प्रधानमंत्री नरेंद्र मोदी ह कीहिन हे कि वीर बाल दिवस भारतीय मन ल विश्व म अपन पहिचान उपर गर्व करे के अवसर दीही। आज नई दिल्ली म पहलइया वीर बाल दिवस के अवसर उपर आयोजित कार्यक्रम ल संबोधित करत प्रधानमंत्री ह कीहिन कि वीर बाल दिवस के आयोजन लोगन मन ल भविष्य बर प्रेरित करे के अवसर आय। सिक्ख गुरू मनके परंपरा एक भारत श्रेष्ठ भारत के विचार ह लोगन मन बर प्रेरणा बनही।
गौरतलब हे कि ए बछर नौ जनवरी के गुरू गोविंद सिंह जी के प्रकाश पर्व के दिन श्री मोदी ह घोषणा करे रीहिस हे कि छब्बीस दिसंबर के गुरू गोविंद सिह के बेटा साहिबजादा बाबा जोरावर सिंह अउ बाबा फतेहसिंह के शहादत ल वीर बालदिवस के रूप म मनाय जाही। ये अवसर म प्रधानमंत्री ह लगभग तीन सौ लईका मन डहार ले प्रस्तुत करे गे शबद कीर्तन म भाग लीन। उंहे तीन हजार लईका मनके मार्च पास्ट घलो रवाना करीन।
स्वास्थ्य मंत्रालय मॉकड्रील
केंद्र सरकार ह कई ठन देश मन म कोविड के बढ़त संक्रमण के सेती काली देशभर म स्वास्थ्य सुविधा मनके मॉकड्रील करवाय के निर्णय लेहे । स्वास्थ्य मंत्रालय ह सबो राज्य अउ केंद्रशासित प्रदेश मन म एला करे बर केहे हे। एखर उद्देश्य स्वास्थ्य संस्था मन म कोविड प्रबंधन के तैयारी सुनिश्चित करना आय। मॉकड्रील के दउरान स्वास्थ्य सुविधा, बिस्तर, डॅाक्टर, नर्स, अउ स्वास्थ्यकर्मी मनके पर्याप्त उपलब्धता मन उपर विशेष ध्यान दे जाही। संगेसंग एंबुलेंस, जांच सुविधा अउ मेडिकल ऑक्सीजन जइसे जीवन रक्षक सुविधा मनके उपलब्धता सुनिश्चित करे उपर घलो ध्यान दे जाही।
एति कोविड के नवा वेरिएंट के खतरा ले बचाव बर स्वास्थ्य विभाग ह तैयारी शुरू कर देहे। राजनांदगांव म स्वास्थ्य विभाग ह कोविड केयर सेंटर अउ आइसोलेट वार्ड मनके निरीक्षण करीन। जिला के मुख्य चिकित्सा अउ स्वास्थ्य अधिकारी डॅाक्टर ए.के. बंसोड़ ह बताइन कि कोरोना संक्रमण के नवा वेरिएंट से डरे के जरूरत नइ हे। तभो सावधानी बरतना जरूरी हे। ओमन लोगन मन ल अपील करीन कि भीड़भाड़ वाले जगा ले बाचय अउ मास्क के उपयोग करय।
मुख्यमंत्री मुआवजा राशि
मुख्यमंत्री भूपेश बघेल ह आज रायपुर म वीडियो कॉन्फ्रेसिंग के जरिया पच्चीस बछर ले भू अर्जन के मुआवजा राशि के इंतजार करत बलरामपुर रामानुजगंज जिला के चौवन किसान मन ल करीब सात करोड़ रूपिया के मुआवजा राशि के ऑनलाईन भुगतान करीन। संगेसंग ओमन जिला के दू हजार चौरानबे हितग्राही मन ल चिटफंड कंपनी ले वसूल करे गे राशि अउ राजस्व पुस्तक परिपत्र के तहत करीब सात करोड़ अड़तीस लाख रूपिया के सहायता राशि घलो वितरित करीन।
प्रदेश प्रभारी बैठक
