मवेशी मौत
बिलासपुर जिला म तखतपुर विकासखंड के ग्राम मेड़पार बाजार म एक ठिन परिसर म राखे गे पचास मवेशी के मउत होगे। ए मामला म अज्ञात आरोपी के खिलाफ एफआईआर दर्ज करे गेहे।
मुख्यमंत्री भूपेश बघेल ह गाय के मउत के घटना ल गंभीरता लेहे। ओमन बिलासपुर कलेक्टर ल ए घटना के जिम्मेदार लोगन उपर कार्रवाई के निरदेस देहे। श्री बघेल ह किहीन कि ए घटना ह दुर्भाग्यजनक हे।
इही बीच, बिलासपुर कलेक्टर डाॅक्टर सारांश मित्तर ह बतईन कि ए मामला म उच्च स्तरीय जांच के आदेस दे दे गेहे। रिपार्ट शाम तक आ जही, एखर बाद दोसी मनके खिलाफ सख्त कार्रवाई करे जाही। ओमन बतईन कि मृत गाय मनके अंतिम संस्कार कर दे गेहे। गाय मालिक मन ल मुआवजा देके निरदेस जारी कर दे गेहे।
गांव के सरपंच विनोद घृतलहरे ह बतईन कि गांव म गौठान नइ हे, जेखर सेती पुराना पंचायत भवन म मवेसी मन ल राखे जावत रिहीस हे। फिलहाल ए घटना के कारण के जानकारी नइ चल पाय हे।
इही बीच, गौसेवा आयोग के अध्यक्ष महंत रामसुंदर दास ह गाय मनके मउत के मामला ल लेके अधिकारी मन ले गोठबात करके सबो जानकारी लीन अउ आयोग के एक टीम बनाके घटना स्थल बर रवाना करीन। ओमन किहीन कि ए मामला म हर स्तर म कार्रवाई करे जाही। लापरवाही बरतइया मन उपर कड़ा कार्रवई के अनुसंसा करे गीस। ओमन यहू किहीन कि जम्मों गौसाला अउ गौठान बर जरूरी दिसा-निरदेस जारी करे गेहे।
गाय मौत-भाजपा
इही बीच, भारतीय जनता पार्टी के प्रदेस अध्यक्ष विष्णुदेव साय ह बिलासपुर जिला के मेड़पार बाजार म पचास मवेसी के मउत के घटना ल गंभीर बतावत राज्य सरकार के कार्यप्रणाली उपर सवाल उठाय हे। श्री साय ह किहीन कि मवेसी मनके मउत ले ए स्पष्ट होगे कि गोधन न्याय योजना के प्रचार करइया प्रदेस के कांग्रेस सरकार ह गौठान के कोई पुख्ता इंतजाम नइ कर पाय हे।
आकांक्षी जिला बीजापुर-अव्वल
छत्तीसगढ़ के आदिवासी बहुल बीजापुर ह आकांक्षी जिला के डेल्टा रैकिंग म पूरा देस म पहला स्थान हासिल करे हे। नीति आयोग डहार ले जून दू हजार बीस के स्थिति म आज जारी करे गे आकांक्षी जिला के रैकिंग म बीजापुर जिला ह कतकोन मानक म बेहतर प्रदर्सन करे हे। मुख्यमंत्री भूपेश बघेल ह ए उपलब्धि बर जिलावासी अउ जिला प्रसासन के जम्मों टीम ल बधाई देहे।
जानबा के मुताबिक स्वास्थ्य, पोषण, शिक्षा, कौशल विकास, कृषि, जल संसाधन, वित्तीय समावेशन अउ बुनियादी अधोसंरचना विकास के क्षेत्र म बने काम करत बीजापुर ह अपन डेल्टा अंक म पूरा देस म सर्वाधिक दू दशमलव तीन अंक के वृद्धि करे हे।
कोरोना मरीज
प्रदेस म आज घलो कई ठिन जिला म कोरोना संक्रमित नवा मरीज मिले हे। उहें, आज राजधानी रईपुर के तीन कोरोना पाॅजिटिव मरीज के मउत होगे। मृतक म एक झिन कांग्रेस नेता घलो सामिल हे।
दुरूग जिला म आज संझा तक छियालीस नवा कोरोना संक्रमित मरीज के पुष्टि होय हे। एमा तेईस बीएसएफ के जवान हे।
अइसने, राजनांदगांव जिला म लाॅकडाउन के पहली दिन काली अट्ठाईस मरीज मिले रिहीस, जेमा तेईस आईटीबीपी के जवान हे। डोंगरगढ़ के उप जेल म बंद दू झिन कैदी घलो कोरोना संक्रमित पाय गेहे।
बेमेतरा जिला म एक जवान के संघरा छह झिन मरीज पहिचान करे गेहे।
