लोक निर्माण मंत्री ताम्रध्वज साहू ह राज्य के एक हजार तीन सौ अड़तालीस किलोमीटर लंबा पांच सौ तिरपन सड़क के नवीनीकरण काम ल मंजूरी देहे। रायपुर म विभागीय समीक्षा बइठका म ओमन सड़क के गुणवत्ता उपर ध्यान देके निर्देश अधिकारी मन ल दीन। ओमन कीहिन कि लापरवाही बरतइया अधिकारी मनके खिलाफ कार्रवाई करे जाही। ए मउका म ओमन सड़क दुर्घटना ले बांचे बर ट्रैफिक सिगनल अउ स्पीड ब्रेकर बनाय के घलो निर्देश दीन।
सड़क सुरक्षा सप्ताह
सड़क सुरक्षा सप्ताह के दूसर दिन आज राजधानी के संगेसंग प्रदेश के कतकोन जिला मन म जन जागरूकता उपर कार्यक्रम राखे गीस। इही कड़ी म रायपुर जिला म संसदीय सचिव अउ विधायक विकास उपाध्याय ह आठ ठिन यातायात जन जागरूकता रथ ल हरा झंडी दिखाके रवाना करीन। ए रथ के माध्यम ले यातायात नियम ले जुड़े बैनर, पोस्टर अउ पांपलेट लोगन मन ल बांटे जाही अउ संगेसंग ए रथ म नुक्कड़ नाटक दल ह गांव गंवतरी म जाके लोगन मन ल सड़क दुर्घटना ले होवइया नकसान के बारे म जानबा दीही।
एति मुंगेली जिला म यातायात पुलिस के अधिकारी मन ह स्कूली लईका मन ल यातायात नियम के बारे म जानबा दीन। ओति कोंडागांव जिला म लोगन मन ल सड़क सुरक्षा के महत्ता ल बतावत यातायात पुलिस ह हेलमेट रैली निकालिन।
विवेकानंद जयंती
राष्ट्र आज युवा मनके प्रेरणा स्त्रोत स्वामी विवेकानंद के जयंती मनावत हे। स्वामी विवेकानंद के जयंती ल देश म राष्ट्रीय युवा दिवस के रूप म मनाये जाथे। राष्ट्रपति प्रधानमंत्री ह स्वामी विवेकानंद के जयंती के मउका म देश के युवा मन ल शुभकामना देवत जोश के संग आगू बढ़े के कामना करे हे। राज्यपाल अनुसुइया उइके, मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह घलो जयंती के मउका म प्रदेश के लोगन मन ल शुभकामना दे हवय।
एति प्रदेश म स्वामी विवेकानंद जयंती के मउका म कतकोन कार्यक्रम चलत हे। मुख्यमंत्री ह आज रायपुर म राखे गे कार्यक्रम म स्वामी विवेकानंद स्मारक डे भवन के जीर्णोद्धार बर चार करोड़ रूपिया मंजूर करीन। मुख्यमंत्री ह नगर निगम गार्डन के तीर बने भूतनाथ डे चेरिटेबल ट्रस्ट डहार ले चलाये जात इंग्लिश हायर सेकण्डरी स्कूल के बने नवा भवन के लोकार्पण करीन। ए मउका म मुख्यमंत्री ह पुलिस सब इंस्पेक्टर पद के भर्ती के काम ल जल्दी शुरू करे के निर्देश दीन। एमा नौ सौ इकहत्तर पद म भर्ती करे जाही। डे भवन कार्यक्रम म विवेकानंद शैक्षणिक अनुसंधान संस्थान बेलूर पश्चिम बंगाल के कुलपति स्वामी सर्वोत्तमानंद महाराज घलो आय रीहिन।
स्वामी विवेकानंद जयंती के मउका म आज भारतीय जनता युवा मोर्चा डहार ले भिलाई म यंग इंडिया रन के आयोजन करे गीस। जेमा बड़ संख्या म युवा मन ह भाग लीन। त उंहे बेमेतरा म घलो भारतीय जनता युवा मोर्चा के कार्यकर्ता मन ह मैराथन दौड़ राखे रीहिन।
