केन्द्रीय मंत्रिमंडल ह निःशुल्क खाद्यान्न देवाय के सहुलियत ल दिसंबर दू हजार तेईस तक बढ़ा देहे। उपभोक्ता कार्य, खाद्य अउ सार्वजनिक वितरण मंत्री पीयूष गोयल ह बतईन कि एमा दू लाख करोड़ रूपिया के उपरहा खरचा आही, जेला केन्द्र सरकार ह उठाही।
केन्द्र ऑक्सीजन आपूर्ति
केन्द्र सरकार ह सबो राज्य अउ केन्द्रसासित प्रदेस मन ले कोविड के प्रबंधन बर मेडिकल ऑक्सीजन के सरलग देवई तय राखे बर किहीन हे। राज्य अउ केन्द्रसासित प्रदेस मन ल पठोय गे अपन पाती म स्वास्थ्य मंत्रालय ह वेंटिलेटर असन जीवन रक्षक जरूरी उपकरण मन ल राखे बर घलो किहीन।
उहें, स्वास्थ्य मंत्री टी.एस. सिंहदेव ह जम्मों विश्व म कोरोना संक्रमण के बाढ़त मामला ल देखत प्रदेसवासी मन ल कोविड प्रोटोकॉल ल माने के अपील करीन हे। ओमन काली वरिष्ठ विभागीय अधिकारी मनके बइठका लेके कोरोना के जांच, इलाज, एखर ले बाचे अउ नियंत्रण बर जम्मों व्यवस्था ल दुरूस्त करे बर किहीन। ओमन आरटीपीसीआर टेस्ट के माध्यम ले कोरोना के जांच के संगे ऑक्सीजन किट, वैक्सीन अउ दवई-पानी के ए सब के पर्याप्त व्यवस्था राखे के निरदेस दीन।
इही बीच, प्रदेस म काली एक हजार तीन सौ ले जादा सैंपल मनके जांच करे गीस, जेमा रईपुर जिला ले दू झिन अउ दुरूग जिला ले एक झन के पॉजिटिव रिपोर्ट आय हे। एला मिलाके राज्य म कोरोना संक्रमित मनके संख्या बाढ़के सात होगे हे।
उहें, प्रदेस म कोरोना टीकाकरण अभियान जारी हे। अब तक राज्य म पांच करोड़ तीन लाख बैसठ हजार ले जादा टीका लग गे हवय।
उपचुनाव-नामांकन जांच
राज्य के आने-आने जिला के नगर पालिक निगम, नगर पालिका परिषद, नगर पंचायत अउ त्रिस्तरीय पंचायत उपचुनाव बर आज नामांकन पत्र मनके जांच करे गीस। छब्बीस दिसंबर तक उम्मीदवार मन नाव वापस ले सकत हे। इहा ए बतादन कि राज्य के बारह ठिन जिला म तीन ठिन नगर पालिक निगम, चार ठिन नगर पालिका परिषद अउ नगर पंचायत म पन्द्रह ठिन वार्ड पार्षद बर उपचुनाव होवत हे। अइसने, त्रि-स्तरीय पंचायत उपचुनाव बर एक जिला पंचायत सदस्य, एक सौ नौ सरपंच अउ पांच सौ अड़सठ पंच पद बर उपचुनाव होवत हे।
इही बीच, स्वतंत्र अउ निष्पक्ष चुनाव खातिर राज्य निर्वाचन आयोग डहार ले तैंतीस झिन सामान्य ऑर्ब्जवर मन ल ट्रेनिंग दे गीस। ट्रेनिंग बेरा राज्य निर्वाचन आयुक्त ठाकुर रामसिंह ह एमन ल जरूरी मार्गदर्शन दीन।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी ले ‘‘मन की बात‘‘ कारीकरम म देस-बिदेस के श्रोता मन ले अपन विचार बांटही। ए हर ए कारीकरम के छियानवां अउ ए बछर के आखिरी कड़ी होही। ए कारीकरम ल आकाशवाणी, दूरदर्शन, आकाशवाणी समाचार के वेबसाइट अउ न्यूज ऑन एआईआर मोबाइल ऐप के नेटवर्क म प्रसारण करे जाही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल म घलो ए कारीकरम के सीधा प्रसारण होही। आकाशवाणी ले हिन्दी प्रसारण के बाद ए कारीकरम ल क्षेत्रीय भासा म प्रसारित करे जाही।
