स्वच्छता पुरस्कार
गांव मन म स्वच्छता ल बढ़ावा दे खातिर राज्य स्वच्छ भारत मिशन डहार ले चार करोड़ चैंतीस लाख रूपिया के इनाम बांटे जाही। मुख्यमंत्री भूपेश बघेल ह चुने गे ग्राम पंचायत अउ प्रतिभागी मन ल अवइया दू अक्टूबर गांधी जयंती के दिन इनाम दीहीं।
पंचायत अउ ग्रामीण विकास मंत्री टी.एस. सिंहदेव ह आज राज्य स्वच्छता पुरस्कार के तहत पन्द्रह ठिन श्रेणी म दे जाय वाले इनाम के घोसना करीन। ए मउका म ओमन किहीन कि स्वच्छता ल बढ़ावा दे खातिर आने-आने स्तर म अच्छा काम करइया वर्ग मन ल इनाम दे जाही।
पंचायत मंत्री ह बतईन कि पन्द्रह ठिन प्रतिस्पर्धात्मक इनाम के संगेसंग प्रदेस के एक ठिन जिला ल एक करोड़ रूपिया के स्वच्छता स्थायित्व पुरस्कार, तीन विकासखंड ल पचास-पचास लाख रूपिया अउ पांच ग्राम पंचायत ल बीस-बीस लाख रूपिया के बिसेस पुरस्कार दे जाही, जेखर बर अवइया तीस जुलाई ले आवेदन ले जाही। आवेदन जमा करे के आखिरी तारीख पन्द्रह अगस्त राखे गेहे।
शिक्षाकर्मी-संविलियन
राज्य सरकार ह प्रदेस के सोलह हजार शिक्षाकर्मी मनके संविलियन के आदेस जारी कर देहे। शिक्षाकर्मी मनके संविलियन एक नवंबर ले होवइया हे। राज्य मंत्रिमंडल म होय ए फइलसा के बाद सिक्षा विभाग ह काली संविलियन के आदेस जारी करीन हे। राज्य सरकार ह चार ठिन अलग-अलग बिंदु म आदेस जारी करीन हे। दू बछर के सेवा पूरा कर चुके सिक्षाकर्मी संविलियन नवंबर म होय के संगेसंग एक जुलाई दू हजार बीस के आठ बछर के सेवा पूरा चुके सिक्षाकर्मी मनके घलो संविलियन एक नवंबर ले करे जाही।
राज्य सरकार ह किहीन हे कि सिक्षक पंचायत अउ नगरीय निकाय संवर्ग नियुक्ति आदेस के विरूद्ध अगर कोनो मामला कोर्ट म हवय त उंखर उपर अभू निर्णय नइ ले जाही। कोर्ट के फइलसा के आधार म संविलियन दे जाही।
मन की बात
प्रधानमंत्री नरेन्द्र मोदी ह इतवार छब्बीस जुलाई के बिहनिया ग्यारह बजे आकाशवाणी म ‘‘मन की बात‘‘ कारीकरम म देस-बिदेस के लोगन मन ले अपन विचार साझा करही। ए ह मासिक रेडियो कारीकरम के सड़सठवां कड़ी होही। जेला आकाशवाणी अउ दूरदर्शन के जम्मों नेटवर्क म प्रसारित करे जाही। ए आकाशवाणी समाचार के वेबसाइट अउ मोबाइल ऐप म घलो उपलब्ध रइही। आकाशवाणी, डीडी न्यूज, पीएमओ अउ सूचना प्रसारण मंत्रालय के यू-ट्यूब चैनल मन म ए कारीकरम लाइव उपलब्ध रइही।
आकाशवाणी हिन्दी म ए कारीकरम के प्रसारण के तुरते बाद क्षेत्रीय भासा म एखर रूपांतरण प्रसारित करे जाही। उहें, क्षेत्रीय भाखा म संझा आठ बजे एखर पुनः प्रसारण होही।
पीएससी-परीक्षा
छत्तीसगढ़ उच्च न्यायालय म पीएससी-प्री के परीक्षा म पूछे गे प्रश्न ल लेके दायर करे गे याचिका उपर काली सुनवाई होईस। न्यायमूर्ति गौदम भादुड़ी के सिंगल बेंच ह सुनवाई करत हुए याचिकाकर्ता मन ल अवइया सत्ताईस जुलाई के बाद घलो मुख्य परीक्षा के फारम भरे के छूट दीन हे। उहें, सुनवाई के बेरा पीएससी डहार ले जवाब दे बर उपरहा बेरा के मांग ल घलो हाईकोर्ट ह मंजूर कर लीन हे। अब मामला के अवइया सुनवाई सत्रह अगस्त के होवइया हे।