भेंट-मुलाकात कार्यक्रम
मुख्यमंत्री ह किहीन हे कि प्रधानमंत्री आवास योजना के तहत हितग्राही मन ल पचास प्रतिसत के रासि राज्य सरकार ह देवत हे। योजना म एसो सात सौ करोड़ रूपिया के बजट राखे गेहे, जेमा ले तीन सौ करोड़ रूपिया जारी कर दे गेहे। भेंट-मुलाकात कारीकरम म धमतरी जिला के सिहावा म पत्रकार मन ले गोठबात म मुख्यमंत्री ह किहीन कि प्रधानमंत्री आवास योजना के प्रचार-प्रसार करे जात हे। हितग्राही मन ल आवास दे बर सर्वें के काम पूरा हो चुके हे।
एखर पहिली, सिहावा म राखे गे समीक्षा बइठका म मुख्यमंत्री ह कुरूद के विकासखंड शिक्षा अधिकारी अउ मगरलोड के तहसीलदार के सिकायत के बाद ओमन ल हटाय के निरदेस दीन।
त उहें, मुख्यमंत्री ह सिहावा म बहत्तर करोड़ छप्पन लाख रूपिया ले जादा के आने-आने विकास काम के लोकार्पण अउ सिलान्यास करीन।
संस्कृति मंत्री-फिल्म सिटी
संस्कृति मंत्री अमरजीत भगत ह किहीन हे कि प्रदेस म फिल्म सिटी बनाय के उद्देश्य छत्तीसगढ़ी फिल्म मन ल बढ़ावा देना, शुटिंग बर छत्तीसगढ़ ल सेंट्रल हब के रूप म विकसित करना अउ निवेस करइया मन ल आगू लाना हे। श्री भगत ह काली महासमुंद जिला के बिरबिरा म फिल्म सिटी बनाय बर जघा ल देखे बर पहुंचीन। ए मउका म ओमन किहीन कि छत्तीसगढ़ी फिल्म उद्योग ल बड़का रूप म देके संगेसंग प्रदेस के आने-आने जिला मन म फिल्म सिटी बनाय के जघा ल घलो चुने जात हे। एखर ले फिल्म उद्योग ले जुड़े कलाकार, निर्माता-निर्देशक के संगेसंग टेक्निशियन मन ल फायदा मिलही अउ इहे के लोगन मन ल रोजगार मिलही।
जानबा के मुताबिक राज्य सरकार ह छत्तीसगढ़ी फिल्म उद्योग ल बढ़ावा दे बर नवा फिल्म नीति लागू करे हे।
केंद्रीय मंत्री रायपुर स्मार्ट सिटी
केंद्रीय आवास अउ शहरी कार्यमंत्री हरदीप सिंह पुरी ह कीहिन हे कि रायपुर स्मार्ट सिटी प्रोजेक्ट के काम म लापरवाही के जांच करके जरूरी कार्रवाई करे जाय। जानबा के मुताबिक लोकसभा सांसद सुनील सोनी अउ राज्यसभा सांसद सरोज पांडे के अगवई म भाजपा पार्षद दल के एक प्रतिनिधि मंडल मन ह काली नई दिल्ली म श्री पुरी ले मुलाकात करीन अउ ओमन ल बछर दू हजार अठारा म रायपुर स्मार्ट सिटी के काम म भ्रष्टाचार के बारे म ज्ञापन सौंपीन।
भाजपा बैठक
