केन्द्रीय गृहमंत्री अमित शाह ह किहीन हे कि केन्द्र सरकार के परयास हे कि बछर दू हजार चौबीस म होवइया आम चुनाव के पहिली पूरा देस नक्सलवाद के समस्या ले मुक्त हो जाय। आज छत्तीसगढ़ के कोरबा म एक ठिन आमसभा म श्री शाह ह किहीन कि सरकार नक्सल प्रभावित क्षेत्र ल ए समस्या ले मुक्त कराय के कगार म पहुंच गे हवय। ओमन किहीन कि एक डहार जिहां नक्सल प्रभावित क्षेत्र म सड़क अउ स्कूल बनाय के संगेच युवा मन ल रोजगार देके ओमन ल विकास के मुख्यधारा ले जोड़े जावत हे। उहें, दूसर डहार ले नक्सली हिंसा के मुकाबला कड़ई ले करे जावत हे। केन्द्रीय गृहमंत्री ह किहीन कि बछर दू हजार नौ के मुकाबला बछर दू हजार इक्कीस म माओवादी घटना एक चौथाई ले भी कम रहि गे हवय।
श्री शाह ह केन्द्र के मोदी सरकार डहार ले हर वर्ग बर करे गे काम के बारे म बतईन कि प्रधानमंत्री नरेन्द्र मोदी के अगुवई म केन्द्र सरकार ह गरीब मन ल मकान, रसोई गैस, बिजली कनेक्सन अउ नल कनेक्सन दे जाय के संगेच उंखर मन बर मुफ्त इलाज के व्यवस्था घलो करीन हे। ओमन किहीन कि मोदी सरकार ह जिला खनिज निधि-डीएमएफ के सुरूवात करीन। एखर ले खदान मन ले होवइया आय के एक हिस्सा क्षेत्र के विकास अउ लोगन के कल्याण बर खर्च करे जाथे। ओमन किहीन कि ए मद म मोदी सरकार ह छत्तीसगढ़ ल नौ हजार दू सौ करोड़ रूपिया ले जादा दे हवय।
केन्द्रीय गृहमंत्री ह छत्तीसगढ़ म रमन सरकार के पन्द्रह बछर के कार्यकाल के उपलब्धि ल गिनावत किहीन कि भाजपा सरकार ह अपन पन्द्रह बछर के सासन म छत्तीसगढ़ ल बीमारू राज्य ले विकसित राज्य बनाय के काम करीस।
अमित शाह-कोरबा-02
श्री शाह ह आरोप लगईन कि पाछु करीब चार बछर म कांग्रेस के सरकार ह छत्तीसगढ़ म भ्रष्टाचार करे के अलावा कोनों काम नइ करे हे। ओमन किहीन कि अवइया चुनाव म जनता कांग्रेस ले उंखर डहार ले करे गे काम के हिसाब मांगही।
इंदिरा प्रियदर्शनी स्टेडियम म होय सभा म भाजपा के प्रदेस प्रभारी ओम माथुर, पार्टी के प्रदेस अध्यक्ष अरूण साव, नेता प्रतिपक्ष नारायण चंदेल संघरा, भाजपा के कतकोन बड़े नेता मौजूद रिहीन।
ए आमसभा म कोरबा के संगेच मनेन्द्रगढ़, कोरिया, अउ गौरेला-पेण्ड्रा-मरवाही ले बड़े संख्या म पार्टी कायकर्ता मन सामिल होईन।
एखर पहिली, केन्द्रीय गृहमंत्री ह झारखंड के चाईबासा ले सीधा कोरबा पहुंचीन। पूर्व निर्धारित कारीकरम के अनुसार ओमन ल रईपुर होवत कोरबा पहुंचना रिहीस, फेर ऐन मउका म उंखर यात्रा कारीकरम म बदलाव करे गीस।
बिलासपुर वेबसाइट-सम्मान
