प्रधानमंत्री नरेन्द्र मोदी ह किहीन हे कि जल जीवन मिशन, राज्य म हरेक घर म जल पहुंचाय के प्रमुख विकास आय। राज्य मंत्रिस्तरीय जल सम्मेलन ल आज वीडियो कान्फ्रेंस के माध्यम ले संबोधित करत प्रधानमंत्री ह कहिन कि संवैधानिक व्यवस्था म पानी ह राज्य मनके बिसय होथे। ओमन कहिन कि जल संरक्षण बर जम्मों राज्य मनके कोसित ले देस के सामूहिक लक्ष्य ल प्राप्त करे जा सकही। प्रधानमंत्री ह बतईन कि हरेक जिला म पचहत्तर अमृत सरोवर बनाय जावत हे। ओमन किहीन कि ग्राम पंचायत मन ल जल जीवन मिशन ल अपन हाथ म लेना चाही अउ मिसन पूरा होय के बाद ओमन ल ए प्रमाणित घलो करना चाही कि उंखर गांव म पूरा अउ साफ-सुथरा पानी मिल गेहे।
परीक्षा पे चर्चा
प्रधानमंत्री नरेन्द्र मोदी ह विद्यार्थी, शिक्षक अउ माता-पिता मन ले ‘‘परीक्षा पे चर्चा‘‘ कारीकरम म भाग लेके आग्रह करीन हे। परीक्षा पे चर्चा के छठवां संस्करण सत्तईस जनवरी के नई दिल्ली के तालकटोरा इंडोर स्टेडियम म राखे जाही। श्री मोदी ह किहीन कि ए कारीकरम परीक्षा के परेसानी ल कमती करे बर अउ परीक्षार्थी मनके मदद करे के तरीका उपर गोठबात करे मउका आय।
विधानसभा-अलंकरण समारोह
राज्यपाल अनुसुईया उइके ह कहिन हे कि विधानसभा एक पवित्र सदन हे, जिहां ले राज्य के विकास के रद्दा खुलथे। छत्तीसगढ़ विधानसभा डहार ले काली संझा राखे गे ‘‘उत्कृष्टता अलंकरण समारोह‘‘ म चुने गे उत्कृष्ट विधायक अउ उत्कृष्ट संसदीय पत्रकार मन ल प्रशस्ति पत्र देके सम्मानित करीन। खबर के मुताबिक बछर दू हजार इक्कीस बर ‘‘उत्कृष्ट विधायक‘‘ के रूप म सत्तापक्ष ले कांग्रेस विधायक संतराम नेताम ल सम्मानित करे गीस अउ विपक्ष ले वरिष्ठ विधायक अजय चंद्राकर ल चुने गेहे। उहेंं, उत्कृष्ट संसदीय पत्रकार बर यशवंत धोटे अउ इलेक्ट्रॉनिक मीडिया ले वरिष्ठ पत्रकार जुल्फिकार अली अउ कैमरामेन शशिकांत वर्मा ल सम्मानित करे गीस।
राज्यपाल ह अलंकरण समारोह के बाद राखे गे सांस्कृतिक संध्या म घलो सामिल होईन। समारोह के पगरइति विधानसभा अध्यक्ष डॉक्टर चरणदास महंत ह करीन। उहें, मुख्यमंत्री भूपेश बघेल अउ विधानसभा के उपाध्यक्ष संतराम नेताम ह बिसेस पहुना के रूप म मौजूद रिहीन।
कोरोना-ओमिक्रॉन
देस म कोरोना संक्रमण के मौजूदा दौर म ओमिक्रॉन के नवा वैरिएंट के परभाव महानगर मनके संगेसंग कुछेक आने राज्य मन म घलो देखे जावत हे। अइसने छत्तीसगढ़ म घलो ओमिक्रॉन के नवा वैरिएंट ले संक्रमित दू मरीज मनके पता रिहीस हे, फेर ए दूनों माईलोगिन मन ह अब ठीक होगे हे।
ए संबंध म प्रदेस के महामारी नियंत्रण के संचालक डॉक्टर सुभाष मिश्रा ह बतईन कि रईपुर निवासी ए दूनों संक्रमित माईलोगिन मन ह पाछु दिन विदेस ले आय रिहीन हे। डॉक्टर मिश्रा ह बतईन कि एमा ले एक झिन माईलोगिन इंग्लैंड ले रईपुर लहुटे रिहीन। उहें, दूसर ह हैदराबाद ले रईपुर आय रिहीन। अभी ए दूनों माईलोगिन आइसोलेशन म रेहे के बाद अब पूरा ठीका होगे हे। डॉक्टर मिश्रा ह किहीन कि ओमिक्रॉन संक्रमण ले चिंता के कोनों बात नइ हे, फेर अभी सावधानी बरतना जरूरी हवय।
नारायणपुर-बैठक
नारायणपुर म पाछु दिन धर्मांतरण ल लेके होय तनाव के बाद अब जिला म स्थिति सामान्य होगे हे। जिला म सांति अउ कानून व्यवस्था बनाय राखे के उद्देश्य ले कलेक्टर अजीत वसंत, पुलिस महानिरीक्षक सुंदरराज पी. अउ पुलिस अधीक्षक सदानंद कुमार ह जिला के जनप्रतिनिधि, समाज प्रमुख अउ व्यापारी मनके संग बइठका लीन। बइठका म मौजूद जम्मों झन लोगन मन ह जिला म पाछु दिन होय घटना के निंदा करीन। संगेसंग जम्मों जिला म सांति बनाय राखे के बात किहीन।