इही बीच, प्रधानमंत्री ह पाछु महीना के मन की बात कारीकरम म आधारित एक ठिन बुकलेट साझा करे हे, जेमा भारत के जी-ट्वेंटी के पगरइति, अंतरिक्ष म सरलग प्रगति अउ वाद्ययंत्र के निर्यात यानि देस ले बाहर पठोय म बढ़ोतरी जइसन बिसय सामिल हवय।
वर्ल्ड कप हॉकी-ट्रॉफी
देस के सोलह ठिन राज्य ले होवत हॉकी विश्व कप के ट्रॉफी आज छत्तीसगढ़ पहुंचीस। रईपुर म मुख्यमंत्री भूपेश बघेल ह ए ट्रॉफी के अनावरण करीन अउ भारत ल विश्व विजेता बने बर सुभकामना दीन। ए दउरान हॉकी के क्षेत्र म सुघ्घर योगदान देवइया छत्तीसगढ़ के अंतर्राष्ट्रीय खिलाड़ी उपस्थित रिहीन। रईपुर के बाद अब ए ट्रॉफी ल भुवनेश्वर सोज पठोय गेहे।
इहा ए बतादन कि ओड़िसा म अवइया तेरह ले उनतीस जनवरी तक एफआईएच ओड़िसा मेन्स वर्ल्ड कप होही। ए प्रतियोगिता ह भुवनेश्वर अउ राउरकेला म होही।
राज्यपाल-प्रतिनिधिमंडल
प्रदेस के जनजातीय समुदाय के विधायक मन ह राज्यपाल अनुसुईया उइके ले राज्य विधानसभा डहार ले पारित आरक्षण संशोधन विधेयक म हस्ताक्षर करे के आग्रह करे हे। स्कूल शिक्षा मंत्री प्रेमसाय सिंह टेकाम के अगुवई म विधायक मनके एक ठिन प्रतिनिधिमंडल ह ए मुद्दा ल लेके राजभवन म राज्यपाल ले भेंट करीन अउ अपन बात राखीन। ए मउका म संसदीय सचिव शिशुपाल सोरी, विधायक डॉक्टर लक्ष्मी धु्रव, गुलाब कमरो समेत आने-आने विधायक मौजूद रिहीन।
एम्स किडनी प्रत्यारोपण
रईपुर स्थित अखिल भारतीय आयुर्विज्ञान संस्थान-एम्स म पहला किडनी प्रत्यारोपण काली करे गीस। कबीरधाम के रहवइया एक झिन मनखे ल उंखर मां के किडनी प्रत्यारोपित करे गीस। रोगी के हालत स्थित हे अउ ओला डॉक्टर मनके निगरानी म राखे गेहे। मरीज के उपचार आयुष्मान भारत योजना के चलत मुफत म करे गेहे।
एम्स के निदेसक प्रोफेसर डॉक्टर नितिन एम. नागरकर ह ए जटिल ऑपरेसन के सफलता बर जम्मों टीम ल बधाई दीन हे।
डाक विभाग-आधार शिविर
