पंचायत/निकाय-उपचुनाव
प्रदेस म काली त्रिस्तरीय पंचायत अउ नगरीय निकाय मन म उपचुनाव ह सांतिपूर्वक ढंग ले खतम होगे। एमा पंचायत बर करीबन तिहत्तर प्रतिसत अउ नगरीय निकाय बर करीबन चौहत्तर प्रतिसत मतदान होईस हे। पंचायत उपचुनाव म जिला पंचायत सदस्य के एक ठन पद, जनपद पंचायत सदस्य के आठ ठन पद, सरपंच के सड़सठ ठन अउ पंच के पैंसठ ठन पद बर वोट डारे गीस। उहें, राज्य के बारह जिला के कुल चौदह नगरीय निकाय के तीन ठन नगर निगम, चार ठन नगर पालिका अउ सात ठन नगर पंचायत के पन्द्रह ठन वार्ड म पार्षद पद बर घलो मतदान करे गीस। पंचायत अउ नगरीय निकाय के उपचुनाव बर बारह जनवरी के मतगणना करे जाही अउ उही दिन परिणाम के घोसना घलो करे जाही।
मुख्यमंत्री-सम्मेलन
मुख्यमंत्री भूपेश बघेल ह छत्तीसगढ़ चेम्बर ऑफ कॉमर्स एंड इंडस्ट्रीज के मांग उपर राज्य म होलसेल कॉरिडोर खातिर एक हजार एकड़ भूमि देके मंजूरी दे देहे। संगेसंग ओमन किहीन कि अवइया चार महीना के भीतर कॉरिडोर के बनई ल सुरू कर दे जाही। उहें, श्री बघेल ह पोहा, मुर्रा के मंडी के फीस ल माफ करे के अधिसूचना ल एक हफ्ता के भीतर जारी करे के घोसना घलो करीन।
मुख्यमंत्री भूपेश बघेल ह आज पंडित दीनदयाल उपाध्याय ऑडिटोरियम म राखे गे छत्तीसगढ़ चेम्बर ऑफ कॉमर्स एंड इंडस्ट्रीज के तिरसठवां वार्षिक सम्मेलन म सामिल होईन। ए मउका म श्री बघेल ह आवासीय प्रायोजन खातिर सुरक्षित भूईया म संचालित बेवसायिक गतिविधि मन ल नियमितीकरण करे के बात घलो किहीन।
मुख्यमंत्री-गोधन न्याय योजना
मुख्यमंत्री भूपेश बघेल ह किहीन हे कि राज्य के गौठान मन म सोलर ड्रायर मसीन ल झटकुन लगाय जाही। श्री बघेल ह किहीन कि धमधा अउ पत्थलगांव म टमाटर के अब्बड़ खेती करे जाथे अउ किसान मन ह एला सूखा के बेचे के काम सुरू करे जा सकत हे। श्री बघेल ह किहीन कि एखर ले किसान मन ल जादा आमदनी हो सकत हे।
मुख्यमंत्री ह आज रईपुर के अपन निवास म गोधन न्याय योजना के हितग्राही मनके पइसा ल उंखर खाता म ऑनलाइन जमा करे खातिर राखे गे एक ठिन कारीकरम म बोलत रिहीन। ए दउरान मुख्यमंत्री ह गाय पलइया, गोबर बेचइया, गौठान समिति अउ महिला स्व-सहायता समूह के सदस्य मन ल सात करोड़ पांच लाख रूपिया के रासि ल जमा करीन। ए मउका म राज्य म पच्चीस ठन जिला के सैंतीस ठन गौठान मन म गोबर पेंट बनाय बर मसीन लगाय के घोसना घलो करीन।
एनीमिया मुक्त भारत अभियान
