महान स्वतंत्रता सेनानी नेताजी सुभाषचंद्र बोस के जयंती के अवसर म आज कृतज्ञ राष्ट्र उनला श्रद्धांजलि अर्पित करत हे। बछर अट्ठारह सौ संतानवे म आजे के दिन ओड़िसा के कटक म नेताजी के जन्म होय रिहीस। उंखर जयंती हर बछर पराक्रम दिवस के रूप म मनाय जाथे।
पराक्रम दिवस के अवसर म आज प्रधानमंत्री नरेन्द्र मोदी ह परमवीर चक्र ले सम्मानित सैनिक मनके नाम उपर अंडमान निकोबार द्वीप समूह के इक्कीस ठन बड़े द्वीप मनके नामकरण करीन। ओमन ए सिलसिला म पोर्ट ब्लेयर म आयोजित समारोह म वर्चुअल माध्यम ले भाग लीन। प्रधानमंत्री ह नेताजी ल समर्पित राष्ट्रीय स्मारक के अनावरण घलो करीन। ए स्मारक ल पोर्ट ब्लेयर म नेताजी सुभाषचंद्र द्वीप म बनाय गेहे। स्मारक म नेताजी के संग्रहालय, विरासत गाथा अउ पोर्ट ब्लेयर ल जोड़ने वाला रोप-वे अउ बाल उद्यान होही।
ए अवसर म प्रधानमंत्री ह किहीन कि नेताजी के एक सौ छब्बीसवां जयंती ल देस ह पराक्रम दिवस के रूप म मना के एक नवा इतिहास लिखत हे। श्री मोदी ह किहीन कि आने वाला पीढ़ी ह ए इतिहास ल याद करही अउ एखर ले प्रेरणा लीही।
केन्द्रीय शिक्षा मंत्रालय ह घलो आज नेताजी सुभाषचंद्र बोस के जयंती के अवसर म देसभर के पांच सौ केन्द्रीय विद्यालय मन म राष्ट्रव्यापी चित्रकला प्रतियोगिता के आयोजन करत हे।
सुभाषचंद्र बोस-जयंती-02
ऐति, छत्तीसगढ़ म घलो नेताजी सुभाषचंद्र बोस के जयंती म अलग-अलग कार्यक्रम आयोजित कर उनला श्रद्धांजलि दे जात हे।
राज्यपाल अनुसुईया उइके अउ मुख्यमंत्री भूपेश बघेल ह नेताजी के जयंती म उनला नमन करीन। राज्यपाल ह अपन संदेस म किहीन कि नेताजी के अभूतपूर्व संगठन क्षमता, निष्ठा अउ नेतृत्व के अद्भूत गुण बर ओमन ल हमेसा याद करे जाही। उंखर विचार अउ आदर्स हमर मन बर धरोहर जइसे हे। उहें, मुख्यमंत्री ह किहीन कि नेताजी ह आजाद हिंद फौज के गठन करके स्वाधीनता आंदोलन ल नवा दिसा दे रिहीन। भारत के स्वतंत्रता बर करे गे संघर्ष अउ अमूल्य योगदान बर नेताजी ल सदा याद करे जाही।
प्रधानमंत्री-बाल पुरस्कार
प्रधानमंत्री राष्ट्रीय बाल पुरस्कार विजेता लइका मन ले काली संझा चार बजे प्रधानमंत्री नरेन्द्र मोदी अपन आवास म संवाद करही। ए लइका मन ल नवाचार, सामजिक सेवा, सिक्षा, खेल, कला अउ संस्कृति अउ बहादुरी के छै श्रेणी म असाधारण उपलब्धि बर सम्मानित करे जाही। पुरस्कार म एक पदक, प्रमाण पत्र अउ एक लाख रूपिया नगद दे जाही। ए बछर देसभर ले प्रधानमंत्री राष्ट्रीय बाल पुरस्कार बर ग्यारह झिन लइका मन ल चुने गेहे। एमा छै झिन बालक अउ पांच झिन बालिका सामिल हे।
