प्रधानमंत्री ह नवा भर्ती अग्निवीर मन संग गोठबात करत किहीन कि अग्निपथ योजना सशस्त्र बल ल मजबूत बनाय अउ भविष्य के चुनौती बर तियार करे म गेम चैंजर साबित होही। ओमन किहीन कि युवा मन म ए बिसेस क्षमता हे। एखरे सेती अवइया बेरा म अग्निवीर के सशस्त्र बल महत्ता के भूमिका निभाही। श्री मोदी ह वीडियो कान्फ्रेंसिंग ले तीनों सेना के अग्निवीर के पहिली बैच म बोलत किहीन कि नवा भारत नवा जोस ले भरे हे अउ सशस्त्र बल ल आधुनिक बनाय के संगेसंग आत्मनिर्भर बनाय के परयास चलत हे।
श्री मोदी ह अग्निपथ योजना के अग्निवीर मन ल बधाई दीन। प्रधानमंत्री ह किहीन कि अग्निवीर ले सशस्त्र बल युवा अउ तकनीकी समझ रखइया बनही।
मुख्यमंत्री-संसदीय समिति मुलाकात
मुख्यमंत्री भूपेश बघेल ह आज रईपुर के अपन निवास कार्यालय म डॉक्टर प्रोफेसर किरीट प्रेमजीभाई सोलंकी के अगुवई म छत्तीसगढ़ दउरा म आए केन्द्रीय संसदीय समिति के सदस्य मन ले भेंट करीन। ए बेरा म मुख्यमंत्री ह समिति के सदस्य मन ले कोल माइंस के खाली खदान के भूईंया राज्य सरकार ल वापिस देवाय, रावघाट होवत जगदलपुर तक रेल लाइन के विस्तार करे, वन अधिनियम के प्रावधान म संसोधन अउ मुंबई-कोलकात रूट के बंद ट्रेन फेर ले सुरू करे के आग्रह करीन।
मुख्यमंत्री ह समिति ल प्रदेस म अनुसूचित जाति अउ जनजाति के कल्याण बर करे जात काम के जानकारी दीन। ओमन किहीन कि अनुसूचित क्षेत्र म शिक्षा अउ स्वास्थ्य के संगेसंग रोजगार के मउका देवाय के परयास करे जात हे। गोठबात के बेरा समिति ह प्रदेस म अनुसूचित जाति अउ जनजाति के उत्थान बर होवत काम अउ प्रयास विद्यालय के प्रसंसा करीन।
खबर के मुताबिक केन्द्रीय संसदीय समिति छत्तीसगढ़ म अनुसूचित जाति अउ जनजाति वरग के लोगन के सामाजिक अउ सैक्षणिक स्थिति के अध्ययन करे बर काली ले दू दिन के दउरा म रईपुर आय हे।
मुख्यमंत्री-प्रांतीय महोत्सव अधिवेशन
प्रदेस के बेटी मन ल वीरता के क्षेत्र म माता बहादुर कलारिन पुरस्कार दे जाही। मुख्यमंत्री भूपेश बघेल काली बालोद जिला के कलंगपुर कलार समाज के प्रांतीय महोत्सव म बोलत रिहीन। ए बेरा म मुख्यमंत्री ह किहीन कि माता बहादुर कलारिन उपर कलार समाज ल भर नइ, भलूक पूरा छत्तीसगढ़ ल गरब हे। ओमन किहीन महुआ बोर्ड बनाय के परयास करे जात हे। ए बोर्ड के अध्यक्ष कलार समाज ले ही बनाय जाही। ए बेरा म मुख्यमंत्री ह परसही गांव पूर्व माध्यमिक साला ल हाई स्कूल म बढ़वार करे, गांव सिकोसा म नवीन प्राथमिक स्वास्थ्य केन्द्र बनाय अउ कलंगपुर गांव म सामुदायिक भवन बर बीस लाख रूपिया देके घोसना करीन।
