प्रधानमंत्री नरेन्द्र मोदी आज वीडियो कॉन्फ्रेंस के माध्यम ले सरकारी विभाग अउ संगठन मन म नव-नियुक्त इकहत्तर हजार कर्मचारी मन ल नियुक्ति पत्र सौंपीन। ए मउका म प्रधानमंत्री ह किहीन कि रोजगार मेला देस के युवा मनके सशक्तिकरण बर सरकार के प्रयास हरय।
प्रधानमंत्री ह बतईन कि सरकार गंवई मन म भारत नेट के माध्यम ले ब्राडबैंड सेवा उपलब्ध कराय के काम करत हे, जेखर ले जादा रोजगार पैदा होही। श्री मोदी ह किहीन कि स्टार्टअप के सफलता ले वैश्विक स्तर म देस के युवा मनके खास पहिचान बनत हे। ओमन किहीन कि सरकार भर्ती प्रक्रिया ल पारदर्सी अउ समयबद्ध करे के दिसा म काम करत हे। ओमन नव-नियुक्त कर्मी मन ले किहीन कि ओमन नागरिक सेवा के मंत्र के संग अपन काम पूरा करय।
माओवादी-गिरफ्तार
बीजापुर जिला म सुरक्षा बल ह दू महिला समेत तीन झिन माओवादी ल गिरफ्तार करे हे। एमन करा ले टिफिन बम, जिलेटिन रॉड, डेटोनेटर समेत दूसर माओवादी सामग्री बरामद करे गेहे।
मिले जानकारी अनुसार बासागुड़ा, गंगालूर अउ किरंदुल के सीमा क्षेत्र म माओवादी मनके मौजूद होय के सूचना म दंतेवाड़ा अउ बीजापुर के डीआरजी, एसटीएफ, महिला कमांडो अउ कोबरा बटालियन के संयुक्त टीम पीड़िया कोति सर्चिंग बर निकले रिहीस। ए दउरान इडेनार के जंगल म माओवादी मन सुरक्षा बल उपर फायरिंग सुरू कर दीन। जवान मन कोति ले करे गे जवाबी कार्रवाई म माओवादी मन भागे लगीन, ए दउरान सुरक्षा बल ह इलाका के घेराबंदी करके दू झिन महिला समेत तीन माओवादी मन ल गिरफ्तार करीन। एमा ले एक झिन माओवादी उपर एक लाख रूपिया के इनाम घोसित रिहीस।
ओति, मोहला-मानपुर-अंबागढ़ चौकी पुलिस ह कोहका थाना क्षेत्र ले करीबन तीस किलो वजनी विस्फोटक बरामद करीस, जेला निष्क्रिय कर दे गीस।
भाजपा अध्यक्ष-गाड़ी दुर्घटनाग्रस्त
भारतीय जनता पार्टी के प्रदेस अध्यक्ष अरूण साव के काफिला म सामिल एक वाहन पाछु रतिहा दुर्घटनाग्रस्त होगीस। ए हादसा म एक हेड कांस्टेबल के मउत होगे। उहें, तीन झिन दूसर घायल होगीन। मिले जानकारी के मुताबिक श्री साव ह पार्टी कार्यसमिति के बइठका म सामिल होय बर बिलासपुर ले अंबिकापुर जावत रिहीन। इही दउरान सरगुजा जिला के उदयपुर क्षेत्र के खरपारी नाला करा ओमन के पायलट वाहन अनियंत्रित होके पलट गीस। ए हादसा म हेड कांस्टेबल के मउकाच म मउत होगे। उहें, दुर्घटना म घायल तीन मनखे मन ल अंबिकापुर मेडिकल कॉलेज म भर्ती कराय गेहे। ए वाहन म चालक समेत चार जवान सवार रिहीन।
इंस्पायर अवॉर्ड
इंस्पायर अवॉर्ड मानक राज्य स्तरीय प्रदर्शनी अउ आदर्श प्रतियोगिता के काली दुरूग म समापन होईस। ए दउरान राष्ट्रीय स्तर के प्रतियोगिता बर राज्य के बाईस विद्यार्थी मन ल चुने गीस। समापन कारीकरम म स्कूल शिक्षा मंत्री डॉक्टर प्रेमसाय सिंह टेकाम ह चयनित विद्यार्थी मन ल पुरस्कार दीन। ए मउका म ओमन किहीन कि जागरूकता ले ही उज्जवल भविष्य के ठोस नींव तियार होथे।
बतादन कि ए प्रतियोगिता बर देस म सबले जादा पंजीयन कराने वाला राज्य म छत्तीसगढ़ तीसरा स्थान म हे।
मदरसा बोर्ड-परीक्षा
छत्तीसगढ़ मदरसा बोर्ड ह हाईस्कूल, हायर सेकेंडरी पत्राचार पाठ्यक्रम परीक्षा अउ उर्दू अदीब, उर्दू माहिर प्रमाण-पत्र परीक्षा के समय-सारिणी जारी कर देहे। ए परीक्षा पच्चीस अप्रैल ले सुरू होही, जउन ह छह मई तक चलही। परीक्षा के समय बिहनिया साढ़े आठ बजे ले साढ़े ग्यारह बजे तक निर्धारित करे गेहे। केन्द्राध्यक्ष डहार ले अवकाश के दिन मन म विज्ञान, जीवन विज्ञान, रसायन, भौतिकी अउ भूगोल के प्रायोगिक परीक्षा ले जाही। मदरसा बोर्ड ले मिले जानकारी अनुसार परीक्षा अवधि के दउरान सासन कोति ले यदि कोनों अवकाश अथवा स्थानीय अवकाश घोषित करे जाथे, तभो ले परीक्षा मन तथावत परीक्षा कारीकरम अनुसार होही।
भाजपा-प्रदर्शन
