राज्यपाल संदेश
राज्यपाल अनुसुईया उइके गणतंत्र दिवस के पूर्व संध्या म आज प्रदेश के जनता के नाम संदेश दीही। एखर प्रसारण रात सवा नौ बजे प्रदेश के जम्मों आकाशवाणी केंद्र ले करे जाही। एखर प्रसारण काली छब्बीस जनवरी के बीहनिया साढ़े आठ बजे दूरदर्शन केंद्र रायपुर ले करे जाही।
गणतंत्र दिवस-मुख्य समारोह
प्रदेस म चौहत्तरवां गणतंत्र दिवस काली देशभक्तिपूर्ण माहौल अउ हर्षोल्लास के संग मनाये जाही। मुख्य समारोह राजधानी रायपुर के पुलिस परेड मैदान म होही। जिहां राज्यपाल अनुसुईया उइके ध्वजारोहण करके परेड के सलामी लीही। उंहे बस्तर जिला मुख्यालय जगदलपुर म मुख्यमंत्री भूपेश बघेल तिरंगा फहराही। छत्तीसगढ़ विधानसभा अध्यक्ष डॅाक्टर चरणदास महंत सक्ति म अउ विधानसभा उपाध्यक्ष संतराम नेताम कोंडागांव म ध्वजारोहण करही।
गृहमंत्री ताम्रध्वज साहू महासमुंद, स्वास्थ्य मंत्री टी.एस. सिंहदेव अंबिकापुर, कृषि मंत्री रविंद्र चौबे दुर्ग, वनमंत्री मोहम्मद अकबर कवर्धा म गणतंत्र दिवस समारोह म ध्वजारोहण करही। उंहे आने मंत्री संसदीय सचिव, विधायक अउ जनप्रतिनिधि आने आने जिला म राष्ट्रीय ध्वज फहराही।
ए बार गणतंत्र दिवस समारोह म राज्य अउ जिला स्तर म स्कूली लईका के सांस्कृतिक कार्यक्रम घलो होही।
पुलिस मेडल/राज्य वीरता पुरस्कार
केंद्रीय गृह मंत्रालय ह गणतंत्र दिवस के बेरा म पुलिस मेडल ले सम्मानित होवइया अधिकारी अउ जवान मनके सूची जारी कर देहे। एमा छत्तीसगढ़ के अठारा पुलिस अधिकारी अउ जवान मन शामिल हे। ए बार पुलिस मेडल फॅार गैलंट्री अवार्ड बर आईपीएस डॅाक्टर अभिषेक पल्लव, आर.आई वैभव मिश्रा, एस.आई अश्विनी सिन्हा, यशवंत श्याम, उत्तम कुमार, हेड कांसटेबल उशरू राम कोर्राम अउ एपीसी स्वर्गीय कृशपाल सिंह कुशवाह के चयन करे गेहे।
उंहे प्रेसिडेंट पुलिस मेडल ले एडीजी विवेकानंद सिन्हा ल सम्मानित करे जाही। एखर अलावा मेरिटोरियस सर्विस ऑफ पुलिस मेडल ले रायपुर आईजी अजय कुमार यादव, बिलासपुर आईजी बद्रीनारायण मीणा, आईपीएस झाडूराम ठाकुर, ईओडब्लू एसपी पंकज चंद्रा, एडिश्नल एसपी अनंत कुमार साहू, इंस्पेक्टर कमलेश्वर सिंह, कंपनी कमांडर अर्जुन सिंह ठाकुर, प्लाटून कमांडर संजय कुमार दुबे, प्लाटून कमांडर हरिहर प्रसाद अउ हेड कांस्टेबल बलवीर सिंह ल घलो सम्मानित करे जाही।
गणतंत्र दिवस-अतिथि जनजाति
नई दिल्ली म गणतंत्र दिवस समारोह म ए बार छत्तीसगढ़ के बलरामपुर जिला के पहाड़ी कोरवा जनजाति के दू सदस्य फोदा कोरवा अउ सुरीत कोरवा अतिथि के रूप म शामिल होही । ओमन गणतंत्र दिवस परेड झांकी के अलावा एक फरवरी तक होवइया आने आने कार्यक्रम म हिस्सा लीहीं।
जानबा के मुताबिक हर बछर गणतंत्र दिवस समारोह म शामिल होय बर आदिम जाति विभाग डहार ले दू आदिवासी अतिथि ल नामांकित करे जाथे। ए यात्रा के मुख्य उद्देश्य जनजाति अतिथि मन ल राजधानी म रेहे के गणतंत्र दिवस समारोह के बेरा म देश के समृद्धशाली, सांस्कृतिक विविधता ले रूबरू कराना हे।
परीक्षा पे चर्चा