खबर के मुताबिक बछर दू हजार उन्नीस-बीस म पीएससी प्री के परीक्षा म आठ ठिन प्रश्न ल लेके चैबीस झिन परीक्षार्थी मन ह हाईकोर्ट म याचिका दायर करे रिहीन।
कृषक पुरस्कार
आत्मा योजना के तहत राज्य, जिला अउ विकासखंड स्तरीय उन्नत कृषक पुरस्कार बर अवइया इकतीस अगस्त तक आवेदन मंगाय गेहे। ए पुरस्कार कृषि, उद्यानिकी, पशुपालन अउ मछरी पालन के क्षेत्र म दे जाही। चयनित किसनहा मन ल इनाम के रासि अउ प्रसस्ति पत्र देके सम्मानित करे के संगेसंग राज्य अउ जिला स्तर म दस-दस अउ विकासखंड स्तर म पांच झिन किसनहा मन ल चुने जाही।
कोरोना-मरीज
प्रदेस म आज घलो आने-आने जिला ले कोरोना संक्रमित नवा मरीज मिले हे। राजधानी रईपुर म आज संझा तक बीस ले जादा कोरोना मरीज मनके पहिचान करे गेहे। एमा रईपुर जिला अस्पताल के सिविल सर्जन अउ उंखर पत्नी घलो सामिल हे। उहें, रईपुर पुलिस कंट्रोल रूम के तीन झिन लोगन के रिपोर्ट घलो पाॅजिटिव आय हे।
ऐति, दुरूग जिला म आज बीएसएफ के सोलह झिन जवान सहित अट्ठारह लोगन मनके कोरोना संक्रमित होय के पुष्टि होय हे। एखर अलावा आने-आने दू मरीज मन म एक झिन माईलोगिन सब्जी बेचइया अउ एक मनखे ह लक्ष्मी नगर भिलाई के रहइया हे।
इही बीच, दुरूग जिला प्रसासन डहार ले कोरोना संक्रमण के बाढ़त मामला ल देखत सैंपलिंग के संख्या ल आज ले दुगुना कर दे गेहे।
उहें, राजनांदगांव जिला म मोहला मानपुर के कोहका थाना म तैनात आईटीबीपी के सत्रह झिन जवान घलो कोरोना संक्रमित पाय गेहे। ए सबो जवान मन अभी हाले म दूसर राज्य ले आय हे। एखर अलावा एक महिला स्वास्थ्यकर्मी म घलो कोरोना संक्रमण पाय गेहे।
ओति, जांजगीर-चांपा जिला के हसौद म आज छह झिन नवा कोरोना संक्रमित मरीज मिले हे, जेमा तीन माईलोगिन अउ दू झिन लइका सामिल हे।
हत्या
बिलासपुर जिला के सीपत थाना क्षेत्र म एक झिन जवान लइका ह अपने परिवार के पांच झिन मनखे के हत्या कर दीस। एखर बाद ओ खुद ह ट्रक के आगू कूद के आत्महत्या कर लीस।
जानबा के मुताबिक मटियारी गांव के जवान लइका रोशन सूर्यवंशी ह अपन दाई-बाबू, दू झिन भाई अउ एक झिन बहिनी के कुल्हाड़ी ले हत्या कर दीन। घटना के बाद आरोपी ह घर के बाहिर निकलीस अउ ट्रक के आगू कूद गीस, जेखर बाद ओखर मउत होगे।
ऐति, घटना के सूचना मिले के बाद मउका म पहुंचे पुलिस ह जांच सुरू कर दीस हे।
माओवादी-लूट
दंतेवाड़ा जिला म माओवादी मन ह आज मालगाड़ी ल रोक के गार्ड ले वाॅकी-टाॅकी लूट लीन।
पुलिस अधीक्षक अभिषेक पल्लव ह घटना के पुष्टि करत बतईन कि भैरमगढ़ एरिया कमेटी के माओवादी मन ह भांसी-कमालूर अउ नेरली-भांसी के बीच दू ठिन जघा म पटरी के बीच म बैनर लगा के मालगाड़ी ल रोकीन। एखर बाद माओवादी मन ह गार्ड ले पूछताछ करे के बाद ओखर तीर रखे वाॅकी-टाॅकी ल लेके भाग गीन। माओवादी मन ह बैनर-पोस्टर म अवइया छब्बीस जुलाई ले तीन अगस्त तक सहीद सप्ताह मनाय के ऐलान करीन हे।
हाथी-मौत
जशपुर जिला के तपकरा इलाका म आज करेंट लगे ले एक हाथी के मउत होगे। वन विभाग ए मामला के जांच म जुट गेहे।