अखिल भारतीय कंाग्रेस कमेटी के महासचिव अउ प्रदेश प्रभारी कुमारी शैलजा ह आज राजीव भवन म कंाग्रेस कार्यकारिणी के बइठका म शामिल होइन। बइठका म मुख्यमत्रंी भूपेश बघेल प्रदेश कंाग्रेस अध्यक्ष मोहन मरकाम, मंत्री रविंद्र चौबे, कवाासी लखमा, डॅाक्टर प्रेमसाय सिंह टेकाम सहित पार्टी के वरिष्ठ पदाधिकारी मन शामिल होवत हे। बइठका म हाथ से हाथ जोड़ो अभियान अउ कंाग्रेस के प्रस्तावित महाधिवेशन समेत दूसर संगठनात्मक मुद्दा मन उपर चर्चा करे जात हे।
राजीव भवन पहुंचे ले पहिली पार्टी कार्यकर्ता मन डहार ले कुमारी शैलजा के भव्य स्वागत होइस । ए दउरान बस्तर ल आये कलाकार मन लोक पारंपरिक नृत्य पेस करके प्रदेश प्रभारी के अभिनंदन करीन।
शासकीय भवन गोबर पेंट
लोक निर्माण विभाग ह गौठान मन म गोबर ले उत्पादित प्राकृतिक पेंट ल विभागीय निर्माण कार्य मनके एसओआर म शामिल कर लेहे। लोक निर्माण विभाग के प्रमुख अभियंता ह अधिकारी मन ल सबो शासकीय भवन के रंग रोगन म केमिकल पेंट के बदला गोबर ले बनने वाला प्राकृतिक पेेंट ल अनिवार्य रूप ले उपयोग करे के निर्देश देहे।
बतादन कि गोबर ले प्राकृतिक पेंट के उत्पादन के शुरूआत रायपुर जिला म स्थित हीरापुर जरवाय गौठान ले होय हे। उंहे गोबर ले प्राकृतिक पेंट बनाय के यूनिट कंाकेर जिला के चारामा म लग चुके हे।
मंगलराम उसेंडी निधन
कोंडागांव के पूर्व विधायक अउ भाजपा के पूर्व मंत्री लता उसेंडी के पिता मंगलराम उसेंडी के रायपुर म निधन होगे। ओमन लंबा बेरा ले बीमार रीहिन अउ उंखर इलाज रायपुर के एक ठिन निजी अस्पताल म चलत रीहिस। श्री उसेंडी बछर उन्नीस सौ नब्बे म अविभाजित मध्यप्रदेश के सुंदरलाल पटवा सरकार म विधायक रीहिन। भाजपा के वरिष्ठ विधायक बृजमोहन अग्रवाल ह श्री उसेंडी के निधन उपर शोक व्यक्त करीन हे।
आदिवासी समुदाय-रमन सिंह
छत्तीसगढ़ के बारह जाति मन ल आदिवासी समुदाय म शामिल करे संबंधी विधेयक लोकसभा म पारित होय ले सवरा समाज के लोगन मन पूर्व मुख्यमंत्री डॅाक्टर रमनसिंह ले भेंटकर उंखर आभार व्यक्त करीन। ओमन डॅाक्टर रमनसिंह ले राज्यसभा म आगामी बजट सत्र म ये बिल ल पास कराय के निवेदन घलो करीन।
राज्यपाल-क्रिकेट टूर्नामेंट
राज्यपाल अनुसूइया उइके ह राजधानी रायपुर के सुभाष स्टेडियम म पुष्करणा प्रीमियम लीग क्रिकेट टूर्नामेंट के समापन कार्यक्रम म सामिल होइन। ये अवसर म राज्यपाल ह कीहिन कि खेल से मानसिक अउ शारीरिक स्वास्थ्य ल बढ़ावा मिलथे अउ नेतृत्व करे के क्षमता घलो विकसित होथे। ओमन कीहिन कि छत्तीसगढ़ म खेल के प्रति बाढ़त रूचि अउ लगातार प्रतिस्पर्धा मनके आयोजन ले अच्छा खिलाड़ी मन निकल के आवत हे। राज्यपाल ह खेल के क्षेत्र म बेटी मन ल पर्याप्त अवसर उपलब्ध कराय के आवश्यकता बताइन।