एनीमिया मुक्त भारत अभियान म छत्तीसगढ़ ह देस के तीसरइया स्थान म हवय। अभियान म नान्हें लइका, जवान लइका, गरभवती अउ लइकोरी माईलोगिन मन ल आयरन फोलिक एसिड सप्लीमेंटेशन गोली देवाय म छत्तीसगढ़ ह ए उपलब्धि पाय हे। ए अभियान के माध्यम ले छह महीना ले उन्नीस बछर तक लइका अउ गरभवती के संगेसंग लइकोरी माईलोगिन मन ल ए दवई के खुराक दे जाथे।
केन्द्र सरकार डहार ले हरेक महीना ए अभियान म जम्मांं राज्य अउ केन्द्र सासित प्रदेस मन म आईएफए सप्लीमेंटेशन के आंकड़ा ल जारी करे जाथे। पाछु तीन महीना – जुलाई, अगस्त अउ सितंबर म छत्तीसगढ़ ह सरलग देस म तीसरइया स्थान म हवय।
केन्द्रीय संसदीय समिति-दौरा
केन्द्रीय संसदीय समिति ह छत्तीसगढ़ म अनसूचित जाति अउ अनुसूचित जनजाति वर्ग के लोगन मनके सामाजिक अउ शैक्षणिक स्थिति के जानकारी ले खातिर एक दिन के दउरा म रईपुर आवत हे। डॉक्टर कीर्ति प्रेमजीभाई सोलंकी के अगुवई म अवइया ए समिति ह राज्य के मुख्य सचिव अउ बड़का अधिकारी मनके संग सोलह जनवरी के बइठका करही। एखर संगेसंग ए संसदीय दल ह आने-आने संस्थान मनके संग बइठका करके अनुसूचित जाति अउ जनजाति वर्ग बर करे गे कल्याणकारी काम के चरचा घलो करही।
भाजपा-बैठक
भारतीय जनता पार्टी डहार ले राज्य म अवइया विधानसभा चुनाव के तैयारी के संबंध म बइठका सुरू कर दे गेहे। राजनांदगांव के सोमनी म राखे गे एक ठन बइठका म पार्टी के प्रदेस अध्यक्ष अरूण साव, पूर्व मुख्यमंत्री डॉक्टर रमन सिंह अउ प्रदेस प्रभारी ओम माथुर ह सामिल होईन। ए मउका म श्री साव ह किहीन कि पार्टी कर्ताकर्ता मन ह जीत के संकलप के संग अवइया चुनाव के तैयारी ल सुरू कर दे। उहें, डॉक्टर रमन सिंह ह आरोप लगावत किहीन कि कांग्रेस सरकार ह कोनों काम ल सही ढंग नइ करे हे।
भाजपा-स्थायी सचिव नियुक्ति
भाजपा विधायक दल के स्थायी सचिव के पद म आशुतोष दुबे ल नियुक्त करे गेहे। श्री दुबे ह अभी भाजपा युवा मोर्चा के प्रदेस कार्यसमिति के सदस्य हरय। एखर पहिली, ओमन पूर्व सांसद अभिषेक सिंह के संसदीय सलाहकार बनाय गे रिहीस। उंखर अनुभव ल देखत पार्टी ह ओमन ल ए पद के जिम्मेवारी देहे।
फर्जीवाड़ा
मुख्यमंत्री के ओएसडी के फर्जी आईडी के इस्तेमाल करे के आरोप म पुलिस ह छत्तीसगढ़ राज्य औद्योगिक विकास निगम के सहायक प्रबंधक यू. रवि पटनायक ल गिरफ्तार करके चौदह दिन के न्यायिक रिमांड म जेल भेज देहे।
उहें, बलौदाबाजार म जीयत मनखे मन ल मरे बताके फर्जी मृत्यु प्रमाण पत्र बनाय अउ उंखर खाता खोलवाके मुख्यमंत्री निर्माण श्रमिक मृत्यु दिव्यांग सहायता योजना के तहत लाखों रूपिया के गबन करे के मामला ह आगू आय हे। ए मामला म छत्तीसगढ़ भवन सन्निर्माण मजदूर संघ के सदस्य अउ संघ के उपाध्यक्ष समेत पांच झन लोगन मन ल गिरफ्तार करे गेहे। पलारी थाना क्षेत्र म एक झिन माईलोगिन ह ए मामला के सिकईत ल थाना म दरज कराय रिहीस।
