राज्य सरकार ह शासकीय अधिकारी-कर्मचारी मन ल पुराना पेंशन योजना के लाभ देके निर्णय लेहे। ए निर्णय आज मुख्यमंत्री भूपेश बघेल के अध्यक्षता म होय राज्य मंत्रिमंडल के बइठका म लीन। एखर तहत शासकीय सेवक मन ल एक अप्रैल दू हजार बाईस ले ही छत्तीसगढ़ सामान्य भविष्य निधि के सदस्य माने जाही अउ एक नवंबर दू हजार चार या उंखर बाद नियुक्ति तिथि ले इकतीस मार्च दू हजार बाईस तक एनपीएस खाता म जमा कर्मचारी अंशदान अउ ओमा मिले लाभ एनपीएस नियम के तहत देय होही। कर्मचारी मन ल राज्य सरकार के अंशदान अउ ओमा मिले लाभ जमा करे म ही पुराना पेंशन के पात्रता होही। एखर बर शासकीय सेवक मन ल एनपीएस अंतर्गत पहिली जइसन बने रेहे या पुराना पेंशन योजना के लाभ ले बर विकल्प नोटराईज्ड शपथ पत्र देना होही। ए विकल्प आखिरी अउ अपरिवर्तनीय होही। सासकीय सेवक डहार ले पुराना पेंशन योजना के विकल्प ले म एक नवंबर दू हजार चार ले इकतीस मार्च दू हजार बाईस तक एनपीएस खाता म शासन डहार ले जमा करे गे अंशदान अउ ओमा मिले लाभ ल शासन के खाता म जमा करना होही। एक अप्रैल दू हजार बाईस अउ ओखर बाद नियुक्त होवइया राज्य के शासकीय सेवक अनिवार्य रूप ले पुराना पेंसन योजना के सदस्य होही।
एखर संगेसंग मंत्रिमंडल ह प्रदेस म जुआ रोके बर कानून बनाय के संबंध म छत्तीसगढ़ जुआ प्रतिषेध विधेयक के प्रारूप ल घलो अनुमोदन करीन।
आज होय बइठका म मंत्रिमंडल ह स्कूल भवन के मरम्मत बर बिसेस योजना सुरू करे के निर्णय लेहे। ए योजना म कुल सात सौ अस्सी करोड़ रूपिया खरचा करे जाही।
मंत्रिमंडल बैठक-02
बइठका म राज्य म मिलेट उत्पादन अउ उंखर उपयोग ल बढ़ावा देके संबंध म घलो चरचा करे गीस। एखर बर कृषि, पंचायत अउ ग्रामीण विकास, स्कूल शिक्षा, खाद्य, महिला अउ बाल विकास के संगेसंग स्वास्थ्य अउ परिवार कल्याण विभाग डहार ले संयुक्त रूप ले पहल करे जाही।
बइठका म राज्य के सबो जिला म राज्य योजना के रासनकार्डधारी मन ल फोर्टिफाईड चावल बांटे के निर्णय ले गीस। एमा एपीएल कार्डधारी मन ल सामिल नइ करे गेहे। इही तरह, राष्ट्रीय खाद्य सुरक्षा अधिनियम के अंतर्गत जारी रासन कार्ड मन म अवइया जनवरी महीना ले दिसंबर दू हजार तेईस तक निःशुल्क खाद्यान्न वितरण के समान ही अंत्योदय अउ प्राथमिकता रासनकार्ड मन म निःशुल्क खाद्यान्न बांटे के निर्णय ले गीस।
आज होय मंत्रिमंडल के बइठका म दंतेवाड़ा विधायक भीमा मंडावी के मउत के घटना ले जुड़े न्यायिक जांच के रिपोर्ट घलो प्रस्तुत करे गीस।
निर्वाचन आयोग-रिमोट वोटिंग व्यवस्था
भारत निर्वाचन आयोग ह देस के प्रवासी लोगन बर रिमोट वोटिंग व्यवस्था सुरू करे के प्रस्ताव करे हे। एखर बर बहु-निर्वाचन क्षेत्र म रिमोट इलेक्ट्रॉनिक वोटिंग मसीन के उपयोग करे जाही। ए मसीन ले एक ठिन मतदान केन्द्र ले बहत्तर निर्वाचन क्षेत्र बर मतदान करे जा सकही। कहूं ए सुधार लागू होही त अपन मूल निवासी स्थान ले काम के सिलसिला म देस के अलग-अलग जगह मन म रहइया लोगन अपन निर्वाचन क्षेत्र बर मतदान कर सकही।
आयोग ह बहु-निर्वाचन क्षेत्र प्रोटोटाइप रिमोट ईवीएम के कार्यप्रणाली के प्रदर्सन बर सबो मान्यता प्राप्त आठ राष्ट्रीय अउ संतावन राज्यीय दल मन ल अवइया सोलह जनवरी के आमंत्रित करे हे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत लइका मन म इंटरनेट अउ सोशल मीडिया के प्रभाव उपर केंद्रित रइही। एखर तहत यूनिसेफ के सोशल बिहेवियर विशेषज्ञ अभिषेक सिंह ले करे गे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली इकतीस दिसंबर के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
सीबीएसई-परीक्षा
