राज्यपाल अनुसुईया उइके ह प्रदेस के बयालीस कैदी मन ल गणतंत्र दिवस के मउका म छब्बीस जनवरी के रिहा करे के प्रस्ताव के अनुमोदन कर देहे। रिहा होवइया कैदी मन म दू माईलोगिन कैदी घलो सामिल हे, जिखर उमर पचास बछर ले जादा हे अउ ओमन अपन कुल अवधि के पचास प्रतिशत सजा काट चुके हे।
खबर के मुताबिक आजादी के पचहत्तरवां बर्षगांठ के मउका म देस ह आजादी के अमृत महोत्सव मनावत हे। इही क्रम म एक ठिन बिसेस पहल करत केन्द्र सरकार डहार ले कैदी मनके कुछ श्रेणी ल बिसेस माफी दे अउ अवइया बछर छब्बीस जनवरी अउ पन्द्रह अगस्त के ओमन ल रिहा करना प्रस्तावित करे गेहे। कुछ विशेष कैदी मन ल रिहा करे के उद्देश्य जेल म अनुशासन अउ सद आचरण ल देखत प्रोत्साहन के रूप म जेल ले तुरते रिहाई के संभावना के अवसर प्रदान करना हे।
कोविड-नेजल वैक्सीन
भारत बायोटेक के नाक ले दे जाने वाला कोविड वैक्सीन ‘‘इन्कोवैक‘‘ जनवरी के चौथा सप्ताह ले बाजार म आ जही। आकाशवाणी ले खास बातचीत म कोविड टास्क फोर्स के अध्यक्ष एन.के. अरोड़ा ह बतईन कि ए नेजल वैक्सीन अट्ठारह बछर ले जादा उमर के लोगन ल बूस्टर डोज के रूप म दे जा सकही। ओमन बतईन कि प्राईवेट सेक्टर म ए वैक्सीन ह करीबन आठ सौ रूपिया के हवय। उहें, सरकार ल ए वैक्सीन सवा तीन सौ रूपिया म मिलही।
मांडविया-टीबी
केन्द्रीय स्वास्थ्य मंत्री डॉक्टर मनसुख मांडविया ह कहिन हे कि सरकार बछर दू हजार पच्चीस तक देस ले क्षय रोग ल खतम कर देना चाहत हे। ओमन बतईन कि क्षय रोग के मामला म अट्ठारह प्रतिसत के कमी आय हे।
क्षय रोग उन्मूलन परियोजना ल गति दे खातिर इंडियन ऑयल कार्पोरेशन लिमिटेड ह केन्द्र के क्षय रोग विभाग अउ उत्तप्रदेश, छत्तीसगढ़ के संग एक ठिन समझौता ज्ञापन उपर हस्ताक्षर करे हे। क्षय रोग के सबले जादा मामला उत्तरप्रदेश अउ छत्तीसगढ़ म मिलथे। डॉक्टर मांडविया ह समझौता ज्ञापन के सराहना करत कहिन कि एखर ले रोगी मनके पहिचान करे अउ उंखर बेरा म इलाज करे म सहायता मिलही।
मुख्यमंत्री-भेंट मुलाकात
मुख्यमंत्री भूपेश बघेल ह भेंट-मुलाकात कार्यक्रम के तहत आज बेमेतरा विधानसभा क्षेत्र के रांका-कठिया गांव पहुंचीन। ए मउका ओमन ह ग्राम पंचायत कुसमी ल नगर पंचायत बनाय अउ स्वामी आत्मानंद अंग्रेजी माध्यम स्कूल खोले के घोसना करीन। मुख्यमंत्री ह रांका-कठिया म स्वामी आत्मानंद अंग्रेजी माध्यम स्कूल, हायर सेकेंडरी स्कूल भवन अउ सामुदायिक भवन के निर्माण करे के संग कतकोन घोसना करीन।