ऐति, रायगढ़ जिला म आज चार नवा कोरोना मरीज के पहिचान करे गेहे। जिला म अब कुल कोरोना संक्रमित मरीज के संख्या एक सौ नवासी होगे हे।
ओति, कोंडागांव जिला म घलो आज चार नवा कोरोना संक्रमित मरीज मिले हे। ए जम्मों झन सीआरपीएफ के जवान हरय अउ ए मन देउरगांव क्वारेंटाइन सेंटर म राहत रिहीन हे।
अइसने, बस्तर जिला म पाछु रतिहा अट्ठारह नवा कोरोना पाॅजिटिव मरीज के पहिचान होईस। ए जम्मों झन सीआरपीएफ के जवान हरय।
उहें, सूरजपुर जिला म घलो पाछु रतिहा आठ मरीज मिले रिहीस।
मुख्यमंत्री-कोरोना अपील
मुख्यमंत्री भूपेश बघेल ह प्रदेसवासी मन ले कोरोना संक्रमण के रोकथाम अउ बचाव के उपाय के कड़ाई ले पालन करे के अपील करे हे। ओमन किहीन कि कोरोना के अभी इलाज नइ हे। न ही वैक्सीन आ पाय हे। एखर बचाव म ही सुरक्षा हे। स्वास्थ्य विभाग के दिसा-निरदेस के अनुसार मास्क, सैनिटाईजर अउ फिजिकल डिस्टेंसिंग के लगातार कड़ाई ले पालन करे जाना चाही।
श्री बघेल ह आज रईपुर म पत्रकार मन ले चरचा करत किहीन कि राजधानी म कोरोना संक्रमण के बढ़ना चिंता के बिसय हरय। रईपुर के लोगन जागरूक हे। बचाव के उपाय के पालन करके संक्रमण ल रोके जा सकत हे।
मुख्यमंत्री-आईसीएमआर/एम्स
मुख्यमंत्री भूपेश बघेल ह आज भारतीय आयुर्विज्ञान अनुसंधान परिषद-आईसीएमआर नई दिल्ली के डायरेक्टर जनरल प्रोफेसर बलराम भार्गव अउ एम्स रईपुर के डायरेक्टर डाॅक्टर नितिन एम. नागरकर ले फोन म गोठबात करीन। ए बेरा मुख्यमंत्री ह कोरोना संक्रमण के उपचार बर प्लाज्मा थैरेपी के संघरा दूसर जरूरी व्यवस्था अउ आगू के उपचार के रणनीति म विस्तृत चरचा करीन।
मुख्यमंत्री ह प्रोफेसर भार्गव ले छत्तीसगढ़ म कोरोना वायरस के नियंत्रण बर अपनाय जावत उपाय के संघरा कोरोना संक्रमित मरीज मन बर इलाज सुविधा म करे गे विस्तार, टेस्टिंग के संख्या अउ बढ़ोतरी के संबंध म गोठबात करीन।
उहें, श्री बघेल ह एम्स रईपुर के डायरेक्टर डाॅक्टर नागरकर ले एम्स म भर्ती कोरोना संक्रमित मरीज के स्थिति, उंखर उपचार बर मेडिकल स्टाॅफ अउ बिस्तर के संघरा दूसर व्यवस्था मनके जानकारी लीन।
इही बीच, मुख्यमंत्री ह प्लाज्मा थैरेपी के संबंध अपर मुख्य सचिव सुब्रत साहू अउ स्वास्थ्य सचिव निहारिका बारिक सिंह ले आवश्यक कार्रवाई करे बर किहीन।
होम आइसोलेशन-दिशा-निर्देश
रईपुर कलेक्टर डाॅक्टर एस. भारतीदासन ह केहे हे कि जिला प्रसासन डहार ले पायलट प्रोजेक्ट के रूप म होम आइसोलेशन के प्रक्रिया पहिली डाॅक्टर मन उपर लागू करे जाही। एखर सफल होय म कोरोना पाॅजिटिव पाय गे कैटेगिरी-सी के मरीज मन ल होम आइसोलेशन करे के अनुमति प्रदान करे जा सकही।
ओमन बतईन कि होम आइसोलेशन बर मरीज के घर म अलग हवादार कमरा अउ सौचालय होय म ही होम आइसोलेशन के अनमुति दे जाही। ए अवधि म जिला स्वास्थ्य विभाग डहार ले एखर बर नियुक्त स्वास्थ्य कर्मी मन रोज मरीज अउ ओखर अटेंडेंड ले फोन के माध्यम ले संपर्क म रइही। जे मरीज मन ल होम आइसोलेशन म राखे जाही, उंखर घर कोन्हों दूसर बाहरी व्यक्ति के आना-जाना मना रइही।
लाॅकडाउन
महासमुंद जिला के बागबाहरा, बसना अउ महासमुंद नगरीय निकाय क्षेत्र म पाछु रतिहा ले पूर्ण लाॅकडाउन शुरू होगे हे। ए ह इकतीस जुलाई तक लागू रइही। अनुविभागीय अधिकारी अउ पुलिस के टीम ह आज बिहनिया फ्लैग मार्च करीन। ए बेरा लोगन ल समझाईश देके संगेसंग बिना मास्क के घुमइया नब्बे झन मनखे ले करीबन नौ हजार रूपिया के जुर्माना घलो ले गीस।
