प्रधानमंत्री नरेन्द्र मोदी ह किहीन हे कि ‘‘परीक्षा पे चर्चा‘‘ कारीकरम ह जम्मों क्षेत्र के लोगन मन ले मिले अनुभव के सेती अविस्मरणीय बन गेहे। एक ट्वीट संदेस म श्री मोदी ह हरेक झन ल बिसेसकर परीक्षार्थी, अभिभावक अउ सिक्षक मन ल ए बछर विचार-विमर्स करे बर अपन अनुभव ल साझा करे के सेती माई जीओवी डॉट आई एन‘‘ म आमंत्रित करीन।
प्रधानमंत्री ए महीना के सत्ताईस तारीख के परीक्षा पे चर्चा कारीकरम के छठवां संस्करण म विद्यार्थी, सिक्षक अउ अभिभावक मन करा गोठबात करही। ए कारीकरम नई दिल्ली के तालकटोरा इंडोर स्टेडियम म आयोजित करे जाही।
आयकर-छापा
आयकर विभाग के टीम ह आज रईपुर अउ दुरूग, भिलाई समेत प्रदेस के कई ठिन जिला म कारोबारी मनके लगभग बीस ठिकाना म छापामार कार्रवाई करे हे। मिले जानकारी अनुसार टीम ह रईपुर अउ दुरूग-भिलाई म कारोबारी मनके घर अउ व्यवसायिक जगह म दबिस दीन। कार्रवाई म करीबन पचास आयकर अधिकारी अउ सत्तर सुरक्षाकर्मी सामिल हरय।
बतादन कि एखर पहिली घलो प्रवर्तन निदेशालय-ईडी अउ आयकर विभाग के टीम ह प्रदेस के कई ठिन जिला मन म कारोबारी अउ अधिकारी मनके ठिकाना म छापा मारे रिहीन।
मुख्यमंत्री-शाकंभरी महोत्सव
मुख्यमंत्री भूपेश बघेल आज रईपुर म पटेल-मरार समाज डहार ले राखे गे शाकंभरी महोत्सव म सामिल होईन। ए मउका म मुख्यमंत्री ह किहीन कि पटेल-मरार समाज सब्जी के उत्पादन म अग्रणी हरय। ओमन समाज के लोगन मन ले राज्य सरकार के बाड़ी योजना के लाभ उठाय के आग्रह करीन। ओमन किहीन कि एखर ले लागत कम आही अउ आमदनी बाढ़ही।
छत्तीसगढ़िया ओलंपिक
छत्तीसगढ़िया ओलंपिक खेल के तहत राज्य स्तरीय प्रतियोगिता के आयोजन अब आठ ले दस जनवरी तक राजधानी रईपुर म करे जाही। प्रतियोगिता के उद्घाटन आठ जनवरी के बिहनिया ग्यारह बजे सरदार बलबीर सिंह जूनेजा इंडोर स्टेडियम म होही। छत्तीसगढ़िया ओलंपिक के जम्मों चौदह खेल विधा के प्रतियोगिता सरदार बलबीर सिंह जूनेजा इंडोर स्टेडियम, आउटडोर स्टेडियम बूढ़ापारा, पंडित रविशंकर शुक्ल विश्वविद्यालय खेल परिसर अउ स्वामी विवेकानंद स्टेडियम कोटा म राखे जाही।
छेरछेरा
प्रदेसभर म अन्नदान के परब छेरछेरा आज बड़ उछाह के संग मनाय जात हे। धान के नवा फसल आय के मउका म पुस माह के पुन्नी के ए परब मनाय जाथे। एमा मुख्य रूप ले धान के दान करे जाथे। बिहनिया ले लइका, सियान अउ महिला मन टोली बनाके घूम-घूम के धान मांगत रिहीन। उहें, किसान अउ दूसर गांव वाला मन घर आगू टुकना म धान राख के लोगन मन ल बांटीन। घरों-घर धान मांगे के बाद परंपरा अनुसार लोगन मन टोली बनाके डंडा नाच के घलो प्रदर्सन करीन।
