मुख्यमंत्री भूपेश बघेल ह भेंट-मुलाकात कारीकरम म कोरबा जिला के नोनबिर्रा अउ रंजना गांव पहुंचीन। ए दउरान ओमन नोनबिर्रा गांव म पचास सीटर पोस्ट मैट्रिक आदिवासी कन्या छात्रावास के स्थापना अउ आदिम जाति सेवा सहकारी समिति के निर्माण काम सुरू करे के घोसना करीन। मुख्यमंत्री ह वन अधिकार पट्टा नइ मिले संबंधी एक किसान के सिकईत म ग्राम पंचायत सचिव ल तुरते निलंबित कर दीन।
उहें, श्री बघेल ह रंजना गांव पहुंच के दीपका के सासकीय महाविद्यालय के नामकरण शहीद मूलचंद कंवर के नाव म करे, कटघोरा म फार्मेसी महाविद्यालय, दीपका अउ बांकीमोंगरा म स्वामी आत्मानंद अंग्रेजी माध्यम स्कूल, भिलई बाजार म उप तहसील सुरू करे अउ लखनपुर के कृषि विज्ञान केन्द्र म कृषक प्रशिक्षण केन्द्र भवन बनाय समेत कतकोन घोसना करीन। ए मउका म मुख्यमंत्री ह रंजना गांव म पूर्व प्रधानमंत्री भारत रत्न स्वर्गीय राजीव गांधी के प्रतिमा के अनावरण करीन।
अमलेश्वर-नगर पालिका
राज्य सरकार ह दुरूग जिला के अमलेश्वर ग्राम पंचायत ल सोझे नगर पालिका बना देहे। अमलेश्वर म शपथ ग्रहण समारोह म बोलत मुख्यमंत्री भूपेश बघेल ह किहीन कि ए क्षेत्र म तेजी ले होवत विकास ल व्यवस्थित रूप दे अउ नागरिक मनके सुभीता के विकास करे बर सरकार ह ए फइसला लेहे। ओमन भरोसा देवईन कि अमलेश्वर के विकास खातिर रकम दे म कोनों किसम के कमी नइ होही। ए मउका म मुख्यमंत्री ह अमलेश्वर नगर पालिका के बाईस झिन पदाधिकारी मन ल सपथ देवईन अउ करीबन चार करोड़ रूपिया के विकास काम के भूमिपूजन करीन। ओमन बतईन कि अमलेश्वर तीर सांकरा म उद्यानिकी विश्वविद्यालय तियार होवत हे।
जनजातीय सलाहकार परिषद-बैठक
छत्तीसगढ़ जनजातीय सलाहकार परिषद के बइठका म राज्य विधानसभा म पारित अनुसूचित जाति, अनुसूचित जनजाति अउ आने पिछड़ा वरग बर आरक्षण संसोधन विधेयक अउ छत्तीसगढ़ शैक्षणिक संस्थान प्रवेस म आरक्षण विधेयक के अनुमोदन के अनुसंसा करे गीस। ए बइठका मुख्यमंत्री के अगुवई म काली रईपुर म होईस। बइठका म नगरनार इस्पात संयंत्र के निजीकरण नइ करे के प्रस्ताव केन्द्र सरकार ल भेजे के फइसला ले गीस। उहें, मुख्यमंत्री ह किहीन कि अनुसूचित क्षेत्र म सामुदायिक सद्भाव खराब करइया मन उपर तुरते कार्रवाई करे जाय।
सब इंस्पेक्टर भर्ती-परीक्षा
छत्तीसगढ़ व्यावयासिक परीक्षा मंडल ह प्रदेस म सब इंस्पेक्टर के नौ सौ पचहत्तर पद म भर्ती बर रूके काम फेर ले सुरू कर देहे। मंडल कोति ले जारी आदेस के मुताबिक इच्छुक उम्मीदवार आज रतिहा बारह बजे ले उन्नीस जनवरी तक ऑनलाइन अरजी दे सकत हे। जउन उम्मीदवार मन ह पहिली ए भर्ती प्रक्रिया बर अरजी करे रिहीन। ओमन ल फेर ले अरजी देके जरूरत नइ हे। सब इंस्पेक्टर के भर्ती बर उनतीस जनवरी के परीक्षा ले जाही। एखर बर पांच ठिन परीक्षा केन्द्र बनाय गेहे।