केन्द्रीय माध्यमिक शिक्षा बोर्ड-सी.बी.एस.ई. ह दसवीं अउ बारहवीं कक्षा के बोर्ड परीक्षा के समय सारिणी जारी कर देहे। दसवीं अउ बारहवीं कक्षा के परीक्षा पन्द्रह फरवरी ले सुरू होही। दसवीं कक्षा के परीक्षा इक्कीस मार्च अउ बारहवीं कक्षा के परीक्षा पांच अप्रैल तक चलही। परीक्षा बिहनिया साढ़े दस बजे ले सुरू होही। बोर्ड परीक्षा के विस्तृत सूची सीबीएसई के आधिकारिक वेबसाइट सीबीएसई डॉट जीओवी डॉट इन म उपलब्ध हे।
हीराबेन-निधन
प्रधानमंत्री नरेन्द्र मोदी के मां हीराबेन के आज अहमदाबाद के एक ठिन अस्पताल म निधन होगे। ओमन सौ बछर के रिहीन। हीरोबेन के अंतिम संस्कार आज बिहनिया गांधी नगर के मुक्तिधाम म करे गीस। प्रधानमंत्री नरेन्द्र मोदी अउ परिवार के आने सदस्य मन ह उंखर अंतिम संस्कार करीन। प्रधानमंत्री ह भावुक संदेस म कहिन कि एक ठिन सानदान शताब्दी अब भगवान के चरण म लीन होगे हे। राष्ट्रपति द्रौपदी मुर्मू, उपराष्ट्रपति जगदीप धनखड़, लोकसभा अध्यक्ष ओम बिरला, सूचना अउ प्रसारण मंत्री अनुराग सिंह ठाकुर अउ आने-आने नेता मन म प्रधानमंत्री के मां के निधन म सोक जताय हे।
ऐति, छत्तीसगढ़ के राज्यपाल अनुसुईया उइके, मुख्यमंत्री भूपेश बघेल, विधानसभा अध्यक्ष डॉक्टर चरणदास महंत, भाजपा के प्रदेस अध्यक्ष अरूण साव, पूर्व मुख्यमंत्री डॉक्टर रमन सिंह अउ नेता प्रतिपक्ष नारायण चंदेल संग आने-आने पार्टी मनके कतकोन नेता मन ह प्रधानमंत्री के मां हीराबेन के निधन म गहरा सोक जताय हे अउ उंखर परिवार के प्रति संवेदना जताय हे।
दुर्घटना
सारंगढ़-बिलाईगढ़ जिला म टिमरलगा गांव के तीर बीते रतिहा पानी ले भरे खदान म एक ठिन कार के गिरे ले सरपंच संग चार लोगन के मउत होगे। उहें, सरपंच के बेटी ह कोनों तरह तैर के अपन जान बचईस।
खबर के मुताबिक काम म सवार होके एके परिवार के पांच झिन लोगन ओड़िसा ले टिमरलगा गांव आवत रिहीन। इही दउरान टिमरलगा गांव ले पहिली कार ल रिवर्स करे के दउरान उंखर गाड़ी पानी म भरे खदान म जा गिरीस। ए हादसा म सबो लोगन डूब गे, जेमा ले चार लोगन के मउका म ही मउत होगे। घटना के जानकारी मिले के बाद पुलिस के टीम मउका म पहुंचीस अउ गोताखोर मनके मदद ले बचाव अभियान चलईस। सरपंच संग चार लोगन के सव बरामद कर ले गेहे। कार ल घलो बाहर निकाल ले गेहे।
मुख्यमंत्री भूपेश बघेल ह सड़क दुर्घटना म चार लोगन के मउत म दुख जतात कहिन कि ए घटना म मउत होय हरेक सदस्य चार-चार लाख रूपिया के मुआवजा रासि मृतक मनके परिजन ल दे जाही। ओमन घायल बालिका ल अच्छा इलाज के सुविधा देवाय के निरदेस जिला प्रसासन के अधिकारी मन ल दीन हे।
जवान-शहीद
छत्तीसगढ़ के धमतरी जिला के ग्राम खरेंगा निवासी मनीष धु्रव लद्दाख सीमा म ड्यूटी के दौरान शहीद होगे हे। मुख्यमंत्री भूपेश बघेल ह उंखर सहादत म ओमन ल नमन करत सोक ले बुड़े परिजन के प्रति अपन संवेदना जताय हे। श्री बघेल ह कहिन कि छत्तीसगढ़ के ए जाबाज़ सपूत ह भारत के सीमा के रक्षा करत अपन जान के बलिदान कर दीन। उंखर वीरता छत्तीसगढ़ के लोगन ल हमेसा गौरवान्वित करते रिही।
अउ अब थोरकुन समाचार सार म –
– राज्यपाल अनुसुईया उइके ह रईपुर के साईंस कॉलेज मैदान म राखे गे स्वदेशी मेला के समापन कारीकरम म सामिल होईन। समारोह ल संबोधित करत प्रतिभागी मन ले कहिन कि ओमन स्वदेशी मेला के प्रचार-प्रसार करके लोगन मन ल स्वदेशी उत्पाद के उपयोग करे बर जागरूक करय।
– परीक्षा पर चर्चा में भाग ले बर प्रविष्टि जमा करे के आज आखिरी तारीख हे।
– जिला रोजगार कार्यालय रईपुर के पुराना पुलिस मुख्यालय परिसर म अवइया पांच जनवरी के एक सौ पैंसठ पद म भर्ती बर प्लेंसमेंट कैम्प के आयोजन करे जाही।
अउ
– बीजापुर जिला के टी-प्वाइंट ले दू किलोमीटर दुरिहा एक ठिन शेर ल देखे गेहे। शेर के फोटो सीआरपीएफ के सीसीटीवी कैमरा म कैद होय हे।