धर्मांतरण अउ एखर विरोध करइया वाला मन उपर राज्य सरकार डहार ले राष्ट्रीय सुरक्षा कानून लागय के आरोप लगावत भारतीय जनता पार्टी ह जांजगीर म धरना प्रदर्शन करीन। एमा नेता प्रतिपक्ष नारायण चंदेल, संभागीय प्रभारी किरण देव, भाजपा के वरिष्ठ नेता गिरधर गुप्ता अउ जिला अध्यक्ष गुलाब सिंह चंदेल मौजूद रिहीन।
अंतर्राष्ट्रीय मिलेट्स वर्ष
संयुक्त राष्ट्र संघ डहार ले बछर दू हजार तेईस ल अंतर्राष्ट्रीय मिलेट्स वर्ष के रूप म मनाय जात हे। एखर तहत छत्तीसगढ़ के जम्मों ग्राम सभा मन म छब्बीस जनवरी के ‘‘पौष्टिक लघु धान्य अनाजों का दैनिक आहार में महत्व‘‘ म बिसेस वाचन करे जाही। ए संबंध म कृषि उत्पादन आयुक्त डॉक्टर कमलप्रीत सिंह ह प्रदेस के जम्मों कलेक्टर मन ल पत्र लिखके दिसा-निरदेस दीन हे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत अंतर्राष्ट्रीय मिलेट्स वर्ष उपर केंद्रित रइही। ए बिसय म रईपुर स्थित इंदिरा गांधी कृषि विश्वविद्यालय के प्रिंसिपल साइंटिस्ट डॉक्टर सी.पी. खरे ले करे गे भेंटवार्ता के दूसरा अंक प्रसारित करे जाही। एखर प्रसारण आकाशवाणी के रायपुर केन्द्र डहार ले काली इक्कीस जनवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
प्रदेश प्रभारी-रायपुर
अखिल भारतीय कांग्रेस कमेटी के सचिव अउ प्रदेस प्रभारी सप्तगिरी शंकर उल्का काली रईपुर आही। प्रदेस कांग्रेस के संचार विभाग प्रमुख सुशील आनंद शुक्ला ह बतईन कि प्रदेस प्रभारी काली बिहनिया ग्यारह बजे राजीव भवन म ‘‘हाथ से हाथ जोड़ो अभियान‘‘ के तैयारी ल लेके वरिष्ठ नेता अउ कार्यकर्ता मन ले चरचा करही।
महिला-हेल्पलाइन
प्रदेस म महिला अउ बाल विकास विभाग डहार ले महिला मन ल संकटकालीन परिस्थित म तुरते सहायता दे बर राज्य स्तर म महिला हेल्पलाइन नंबर ‘एक आठ एक‘ के संचालन करे जात हे। महिला हेल्पलाइन के जरिया अब तक अट्ठारह हजार ले जादा प्रकरण दरज करे गेहे, जेमा ले पन्द्रह हजार चार सौ ले जादा प्रकरण के निराकरण करे जा चुके हे।
बतादन कि मुसीबत म फंसे महिला मन टोल फ्री नंबर – एक आठ एक अउ सखी सेंटर ले मदद लेहे के संग फेसबुक, ट्विटर अउ वाट्सऐप के माध्यम ले घलो सहायता मांग सकत हे। चौबीस घंटा निःशुल्क उपलब्ध ए नंबर म मोबाइल या लैंडलाइन नंबर ले फोन करके मदद ले जा सकत हे।
क्रिकेट मैच
नवा रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म काली इक्कीस जनवरी के भारत अउ न्यूजीलैंड के बीच एक दिवसीय मुकाबला होही। दूनों टीम के खिलाड़ी काली संझा रईपुर पहुंचीन, जिहा राजकीय गमछा पहिना के ओमन के स्वागत करे गीस। खिलाड़ी मन बर मिलेट्स शूप अउ मिलेट्स सलाद के संगेसंग छत्तीसगढ़िया पारंपरिक व्यंजन के व्यवस्था करे गेहे। राजधानी रईपुर म पहिली घांव होवइया अंतर्राष्ट्रीय क्रिकेट मैच ल लेके लोगन मन म बड़ उछाह देखे जात हे।
अउ अब थोरकुन समाचार सार म-
– छत्तीसगढ़ म आजादी के खातिर बलिदान देवइया अमर शहीद गेंदसिंह के आज सहादत दिवस हरय। ए मउका म मुख्यमंत्री भूपेश बघेल ओमन ल नमन करत किहीन कि गेंदसिंह सन् 1857 म होय देस के प्रथम स्वतंत्रता संग्राम ले बहुत पहिली अंग्रेज मनके गुलामी अउ सोसन के विरोध म आवाज उठाय रिहीन।
– स्वास्थ्य अउ परिवार कल्याण विभाग ह तिहत्तर नवा चिकित्सा अधिकारी मनके पदस्थापना के आदेस जारी करे हे।
– कोरबा जिला म राखे गे सड़क सुरक्षा सप्ताह के काली समापन होईस। ए दउरान यातायात पुलिस अउ स्कूल-कालेज के विद्यार्थी मन नुक्कड़ नाटक के माध्यम ले सुरक्षित तरीका ले वाहन चलाय, सीटबेल्ट अउ हेलमेट लगाय, यातायात के नियम के पालन करे बर लोगन मन ल जागरूक करीन।
अउ
– सूरजपुर जिला म पुलिस डहार ले चले गे ‘‘ऑपरेशन ईगल‘‘ के तहत एक सौ एक स्थायी वारंटी मन ल गिरफ्तार करे गीस। एमन उपर छेड़छाड़, मारपीट, अउ चोरी समेत दूसर मामला दर्ज हे।