कंाग्रेस नेता हत्या-गिरप्तार
बिलासपुर म पाछू दिन म कांग्रेस नेता संजू त्रिपाठी के हत्या के मामला म पुलिस ह दू झिन अउ आरोपी मन ल उत्तरप्रदेश ले गिरप्तार करे हे।ए मामाला म पुलिस ह अब तक मृतक के माता-पिता, भाई अउ पत्नी समेत सोलह झिन आरोपी मन ल गिरप्तार कर चुके हे। गौरतलब हे कि कंाग्रेस नेता संजू त्रिपाठी के बीते चौदा दिसंबर के बिलासपुर के सकरी बायपास करा गोली मारके हत्या कर देगे रीहिस।
कंाग्रेस महारैली भाजपा बैठक
आरक्षण संशोधन विधेयक ल लेके प्रदेश कंाग्रेस आगामी तीन जनवरी के राजधानी रायपुर म महारैली निकालही। रायपुर म पत्रकार मनले चर्चा करत मुख्यमंत्री भूपेश बघेल ह कीहिन कि आरक्षण बिल उपर राज्यपाल डहार ले मंागे गे दस ठिन सवाल मनके जवाब शासन डहार ले भेज दे गेहे। फेर एखर बाद घलो आरक्षण बिल उपर राज्यपाल डहार ले हस्ताक्षर नही करे जात हे। एला देखत तीन जनवरी के पार्टी डहार ले महारैली निकाले जाही।
उंहे भारतीय जनता पार्टी के रायपुर इकाई डहार ल आगामी उनतीस दिसंबर के अनियमितता अउ भ्रष्टाचार सहित दूसर विषय मन ल लेके रायपुर नगर निगम के घेराव करे जाही। ए संबंध म काली एकात्म परिसर म भाजपा पदाधिकारी अउ कार्यकर्ता मनके बइठका होइस। बइठका म सांसद सुनील सोनी, वरिष्ठ विधायक बृजमोहन अग्रवाल अउ पूर्व मंत्री राजेश मूणत सहित पार्टी के वरिष्ठ नेता मन शामिल होइन।
अउ अब थोरकुन समाचार सार म –
– राज्य शासन ह राजधानी रायपुर म अधूरा बने स्काई वॉक निर्माण प्रकरण म प्रथम दृष्टया अनियमितता पाये जाय उपर ये मामला के जांच एसीबी अउ ईओडब्लू ल सौंपे के निर्णय लेहे।
– गरियाबंद जिला के फिंगेश्वर नगर पंचायत उपाध्यक्ष रूखमणी मांडले के काम ले असहमत सात झन पार्षद मन आज डिप्टी कलेक्टर ल अविश्वास प्रस्ताव पत्र सौंपे हे।
– बलरामपुर पुलिस ह वाहन खरीदी के मामला म करीब चालीस लाख रूपिया के ठगी अउ धोखाधड़ी के आरोप म एक ठन निजी कंपनी के महिला डायरेक्टर सहित पांच झन ल गिरप्तार करे हे।
– जांजगीर-चंापा जिला के बहेराडीह म आयोजित किसान महोत्सव के दूसरइया दिन स्कूली लईका मन रंगारंग कार्यक्रम के प्रस्तुती दीन। उंहें पाचं सौ महिला मन सुआ गीत म सामूहिक नृत्य घलो करीन।
– राजनंादगंाव जिला के खुर्सीटिकुल गांव म अज्ञात वाहन के टकराय ले एक झन मनखे के मउत होगे।
– रायगढ़ के लोइंग मार्ग म अज्ञात वाहन के चपेट म आय ले एक झन युवक के मउकाच म मउत होगे।