मुख्यमंत्री-प्रधानमंत्री मुलाकात
छत्तीसगढ़ के मुख्यमंत्री भूपेश बघेल ह आज नई दिल्ली दउरा के बेरा प्रधानमंत्री नरेन्द्र मोदी ले भेंट करीन अउ छत्तीसगढ़ के कृषि समेत आने क्षेत्र म होवत प्रगति के जानकारी दीन। मुख्यमंत्री ह प्रधानमंत्री ल बतईन छत्तीसगढ़ म मिलेट्स के भरपूर मात्रा म उत्पादन होथे। एमा प्रधानमंत्री ह मुख्यमंत्री ल राजधानी रईपुर म मिलेट कैफे सुरू करे के सलाह दीन। भेंट के बेरा श्री बघेल ह श्री मोदी ल केन्द्र तीर लंबित छत्तीसगढ़ के राजस्व रासि ले अवगत करईन अउ ओला जल्दी देके अनुरोध करीन। संगेसंग केन्द्र तीर छत्तीसगढ़ के हिस्सा के जीएसटी के एक हजार तीन सौ पचहत्तर करोड़ अउ कोल लेवी के चार हजार एक सौ सत्तर करोड़ रूपिया लंबित हे। उहें, रेलवे कोति ले छत्तीसगढ़ ले होके चलइया कतकोन यात्री ट्रेन के अवई-जवई रद्द करे जाय के मुद्दा उठावत किहीन कि एखर ले लोगन ल असुविधा होवत हे। ओमन प्रधानमंत्री ले प्रदेस म जरूरी आने व्यवस्था के बिना ट्रेन ल निरस्त नइ करे के अनुरोध करीन।
मुख्यमंत्री-घासीदास जयंती समारोह
मुख्यमंत्री भूपेश बघेल काली बेमेतरा जिला के नवागढ़ म राखे गे राज्य स्तरीय गुरू घासीदास बाबा लोक महोत्सव अउ जयंती समारोह म संघरीन। ए बेरा म ओमन किहीन कि गुरू घासीदास बाबा के मनखे-मनखे म कोनों भेद नइ, ए विचार के सेती छत्तीसगढ़ राज्य विकास, सद्भावना, सांति अउ प्रेम के रद्दा म चलके विकास करत हे। ए बेरा म ओमन नवागढ़ म जैतखांभ अउ भवन बनाय बर एक करोड़ रूपिया देके घोसना करीन। कारीकरम म मुख्यमंत्री ह राज्य स्तरीय ओपन पंथी नृत्य प्रतियोगिता के विजेता मन ल इनाम दीन।
निर्वाचन आयोग-रिमोट
देस म कोनों भी हिस्सा ले अपन गृह अउ मूल निर्वाचन क्षेत्र बर मतदान करना संभव होही। एखर बर भारत निर्वाचन आयोग ह प्रोटोटाईप रिमोट इलेक्ट्रॉनिक वोटिंग मसीन बनाय हे, जेमा ले प्रवासी मतदाता मन ल मतदान बर अपन गृह राज्य अउ नगर जाय के झंझट ले मुक्ति मिलही। ए जानकारी मुख्य निर्वाचन पदाधिकारी रीना बाबा साहेब कंगाले ह देहे। ओमन बतईन कि आने-आने कारण ले कई घांव मतदाता वोट नइ दे पावय। रिमोट मसीन के आय ले मतदाता के निर्वाचन म जादा ले जादा भागीदारी सुनिश्चित हो सकही। आयोग ह बहु-निर्वाचन क्षेत्र प्रोटोटाईप रिमोट ईव्हीएम के कार्यप्रणाली के प्रदर्सन करे बर सबो मान्यता मिले आठ राष्ट्रीय अउ संतावन राज्यीय दल ल अवइया सोलह जनवरी के बलाय हे।
भाजपा-आरोप