कलेक्टर ह किहीन कि जिला म कानून व्यवस्था बनाय राखे बर अधिकारी मनके ड्यूटी लगाय गेहे। कहूं कोनों मनखे ल संवेदनसील मुद्दा म कोनों खबर मिलथे, त ओ ह ए अधिकारी मन ल एखर सूचना दे सकत हे। उहें, पुलिस अधीक्षक ह बतईन कि जिला म सांतिपूर्ण व्यवस्था बनाय राखे बर पुलिस डहार ले सरलग पेट्रोलिंग करे जावत हे। ओमन किहीन कि कहूं सोसल मीडिया म कोनों संवेदनसील मुद्दा म आपत्तिजनक फोटू, वीडिया या कमेंट आवत हे त लोगन एखर सूचना प्रसासन ल देवय, जेखर ले एखर जांच करे जा सकय।
मुख्यमंत्री वृक्ष संपदा योजना
प्रदेस के किसान मन ल अपन जमीन उपर पेड़ लगाके एखर ले फायदा लेके उद्देश्य ले ‘‘मुख्यमंत्री वृक्ष संपदा योजना‘‘ सुरू करे गेहे। ए योजना ल लागू करे अउ आने-आने बिन्दु म चरचा करे बर वन विभाग डहार ले एक कार्यसाला के आयोजन करे गीस। कार्यसाला ल संबोधित करत वनमंडल अधिकारी विश्वेष झा ह बतईन कि ‘‘मुख्यमंत्री वृक्ष संपदा योजना‘‘ ले हितग्राही मन ल एक बछर म एक एकड़ पाछु पन्द्रह ले पचास हजार रूपिया तक के आमदनी हो सकत हे।
योजना म भाग ले बर इच्छुक किसान या संस्था के सदस्य अपन क्षेत्र म स्थित वन विभाग के कार्यालय ले रोपण बर जरूरी पौधा के जानकारी सहमति पत्र के संग दे सकत हे। ए योजना म हितग्राही मन ल पांच एकड़ जमीन म जादा ले जादा पांच हजार पौधा लगाय म सौ प्रतिसत के अनुदान दे जाही। उहें, पांच एकड़ ले जादा के जमीन म पौधा लगाय म पचास प्रतिसत के अनुदान दे जाही। ए पौधा के पेड़ बने म राज्य सरकार डहार ले एमन ल निर्धारित समर्थन मूल्य म बिसाय जाही।
अउ अब पेस हे मौसम के हाल…
प्रदेस म अचानके जाड़ बाढ़े ले जनजीवन अउ सामान्य कामकाज परभावित होय हे। बरसा, जाड़ा अउ कोहरा के सेती प्रदेस के कुछेक जिला म प्रसासन ह स्कूल मन म छुट्टी घलो घोसित कर देहे। सरगुजा संभाग के कुछेक जिला मनके स्कूल मन म छुट्टी घोसित होय के बाद रायगढ़ जिला म घलो आज ले सात जनवरी तक जम्मों स्कूल मन म छुट्टी घोसित करे गेहे। उहें, बालोद जिला म घलो आज ले सात जनवरी तक नर्सरी ले आठवीं कक्षा के लइका मन बर छुट्टी घोसित करे गेहे। खबर के मुताबिक काली छह जनवरी के छेरछेरा पुन्नी के सेती पहिलीच छुट्टी घोसित होगे हे।
मौसम विभाग के मुताबिक प्रदेस म दक्षिण-पूर्व ले नमी आवत हे। एखर सेती प्रदेस के जादा जघा म कोहरा छाए के संगेसंग बदली घलो हवय। मौसम म आए ए बदलाव के सेती प्रदेस के कई ठिन इलाका म जोरदरहा जाड़ा पड़त हे। मौसम विभाग के मुताबिक प्रदेस के तापमान म अभी अउ गिरावट हो सकत हे।
अउ अब थोरकुन समाचार सार म-
– काली छेरछेरा पुन्नी आय। ए मउका म मुख्यमंत्री भूपेश बघेल अउ विधानसभा अध्यक्ष डॉक्टर चरणदास महंत ह प्रदेसवासी मन ल के बधाई अउ सुभकामना दे हवय।
– कर्मचारी चयन आयोग डहार ले राखे गे कार्मिक अउ प्रसिक्षण विभाग के सी.एच.एस.एल. कौशल परीक्षा काली छह जनवरी के बिहनिया नौ बजे ले संझा साढ़े पांच बजे तक तीन पारी म होही। एखर बर रईपुर म तीन ठिन केन्द्र बनाय गेहे।
– छत्तीसगढ़ संस्कृत विद्यामंडलम डहार ले संचालित प्राच्य संस्कृत विद्यालय के पूर्व मध्यमा ले उत्तर मध्यमा यानि नौवीं ले बारहवीं के वार्षिक परीक्षा के समय-सारिणी घोसित कर देहे। ए परीक्षा एक ले पच्चीस मार्च तक होही।
– छत्तीसगढ़ राज्य ओपन स्कूल डहार ले अवइया मार्च-अप्रैल महीना के परीक्षा म सामिल होय बर प्रवेस के आखिरी तारीख इकतीस दिसंबर ले बढ़ाके दस जनवरी कर दे गेहे। एखर बाद ग्यारह ले पन्द्रह जनवरी तक लेट फीस के संग आवेदन जमा करे जा सकथे।
– रईपुर के जिला रोजगार अउ स्वरोजगार मार्गदर्शन केन्द्र डहार ले नौ जनवरी के बयासी पद के भर्ती बर अपन कार्यालय परिसर म रोजगार सिविर लगाय जाही।
अउ
– छत्तीसगढ़ अंशकालीन स्कूल सफाई कर्मचारी कल्याण संघ ह नियमितीकरण के मांग ल लेके आज कवर्धा म रैली निकालीन अउ मुख्यमंत्री के नाव जिला प्रसासन ल ज्ञापन सौंपीन।