धान खरीदी
प्रदेस म समर्थन कीमत म करीबन निन्यानवे लाख मीटरिक टन धान बिसाय गेहे। बताय गेहे कि ए राज्य निर्माण के बाद अब तक सबले जादा खरीदी हे। ए उपलब्धि बर मुख्यमंत्री भूपेश बघेल अउ खाद्य मंत्री अमरजीत भगत ह किसान मन ल सुभकामना दीन हे। समर्थन कीमत म राज्य म अभी तक बाईस लाख ले जादा किसान मन ह धान बेचे हे, जेखर बदला म ओमन ल बीस हजार तीन सौ पचहत्तर करोड़ रूपिया के भुगतान होय हे। धान खरीदी अभियान इकतीस जनवरी तक चलही। राज्य सरकार ह एसो एक सौ दस लाख मीटरिक टन धान बिसाय के लक्ष्य राखे हे।
इही बीच, जांजगीर-चांपा जिला के कोरबी धान खरीदी केन्द्र म किसान मनके फर्जी पंजीयन करके चार लाख रूपिया ले जादा के गड़बड़ी के मामला आगू आय हे। ए मामला म बलौदा पुलिस ह एक माईलोगिन समेत दू झिन आरोपी ल गिरफ्तार करे हे। उहें, आने आरोपी के खोज करे जावत हे।
परीक्षा पे चर्चा
प्रधानमंत्री नरेंद्र मोदी ह विद्यार्थी, शिक्षक अउ अभिभावक मनले परीक्षा पे चर्चा कार्यक्रम म भाग लेके आग्रह करीन हे। परीक्षा पे चर्चा के छठवां संस्करण सत्ताईस जनवरी के नई दिल्ली के तालकटोरा इंडोर स्टेडियम म राखे जाही। श्री मोदी ह कीहिन कि ये कार्यक्रम परीक्षा ल तनावमुक्त बनाय बर अउ विद्यार्थी मनके मदद करे के तरीका उपर चर्चा करे के मउका देथे।
निगरानी समिति-बैठक
राजनांदगांव जिला विकास समन्वय अउ निगरानी समिति के बइठका म सांसद संतोष पांडेय ह किहीन हे कि केन्द्र सरकार के लोक कल्याणकारी योजना ल बने ढंग ले चलाय बर सबो जनप्रतिनिधि अउ अधिकारी मन ल आपस म जुरमिल के काम करे जरूरत हे। राजनांदगांव कलेक्ट्रेट सभाकक्षा म राखे गे बइठका म प्रधानमंत्री आवास योजना के संबंध म जानकारी दे गीस। बइठका म स्वच्छ भारत मिशन-ग्रामीण, प्रधानमंत्री कृषि सिंचाई योजना, राष्ट्रीय ग्रामीण पेयजल कारीकरम, प्रधानमंत्री उज्जवला योजना अउ प्रधानमंत्री फसल बीमा योजना समेत कतकोन योजना के जानकारी दे गीस।
संविदाकर्मी-आंदोलन
छत्तीसगढ़ सर्वविभागीय संविदा कर्मचारी महासंघ के बैनर म संविदा कर्मचारी मन नियमितीकरण के मांग ल लेके राज्य स्तरीय आंदोलन करत हे। एमा काली हड़ताल के पहिली दिन सबो जिला मुख्यालय म प्रदर्सन करे गीस। पांच दिवसीय ए हड़ताल के बेरा संविदा कर्मी मन राज्य सरकार ले चुनावी घोषणा पत्र म संविदाकर्मी मनके नियमितकरण के वादा ल पूरा करे के मांग करत हे।
एनसीसी-प्रशिक्षण शिविर