उहें, श्री बघेल बलौदाबाजार-भाटापारा जिला के खपराडीह गांव म राखे गे बलौदाबाजार राजकुर्मी क्षत्रीय समाज के कारीकरम म सामिल होईन। ए बेरा म मुख्यमंत्री ह जिला मुख्यालय म प्रतियोगी परीक्षा के तियारी बर ई-लायब्रेरी, ग्राम तिल्दाबांधा म प्राथमिक स्वास्थ्य केन्द्र, खपराडीह गांव म मंगल भवन अउ मुक्तिधाम बर बीस-बीस लाख रूपिया देके घोसना करीन हे। संगेसंग खपराडीह के हाईस्कूल ल हायर सेकेंडरी स्कूल म बढ़वार करे के ऐलान करीन। ओमन किहीन कि राजीव गांधी किसान न्याय योजना के चौथइया किश्त के भुगतान अवइया इकतीस मार्च के करे जाही।
भाजपा-शक्कर कारखाना
भारतीय जनता पार्टी सहकारिता प्रकोष्ठ के प्रदेस संयोजक शशिकांत द्विवेदी ह किहीन कि सूरजपुर जिला के गांव केरता म मां महामाया सहकारी शक्कर कारखाना भ्रष्टाचार के भेंट चढ़ गे। पत्रकार मन ले गोठबात करत श्री द्विवेदी ह किहीन कि सहकारिता विभाग म नियम अउ अधिनियम के धज्जी उड़ाय जात हे। ओमन कोताही बरतइया अधिकारी मनके खिलाफ कार्रवाई करे के मांग करीन।
खबर के मुताबिक मां महामाया सहकारी शक्कर कारखाना म भ्रष्टाचार के चलत बारह करोड़ छत्तीस लाख रूपिया ले जादा के घोटाला आगू आय हे। ए शक्कर कारखाना म स्टाक म कमी आय संबंधी सिकईत ल संज्ञान म लेवत सहकारिता मंत्रालय कोति ले जांच दल बनाय गे रिहीस। जांच दल कोति ले शक्कर कारखाना के जांच बर प्रतिवेदन सौंपे गेहे। श्री द्विवेदी ह बतईन कि शक्कर कारखाना के गोदाम म शक्कर के भौतिक सत्यापन म जांच दल कोति ले कतकोन कमी पाय गेहे।
झुमका जल महोत्सव
कोरिया जिला म काली ले दू दिवसीय झुमका जल महोत्सव राखे जाही। महोत्सव के सुभारंभ संस्कृति मंत्री अमरजीत भगत करही। उहें, कारीकरम के मुख्य अतिथि गृह मंत्री ताम्रध्वज साहू होही। जिला कलेक्टर विनय कुमार लंगेह ह आज कार्यक्रम स्थल के जांच करीन। ए महोत्सव ले लोगन ल जिला के संस्कृति अउ पर्यटन के संबंध म जानकारी मिल सकही। संगेसंग कलाकार मन कोति ले सांस्कृतिक कारीकरम प्रस्तुत करे जाही। ए दउरान झुमका जल महोत्सव म लोगो, टैग लाइन अउ मोमेंटो डिजाइन प्रतियोगिता राखे जाही। उहें, जिला के पर्यटन वाले जघा म आधारित चित्रकला अउ पतंग उत्सव घलो होही। महोत्सव के बेरा अभिनय, नृत्य अउ गायन प्रतियोगिता होही।
पुनीत राम साहू-निधन
राजिम विधानसभा क्षेत्र के पूर्व विधायक पुनीत राम साहू के निधन होगे। ओमन इक्यासी बछर के रिहीन। श्री साहू उन्नीस सौ पच्यासी म अविभाजित मध्यप्रदेश म राजिम ले विधायक चुने गे रिहीन। अपन राजनीतिक जीवन म ओमन कतकोन महत्वपूर्ण पद ल संभालीन। श्री साहू राजिम विधानसभा क्षेत्र के बासीन खपरीपरा के रहवइया रिहीन।
कांग्रेस-आरोप
