श्री मोदी ह कहिन कि विद्यार्थी मन ल अपन मनपसंद विसय उपर जादा समय देना चाही। ओमन विद्यार्थी मन ल सुझाव दीन कि अपन काम शुरू करे के पहिली अपन बुद्धि के उपयोग करके खुद के आकलन करे के संगेसंग ओमन अपन क्षमता जानके अपन उर्जा ल दिशा देवयं। आलोचना उपर प्रधानमंत्री ह कीहिन हे कि आलोचना ह समृद्ध बनाथे अउ हमर जीवन म सीख बर मूल्यवान हे। ओमन गैजेट्स के इस्तेमाल बर चिंता जतात कीहिन कि भारत म लोगन मन करीबन छै घंटा स्क्रीन म बिताथे अउ ये बड़ चिंता के विसय हे। ओमन घर म नो टेक्नॉलाजी जोन बनाय उपर घलो जोर दीन।
प्रधानमंत्री ह माता-पिता मन ल सलाह देत कीहिन कि ओमन लईका मन ल तीरतखार म होवत घटना ल देखे अउ ओखर ले सीखे बर प्रेरित करय। प्रधानमंत्री ह शिक्षक मन ल सिखाये के मंत्र देत ओमन ल विद्यार्थी मनके संग सशक्त संबंध बनाये के बात कीहिन।
परीक्षा पे चर्चा 02
परीक्षा पे चर्चा कार्यक्रम ल लेके छत्तीसगढ़ म घलो स्कूली लइका मन म बड़ उत्साह देखे गीस। जाजंगीर-चांपा जिला के बम्हनीडीह स्थित स्वामी आत्मानंद शासकीय उत्कृष्ट विद्यालय म विद्यार्थी अउ शिक्षक मनके संग सांसद गुहाराम अजगले घलो परीक्षा पे चर्चा कार्यक्रम म सामिल होइन।
परीक्षा पे चर्चा कार्यक्रम के बारे म शिक्षक अउ विद्यार्थी मन ह अपन अपन अनुभव साझा करीन। दुर्ग जिला के भिलाई स्थित के.एच. मेमोरियल स्कूल के प्राचार्य ह कीहिन कि परीक्षा पे चर्चा कार्यक्रम के दउरान लइका मन ह प्रधानमंत्री ले खुलके गोठबात करीन। ओमन ह प्रधानमंत्री ले अपन वो बात घलो कहीन हे, जेला ओमन अपन माता-पिता अउ शिक्षक मनले घलो नइ बोल सकय।
इही स्कूल के छात्र अमन द्विवेदी ह कहिन कि परीक्षा पे चर्चा कार्यक्रम म प्रधानमंत्री ह विद्यार्थी मन ल परीक्षा देबर प्रोत्साहित करीन।
उंहे छात्रा पलक पति ह कीहिन कि परीक्षा पे चर्चा के माध्यम ले प्रधानमंत्री ह हमन परीक्षा ल लेके बने सुझाव दीन हे। ओमन ह हमन ल अपन दैनिक जीवन के घटना ले सीखे अउ समय प्रबंधन के मंत्र दीन।
अइसने बिलासपुर स्थित एस.ई.सी रेलवे हायर सेकण्डरी के छात्रा मिंसी यादव ह प्रधानमंत्री डहार ले बताए गे हार्ड वर्क अउ स्मार्ट वर्क के अंतर ल महत्वपूर्ण बताइन।
भारत वर्ष
देश के संस्कृति अउ पर्यटन ल बढ़ावा देके उद्देश्य ले केंद्रीय पर्यटन मंत्रालय डहार ले नई दिल्ली के लालकिला प्रांगण म काली ले छै दिन के भारत पर्व के आयोजन करे जावत हे। ए कार्यक्रम म लोगन मन ल छत्तीसगढ़ समेत आने आने राज्य के संस्कृति, कला अउ खानपान के बारे म जाने के मउका मिलही।
भारत पर्व म प्रदेश के कला अउ संस्कृति के संग स्टॉल के माध्यम ले राज्य के पर्यटन स्थल मन ल प्रदर्शित करे गेहे। इंहा बने गढ़कलेवा म छत्तीसगढ़ के व्यंजन के बिक्री करे जावत हे। संगेसंग छत्तीसगढ़ के हस्तशिल्प अउ हथकरघा के घलो झलक देखे ल मिलत हे।
मुख्यमंत्री बजट तैयारी समीक्षा
मुख्यमंत्री भूपेश बघेल ह आज रायपुर म राखे गे बइठका म महिला अउ बाल विकास विभाग, राजस्व अउ आपदा प्रबंधन, उच्च शिक्षा अउ तकनीकी शिक्षा, खेल अउ युवा कल्याण, खाद्य नागरिक आपूर्ति, उपभोक्ता संरक्षण अउ संस्कृति लोक स्वास्थ्य यांत्रिकी समेत आने आने विभाग मनके बजट तैयारी के समीक्षा करीन।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ ले पद्मश्री पुरस्कार बर चुने गे जाने माने पंडवानी गायिका उषा बारले ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली अठाईस जनवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