छत्तीसगढ़ के बिलासपुर जिला प्रशासन के वेबसाइट ल आज नई दिल्ली म नवाचार बर राष्ट्रपति द्रौपदी मुर्मू ह राष्ट्रीय प्लेटिनम अवॉर्ड ले सम्मानित करीन। विज्ञान भवन म राखे गे कारीकरम म बिलासपुर कलेक्टर सौरभ कुमार ह ए पुरस्कार ग्रहण करीन।
खबर के मुताबिक केन्द्र सरकार के डिजिटल इंडिया के फ्लैगशिप योजना चलाय बर बिलासपुर जिला के वेबसाइट ह नवाचार करे हे। राष्ट्रीय सूचना विज्ञान केन्द्र डहार ले बने ए वेबसाइट म केन्द्र अउ राज्य सरकार के योजना मनके जानकारी अपलोड करे के संगेच दिव्यांग मन बर घलो एमा बिसेस सुविधा दे गे हवय। दृष्टिबाधित मन घलो सॉफ्टवेयर के माध्यम ले ए वेबसाइट म दे गे सूचना ल सुन सकत हे।
त्रिस्तरीय पंचायत उपचुनाव-अवकाश
राज्य सरकार ह त्रिस्तरीय पंचायत उपचुनाव बर नौ जनवरी के होवइया मतदान बर संबंधित चुनाव क्षेत्र के सासकीय संस्थान अउ कार्यालय मन बर सार्वजनिक अवकाश घोसित करीन हे। मतदान वाले ए क्षेत्र मन म ए दिन मतदान करे बर सामान्य अवकाश घलो रइही। त्रिस्तरीय पंचायत उपचुनाव बर मतदान के जरूरत वाले क्षेत्र म नौ जनवरी के बिहनिया सात बजे ले मंझनिया तीन बजे तक वोट डारे जाही।
छत्तीसगढ़िया ओलंपिक
छत्तीसगढ़िया ओलंपिक खेल के तहत राज्य स्तरीय प्रतियोगिता के आयोजन काली ले दस जनवरी तक राजधानी रईपुर म करे जाही। प्रतियोगिता के उद्घाटन काली बिहनिया ग्यारह बजे सरदार बलबीर सिंह जूनेजा इंडोर स्टेडियम म होही। छत्तीसगढ़िया ओलंपिक के जम्मों चौदह खेल विधा के प्रतियोगिता सरदार बलबीर सिंह जूनेजा इंडोर स्टेडियम, आउटडोर स्टेडियम बूढ़ापारा, पंडित रविशंकर शुक्ल विश्वविद्यालय खेल परिसर अउ स्वामी विवेकानंद स्टेडियम कोटा म राखे जाही।
आयकर-छापा
आयकर विभाग डहार ले रईपुर अउ दुरूग-भिलाई संघरा प्रदेस के कतकोन जिला म मारे गे छापा के कार्रवाई आज दूसर दिन घलो जारी रिहीस।
मिले जानकारी के अनुसार इंदौर-भोपाल अउ रईपुर के करीबन एक सौ पचास आयकर अधिकारी मनके टीम ह ट्रांसपोर्ट अउ रियल एस्टेट कारोबारी मनके करीब बीस ले जादा ठिकाना म छापा के कार्रवाई करीन हे। ए कारोबारी मनके ठिकाना ले जब्त दस्तावेज के जांच करे जावत हे।
भाजपा मंथन-बैठक
राजनांदगांव जिला म काली ले दू दिन के भारतीय जनता पार्टी के प्रदेस इकाई डहार ले मंथन बइठका के आयोजन करे जाही। ए दउरान अवइया विधानसभा चुनाव ल लेके रूपरेखा तैयार करे जाही। संगेसंग शक्ति केन्द्र मन ल मजबूत बनाय के योजना उपर काम करे जाही। बइठका ल लेके पदाधिकारी मन ल जोनवार जिम्मेदारी सौंपे गेहे। बइठका म भाजपा के छत्तीसगढ़ प्रभारी ओम माथुर संघरा भाजपा के बड़े पदाधिकारी अउ कार्यकर्ता मन सामिल होही।
मुख्यमंत्री-राजिम महोत्सव