भारतीय जनता पार्टी के प्रदेस महामंत्री ओ.पी. चौधरी ह राज्य कैबिनेट कोति ले काली ले गे फइसला उपर कतकोन सवाल उठाय हे। ओमन आरोप लगईन कि राज्य सरकार प्रदेस के सरकारी कर्मचारी मन ल उलझा के नवा अउ जुन्ना पेंसन योजना के बीच म उंखर रकम के दुरूपयोग करे के योजना बनावत हे। सरकार के सरत काबर लगावत हे कि सरकार ल जउन करमचारी रासि जमा कराही, उही ल जुन्ना पेंसन योजना के फायदा मिलही। श्री चौधरी ह आरोप लगईन कि सरकार स्कूल के मरम्मत के बहाना म करोड़ों रूपिया के भ्रष्टाचार करना चाहत हे। ओमन सवाल करीन कि कोरोना काल म प्रधानमंत्री नरेन्द्र मोदी ह गरीब कल्याण अन्न योजना म हरेक मनखे बर पांच किलो अलग ले चाउर हर महीना देहे, ओला राज्य सरकार कब दीही।
मरकाम-आरक्षण
प्रदेस कांग्रेस अध्यक्ष मोहन मरकाम ह आरोप लगाय हे कि भाजपा आरक्षण विधेयक म राजभवन के आड़ म राजनीति करत हे। ओमन किहीन कि एखर विरोध म कांग्रेस अवइया तीन जनवरी के रईपुर म जन अधिकार रैली निकालही। साईंस कॉलेज मैदान म प्रदेसभर ले एक लाख ले जादा युवा जुटही। श्री मरकाम ह किहीन कि कांग्रेस पार्टी मांग करत हे कि भाजपा आरक्षण विधेयक म अपन मत बतावय।
खबर के मुताबिक आरक्षण संशोधन विधेयक ल राज्यपाल के मंजूरी बर राजभवन भेजे गेहे, जउन म अभी तक दस्तखत नइ होय हे।
नववर्ष-दिशा-निर्देश
राज्य सासन ह नवा बछर के कारीकरम म ध्वनि विस्तारक यंत्र लाउड स्पीकर ल लेके दिसा-निरदेस जारी करे हे। एखर मुताबिक आज अउ काली रतिहा दस बजे ले बारह बजे तक लाउड स्पीकर बउरे के मंजूरी दे गेहे। ए संबंध म कलेक्टर अउ पुलिस अधीक्षक ल निरदेस जारी कर दे गेहे।
ओति, कोरिया जिला म नवा बछर लेके पुलिस कोति ले जांच अभियान चलाय जात हे। एमा गलत कागजात, तीन सवार, बिना आरसी, बगैर हेलमेट अउ सराब पीके गाड़ी चलइया मन उपर जुर्माना के कार्रवाई करे गीस।
इही बीच, राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल नवा बछर के बधाई अउ सुभकामना दीन हे। राज्यपाल ह किहीन कि पाछु बछर के कोरोना संकट ले सीख लेके नवा बछर बर तियार रहना चाही। कोरोना के संकट अभी टले नइ हे, एखर सेती जम्मों झन ल सरकार कोति ले जारी दिसा-निरदेस के पालन करना जरूरी हे। राज्यपाल ह किहीन कि नवा बछर म प्रधानमंत्री नरेन्द्र मोदी के अगुवई म जी-ट्वेंटी सम्मेलन भारत म राखे जाही, जेमा भारत के दुनिया म साख अउ बाढ़ही। ए सम्मेलन वसुधैव कुटम्बकम के आदर्श म आधारित हवय। नौ अउ दस सितंबर के नई दिल्ली म अवइया जी-ट्वेंटी शिखर सम्मेलन होही। एखर बइठका छत्तीसगढ़ समेत आने-आने राज्य म होही।
यूआईडीएआई-आधार
