संसद बजट सत्र
संसद के बजट सत्र इकतीस जनवरी ले शुरू होके छै अप्रैल तक चलही। सत्र म सामान्य अवकाश के संग छियांसठ दीन म सत्ताईस बइठका होही। संसदीय कार्यमंत्री प्रहलाद जोशी ह ट्वीट करके एखर जानकारी दीन। ओमन कीहिन कि सरकार अमृतकाल के बेरा राष्ट्रपति के अभिभाषण म धन्यवाद प्रस्ताव, केंद्रीय बजट अउ दूसर मुद्दा मन म चर्चा बर उत्सुक हरय।
जनऔषधि केंद्र आवेदन
केंद्र सरकार ह देशभर के छै सौ इंक्यावन जिला म नवा जनऔषधि केंद्र खोले बर ऑनलाईन आवेदन मंगाय हे। प्रधानमंत्री भारतीय जनऔषधि योजना सस्ता कीमत म गुणवत्तापूर्ण जेनरिक दवा उपलब्ध कराय के सेती शुरू करे गे रीहिस। ए बेरा नौ हजार ले जादा जनऔषधि केंद्र हरय। केंद्रीय रसायन अउ उर्वरक मंत्रालय ह केहे हे कि सरकार ह अवइया बछर मार्च तक जनऔषधि केंद्र मनके संख्या दस हजार करे के लक्ष्य राखे हे।
पंचायत निकाय उपचुनाव
प्रदेश म त्रि-स्तरीय पंचायत अउ नगर पालिका बर होय उपचुनाव के परिणाम के घोषणा होय के संग संबंधित निर्वाचन क्षेत्र मन म लागू आदर्श आचार संहिता समाप्त होगे हे। राज्य निर्वाचन आयोग के अनुसार त्रि-स्तरीय पंचायत के तहत प्रदेश के इकतीस जिला मन म कुल पांच सौ पद बर उपचुनाव कराय गे रीहिस।
एमा जिला पंचायत सदस्य के एक, जनपद पंचायत सदस्य के नौ, सरपंच के तिरासी अउ पंच के चार सौ सात पद भरे गीस। उंहे बारा जिला मन म चौदा नगर पालिका के पंद्रह वार्ड मन म घलो उपचुनाव होइस। ए निकाय मन म पंद्रह पार्षद पद म ले दस म कांग्रेस अउ पांच पद उपर भाजपा ह जीत दर्ज करे हे।
ईडी छापा
प्रवर्तन निदेशालय-ईडी के टीम ह आज एक आईएएस अधिकारी अउ पूर्व विधायक समेत कई कारोबारी मनके रायपुर भिलाई महासमुंद अउ बिलासपुर स्थित ठिकाना म छापा के कार्रवाई करीन।
आज बीहनिया ईडी के टीम पर्यटन अउ संस्कृति विभाग के सचिव अनबलगन पी.के. देवेन्द्र नगर रायपुर स्थित निवास म पहुंचीन। इही दउरान ईडी के एक दूसर टीम सीआरपीएफ के जवान मन संग ओखर भिलाई स्थित निवास घलो पहुंचीन। उंहे ईडी के टीम ह महासमुंद म पूर्व विधायक अग्नि चंद्राकर के अलावा ट्रांसपोर्ट कारोबारी विपुल पटेल अउ स्वतंत्र जैन के घर म घलो छापा मारीन।
भेंट-मुलाकात
भेंट-मुलाकात कार्यक्रम के तहत मुख्यमंत्री भुपेश बघेल आज कोरबा जिला के पाली-तानाखार विधानसभा क्षेत्र के गांव पिपरिया पहुंचीन। ए दउरान ओमन ग्रामीण मनले भेंट करीन अउ उंखर समस्या ल सुनीन। ए मउका म मुख्यमंत्री ह कीहिन कि ग्राम पिपरिया समेत पच्चीस जगा मन म देवगुड़ी बनाय जाही। संघरा पिपरिया म नवीन बालक छात्रावास खोले, पसान म जिला सहकारी बैंक के शाखा शुरू करे, अउ मोरगा म विद्युत सब स्टेशन के स्थापना करे समेत आने आने घोषणा करीन। ओमन कोरबी अउ घुचापुर म हाथी प्रभावित क्षेत्र मन बर रेस्क्यू सेंटर के स्थापना करे के घलो घोषणा करीन।