छेरछेरा के मउका म मुख्यमंत्री भूपेश बघेल आज राजधानी रईपुर के मठपारा स्थित दूधाधारी मंदिर पहुंचीन। मंदिर म पूजापाठ के बाद मुख्यमंत्री ह हाथ म झोला लेके आसपास के घर मन म छेरछेरा मांगीन। मनखे मन दान स्वरूप उंखर झोला म अनाज अउ सब्जी के दान करीन। ए दउरान मुख्यमंत्री ह घलो उहां मौजूद लइका मन ल दान स्वरूप रासि भेंट करीन। एखर पहिली, मंदिर परिसर म मुख्यमंत्री ल धान ले तउले गीस। कारीकरम म गौसेवा आयोग के अध्यक्ष राजेश्री महंत रामसुंदर दास अउ विधानसभा उपाध्यक्ष संतराम नेताम समेत दूसर जनप्रतिनिधि मौजूद रिहीन।
भाजपा-छेरछेरा
भारतीय जनता पार्टी के प्रदेस इकाई ह दान के परब छेरछेरा म मुख्यमंत्री भूपेश बघेल ले प्रधानमंत्री आवास, प्रधानमंत्री गरीब कल्याण योजना के चाउर, सराबबंदी, बेरोजगारी भत्ता अउ महिला स्व-सहायता समूह के कर्ज माफी के दान देके मांग करीन हे। पार्टी के प्रदेस महामंत्री विजय शर्मा ह मुख्यमंत्री ले अपील करीन कि ओमन प्रधानमंत्री आवास योजना के तहत गरीब मन ल छत देवाय के घोसना करय। उहें, प्रदेस प्रवक्ता अउ विधायक रंजना साहू ह मुख्यमंत्री ले मांग करीन कि ओमन सराबबंदी अउ महिला स्व-सहायता समूह के कर्ज माफी के घोसना करके दान के महापरब ल सफल बनावय।
अइसने, प्रदेस प्रवक्ता संदीप शर्मा ह राज्य सरकार ले मांग करीन कि जउन चाउर प्रधानमंत्री नरेन्द्र मोदी ह राज्य के गरीब मन बर भेजे हे, ओमन ल दे जाय। ओमन किहीन कि केन्द्र सरकार डहार ले गरीबहा मन ल प्रति व्यक्ति पांच किलो अतिरिक्त अनाज पाछु तैंतीस महीना ले दे जावत हे, फेर छत्तीसगढ़ के जनता ल ए चाउर नइ मिलत हे।
अमित शाह-कोरबा
केन्द्रीय गृहमंत्री अमित शाह काली सात जनवरी के कोरबा आवत हे। जानकारी अनुसार गृहमंत्री झारखंड ले सीधा छत्तीसगढ़ पहुंचही। ओमन संगठन मंत्री अजय जामवाल, प्रदेस भाजपा अध्यक्ष अरूण साव समेत वरिष्ठ नेता मन ले चरचा करके नवंबर महीना म होवइया विधानसभा चुनाव के रणनीति घलो तियार करही। रईपुर के बाद श्री शाह कोरबा जिला बर रवाना हो जही। उहां आकांक्षी जिला मन म केन्द्रीय योजना के क्रियान्वयन के समीक्षा करही। एखर बाद श्री शाह भाजपा कार्यकर्ता मनके सभा ल संबोधित करही।
भाजपा प्रदेस अध्यक्ष अरूण साव ह आज श्री शाह के कोरबा प्रवास ल देखत सभा स्थल के निरीक्षण करीन।
भाजपा-चौपाटी निर्माण विरोध
पंडित रविशंकर शुक्ल विश्वविद्यालय परिसर म रईपुर नगर निगम डहार ले करावत चौपाटी निर्माण ल भारतीय जनता पार्टी ह अवैध अउ अनैतिक बताय हे। एला लेके पूर्व मंत्री राजेश मूणत के अगुवई म भाजपा कार्यकर्ता विरोध प्रदर्सन करत हे। उहें, चौपाटी निर्माण स्थल म भाजपा कार्यकर्ता अनिश्चितकालीन धरना म बइठ गेहे। नियम विरूद्ध निर्माण के आरोप लगावत भाजपा नेता मन न्यायालय के दुवार घलो खटखटाय हे। पूर्व मंत्री राजेश मूणत ह किहीन कि भाजपा ओ व्यवस्था के खिलाफ अनिश्चितकालीन धरना म बइठे हे, जउन गैर कानूनी हरय।