परीक्षा पे चर्चा
प्रधानमंत्री नरेंद्र मोदी ह विद्यार्थी, शिक्षक अउ अभिभावक मनले परीक्षा पे चर्चा कार्यक्रम म भाग लेके आग्रह करे हे। परीक्षा पे चर्चा के छठवां संस्करण सत्ताईस जनवरी के नई दिल्ली के तालकटोरा इंडोर स्टेडियम म राखे जाही। श्री मोदी ह कीहिन कि ये कार्यक्रम परीक्षा ल तनावमुक्त बनाय बर अउ विद्यार्थी मनके मदद करे के तरीका उपर चर्चा करे के मउका देथे।
ऐति, छत्तीसगढ़ के जगदलपुर स्थित केन्द्रीय विद्यालय म आज अलग-अलग स्कूल के विद्यार्थी मनके बीच चित्रकला प्रतियोगिता के आयोजन करे गीस। प्रतियोगिता म लगभग सौ झन छात्र-छात्रा मन भाग लीन। जगदलपुर केन्द्रीय विद्यालय के प्राचार्य ह बतईन कि परीक्षा के दउरान विद्यार्थी मन ल तनाव हो जथे, जेला दू करे बर प्रधानमंत्री नरेन्द्र मोदी ह परीक्षा के पहिली ‘‘परीक्षा पे चर्चा‘‘ करत हुए तनाव ल दूर करे के प्रयास करत हे।
राज्यपाल-रजत जयंती समारोह
राज्यपाल अनुसुईया उइके ह आज रायपुर स्थित महाराजा अग्रसेन कालेज के वार्षिक उत्सव मैक कार्निवाल अउ महाराज अग्रसेन चैरिटेबल ट्रस्ट के रजत जयंती समारोह म सामिल होईन। ए मउका म राज्यपाल ह महाराजा अग्रसेन चैरिटेबल ट्रस्ट के प्रतिनिधि, उत्कृष्ट सिक्षक, महाविद्यालय के कर्मचारी अउ मेधावी विद्यार्थी मन ल सम्मानित करीन।
कार्यक्रम ल संबोधित करत हुए राज्यपाल ह किहीन कि महाविद्यालय म पहिली से ही लइका मनके नैतिक, चारित्रिक, आध्यात्मिक अउ भावनात्मक विकास के उद्देश्य ल पूरा करे के निरंतर प्रयास करे जात हे। संस्थान विद्यार्थी मन ल बेहतर नागरिक बनाय के प्रतिबद्धता के संग काम करत हे। राज्यपाल ह वार्षिक उत्सव के आयोजन ले विद्यार्थी मनके छुपे हुए प्रतिभा ल मंच मिले के बात किहीन अउ अपन छात्र जीवन म वार्षिक उत्सव मन म सक्रियता ले भाग ले अउ अपन नाट्य मंचन ले जुड़े रोचक तथ्य ल साझा करीन।
भेंट-मुलाकात कार्यक्रम
मुख्यमंत्री भूपेश बघेल आज भेंट मुलाकात कार्यक्रम के तहत बलौदाबाजार विधानसभा क्षेत्र के अंतर्गत जिला के विकास बर लगभग अस्सी करोड़ रूपिया के विकास कार्य मनके लोकार्पण अउ भूमिपूजन करीन।
ए मउका म मुख्यमंत्री ह सरोरा ले परसदा तक अउ सरोरा ले बिनैका तक पक्का सड़क बनाय, सरोरा स्वास्थ्य केन्द्र म संचालित एक बिस्तर हेल्थ एंड वेलनेस सेंटर म तीन अतिरिक्त बिस्तर मनके स्वीकृति अउ तिल्दा अस्पताल के मातृ अउ शिशु कल्याण वार्ड बर पचास बिस्तर के नवा भवन के निर्माण करे के घोसना करीन। एखर अलावा श्री बघेल ह ताराशिव म हायर सेकेंडरी स्कूल अउ खम्हरिया म मिडिल स्कूल खोले के संगेसंग सासाहोली हाईस्कूल के उन्नयन हायर सेकेंडरी स्कूल के रूप म करे अउ कोहका कॉलेज तिल्दा नेवरा म एमएससी साईंस गु्रप अउ कला संकाय म भूगोल के कक्षा सुरू करे के ऐलान घलो करीन।