सिंहदेव समीक्षा
स्वास्थ्य मंत्री टी.एस. सिंहदेव ह मेडिकल कॉलेज के विशेषज्ञ डॅाक्टर अउ दूसर स्टाफ ल मरीज मन संग अउ ओमन के परिजन मन करा संवेदनशील व्यवहार राखे के निर्देश दीन हे। श्री सिंहदेव ह काली रायपुर म प्रदेश के जम्मों मेडिकल कॉलेज के डीन अउ अस्पताल अधीक्षक के बइठका लेके मेडिकल कॉलेज म पढ़ई के संग इलाज के व्यवस्था मनके समीक्षा करीन। ओमन मेडिकल कॉलेज ले जुड़े अस्पताल मन म सब तरह के दवाई पर्याप्त मात्रा म राखे बर कीहिन। जेखर ले मरीज मन ल बाहिर ले दवा बिसाय बर झन पड़य।
बइठका म स्वास्थ्य मंत्री ह मेडिकल कॉलेज ले जुड़े अस्पताल मन म डॅाक्टर खूबचंद बघेल स्वास्थ्य सहायता योजना के तहत आईपीडी उपचार के राशि मिले म आवत कठिनाई ल दूर करे के निर्देश दीन। एखर बर ओमन अस्पताल स्टाफ ल समुचित प्रशिक्षण देबर कीहिन। बइठका म जम्मों मेडिकल कॉलेज डहार ले बीहनिया नौ बजे ले संझा पांच बजे तक ओपीडी संचालित करे बर सहमति दे गीस। उंहें इलाज बर बीहनिया आठ बजे ले मंझनियां दू बजे तक पंजीयन कराय जा सकही। ओमन कांकेर, महासमुंद अउ कोरबा के नवा कॉलेज मन म घलो छात्रावास बनाय के कार्ययोजना तियार करे के निर्देश दीन।
राष्ट्रीय जम्बूरी
छत्तीसगढ़ के कॉन्टिजेंट ह भारत स्काउट एंड गाईड के अठारवां राष्ट्रीय जम्बूरी म शानदार प्रदर्शन करके चार प्रतियोगिता मन म ए ग्रेड पाय हे। राजस्थान के रोहटपाली म चार ले दस जनवरी तक राखे गे राष्ट्रीय जम्बूरी म छत्तीसगढ़ कॉन्टिजेंट ह दू संयुक्त प्रतियोगिता राज्य प्रदर्शनी अउ एथनिक शो के संगेसंग मार्चपास्ट अउ फिजिकल डिस्प्ले म ए-ग्रेड पाय हे। ए प्रतियोगिता म छत्तीसगढ़ कला संस्कृति ल देखाय गेहे।
बतादन के राष्ट्रीय जम्बूरी म प्रदेश के चौबीस जिला मन ले स्काउट गाइड्स, लीडर्स, राज्य मुख्यालय स्टाफ, सर्विस रोवर्स अउ रेंजर्स समेत तीन सौ इक्यासी सदस्य शामिल होइन।
माओवादी समाचार
बीजापुर जिला के भैरमगढ़ थाना पुलिस ह तीन मनखे मन ल विदेशी हथियार के संग गिरप्तार करे हे। एमन करा ले देशी कट्टा अउ कई ठिन हथियार घलो बरामद करे गेहे। आरोपी मनके खिलाफ आर्म्स एक्ट अउ यूएपीए के तहत मामला दर्ज कर ओमन ल दंतेवाड़ा न्यायालय म पेस करे गीस। जिहां ले ओमन ल जेल भेज दे गीस। पुलिस ह आरोपी मन डहार ले माओवादी मन ल हथियार पहुंचाय के आशंका जताय हे।