युवा महोत्सव-साहित्य सम्मेलन
राजधानी रायपुर म काली ले तीन दिन के राज्य स्तरीय युवा महोत्सव अउ छत्तीसगढ़ लोक साहित्य सम्मेलन के आयोजन करे जाही। ए महोत्सव म प्रदेशभर के तीन हजार ले जादा प्रतिभागी अड़तीस विधा म अपन प्रतिभा के प्रदर्शन करही।
राज्य शासन, खेल अउ युवा कल्याण विभाग के संग संस्कृति विभाग डहार ले राखे गे ये महोत्सव म छत्तीसगढ़ ले जुड़े खेल, फुगड़ी, भौंरा, गेड़ी दौड़ के संग छत्तीसगढ़ी लोकगीत अउ लोकनृत्य के सुंदर प्रस्तुती दे जाही। संगेसंग छत्तीसगढ़ी ले जुड़े चित्रकला, पारंपरिक वेशभूषा अउ फूड-फेस्ट के आयोजन घलो करे जाही। राज्य स्तरीय युवा महोत्सव म पंद्रह ले चालीस बछर अउ चाली बछर ले जादा उमर के प्रतिभागी सामिल होही।
रूरल इंडस्ट्रियल पार्क लोकार्पण
मुख्यमंत्री भूपेश बघेल ह काली बस्तर जिला के तुरेनार म देश के पहिली रूरल इंडस्ट्रियल पार्क – रीपा के लोकार्पण करीन। ग्रामीण मनके स्वरोजगार बर इंहा पांच एकड़ क्षेत्र म बीस वर्किंग शेड्स बनाए गेहे, जेमा आने आने योजना मनके तहत तीन सौ ले जादा लोगन मन काम करत हे। संगेसंग इंहा प्रशिक्षण बर आवासीय परिसर घलो बनाय गेहे।
मुख्यमंत्री ह बताइन हे कि प्रदेशभर म अइसने तीन सौ रूरल इंडस्ट्रियल पार्क बनाए जावत हे। ओमन कीहिन कि एखर माध्यम ले राज्य सरकार राष्ट्रपिता महात्मा गांधी के ग्राम स्वराज के सपना ल साकार करत हे। एखर ले गांव वाले मन स्वावलंबी बनही, आर्थिक रूप ले सशक्त होही अउ माइलोगिन मन आत्मनिर्भर होही।
शहीद जवान कीर्ति चक्र
सक्ती जिला के पिहरीद गांव के शहीद जवान दीपक भारद्वाज ल कीर्ति चक्र दे जाही। केंद्रीय गृह मंत्रालय डहार ले शहीद दीपक भारद्वाज ल कीर्ति चक्र सम्मान देके फैसला के बाद पूर्व विधायक निर्मल सिन्हा शहीद जवान के घर पहुंची अउ ओमन ल श्रद्धा सुमन अर्पित करीन।
खबर के मुताबिक तीन अपै्रल दू हजार इक्कीस के बीजापुर जिला के तर्रेम थाना क्षेत्र के टेकलागुड़ा म माओवादी मन संग होय मुठभेड़ म दीपक भारद्वाज साहस के परिचय देत शहीद होगे रीहिन।
माओवादी आत्मसमर्पण
सुकमा जिला म तीन झिन माइलोगिन समेत दस माओवादी मन ह पुलिस के आगू आत्मसमर्पण कर दीस। भेज्जी थाना क्षेत्र म सक्रिय ए माओवादी मन ह सीआरपीएफ अउ जिला पुलिस बल के आगू आत्मसमर्पण करीन। आत्मसमर्पण करइया ए माओवादी मन ल राज्य शासन के पुनर्वास नीति के फायदा दे जाही।
मिलेट्स कैफे
स्कूल शिक्षा मंत्री डॅाक्टर प्रेमसाय सिंह टेकाम ह सूरजपुर जिला के गढ़कलेवा के पहिली मिलेट्स कैफे के शुभारंभ करीन। ए मिलेट्स कैफे म कोदो, कुटकी, रागी समेत आने आने लघु धान्य फसल ले बने इडली, दोसा, पोहा, उपमा, भजिया, खीर, हलवा कुकीज जइसन छत्तीसगढ़ी व्यंजन मिलही।
ए मउका म डॅाक्टर टेकाम ह किसान मन ल रागी बीजा बांटीन। ये मिलेट्स कैफे के संचालन राष्ट्रीय ग्रामीण आजीविकास मिशन के तहत गठित लक्ष्मी महिला संकुल संगठन डहार ले करे जाही।
खबर के मुताबिक लघु धान्य फसल के प्रोत्साहन बर राज्य शासन के महत्वाकांक्षी योजना मिलेट्स मिशन के तहत जिला प्रशासन के पहल म मिलेट्स कैफे शुरू करे गेहे। छत्तीसगढ़ ह देश के पहिला राज्य हे जिहां समर्थन कीमत म मिलेट्स के खरीदी करे जावत हे।
उंहे डॅाक्टर टेकाम ह सूरजपुर जिला के ग्राम पंचायत केशवनगर के महात्मा गांधी ग्रामीण औद्योगिक पार्क-रीपा परिसर म गाय के गोबर ले प्राकृतिक पेंट निर्माण इकाई के शुभारंभ घलो करीन।