एखर पहिली, काली मुख्यमंत्री ह साजा के ठेलका अउ बोरतरा म नवा महाविद्यालय, ठेलका-परपोड़ी अउ मोहगांव म स्वामी आत्मानंद अंग्रेजी माध्यम उत्कृट विद्यालय खोले के घोसना करीन। ए मउका श्री बघेल ह ग्राम ठेलका म करीबन अट्ठायासी करोड़ रूपिया के आने-आने विकास काम के लोकार्पण अउ भूमिपूजन घलो करीन।
अरूण साव-ट्रेन ठहराव
भारतीय जनता पार्टी के प्रदेस अध्यक्ष अउ बिलासपुर सांसद अरूण साव ह ट्रेन मनके आने-आने स्टेसन मन म रूके के मांग लेके रेल भवन नई दिल्ली म प्रधान कार्यकारी निदेशक देवेन्द्र कुमार अउ रेलवे बोर्ड के अधिकारी मन ले भेंट करीन। श्री साव ह घुटकु, करगीरोड कोटा, बेलगहना, टेंगनमाड़ा, खोगसरा, भनवारटंक अउ खोडरी स्टेशन मन म नर्मदा एक्सप्रेस, बिलासपुर-रीवा पैसेंजर, टाटा-नागपुर पैसेंजर, सारनाथ एक्सप्रेस, अंबिकापुर-एक्सप्रेस, हसदेव एक्सप्रेस, इंटरसिटी सुपरफास्ट एक्सप्रेस, शिवनाथ एक्सप्रेस, कुर्ला एक्सप्रेस, छत्तीसगढ़ एक्सप्रेस अउ लिंक एक्सप्रेस के ठहराव देके मांग करीन। उंखर मांग म रेलवे बोर्ड के अधिकारी मन ह तुरते कार्यवाही करे के आश्वासन दीन।
हाईकोर्ट-रोस्टर सुनवाई
छत्तीसगढ़ उच्च न्यायालय म शीतकालीन अवकाश के बाद नवा बछर म नवा रोस्टर ले सुनवाई करे जाही। ए बखत रोस्टर म आठ सिंगल, तीन डिवीजन बेंच के साथ चीफ जस्टिस संग आने-आने जज मनके छह स्पेशल बेंच म घलो सुनवाई होही। स्पेशल बेंच हर सुक्रवार के मंझनिया सवा दू बजे ले महत्वपूर्ण मामला के सुनवाई करही। नवा रोस्टर दू जनवरी ले प्रभावी होही।
होईकोर्ट के रजिस्टार जनरल डहार ले जारी अधिसूचना के अनुसार नवा रोस्टर म चीफ जस्टिस अरूप कुमार गोस्वामी के संग जस्टिस अरविंद सिंह के डिवीजन बेंच म रिट अपील, जनहित याचिका, बंदी प्रत्यक्षीकरण के संग टैक्स मामला के सुनवाई होही। उहें, दूसरा डिवीजन बेंच म न्यायधीश गौतम भादुड़ी अउ न्यायधीश नरेश कुमार चंद्रवंशी सबो सिविल, व्यावसायिक मामला के संग कंपनी अपील अउ रेंट कंट्रोल डहार ले पारित आदेश मनके सुनवाई करही। तीसर डिवीजन बेंच म न्यायाधीश संजय के. अग्रवाल अउ न्यायधीश राकेश मोहन पांडेय अपराध ले संबंधित मामला के सुनवाई करही।
नगर पालिका-अविश्वास प्रस्ताव
भाटापारा नगर पालिका म नगर पालिका अध्यक्ष सुनीता गुप्ता के खिलाफ लाय गे अविश्वास प्रस्ताव ध्वस्त होगे हे। कांग्रेस के पक्ष म सत्रह अउ भाजपा ल चौदह वोट मिलीस। कांग्रेस ह ए जीत तेरह वोट के संग चार निर्दलीय पार्षद के सेती हासिल करे हे। खबर के मुताबिक भाजपा पार्षद मन ह नगर पालिका म भ्रष्टाचार, कमीनशखोरी अउ योजना मनके संचालन म निष्क्रियता ल देखत ए अविश्वास प्रस्ताव लाय रिहीस।
