एसो राज्य वीरता पुरस्कार बर छत्तीसगढ़ बाल कल्याण परिषद ह तीन बहादुर लइका मन ल चुने हे। परिषद के उपाध्यक्ष राजेन्द्र निगम ह बतईन कि कांकेर जिला के भानबेड़ा गांव के आठ बछर के नोनी जम्बावती भूआर्य, बेमेतरा जिला के चुहका गांव के रहवइया बारह बछर के सीताराम यादव अउ महासमुंद जिला के खल्लारी गांव के नोनी छाया विश्वकर्मा सामिल हे।
जम्बावती भूआर्य ह तउरे बर नइ जानत रिहीस हे, तभो ले नंदियां म कूद के अपन बहिनी अउ महतारी के जान बचईस। उहें, छाया विश्वकर्मा ह पागल कुत्ता के हमला ले अपन बहिनी के जान बचईस। सीताराम यादव ह बाढ़ म नंदियां म कूद के दू झिन नोनी म एक झन के जान बचाय म सफल रिहीस। ए तीनों लइका ल छब्बीस जनवरी के राजधानी म होवइया गणतंत्र दिवस परेड समारोह म राज्यपाल अनुसुईया उइके ह राज्य वीरता पुरस्कार ले करही।
गणतंत्र दिवस-तैयारी
प्रदेसभर म गणतंत्र दिवस समारोह के तियारी जोरदरहा होवत हे। राजधानी रईपुर म गणतंत्र दिवस समारोह के तियारी करीबन पूरा होगे हे। ए समारोह बर आज पुलिस अउ आने सशस्त्र बल ह आखिरी अभ्यास करीन। समारोह छब्बीस जनवरी के पुलिस परेड मैदान म बिहनिया नौ बजे होही। समारोह म राज्यपाल अनुसुईया उइके ध्वजारोहण करके परेड के सलामी लीहीं। एसो के समारोह म केन्द्र अउ राज्य के आने-आने अर्द्धसैनिक बल के संगेसंग झारखंड के सशस्त्र बल प्लाटून घलो परेड म संघरही। ए बखत के गणतंत्र दिवस समारोह म राज्यपाल के हाथ ले पचास झिन ले जादा पुलिस अधिकारी-जवान मन ल पदक अउ पुरस्कार ले सम्मानित करे जाही।
उहें, राज्य के माओवाद प्रभावित जिला म साहस अउ वीरता के परिचय देवइया अधिकारी अउ करमचारी मन ल राष्ट्रपति के पुलिस वीरता पदक दे जाही। बने सेवा बर राष्ट्रपति के विशिष्ट सेवा पदक अउ आपदा राहत काम म बिसेस काम करइया सैनिक मन ल नागरिक सुरक्षा पदक मिलही। उहें, प्रसिक्षण कार्य म बने काम करइया प्रसिक्षक मन ल केन्द्रीय गृह मंत्रलाय के पदक मिलही। प्रदेस म पहिली घांव सहायक जिला अभियोजन अधिकारी ल ए पदक ले सम्मानित करे जाही। एसो ए सम्मान चंदखुरी के राज्य पुलिस अकादमी के एडीपीओ सोहन लाल साहू ल मिलही। दू झन लइका मन ल पन्द्रह हजार रूपिया नगद अउ प्रसस्ति पत्र बहादुरी के काम करे बर मिलही। समारोह म स्कूल पढ़ईया लइका मन ह सुघ्घर सांस्कृतिक कारीकरम देखाही। संगेसंग सासकीय योजना म आधारित झांकी घलो देखाय जाही।
गणतंत्र दिवस-राष्ट्रपति संदेश