छत्तीसगढ़ के पहिली घुड़सवार रेजीमेंट एनसीसी कोति ले दुरूग के अंजोरा म राखे गे आठ दिवसीय संयुक्त वार्षिक प्रशिक्षण सिविर काली सिरा गे। समापन मउका म कैम्प फायर करे गीस। कारीकरम के माईपहुना कर्नल डॉक्टर एन.पी. दक्षिणकर रिहीन। उहें, कारीकरम के अगुवई दाऊ वासदेव चंद्राकर कामधेनू विश्वविद्यालय के कुलपति डॉक्टर आर.एन. सोनवाने ह करीन। समापन कारीकरम म राज्य के आठ ठिन जिला ले आय कैडेट मन ह सुघ्घर कारीकरम प्रस्तुत करीन। उहें, कैम्प म राखे गे आने-आने प्रतियोगिता के विजेता मन ल पुरस्कार दे गीस।
दुर्घटना
बालोद जिला म राष्ट्रीय राजमार्ग क्रमांक-तीस म आज टरक अउ बस के बीच भिंड़त होगे। ए हादसा म चालीस ले जादा यात्री घायल होगे हे। बस अउ टरक परिचालक के हालत गंभीर बताय जात हे। खबर के मुताबिक रईपुर कोति आवत एक यात्री बस अउ आगू ले आवत सीमेंट ले भरे टरक के बीच गुरूर थाना क्षेत्र के मोरकाटोला के बीच भिंड़त होगे। घायल यात्री मन ल इलाज बर धमतरी अउ चरामा के अस्पताल लेगे गेहे।
हत्या
राजधानी रईपुर म पंडरी थाना क्षेत्र म शिवाजी नगर तीर पाछु रतिहा दू गुट के बीच होय आपसी विवाद म दू झिन युवक के हत्या कर दे गीस। खबर के मुताबिक कोनों बात ल लेके दू गुट के बीच विवाद होगे अउ एखर बाद होय चाकूबाजी म एक मनखे के मउकाच म मउत होगे। उहें, दूसर के इलाज के बेरा अस्पताल म मउत होगे। पुलिस आरोपी मनके खोज करत हे।
झुमका जल महोत्सव
कोरिया जिला के झुमका बोट क्लब म आज ले दू दिवसीय झुमका जल महोत्सव सुरू होईस। संसदीय सचिव अंबिका सिंहदेव ह ए महोत्सव के सुभारंभ करीन। कारीकरम के अगुवई सरगुजा विकास प्राधिकरण के उपाध्यक्ष गुलाब कमरो ह करीन। ए मउका म कलाकार मन ह लोक कला अउ संस्कृति ले जुड़े सुघ्घर कारीकरम प्रस्तुत करीन। झुमका म पहिली घांव राखे गे ए जल महोत्सव स्थल म आने-आने सासकीय विभाग के प्रदर्सनी घलो लगाय गेहे।
अउ अब थोरकुन समाचार सार म-
– भारतीय जनता पार्टी ह दुरूग जिला कार्यकारिणा के सूची जारी कर देहे। एमा जितेन्द्र वर्मा ल जिला अध्यक्ष बनाय के संगेसंग छह झिन उपाध्यक्ष, दू महामंत्री अउ पांच मंत्री बनाय गेहे।
– कोंडागांव यातायात पुलिस अउ माकड़ी थाना के पुलिस कमरचारी मन ह माकड़ी म यातायात जागरूकता रैली निकाल के स्कूल के पढ़ईया लइका अउ सिक्षक मन ल यातायात नियम बर जागरूक करीन।
– योग आयोग के अध्यक्ष ज्ञानेश शर्मा ह रईपुर डंगनिया के एक सासकीय स्कूल म राखे गे कारीकरम म सामिल होके स्वस्थ जिनगी बर लोगन ल अउ स्कूल के लइका मन ल योग करे बर प्रेरित करीन।
अउ
– जिला रोजगार अउ स्वरोजगार मार्गदर्शन केन्द्र दुरूग म बीस जनवरी के प्लेसमेंट कैम्प लगाय जाही।