जियो ट्रू 5 जी सेवा
छत्तीसगढ़ के तीन शहर रायपुर, दुर्ग अउ भिलाई म जियो ट्रू 5 जी सेवा शुरू होगे हे। मुख्यमंत्रंी भूपेश बघेल ह काली अपन निवास कार्यालय म एखर शुरूआत करीन।
ए मउका म मुख्यमंत्री ह कीहिन कि 5 जी सेवा लॉंच होय ले ई-गवर्नेंस, कृषि, उर्जा, शिक्षा, मैन्यूफैक्चरिंग, लॉजिस्टिक्स, स्वास्थ्य, लोक आधारित टूरिज्म, स्वयं सहायता समूह के सशक्तिकरण, आईटी अउ एसएमई कारोबार जइसन क्षेत्र म विकास के नवा अवसर खुलही। मुख्यमंत्री ह कीहिन कि आधुनिक युग के युवा मन जउन तकनीक के प्रयोग करत हे, ओखर ले हमन सबो झन ल जुड़ना चाही। मोबाइल क्षेत्र म 5 जी के उपयोग ले मरीज मन ल घलो मदद मिलही।
केंद्रीय संसदीय समिति दौरा
केंद्रीय संसंदीय समिति छत्तीसगढ़ म अनुसूचित जाति अउ अनुसूचित जनजाति वर्ग के लोगन के सामाजिक अउ शैक्षणिक स्थिति के अध्ययन करे बर आज रायपुर पहुंच गेहे। संसदीय दल के सदस्य मन ह आज रायपुर के प्रयास आवासीय विद्यालय म शैक्षणिक स्थिति अउ दूसर कल्याणकारी योजना के जानकारी लीन।
संसदीय दल काली सोला जनवरी के अखिल भारतीय आयुर्विज्ञान संस्थान एम्स रायपुर के प्रबंधन संग गोठबात करही। एखर बाद संसदीय दल ह महानिदेशक केंद्रीय रिजर्व पुलिस बल-सीआरपीएफ के संग चर्चा करहीं। अपन दू दिन के दौरा म डॅाक्टर, प्रोफेसर कीर्ति प्रेमजीभाई सोलंकी के अगवई म इकतीस झन सदस्य वाले संसदीय दल के छत्तीसबढ़ के मुख्य सचिव अउ बड़े अधिकारी मन संग घलो बइठका होही। एखर अलावा संसदीय दल आने आने संस्थान के संग बइठका करके अनुसूचित जाति अउ जनजाति के प्रतिनिधित्व अउ उंखर मन बर करे गे कल्याणकारी उपाय के बारे म घलो चर्चा करही।
परीक्षा पे चर्चा
प्रधानमंत्री नरेंद्र मोदी ह विद्यार्थी, शिक्षक अउ अभिभावक मनले परीक्षा पे चर्चा कार्यक्रम म भाग लेके आग्रह करीन हे। परीक्षा पे चर्चा के छठवंा संस्करण सत्ताईस जनवरी के नई दिल्ली के तालकटोरा इंडोर स्टेडियम म राखे जाही। श्री मोदी ह कीहिन कि ये कार्यक्रम परीक्षा ल तनावमुक्त बनाय बर अउ विद्यार्थी मनके मदद करे के तरीका उपर चर्चा करे के मउका देथे।
भाजपा बयान
भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमन सिंह ह कीहिन हे कि छत्तीसगढ़ म राज्य के कांग्रेस एक घांव फेर ले आपाताकालीन लगाये के साजिश रचे हे। डॅाक्टर सिंह ह पत्रकार मनले चर्चा करत कीहिन कि असामान्य परिस्थिति म राष्ट्रीय सुरक्षा कानून लगाये जाथे। फेर प्रदेश के राज्य सरकार ह बिगड़े कानून बेवस्था ल छिपाये बर राष्ट्रीय सुरक्षा कानून लगाये के तियारी करत हे।
ओमन कीहिन कि राज्य सरकार के ए कदम ले साबित होगे हे कि प्रदेश के कानून व्यवस्था सरकार के नियंत्रण ले बाहिर हे। उंहें भाजपा के प्रदेश अध्यक्ष अरूण साव ह आरोप लगाइन कि राज्य सरकार छत्तीसगढ़ म तुष्टिकरण अउ धर्मांतरण के मुद्दा म काम करत हे। ओमन कीहिन कि सरकार अपन अधिकार के दुरूपयोग करत हे।
शहीद पार्क लोकार्पण
मुख्यमंत्री भूपेश बघेल ह बलरामपुर म राज्य के पहिली शहीद पार्क के लोकार्पण करीन। ए शहीद पार्क ल करीबन चालीस लाख रूपिया के लागत ले तैयार करे गेहे। बलरामपुर के शहीद चौक म बने ए पार्क म शहीद प्रधान आरक्षक लाजरूस मिंज, शहीद आरक्षक महेश राम पैकरा, शहीद आरक्षक अनिल खलको, शहीद उप निरीक्षक नबोर कुजूर, शहीद प्रधान आरक्षक मनाजरूल हक, शहीद उप निरीक्षक मसीह भूषण लकड़ा अउ शहीद प्रधान आरक्षक रामसाय राम के प्रतिमा लगाय गेहे। ये प्रतिमा के नीचे अमर शहीद मनके बायोडाटा घलो लिखाय हवय, ताकि इंखर मनके योगदान के बारे म लोगन जान सकय।
रिमोट मतदान मशीन