प्रदेस कांग्रेस संचार विभाग के अध्यक्ष सुशील आनंद शुक्ला ह किहीन कि मुद्दा विहीन भाजपा अपन राजनैतिक वजूद ल बचाय अउ राज्य सरकार के छबि खराब करे बर झूठ अउ गलत बयानबाजी के सहारा लेवत हे। ओमन किहीन कि प्रदेस म राष्ट्रीय सुरक्षा अधिनियम लागू करे के बाद भाजपा सरलग एखर विरोध करत हे। श्री शुक्ला ह बतईन कि अइसने अधिसूचना पहिली भाजपा सरकार के बेरा प्रकासित होय रिहीस। ओमन आरोप लगईन कि भाजपा राष्ट्रीय सुरक्षा अधिनियम ल लेके आदिवासी समाज ल भ्रमित करत हे।
खबर के मुताबिक राज्य सरकार ह साम्प्रदायिक भाईचारा बिगड़इया लोगन के खिलाफ राष्ट्रीय सुरक्षा कानून म कार्रवाई करे के अधिसूचना जारी करे हे। एमा सिकईत मिले म ओ थाना के पुलिस संबंधित मनखे ल तुरते गिरफ्तार कर सकत हे।
कोविड-टीकाकरण
केन्द्रीय स्वास्थ्य मंत्री मनसुख मांडविया ह कोविड टीकाकरण के दू बछर पूरा होय म लोगन ल बधाई दीन हे। स्वास्थ्य मंत्री ह किहीन कि दुनिया के सबले बड़े अउ सबले जादा सफल टीकाकरण सरलग नवा रिकार्ड बनावत हे। एक ट्वीट म श्री मांडविया ह किहीन कि प्रधानमंत्री नरेन्द्र मोदी के अगुवई म ए टीकाकरण अभियान चलाय जात हे।
सड़क सुरक्षा सप्ताह
प्रदेस म अभी सड़क सुरक्षा सप्ताह मनाय जात हे। एमा काली राजनांदगांव म हेलमेट पहनइया लोगन ल सॉल अउ श्रीफल देके सम्मानित करे गीस। ए मउका म कलेक्टर डोमन सिंह ह किहीन कि जीवन के सुरक्षा खातिर गाड़ी चलइया मन ल हेलमेट बउरना चाही।
उहें, काली राजनांदगांव जिला म हेलमेट जागरूकता रैली निकाले जाही। ए दउरान जिला, तहसील अउ ग्राम पंचायत स्तर म हेलमेट पहिन के बाईक रैली निकाले जाही। कलेक्टर ह जिला के अधिकारी-करमचारी मनके संगेसंग आम लोगन ल हेलमेट जागरूकता रैली म सामिल होके बने यातायात म अपन भागीदारी निभाय के अपील करीन।
अउ अब थोरकुन समाचार सार म-
– भारतीय थल सेना कोति ले दुरूग जिला म राखे गे भर्ती रैली के चुने गे आवेदक मनके लिखित परीक्षा काली नवा रईपुर म आर्मी रिक्रूटमेंट कार्यालय म होईस। ए परीक्षा म चौदह सौ अभ्यर्थी मन सामिल होईन।
– जांजगीर-चांपा जिला म चिटफंड कंपनी के निवेसक मन ह रकम वापिस देवाय के मांग ल लेके कचहरी चउक ल कलेक्ट्रेट तक रैली निकाल के कलेक्टर ल मुख्यमंत्री के नाव ज्ञापन सौंपीन। निवेसक मन ह चेताय हे कि कहूं उंखर रकम नइ लहुटाय जाही, त ओमन रायगढ़ ले रईपुर तक पैदल मार्च करही अउ विधायक निवास के घेराव करही।
अउ
– धमतरी जिला के बोराई पुलिस ह सत्ताईस किलो गांजा के संग दू झन ल गिरफ्तार करे हे। जब्त गांजा के कीमत करीबन साढ़े पांच लाख रूपिया बताय जात हे। पुलिस ह आरोपी मन तीर ले एक कार अउ दू नग मोबाइल घलो जब्त करे हे।