दंपत्ति हत्या-फांसी
दुर्ग शहर म करीब पांच साल पहिली होय रावलमल जैन मणि दंपत्ति हत्याकांड के मामला म दुर्ग न्यायालय ह मुख्य आरोपी बेटा संदीप जैन ल दोसी करार देवत हुए फांसी के सजा सुनाय हे। उहें, आरोपी ल हत्या बर पिस्तौल उपलब्ध कराने वाला दू झिन आरोपी मन ल पांच-पांच साल के कारावास के सजा सुनाय गेहे।
गौरतलब हे कि पांच साल पुराना ए मामला म आरोपी बेटा ह अपन माता-पिता ल गोली मारके हत्या कर दे रिहीस।
हादसा
आज भिलाई म हाईटेंशन तार के चपेट म आय ले एक झिन महिला के मउत होगे। जबकि मां-बेटी गंभीर रूप ले झुलस गेहे।
मिले जानकारी के अनुसार उम्दा रोड स्थित एक ठिन मकान के उपर ग्यारह केवी के हाईटेंशन तार लगे हे। आज बिहनिया महिला डहार ले घर के सफाई के दउरान स्टील रॉड हाईटेंशन तार ले टकराय ले एमा करेंट प्रवाहित होगे। एखर संपर्क म आय ले महिला झुलस गे अउ ओला बचावत परिवार के दू झिन अन्य महिला मन घलो झुलस गे। तीनों झन ल एक ठिन निजी अस्पताल म भर्ती कराय गीस, जिहां इलाज के दउरान एक झिन महिला के मउत होगे।
इही बीच, बिलासपुर के रतनपुर-बेलगहना मार्ग म दू दिन पहिली होय सड़क हादसा म पुलिस ह चार झन लोगन मनके मउत होय के पुष्टि करे हे। इंखर मउत कार म आगी लगे के वजह से बताय जात हे। गौरतलब हे कि दू दिन पहिली जिला के रतनपुर-बेलगहना मार्ग म एक ठन कार अनियंत्रित होके पेड़ ले टकरा गे, जेखर सेती कार म आगी लग गे। ए हादसा म पहिली तीन झन के मउत के पुष्टि होय रिहीस। फेर जांच के दउरान पुलिस ह चार झन के मउत के जानकारी देहे।
मुक्केबाज कोच-निधन
अंतर्राष्ट्रीय मुक्केबाज कोच कृष्ण कुमार दसमाना के आज इलाज के दउरान निधन होगे। भिलाई इस्पात संयंत्र के खेल विभाग म कार्यरत् कृष्ण कुमार दसमाना पाछु हफ्ता एक ठिन सड़क हादसा म घायल होगे रिहीन। उनला इलाज बर भिलाई के सेक्टर-नौ अस्पताल म भर्ती कराय गे रिहीस। बाद म उंखर गंभीर स्थिति ल देखत हुए रईपुर के एक निजी अस्पताल म रिफर करे गे रिहीस, जिहां इलाज के दउरान आज उंखर मउत होगे।
कृष्ण कुमार दसमाना ह राष्ट्रीय स्तर म मुक्केबाजी म रजत पदक हासिल करे रिहीन। ओमन एनआईए के कोच घलो रिहीन। श्री दसमाना ल छत्तीसगढ़ सरकार डहार ले वीर हनुमान पुरस्कार ले सम्मानित करे गे रिहीस।