इही बीच, आज पूर्व मंत्री अजय चंद्राकर, रईपुर सांसद सुनील सोनी, अनुसूचित जाति मोर्चा के प्रांता अध्यक्ष विकास मरकाम अउ पूर्व विधायक वीरेन्द्र पांडेय समेत दूसर नेता अउ सामाजिक कार्यकर्ता धरनास्थल पहुंचीन। उहें, साईंस कॉलेज के विद्यार्थी घलो चौपाटी हटाओ अभियान म सामिल होईन।
फल/फूल-प्रदर्शनी
राजधानी रईपुर के गांधी उद्यान म काली ले नौ जनवरी तक तीन दिन के बिसेस फल-फूल अउ सब्जी मनके प्रदर्सनी लगाय जाही। प्रदर्सनी के सुभारंभ मुख्यमंत्री भूपेश बघेल करही। एमा कट फ्लावर, पिनसुटिया, इंडोर प्लांट, एरीका पॉम अउ स्नेक प्लान्ट्स के प्रदर्सनी लगाय जाही। प्रदर्सनी म पांच ले पचास साल तक के आयु के बोनसाई पौधा आकर्षण के केन्द्र होही।
उद्यानिकी विभाग, इंदिरा गांधी कृषि विश्वविद्यालय, नगर निगम रईपुर अउ निजी संस्था ‘प्रकृति की ओर सोसायटी‘ के संयुक्त तत्वाधान म राखे गे प्रदर्सनी म अच्छा किसम के फल-फूल अउ सब्जी मन बर किसान मन ल पुरस्कृत घलो करे जाही। ए प्रदर्सनी म स्टॉल मन म औषधीय पौधा मनके प्रदर्सन अउ ओखर औषधीय गुण के जानकारी के संघरा औषधीय पौधा निःशुल्क प्रदान करे जाही।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत लइका मन म इंटरनेट अउ सोशल मीडिया के प्रभाव उपर केंद्रित रइही। एखर तहत यूनिसेफ के सोशल बिहेवियर विशेषज्ञ अभिषेक सिंह ले करे गे भेंटवार्ता के दूसरा कड़ी प्रसारित करे जाही। एखर प्रसारण आकाशवाणी के रायपुर केन्द्र डहार ले काली इकतीस दिसंबर के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
अउ अब पेस हे मौसम के हाल…
मौसम विभाग ह अवइया अड़तालीस घंटा के दउरान प्रदेस के कोरिया, सूरजपुर, बलरामपुर, सरगुजा अउ ओखर ले लगे जिला मन म सीतलहर चले के चेतावनी देहे। संघरा ए जिला मन म बिहनिया कोहरा छाय रेहे के घलो संभावना जताय हे।
प्रदेस म उत्तर ले आवत सुष्क अउ ठंडा हवा के सेती अवइया दू दिन म न्यूनतम तापमान म चार डिग्री सेल्सियस के गिरावट होय के संभावना हे। मौसम विभाग अनुसार प्रदेस म काली सात जनवरी के मौसम सुष्क रेहे के सेती न्यूनतम तापमान म गिरावट आही। एखरे संग उत्तरी क्षेत्र म बिहनिया हल्का ले मध्यम घना कोहरा बन सकत हे। उहें, बस्तर संभाग के न्यूनतम तापमान म अवइया दू दिन म छह डिग्री सेल्सियस तक गिरावट आय के संभावना जताय गेहे।