जानबा के मुताबिक एक झिन किसनहा अपन घर के बाड़ी ल जंगली जानवर मन ले बचाय बर बिजली तार बिछा के राखे रिहीस। पाछु रतिहा ए क्षेत्र म हाथी भटक के तार के संपर्क आ गे, जेखर ल मउका म ही ओखर मउत होगीस। ऐति, घटना के सूचना मिले के बाद तपकरा वन विभाग के टीम मउका म पहुंचीस अउ किसान के खिलाफ वन्यप्राणी सुरक्षा अधिनियम के तहत मामला दरज करके कार्रवाई करत हे।
स्पंदन अभियान
महासमुंद जिला म स्पंदन अभियान के चलत पुलिस अधीक्षक प्रफुल्ल कुमार ठाकुर ह पुलिस करमचारी मन ले गोठबात करीन। ए बेरा म ओमन ह उंखर मनके समस्या ल घलो सुनीन।
ए अभियान के तहत रक्षित केन्द्र महासमुंद म रक्षित निरीक्षक नीतीश आर नायर के अगुवई म जनरल परेड करे गीस। संगेसंग पुलिस अधीक्षक ह परेड अउ ड्रिल के निरीक्षण करके जवान मन ल उंखर मनके अच्छा वेसभूसा बर इनाम घलो दीन।
बुनकर-पुरस्कार
प्रदेस म स्वतंत्रता संग्राम सेनानी स्वर्गीय बिसाहू दास महंत के नाव म सर्वश्रेष्ठ बुनकर पुरस्कार योजना सुरू करे जाही। ए घोसना मुख्यमंत्री भूपेश बघेल ह काली स्वर्गीय महंत के पुण्यतिथि के मउका म आयोजित करे गे श्रद्धांजलि सभा म करीन।
बतादन कि राज्य सरकार डहार ले ए पुरस्कार ल प्रदेस म बुनकर मन ल प्रोत्साहित करे बर दे जाही।
राजनांदगांव-स्वतंत्रता समारोह
राजनांदगांव जिला म ए बछर पन्द्रह अगस्त म होवइया स्वतंत्रता दिवस समारोह म स्कूल अउ कालेज के पढ़ईया लइका अउ कैडेट मन परेड म सामिल नइ होही। म्युनिस्पल स्कूल मैदान म होवइया मुख्य समारोह म सिरिफ ध्वजारोहण, परेड अउ सलामी होही। कलेक्टर टोपेश्वर वर्मा ह एखर बारे म दिसा-निरदेस जारी कर देहे। ओमन ह ए संबंध म एक ठिन बइठका लेके अधिकारी मन ल जम्मों तैयारी बेरा म पूरा करे के निरदेस दीन।
स्कूल शिक्षा-एंड्रायड ऐप
प्रदेस म स्कूल शिक्षा विभाग ह एक ठिन एंड्रायड ऐप तियार करत हे, जेमा सबो प्रकार के पाठ्य सामग्री उपलब्ध होही। ए ऐप ल इंटरनेट के माध्यम ले कोनो भी सिक्षक या फेर लइका मन डाउनलोड करके कभू भी बिना इंटरनेट के आॅफ लाइन घलो देख सकही। ए ऐप ल अवइया पन्द्रह अगस्त तक लांच करे जाही।
ए जानकारी स्कूल सिक्षा विभाग के प्रमुख सचिव डाॅक्टर आलोक शुक्ला ह यूनिसेफ डहार ले आयोजित – ‘डिजिटल टाउन हाॅल फाॅर चिल्ड्रन‘ बिसय म आयोजित वेबिनार म दीन। श्री शुक्ला ह बतईन कि ‘पढ़ई तुंहर दुआर‘ आॅनलाईन सिक्षा ही नइ, बल्कि लइका मनके दुआरी तक सिक्षा पहुंचाय के एक ठिन माध्यम घलो हे। ओमन बतईन कि राज्य सरकार डहार ले ‘सीजी स्कूल डाॅट‘ इन नाव के एक ठिन पोर्टल बनाय गेहे, जेमा राज्य के पहुंचविहीन क्षेत्र म जिहां इंटरनेट के समस्या हे, जिखर करा मोबाइल फोन नइ हे, ओमन बर दूसरा विकल्प उपर घलो काम करे जात हे।
आकाशीय बिजली-दिशा/निर्देश
राज्य सरकार ह आकाशीय बिजली अउ वज्रपात ले बांचे बर दिसा-निरदेस जारी करीन हे। राष्ट्रीय आपदा प्रबंधन प्राधिकरण डहार ले जारी करे गे गाईड-लाइन के अनुसार राज्य के सबो जिला ल जरूरी व्यवस्था अउ कार्रवाई करे बर निरदेस दीन हे। जारी निरदेस म जिला स्तर म आकाशीय बिजली अउ वज्रपात ले बचे बर स्थानीय भाखा म आने-आने सुरक्षा युक्ति के प्रदर्सन करे अउ लोगन मन ल बचाव के प्रचार सामग्री उपलब्ध कराय बर किहीन हे।