गणतंत्र दिवस के पूर्व संध्या म काली राष्ट्रपति द्रौपदी मुर्मू देस के जनता के नाव अपन संदेस दीही, जेखर प्रसारण काली संझा सात बजे ले आकाशवाणी के नई दिल्ली केन्द्र ले करे जाही। एखर सेती आकाशवाणी रईपुर ले प्रसारित होवइया हिन्दी के प्रादेशिक समाचार बुलेटिन काली संझा सात बजके पांच मिनट के जघा म रतिहा आठ बजे प्रसारित करे जाही।
छत्तीसगढ़ के राज्यपाल अनुसुईया उइके घलो प्रदेस के जनता के नाव अपन संदेस दीही, जेखर प्रसारण रतिहा सवा नौ बजे होही।
राष्ट्रीय मतदाता दिवस
राष्ट्रपति द्रौपदी मुर्मू राष्ट्रीय मतदाता दिवस के मउका म काली नई दिल्ली म राष्ट्रीय पुरस्कार दीही। एसो के बिसय हरय – ‘‘मतदान जैसा कुछ नहीं, मैं अवश्य मतदान करूंगा‘‘। निर्वाचन आयोग ह केहे हे कि सर्वश्रेष्ठ निर्वाचन अभ्यास राष्ट्रीय पुरस्कार ओ राज्य अउ जिला स्तर के अधिकारी मन ल दे जाही, जउन मन पाछु बछर चुनाव के बेरा बने प्रदर्सन करीन।
परीक्षा पे चर्चा
केन्द्रीय शिक्षा मंत्री धर्मेन्द्र प्रधान ह बतईन कि एसो ‘‘परीक्षा पे चर्चा‘‘ बर अड़तीस लाख ले जादा पढ़ईया लइका मन ह पंजीयन कराय हे। आज नई दिल्ली म संवाददाता सम्मेलन म बोलत श्री प्रधान ह किहीन कि एसो पंजीयन होय विद्यार्थी मन म करीबन सोलह लाख देसभर के आने-आने राज्य सिक्षा मंडल ले जुड़े हे। देसभर ले एक सौ दू विद्यार्थी नई दिल्ली के तालकटोरा स्टेडियम सत्ताईस जनवरी के होवइया ‘‘परीक्षा के चर्चा‘‘ कारीकरम म सामिल होय बर बलाय गेहे।
राष्ट्रीय बालिका दिवस
आज राष्ट्रीय बालिका दिवस हरय। ए मउका म देसभर के नोनी मन ल जागरूक करे, उंखर सुरक्षा अउ समानता के अधिकार बताय बर कतकोन कारीकरम होवत हे।
ए मउका म मुख्यमंत्री भूपेश बघेल ह जम्मों नोनी मन ल बधाई देवत उंखर सुघ्घर भविष्य बर सुभकामना दीन हे। अपन संदेस म मुख्यमंत्री ह किहीन कि नोनी मन देस, प्रदेस, समाज अउ परिवार के गौरव होथे, ओमन ल सुरक्षित माहौल देके जरूरत हे। ओमन किहीन कि लिंग अनुपात के मामला म छत्तीसगढ़ देस के राज्य मन ले आगू हे। ए प्रदेसवासी मन बर गरब के बिसय हे।
भाजपा-पेंशन आरोप
राज्य सरकार ह छत्तीसगढ़ के करीबन तीन लाख करमचारी मनके आगू नवा अउ जुन्ना पेंसन योजना म कोनों एक ल चुने बर केहे हे। करमचारी मन ले केहे गेहे कि कहूं ओमन जुन्ना पेंसन योजना म सामिल होना चाहत हे, त एमा अपन मंजूरी बताय बर तय अरजी पत्र भर के राज्य सरकार तीर जमा करे बर पड़ही। एखरे संग ओमन ल निवेस करे गे रकम राज्य सरकार ल दे बर मंजूरी घलो दे बर पड़ही। ए विकल्प एक नवंबर दू हजार चार या एखर बाद नियुक्त होवइया करमचारी मन ले मांगे जात हे। काबर कि ए तारीख ले राज्य म नवा पेंसन योजना लागू करे गे रिहीस। ए समय राज्य म जुन्ना पेंसन योजना म करीबन एक लाख दस हजार करमचारी काम करत हे। उहें, करीबन तीन लाख करमचारी नवा पेंसन योजना के दायरा म आथे। वित्त विभाग ह ए संबंध म अधिसूचना जारी कर दे हे।