भारतीय जनता युवा मोर्चा के नवा कार्यकारिणी के पहिली बइठका रायपुर के भाजपा कार्यालय म होइस । बइठका म प्रदेश प्रभारी ओम माथुर ह युवा मनले कीहिन कि ओमन जनता ले मिल जुलके उंखर मनके समस्या ल सुनय अउ ओमन ल साथ लेके उंखर मनके हित म काम करय। ओमन कीहिन कि गांव-गांव म जाके लोगन मनले मिलके युवा मन ल जागरूक करय। बइठका म प्रदेश भाजपा अध्यक्ष अरूण साव युवा मोर्चा के प्रदेश प्रभारी आलोक डंगस अउ प्रदेश अध्यक्ष रवि भगत सामिल होइन। त उंहे भारतीय जनता पार्टी पिछड़ा वर्ग मोर्चा के प्रदेश कार्य समिति के बइठका रायपुर म होइस। बइठका म प्रदेश अध्यक्ष अरूण साव ह कीहिन कि कार्यकर्ता मन ह भाजपा के सरकार बनाय बर घरोघर जाके लोगन मनले मिलय।
उंहे नेता प्रतिपक्ष नारायण चंदेल ह कीहिन कि राज्य सरकार ह जनता के संग वादा खिलाफी करत हे। बइठका म पिछड़ा वर्ग के प्रदेश अध्यक्ष भरत वर्मा ह कीहिन कि पैंतीस जिला मन म चार सौ पांच मंडल अउ बूथ मन म कार्यकर्ता सम्मेलन के आयोजन करे जाही।
निगरानी समिति बैठक
दीनदयाल अंत्योदय योजना राष्ट्रीय शहरी आजीविका मिशन के तहत शहरी जगा मन म बेघर होय आश्रय स्थल योजना अउ राज्य स्तरीय आश्रय स्थल निगरानी समिति के बइठका आज रायपुर म सुयोग्य कुमार मिश्रा के अध्यक्षता म होइस। बइठका म समिति ह बेघर मनके बारे म जानबा लेबर नगर निगम ले सर्वे कराय बर कीहिन। बइठका म राज्य शहरी विकास अभिकरण के मुख्य कार्यपालन अधिकारी सौमिल रंजन चौबे ह बताइन कि रायपुर म अंतर्राष्ट्रीय बस स्टैण्ड बीरगांव अउ बड़े बचेली बस स्टैण्ड के तीर आश्रय स्थल बनाय के काम पूरा होगे हे।
इंस्पायर अवॉर्ड-प्रतियोगिता
इंस्पायर अवॉर्ड मानक के राज्य स्तरीय प्रदर्सनी अउ प्रतियोगिता अट्ठारह अउ उन्नीस जनवरी के दुरूग के एक ठिन प्राईवेट स्कूल म होही। ए प्रतियोगिता म दू सौ इकचालीस प्रतिभागी मन डहार ले करे के मॉडल ल प्रदर्सित करे जाही। ए प्रदर्सनी म चुने गे मॉडल ल अहमदाबाद के राष्ट्रीय नवप्रवर्तक प्रतिष्ठान म उन्नीस अउ बीस जनवरी के होवइया मेंटरशिप कारीकरम म राखे जाही। एमा एनआईटी, आईआईटी, ट्रिपल आईटी के बिसय बिसेसज्ञ प्रोफेसर मन डहार ले चुने गे प्रतिभागी मनके प्रोजेक्ट मॉडल आइडिया ल अउ बढ़िया बनाय बर दिसा-निरदेस दे जाही। राज्य स्तर म चुने गे प्रोजेक्ट, मॉडल मन ल राष्ट्रीय स्तर के प्रदर्सनी अउ प्रतियोगिता म ले जाही।
अउ अब थोरकुन समाचार सार म-
– केंद्र सरकार ह नवा एकीकृत खाद्य सुरक्षा योजना ल प्रधानमंत्री गरीब कल्याण योजना नाम दे हवय।
– जिला रोजगार अउ स्व रोजगार मार्गदर्शन केंद्र कोंडागांव डहार ले अठारा जनवरी के लाइवलीहुड कॉलेज डोंगरीपारा म एक सौ चौवांलिस पद म भर्ती बर प्लेसमेंट कैंप के आयोजन करे जाही।
– कबीरधाम जिला के कुकदूर पुलिस ह एक ठिन गाड़ी म करीबन दू हजार किलोग्राम विस्फोटक के संग दू झिन आरोपी मन ल गिरप्तार करे हे।
– दुर्ग जिला के धमधा पुलिस ह साढ़े पांच सौ पेटी शराब के संग दू झिन लोगन मन ल गिरप्तार करे हे।