उंहे इही जिला के उसूर थाना क्षेत्र म माओवादी मन धान बेचे गे ग्रामीण के हत्या कर दीन। ये ग्रामीण उसूर धान उपार्जन केंद्र म धान बेचे बर गे रीहिस।
भाजपा आरोप
भारतीय जनता पार्टी के वरिष्ठ नेता अउ पूर्व मंत्री बृजमोहन अग्रवाल ह राज्य सरकार के राष्ट्रीय सुरक्षा कानून संबंधी जारी आदेश ल तानाशाही रवैया बताय हे । ओमन कीहिन कि राज्य सरकार छत्तीसगढ़ म अघोषित आपातकाल लगाय के तियारी करत हे।
श्री अग्रवाल ह कीहिन कि छत्तीसगढ़ के राजपत्र म असाधारण सूचना जारी करे गेहे। जेमा कलेक्टर मन ल ए बात के अधिकार दे जात हे कि कोनो भी मनखे के विरूद्ध राष्ट्रीय सुरक्षा अधिनियम के तहत कार्रवाई करे जा सकत हे। श्री अग्रवाल ह आरोप लगाइन कि आदिवासी वर्ग अपन हक बर धर्मांतरण करइया लोगन मनके खिलाफ खड़ा होवत हे, त ओमन ल डराय बर राज्य म राष्ट्रीय सुरक्षा कानून लागू करे जात हे।
चौपाटी निर्माण प्रदर्शन
राजधानी म पंडित रविशंकर शुक्ल विश्वविद्यालय परिसर म रायपुर नगर निगम डहार ले करे जात चौपाटी निर्माण के खिलाफ भारतीय जनता पार्टी कोति ले होवत प्रदर्शन आज नवां दिन घलो जारी रीहिस। पूर्व मंत्री राजेश मूणत ह कीहिन कि प्रदेश के पार्टी नेता मन केंद्रीय मंत्री हरदीप सिंह पुरी अउ स्मार्ट सिटी के डायरेक्टर जितेंद्र मेहन ले हालेच म मुलाकात करीन। ओमन आश्वासन दीन कि जम्मों नियम समेत टेक्निकल ऑडिट घलो करे जाही अउ गड़बड़ी पाय जाय म दोषी मनके खिलाफ कार्रवाई करे जाही। ओमन कीहिन कि भाजपा एजुकेशन हब म चौपाटी नइ बने देवय।
गणतंत्र दिवस तैयारी
प्रदेश म गणतंत्र दिवस समारोह के तियारी शुरू होगे हे। मुख्य समारोह राजधानी रायपुर के पुलिस परेड मैदान म होही, जिहां राज्यपाल अनुसुइया उइके ध्वजारोहण करके परेड के सलामी लीही। राज्य स्तर म होवइया परेड म सीआरपीएफ, सीआईएसएफ, डीएफ, जेल बल, होमगार्ड, एसटीएफ, बीएसएफ, आईटीबीपी अउ दूसर सशस्त्र बल के टुकड़ी शामिल होही ।
उंहे जिला मुख्यालय म आयोजित समारोह म राज्य शासन के मंत्री अउ जनप्रतिनिधि ध्वजारोहण करके परेड के सलामी लीहीं अउ मुख्यमंत्री के संदेश पढ़के सुनाही। सामान्य प्रशासन विभाग ह कार्यक्रम ल लेके जम्मो विभाग संभागायुक्त, कलेक्टर, अउ मुख्य कार्यपालन अधिकारी मन ल चिट्ठी लिखके कोरोना महामारी के सेती समारोह के दउरान विशेष सावधानी बरते के निर्देश दीन हे। पत्र म कोरोना के नवा वेरिएंट के खतरा ल देखत मास्क पहिने अउ सामाजिक दूरी के पालन करे बर कहे गेहे संगरा स्कूली लइका मनके कार्यक्रम अउ दूसर सांस्कृतिक कार्यक्रम के आयोजन घलो नइ करे के निर्देश दे गेहे।