सीबीएसई-प्रायोगिक परीक्षा
केन्द्रीय माध्यमिक शिक्षा बोर्ड-सी.बी.एस.ई. ह दसवीं अउ बारहवीं कक्षा के प्रायोगिक परीक्षा के कार्यक्रम के घोसना कर देहे। प्रायोगिक परीक्षा दू जनवरी ले चौदह फरवरी के बीच होही। सी.बी.एस.ई. के अनुसार दसवीं अउ बारहवीं कक्षा के विद्यार्थी मनके प्रायोगिक परीक्षा पूरा कराय खातिर स्कूल मन ल अवइया चौदह फरवरी तक के समय दे गेहे। प्रायोगिक परीक्षा के अंक अउ आंतरिक श्रेणी ल दू फरवरी ले वेबसाइट म अपलोड करना सुरू कर दे जाही अउ ए काम ह चौदह फरवरी तक चलही।
भाजपा-आरोप
भारतीय जनता पार्टी के पूर्व मंत्री केदार कश्यप ह कहिन कि बस्तर विधानसभा क्षेत्र म बड़का संख्या म ग्रामीण अउ कांग्रेस कार्यकर्ता भाजपा के सदस्यता लेवत हे। ओमन एला क्षेत्रीय संगठन महामंत्री अजय जामवाल के प्रभाव बतावत कहिन कि श्री जामवाल के सक्रियता के सेती बस्तर क्षेत्र म आम लोगन संग कांग्रेस कार्यकर्ता मन म भाजपा के उपर विश्वास बाढ़त हे। श्री कश्यप ह कहिन कि आदिवासी अंचल के लोगन मन ह समझ गेहे कि चार साल म राज्य म कांग्रेस के सरकार ह आदिवासी अउ सबो वर्ग के संग धोखाबाजी के अलावा कुछु नइ करे हे।
हाथी-मौत
जशपुर वनमंडल म आज एक ठिन अउ हाथी के मउत होगे। मिले जानकारी के मुताबिक बगीचा वन परिक्षेत्र के कुरडेग म पाछु रतिहा खेत म घूमत एक ठिन नर हाथी करेंट के चपेट म आ गे, जेखर ले ओखर मउत होगे। बगीचा वन परिक्षेत्र अधिकारी अशोक सिंह ह बतईन कि घटना के सूचना मिले के बाद वन विभाग के टीम मउका म पहुंच के जांच म जुट गेहे। बताय जात हे कि बगीचा क्षेत्र के पाट इलाका म कुछेक दिन म बीस ले पच्चीस हाथी मनके दल ल घूमत देखे गेहे।
खबर के मुताबिक पाछु एक महीना म जशपुर वनमंडल म तीन हाथी मनके मउत हो चुके हे।
अउ अब थोरकुन समाचार सार म –
– नारायणपुर जिला म जंगल कोति गे एक झिन ग्रामीण उपर भालू ह हमला कर दीस। ए हमला म ग्रामीण गंभीर रूप ले घायल होगे, जेला अस्पताल म भर्ती कराय गेहे।
– जिला रोजगार अउ स्व-रोजगार मार्गदर्शन केन्द्र दुरूग डहार ले काली उनतीस दिसंबर के दू सौ छह पद म भर्ती बर रोजगार शिविर के आयोजन करे जाही।
अउ
– जांजगीर-चांपा जिला म पुलिस ह बीस चिटफंड कंपनी मनके खिलाफ एफआईआर दर्ज करे हे। उहें, पांच चिटफंड कंपनी के खिलाफ कुर्की वारंट जारी करे गेहे।