भारतीय विशिष्ट पहिचान प्राधिकरण ह केहे गेहे कि सोशल मीडिया अउ आने सार्वजनिक मंच म आधार साझा नइ होना चाही। केन्द्रीय इलेक्ट्रॉनिक्स अउ सूचना प्रौद्योगिकी मंत्रालय ह केहे हे कि आधार कारडधारी मन ल कोनों भी आने मनखे या संस्थान ल आधार ओटीपी नइ बताना चाही। एखर संगेसंग एम. आधार के पिन घलो कोनों ल बताय ले बाचना चाही। मंत्रालय ह बताय हे कि आधार कारड धारी मन ल फायदा अउ सेवा ले बर गोपनीय तरीका ले आधार ल बउरना चाही।
शहीद जवान-अंतिम संस्कार
धमतरी जिला के खरेंगा गांव के शहीद जवान मनीष धु्रव के राजकीय सम्मान के संग आज अंतिम संस्कार करे गीस। ए बेरा म जनप्रतिनिधि, सेना के अधिकारी, पुलिस जवान संग बड़ संख्या म लोगन मौजूद रिहीन।
खबर के मुताबिक मनीष धु्रव भारतीय सेना म तैनात रिहीन अउ अट्ठाईस दिसंबर के लद्दाख म ड्यूटी के दउरान शहीद होगे।
माओवादी-आत्मसमर्पण
सुकमा जिला म दू झिन माओवादी मन ह आत्मसमर्पण करीन हे। एमा ले एक माओवादी उपर एक लाख रूपिया के इनाम घोसित रिहीस। ए माओवादी मन ह अतिरिक्त पुलिस अधीक्षक ओम चंदेल अउ सीआरपीएफ के अधिकारी मनके आगू आत्मसमर्पण करीन हे। ए माओवादी सुकमा अउ दंतेवाड़ा समेत ओड़िसा म घलो रिहीन। एमन ल राज्य सासन के पुनर्वास नीति के फायदा दे जाही।
इही बीच, बीजापुर जिला के पुलिस अधीक्षक आंजनेय वार्ष्णेय ह बतईन कि सुरक्षा दल के मुश्तैदी के सेती एसो जिला म सोलह झिन माओवादी मन आत्मसमर्पण करीन हे। उहें, सुरक्षा बल ह एक सौ पैंसठ झिन माओवादी मन ल गिरफ्तार करे हे। उहें, माओवादी मन संग होय मुठभेड़ म छै झिन जवान सहीद होय हे अउ सत्ताईस जवान घायल होय हे।
लघु बचत योजना-ब्याज दर
केन्द्र सरकार ह काली ले सुरू होवत वर्तमान वित्तीय बछर के चौथइया तिमाही बर आने-आने लघु बचत योजना के ब्याज दर बढ़ा देहे। पांच बछर के राष्ट्रीय बचत योजना म ब्याज दर छह दशमलव आठ प्रतिसत ले बढ़ाके सात प्रतिशत कर दे गेहे। वरिष्ठ नागरिक बचत योजना के ब्याज दर सात दशमलव छह प्रतिशत ले बढ़के आठ प्रतिशत होगे हे। मासिक आय बचत खाता म ब्याज दर छह दशमलव सात प्रतिशत ले बाढ़के सात दशमलव एक प्रतिशत होय हे। किसान विकास पत्र म ब्याज दर सात दशमलव दू प्रतिसत होही अउ एक सौ बीस महीना म पूरा होही। ए बछर के अवधि वाले लघु बचत जमा म ब्याज दर पांच दशमलव पांच प्रतिसत ले बाढ़के सात दशमलव छह प्रतिसत होगे हे। पीपीएफ सुकन्या समृद्धि योजना अउ बचत जमा म ब्याज दर म कोनों किसम के फेरबदल नइ होय हे।
जिले की चिट्ठी
प्रादेशिक समाचार एकांश, आकाशवाणी समाचार डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मों केंद्र एक संगरा रिले करही। ए बखत के अंक म ‘‘रायगढ़‘‘ जिला के गतिविधि के संबंध म जानकारी दे जाही।