भारतीय डाक विभाग डहार ले अवइया छब्बीस ले इकतीस दिसंबर तक दुरूग के मेन पोस्ट आफिस अउ भिलाई-वन के उपडाकघर म आधार सिविर लगाय जाही। ए सिविर म बिहनिया आठ बजे ले रतिहा आठ बजे तक नवा आधार पंजीयन करे के संगे लइका मनके बायोमैट्रिक मुफ्त करे जाही। आधार संबंधित दूसर कोनों सुधार बर पचास ले सौ रूपिया सुल्क ले जाही।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ ल काली संझा छह बज के पांच मिनट ले छह बजके दस मिनट तक प्रसारित करे जाही। ए कारीकरम ल छत्तीसगढ़ स्थित आकाशवाणी के सबो केन्द्र रिले करही। ए बखत के अंक म ‘‘बालोद‘‘ जिला के गतिविधि बारे म जानकारी दे जाही।
हत्या-आरोपी गिरफ्तार
कवर्धा के लापता पत्रकार अउ आरटीआई कार्यकर्ता विवेक चौबे के हत्या के मामला के खुलासा करत पुलिस ह चार झिन आरोपी मन ल गिरफ्तार करे हे। पुलिस अधीक्षक डॉक्टर लाल उमेद सिंह ह बतईन कि सबो आरोपी मन ल जेल भेज दे गेहे। आरोपी मन ह पत्रकार के हत्या करके उंखर लास ल जंगल म जला दे रिहीस अउ उंखर फटफटी के घलो टुकड़ा करके ओला भूईंया भीतरी दबा दे रिहीस।
कार्यशाला
छत्तीसगढ़ रीजनल साईंस सेंटर डहार ले लइका मन बर रईपुर म एयरो मॉडलिंग कार्यशाला के आयोजन करे गीस। एमा पढ़ईया लइका मन ह एयरोप्लेन के विज्ञान ल समझीन अउ मॉडल बनाके एखर खुदे अनुभव करीन। ए कार्यसाला म स्वामी आत्मानंद शासकीय उत्कृष्ट अंग्रेजी माध्यम स्कूल माना कैम्प के पढ़ईया लइका सामिल होईन। ए कार्यसाला के उद्देश्य नवा खोज अउ प्रायोगिक क्रियाकलाप ल लइका मन स्वयं करके सीखय ए प्रक्रिया ल बढ़ावा देना हे।
अउ अब थोरकुन समाचार सार म –
– केन्द्र सरकार ह लोगन मन ल प्रधानमंत्री आयुष्मान भारत स्वास्थ्य अवसंरचना मिशन के ‘‘लोगो‘‘ तैयार करे म सहभागिता बर नेवते हे। स्वास्थ्य मंत्रालय के मुताबिक विजेता ल एक लाख रूपिया के नकदी पुरस्कार मिलही।
– स्वतंत्रता संग्राम सेनानी भारतरत्न पंडित मदनमोहन मालवीय अउ पूर्व प्रधानमंत्री भारतरत्न अटल बिहारी वाजपेयी के जयंती के पूर्व संध्या बेरा म राज्यपाल अनुसुईया उइके ह ओमन ल सुरता करत नमन करीन हे।
– राज्यपाल ह प्रभु यीशु के जनम दिन क्रिसमस के मउका म प्रदेसवासी मन ल बधाई अउ सुभकामना दीन हे।
– सुकमा जिला के चिंतलनार साप्ताहिक बाजार तीर सुरक्षा बल मन माओवादी मन डहार ले लगाय गे दू ठिन आईईडी बरामद करे हे। फेर जवान मन ए दूनों आईईडी ल ब्लास्ट करके नष्ट कर देहे।
– बीजापुर जिला के कुटरू गांव म इंद्रावती नंदियां म नहावत बेरा दू झिन नारी-परानी के पानी बुड़े ले मउत होगे।
अउ
– कोंडागांव म सुशासन सप्ताह के चलत ‘‘प्रशासन गांव की ओर‘‘ कार्यशाला राखे गीस। एमा जनसिकईत के निवारण, सेवा देवइया संबंधी आवेदन पत्र मनके निपटारा करे के संगे सार्वजनिक सेवा मन ल सुघ्घर ढंग ले देवाय बर जोर दे गीस।