मुख्यमंत्री भूपेश बघेल ह आज राजिम महोत्सव स्थल म भगवान श्रीराम के पच्चीस फीट ऊंचा मूर्ति के अनावरण करीन। ए दउरान श्री बघेल ह राजिम-चौबेबांधा-नवागांव मार्ग चौड़ीकरण संघरा लक्ष्मण झूला पहुंच मार्ग के भूमिपूजन करीन। संगेसंग मुख्यमंत्री ह राजीव लोचन मंदिर जाके पूजा करके प्रदेस के खुसहाली के कामना करीन। मुख्यमंत्री ह प्रदेसवासी मन ल राजिम भक्तिन माता जयंती के बधाई अउ सुभकामना घलो दीन।
जिले की चिट्ठी
प्रादेशिक समाचार एकांश, आकाशवाणी समाचार डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मों केंद्र एक संगरा रिले करही। ए बखत के अंक म ‘‘सरगुजा‘‘ जिला के गतिविधि के संबंध म जानकारी दे जाही।
नारायणपुर पथराव-आरोपी गिरफ्तार
नारायणपुर जिला म पथराव के मामला म पुलिस ह छह झिन अउ आरोपी मन ल गिरफ्तार करे हे। ए मामला म पहिलीच ग्यारह झन के गिरफ्तारी होगे हवय। इही बीच, नारायणपुर जिला म सांति स्थापित करे के परयास चलत हे। पुलिस प्रशासन के दावा हे कि स्थिति पूरा तरीका ले नियंत्रण म हवय। उहें, पुलिस प्रसासन ह सोसल मीडिया म भ्रामक पोस्ट करइया मन उपर कार्रवाई करे के चेतावनी देहे।
खबर के मुताबिक पाछु दिन नारायणपुर म धर्मांतरण के सेती दू पक्ष के बीच होय विवाद ल रोके बर पुलिस ह हस्तक्षेप करे रिहीस। ए दउरान होय पथराव म एसपी संघरा कई झन जवान मन ल चोट आय रिहीस।
दुर्घटना
प्रदेस म पाछु चौबीस घंटा के दउरान होय अलग-अलग सड़क हादसा म पांच लोगन के मउत होगे। उहें, दू झिन गंभीर रूप ले घायल होगीन।
सक्ती जिला के हसौद म बरेकेल पुल तीर होय सड़क हादसा म दुपहिया म बइठे पिता-पुत्र के मउत होगे। उहें, एक झिन गंभीर रूप ले घायल होगीस।
उहें, कबीरधाम जिला म पाछु रतिहा एक ठिन निजी स्कूल तीर ट्रक के ठोकर ले दुपहिया म बइठे दू झिन युवक मनके मउकाच म मउत होगे।
ऐति, राजनांदगांव जिला म नादिया-मोतिपुर गांव तीर दूसर दिसा ले आवत मालवाहक गाड़ी के टक्कर ले मोटर साइकिल म बइठे एक झिन सियान के मउत होगे। उहें, एक झिन महिला गंभीर रूप ले घायल होगे।
प्रदेस के कोरिया, सूरजपुर, बलरामपुर, सरगुजा, जशपुर, कबीरधाम, पेण्ड्रा रोड अउ दुरूग संघरा एखर ले लगे जिला म अवइया अड़तालीस घंटा के दउरान सीतलहर चले के चेतावनी दे गे हवय।
मौसम विभाग ले मिले जानकारी के अनुसार उत्तर डहार ले आवत ठंडा हवा के सेती प्रदेस म मौसम के मिजाज बदल गे हवय। राजधानी रईपुर संघरा प्रदेस के अधिकांश जिला म कड़ाका के ठंडी पड़त हे। कोंडागांव जिला म न्यूनतम तापमान नौ डिग्री सेल्सियस के आसपास दर्ज करे गेहे। उहें, कुछेक जिला म सीतलहर चले के घलो खबर हे। अवइया दिन म न्यूनतम तापमान म अउ कमी आय हे संभावना हे।