केंद्रीय निर्वाचन आयोग ह रिमोट मतदान मशीन बर चर्चा बर काली सबो राष्ट्रीय राजनीतिक दल के अध्यक्ष, प्रमुख नेता अउ महासचिव मन संग एक ठन बइठका करही। जेमा तकनीकी विशेषज्ञ समिति के सदस्य मन घलो मौजूद रीही। आयोग ह अपन घर ले दूर रहत मतदाता मन बर रिमोट वोटिंग के बेवस्था शुरू करे के प्रस्ताव देहे। एखर बर बहुनिर्वाचन क्षेत्र इलेक्ट्रॉनिक वोटिंग मशीन के उपयोग करे जाही । जउन ह वर्तमान इलेक्ट्रॉनिक वोटिंग मशीन जइसे सुरक्षित होही। ये नवा मशीन के उपयोग करके एकेच मतदान केंद्र ले बहत्तर ठन निर्वाचन क्षेत्र म वोट डारे जा सकही।
ए बेवस्था लागू होय ले प्रवासी मन बर मतदान आसान हो जाही। निर्वाचन आयोग ह एखर बर कानून म जरूरी बदलाव, प्रशासनिक प्रक्रिया अउ मतदान के तरीका के बारे म सबो दल मनले इकतीस जनवरी तक अपन-अपन सुझाव दे जाय के अनुरोध करे हे।
मुख्यमंत्री मिलेट
मुख्यमंत्री भूपेश बघेल ह मकर संक्राति के बधाई अउ शुभकामना के संग देशभर म मिलेट भेजीन हे। मुख्यमंत्री ह प्रधानमंत्री नरेंद्र मोदी संगरा केंद्रीय मंत्री, देशभर के सबो मुख्यमंत्री, कलाकार, साहित्यकार, मीडिया, फिल्म जगत, राजनीतिक क्षेत्र ले जुड़े लोगन ल मिलेट हैम्पर भेजीन हे। मुख्यमंत्री ह मकर सक्रांति म मिलेट मिशन के सफलता के कामना घलो करीन हे।
खबर के मुताबिक प्रदेश म एक दिसंबर दू हजार इक्कीस ले मिलेट मिशन शुरू करे गेहे। जेखर उद्देश्य प्रदेश म कोदो, कुटकी, रागी, अउ ज्वार के खेती ल बढ़ावा देना हे। संगेसंग दैनिक आहार म मिलेट्स के उपयोग ल प्रोत्साहन देके कुपोषण ल दूर करना हे।
तातापानी महोत्सव
बलरामपुर-रामानुजगंज जिला ह अपन आदिम संस्कृति अउ परंपरा बर प्रसिद्ध हे। इही विरासत ल अउ आगू बढ़ाय बर हर बछर तातापानी महोत्सव मनाये जाथे। तीन दिन के ये महोत्सव के पहिली दिन के सांस्कृतिक संझा म स्थानीय कलाकार अउ प्रदेश के प्रसिद्ध कलाकार मन ह अपन प्रस्तुती दीन।
ये मउका म जिला के आने आने स्कूल अउ कॅालेज के लइका मन ह सुआ, कर्मा, गेंड़ी नृत्य के प्रस्तुती ले सबके मन मोह लीन। महोत्सव म जिला के आने आने जगा ले आये स्थानीय जनजातीय कलाकार मन घलो अपन नृत्य के माध्यम ले छत्तीसगढ़ के कला अउ संस्कृति के झलक देखाइन।
भाजपा जांजगीर
जांजगीर-चांपा जिला के अकलतरा म भारतीय जनता पार्टी के लोकसभा प्रवास कार्यक्रम आयोजित करे गीस। कार्यक्रम म रायपुर सांसद सुनील सोनी ह पदाधिकारी अउ कार्यकर्ता मनके बइठका लीन। बइठका के बाद सांसद श्री सोनी ह कीहिन कि केंद्र सरकार के कई ठिन योजना मनके क्रियान्वयन राज्य सरकार डहार ले बने ढंग ले नइ करे जात हे। ओमन आरोप लगाइन कि राज्य सरकार डहार ले कतकोन योजना म अनियमितता घलो बरते जावत हे।
एखर अलावा जिला म मोर आवास मोर अधिकार के तहत घलो कार्यक्रम कराये गीस। कार्यक्रम म अइसन हितग्राही मनले आवेदन ले गीस, जउन मन ल अभी तक प्रधानमंत्री आवास योजना म घर नइ मिले हे।
माओवादी गिरप्तार
धमतरी म मोतियाबिंद के ऑपरेशन कराये बर गे एक झन महिला माओवादी संघरा चार झिन लोगन ल पुलिस ह गिरप्तार करे हे। मिले जानकारी के अनुसार महिला माओवादी तीन झन दूसर लोगन संग रत्नाबांधा रोड के एक ठन प्रायवेट अस्पताल म ऑपरेशन कराये बर आय रीहिस तभे एखर जानकारी धमतरी पुलिस ल होइस, जेखर बाद पुलिस के टीम ह अस्पताल म दबिश देके ये महिला माओवादी संघरा दूसर तीन आरोपी मन ल गिरप्तार कर लीस।
थलसेना दिवस
आज पचहत्तरवंा थलसेना दिवस मनाये जावत हे। बेंगलुरू म थलसेना दिवस समारोह म थलसेना प्रमुख जनरल मनोज पांडेय ह कीहिन कि सेना के हथियार अउ दूसर ढंाचा के आधुनिकीकरण करे जावत हे। ओमन कीहिन कि सेना ह उन्नत तकनीक ल अपनावत हे अउ स्वदेशी हथियार अउ उपकरण ल बढ़ावा देबर उद्योग मन संग साझेदारी करत हे। जेखर ले अवइया चुनौती ले निपटे जा सकय। ओमन कीहिन कि सेना ह भारतीय सीमा म कोनो भी प्रकार के स्थिति ले निपटे बर तियार हे।