केंद्रीय शिक्षा मंत्री धर्मेन्द्र प्रधान ह बताइन कि ए बछर परीक्षा पे चर्चा बर अड़तीस लाख ले जादा विद्यार्थी मन ह पंजीकरण कराय हे, जेन पाछू बछर के तुलना म पचास प्रतिशत ले जादा हे। श्री प्रधान ह कहिन हे कि ए बछर पंजीकृत विद्यार्थी म लगभग सोला लाख देशभर के राज्य बोर्ड के हे। ओमन ह बताइन हे कि देशभर ले एक सौ दू विद्यार्थी ल राजधानी के तालकटोरा स्टेडियम म सत्ताईस जनवरी के होवइया कार्यक्रम म शामिल होय बर आमंत्रित करे गेहे।
राष्ट्रीय बाल शक्ति पुरस्कार
छत्तीसगढ़ के छात्र मास्टर आदित्य प्रताप सिंह चौहान ल ए बार प्रधानमंत्री राष्ट्रीय बाल शक्ति पुरस्कार दे गेहे। आदित्य ल ए पुरस्कार राष्ट्रपति द्रौपदी मुर्मु ह नई दिल्ली म प्रदान करीन। आदित्य ल इनोवेशन बर ए पुरस्कार दे गेहे। मुख्यमंत्री भूपेश बघेल ह ए उपलब्धि बर ओमन ल बधाई दीन हे।
उंहे राज्यपाल प्रदेश के 2 झिन लईका मन ल राज्य वीरता पुरस्कार ले सम्मानित करहीं। एमा कांकेर जिला के भानबेड़ा गांव के जंबावती भूआर्य अउ महासमुंद जिला के खल्लारी गांव के छाया विश्वकर्मा शामिल हे।
मुख्यमंत्री बस्तर
मुख्यमंत्री भूपेश बघेल दू दिन के बस्तर प्रवास म हे, ओमन आज बकावंड विकासखंड के गिरोला गांव म पहुंचीस अउ बस्तर के विकास बर एक सौ तैंतीस करोड़ रूपिया ले जादा के आने आने विकास काम के लोकार्पण अउ भूमिपूजन करीन। एमा राम वनगमन पर्यटन परिपथ के अंतर्गत विकास काम घलो शामिल हे। इही दउरान ओमन आने आने जनजाति, राजीव युवा मितान क्लब, गौठान समिति अउ पंचायती राज प्रतिनिधि मन डहार ले आयोजित सम्मान समारोह म शामिल होइन।
कैदी रिहा
गणतंत्र दिवस के मउका म प्रदेश के आने आने जेल मन म सजा काटत चौबीस कैदी मन ल रिहा करे जाही। राज्यपाल अनुसुईया उइके ह कैदी मन ल रिहा करे के प्रस्ताव के अनुमोदन कर देहे।
जानबा के मुताबिक आजादी के पचहत्तरवां वर्षगांठ के उपलक्ष्य म एक विशेष पहल के तहत केंद्र सरकार ह कैदी मनके कुछ श्रेणी ल विशेष माफी दे अउ छब्बीस जनवरी के ओमन ल रिहा करे के प्रस्ताव दे रीहिस।
कांग्रेस-हाथ से हाथ जोड़ो अभियान
कांग्रेस, काली ले देश म हाथ से हाथ जोड़ो अभियान शुरू करे बर जात हे। अभियान के तहत पार्टी कार्यकर्ता अउ पदाधिकारी अपन अपन क्षेत्र म मतदाता मनके घर जाही अउ उंहे कांग्रेस के विचारधारा के जानकारी दीही। ए अभियान ल लेके छत्तीसगढ़ म पार्टी कार्यकर्ता मन ल जिम्मेदारी दे गेहे।
राजधानी रायपुर म ए अभियान के शुभारंभ काली बीहनिया ग्यारा बजे ले होही। एमा शामिल होय बर पूर्व केंद्रीय राज्यमंत्री अउ हाथ से हाथ जोड़ो अभियान के छत्तीसगढ़ पर्यवेक्षक अरूण यादव काली बीहनिया रायपुर पहुंचही।
टेलीकॉम-सील/विद्युत आपूर्ति
राज्य के कोनो भी नगरीय अउ आने आने क्षेत्र मन म स्थापित बीटीएस टेलीकॉम टॉवर कोनो भी अथॉरिटी डहार ले सील नइ करे जा सकही। अउ न ही ओखर विद्युत आपूर्ति बाधित करे जा सकही। ए संबंध म इलेक्ट्रॉनिक्स अउ सूचना प्रौद्योगिकी मंत्रालय डहार ले राज्य शासन के जम्मों विभाग मन ल पत्र भेजके केंद्र सरकार डहार ले जारी गाईड लाईन के अनुसार कार्रवाई करे के निर्देश दे गेहे। यदि बीटीएस टेलीकॉम टॉवर बाधित करे जाथे त एखर बर डिपार्टमेंट ऑफ टेलीकॉम या लाइसेंस्ड सर्विस एरिया फील्ड यूनिट ले संपर्क करके सहमति लेना होही।