ओति, बिलासपुर के सिविल लाइन थाना क्षेत्र के एक्सिस बैंक म करोड़ों रूपिया के रासि के धोखाधड़ी अउ गबन करे के मामला आगू आय हे। बैंक के तीन झन करमचारी मन ह एक ठन प्राईवेट एजेंसी के संग मिलीभगत करके खाता ले पइसा निकाल लीन। साखा प्रबंधक के सिकईत म पुलिस के टीम ह आरोपी मन ल गिरफ्तार कर लेहे।
उहें, भिलाई म के.एफ.सी. के फ्रेंचाइजी लेके नाव म नौ लाख रूपिया ले जादा के ठगी करे के मामला आगू आय हे। सुपेला थाना प्रभारी के मुताबिक अभनपुर नगर पंचायत के मुख्य नगर पालिका अधिकारी ह अपन बेटी के नाव म फ्रेंचाइजी ले खातिर एक ठन वेबसाइट म आवेदन करे रिहीन, जिहां ले दू झन मनखे ह खुद ल कंपनी के अधिकारी बताके उंखर रासि ल जमा कराय रिहीस।
वन स्टेशन-वन प्रोडक्ट
रेल मंत्रालय के ‘‘वन स्टेशन-वन प्रोडक्ट‘‘ योजना के तहत दक्षिण पूर्व मध्य रेलवे के सत्ताईस ठन स्टेसन मन म स्थानीय उत्पाद मनके बिक्री करे जात हे। योजना म रेलवे स्टेशन मन म ऐकतीस स्टॉल लगाके मेक इन इंडिया ल आगू बढ़ावत स्थानीय उत्पाद के संगेसंग स्थानीय कारीगर मन ल प्रोत्साहित करे के काम करे जावत हे। ए स्टॉल मन म हस्तशिल्प, माटी ले बने जिनीस, हथकरघा, बांस के उत्पाद, वनोपज जइसन सामान मन ल बेचे बर राखे गेहे। ए अभियान के उद्देश्य रेलवे के उपयोग करके स्थानीय उत्पाद के आपूर्ति करना हवय।
विश्व हिन्दी दिवस
आज विश्व हिन्दी दिवस हरय। विदेस मन म हिन्दी भासा के प्रयोग ल बढ़ावा दे खातिर हरेक बछर आज के दिन ल विश्व हिन्दी दिवस के रूप म मनाय जाथे। बछर दू हजार छह म नागपुर म पहिली घांव विश्व हिन्दी सम्मेलन के कारीकरम राखे गे रिहीस, तब ले आज के दिन ल विश्व हिन्दी दिवस के रूप म मनाय जाथे।
केन्द्रीय सूचना अउ प्रसारण मंत्री अनुराग सिंह ठाकुर ह विश्व हिन्दी दिवस के मउका म देसवासी मन ल सुभकामना दीन हे।
एनसीसी-प्रशिक्षण शिविर
छत्तीसगढ़ के पहिली घोड़सवार रेजिमेंट राष्ट्रीय कैडेट कोर-एनसीसी डहार ले भिलाई म संयुक्त वार्षिक प्रसिक्षण सिविर के कारीकरम करे जावत हे। सोला जनवरी तक चलइया ए सिविर म राज्य के आने-आने एनसीसी इकाई के करीबन पांच सौ कैडेट्स मन ह भाग लेवत हे। ए कारीकरम म कैडेट मन ल ड्रिल, फायरिंग अउ कई ठन सैनिक गतिविधि के संगेसंग घोड़सवारी के प्रसिक्षण घलो दे जावत हे।