इही बीच, प्रदेस म मुख्य विपक्षी दल भाजपा ह आरोप लगाय हे कि राज्य मंत्रिमंडल के फइसला के बाद जुन्ना पेंशन योजना के बिसय म वित्त विभाग के निरदेस के सेती करमचारी मनके आगू दुविधा के स्थिति बन गेहे। ए संबंध म प्रदेस भाजपा के महामंत्री ओ.पी. चौधरी ह बतईन कि राज्य सरकार ह पाछु चार बछर म करीबन बैसठ हजार करोड़ रूपिया के करजा लेहे। ओमन किहीन कि राज्य के अइसन आर्थिक स्थिति ल देखत करमचारी जुन्ना पेंसन योजना ल लेके संसो म हवय।
भेंट-मुलाकात
बलौदाबाजार के मनोहर वैष्णव शासकीय विद्यालय म दिवंगत स्वाधीनता सेनानी के प्रतिमा लगाय जाही। ए घोसना मुख्यमंत्री भूपेश बघेल ह जिला के पुरैना खपरी गांव म भेंट-मुलाकात कारीकरम म कहिन। ओमन गणेश शंकर वाजपेयी हाईस्कूल बर नवा भवन बनाय के घोसना करीन। ए बेरा म मुख्यमंत्री ह बलौदाबाजार म प्रेस क्लब भवन बनाय बर बीस लाख रूपिया के मंजूरी दीन। अपन दउरा के बेरा मुख्यमंत्री ह बलौदाबाजार के संयुक्त जिला कार्यालय परिसर म शहीद वीरनारायण सिंह के प्रतिमा के अनावरण घलो करीन।
जल जीवन मिशन
केन्द्र सरकार के महत्वाकांक्षी योजना जल जीवन मिशन म प्रदेस के आने-आने जिला म पीये के पानी के आपूर्ति बर काम होवत हे। एमा जांजगीर-चांपा जिला म स्थापित जल प्रशिक्षण प्रयोगसाला के जांच करे बर केन्द्रीय जलशक्ति मंत्रालय के अधिकारी मन ह प्रदेस के दउरा करीन। मंत्रालय कोति ले शिष्यपाल शेट्ठी अउ बुंगाकृष्णा किशोर ह जांजगीर-चांपा जिला के अकलतरा, बम्हनीडीह अउ डभरा विकासखंड के सोलह ठिन गांव म जाके उहां जल जीवन मिशन के जांच करीन।
दुर्घटना
राजनांदगांव जिला के एटमेटा गांव पाछु रतिहा एक कार के पलटे ले गाड़ी चलइया ड्राईवर के मउकाच म मउत होगे। पुलिस के मुताबिक मुख्य रद्दा म मवेसी के आगू आय ले ए दुर्घटना होय हे। ड्राईवर ह अचानक से ब्रेक लगईस, जेखर ले कार पलट गे। ए दुर्घटना म छै झिन घायल होय हे, जिहां तीन के हालत गंभीर बताय जात हे। ए सबो झन ल इलाज बर राजनांदगांव के अस्पताल म भर्ती कराय गेहे।
ऑनलाइन-ठगी
रईपुर पुलिस ह राजधानी निवासी एक मनखे के क्रेडिट कार्ड ले करीबन साढ़े चौदह लाख रूपिया के ऑनलाइन ठगी के मामला म तुरते कार्रवाई करत उंखर कार्ड म करीबन साढ़े दस लाख तुरते वापसी देवाय म सफलता पाय हे। पुलिस कोति ले बांचे रकम ल वापिस लाय बर परयास कर जात हे।