ओति, कोरिया जिला म कलेक्टर एस.एन. राठौर ह कोरोना संक्रमण ल रोके बर जम्मों प्रसासनिक अमला ल कड़ाई ले नियम पालन सुनिश्चित करे बर केहे हे। जिला के बैकुंठपुर साप्ताहिक बाजार ह अब मिनी स्टेडियम म इतवार अउ गुरूवार के दू दिन लगही।
ए डहार रायगढ़ म कलेक्टर भीमसिंह अउ पुलिस अधीक्षक संतोष सिंह ह पैदल मार्च करके सहर के निरीक्षण करीन। अइसने, जांजगीर-चांपा जिला म पन्द्रह नगरीय निकाय म लाॅकडाउन के दूसरइया दिन कलेक्टर यशवंत कुमार अउ पुलिस अधीक्षक पारूल माथूर ह घलो पैदल मार्च करीन।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी ले ‘‘मन की बात‘‘ कारीकरम म देस-बिदेस के लोगन मन ले अपन विचार साझा करही। ए कारीकरम ल आकाशवाणी अउ दूरदर्शन के जम्मों नेटवर्क म प्रसारित करे जाही। ए आकाशवाणी समाचार के वेबसाइट अउ मोबाइल ऐप म घलो उपलब्ध रइही। आकाशवाणी, डीडी न्यूज, पीएमओ अउ सूचना प्रसारण मंत्रालय के यू-ट्यूब चैनल मन म ए कारीकरम लाइव उपलब्ध रइही।
हिन्दी म ए कारीकरम के प्रसारण के तुरते बाद क्षेत्रीय भासा म एखर प्रसारण करे जाही। उहें, क्षेत्रीय भाखा म संझा आठ बजे एखर पुनः प्रसारण होही।
प्रधानमंत्री आवास योजना
छत्तीसगढ़ म प्रधानमंत्री आवास योजना ग्रामीण म ए वित्तीय बछर म एक लाख संतावन हजार ले जादा मकान बनाय के लक्ष्य राखे गेहे। योजना के संचालक एस. प्रकाश ह जम्मों जिला पंचायत के मुख्य कार्यपालन अधिकारी मन ल परिपत्र जारी करके एखर बर प्राथमिकता निर्धारित करे के निरदेस देहे। ओमन जम्मों जिला म ए बछर ए योजना म बनइया मकान के जानकारी घलो भेजे हे।
नागपंचमी
नागपंचमी के परब आज प्रदेसभर म पारंपरिक ढंग मनाय गीस। ए बेरा म लाॅकडाउन अउ कोरोना संक्रमण ल देखत राज्य सरकार डहार ले जारी दिसा-निरदेस के पालन करत सहर ले लेके गांव म नागदेवता के प्रतिमा बनाके पूजा-पाठ करे गीस। ए साल कहनचो ले घलो कुश्ती अउ दंगल जइसे पांरपरिक खेल के आयोजन होय के खबर नइ मिले हे।
कोरोना संकट-वनवासी
कोरोना संकट काल म बस्तर के स्वादिष्ट काजू ल अंचल म रहइया वनवासी परिवार मनके आमदनी बढ़ाही। मुख्यमंत्री भूपेश बघेल ह पैकेजिंग अउ बस्तर ब्रांड नाम ले एला नवा स्वरूप म अभी हालेच म लांच करीन। बस्तर के काजू के मांग ल देखत एला वन विभाग के संजीवनी स्टोर म घलो उपलब्ध कराय गेहे। राज्य सरकार ह वनांचल म रहवइया लोगन ल वन उत्पाद ले रोजगार उपलब्ध कराय के मुहिम के चलत बंद पड़े काजू प्रसंस्करण ल घलो फिर से चालू करीन। राज्य सरकार ह ए बछर काजू के समर्थन मूल्य ल बढ़ाके सौ रूपिया प्रति किलो कर देहे।
डाक विभाग
डाक विभाग ह जम्मों लघु बचत योजना ल डाकघर साखा स्तर तक बढ़ा देहे। एखर उद्देश्य ग्रामीण इलाका म लोगन तक डाक बचत के जम्मों योजना पहुंचा के ग्रामीण भारत ल ससक्त बनाना हे। नवा आदेस म डाक घर साखा मन ल सार्वजनिक भविष्य निधि, मासिक आय योजना, राष्ट्रीय बचत प्रमाण पत्र, किसान विकास पत्र अउ वरिष्ठ नागरिक बचत योजना मन ल उपलब्ध कराय के अनुमति दे देहे। लोगन मन अब गांवेच के डाकघर म ए बचत योजना म पइसा जमा कर सकही।