मुख्यमंत्री मितान योजना के तहत अब लोगन मन ल घर बइठे पैनकार्ड बनवाय के सुविधा मिलही। मुख्यमंत्री भूपेश बघेल ह सरकार के 4 साल पूरा होय के मउका म ए घोसना करीन। बतादन कि पैनकार्ड बनवाय बर मितान ल घर बुलाके अरजी दे बर पड़ही। एखर बर टोल फ्री नंबर – 1 4 5 4 5 घलो जारी करे गेहे। ए नंबर म फोन करके कोन्हों घलो नागरिक पैनकार्ड बनवाय बर जानकारी ले सकत हे।
बतादन कि छत्तीसगढ़ के 14 नगर निगम म फेरहाल मुख्यमंत्री मितान योजना के लाभ नागरिक मन ल मिलत हे।
गुरू घासीदास-जयंती
समाज ल एकता, भाईचारा अउ समरसता के संदेस देवइया बाबा गुरू घासीदास के आज जयंती हे। ए मउका म प्रदेसभर म आने-आने कारीकरम के आयोजन करे जावत हे। मुख्यमंत्री ह अपन निवास कार्यालय म गुरू घासीदास के छात्राचित्र उपर फूलमाला चढ़ाके नमन करीन अउ प्रदेस के खुसहाली के कामना करीन।
उहें, विधानसभा अध्यक्ष डॉक्टर चरणदास महंत ह घलो विधानसभा परिसर म बाबा गुरू घासीदास के तैत्रचित्र म फूलमाला चढ़ाके ओमन ल सुरता करीन अउ अपन संदेस म किहीन कि गुरू घासीदास के जीवन दर्सन अउ विचार मूल्य ह जम्मों मनखे बर कल्याणकारी हे।
मुख्यमंत्री भूपेश बघेल ह आज रईपुर के आदर्स शासकीय पोस्ट मैट्रिक अनुसूचित जाति बालक छात्रावास म आयोजित सम्मान अउ आभार कारीकरम म सामिल होईन। ए मउका ओमन सबो संभाग मुख्यालय म अनुसूचित जाति अउ पिछड़ा वर्ग के लइका मन बर छात्रावास अउ अलग से प्रयास विद्यालय खोले के घोसना करीन। उहें, पोस्ट मैट्रिक बालक छात्रावास म ई-लाइब्रेरी बनाय के घलो घोसना करीन हे। ए मउका म नगरीय प्रससान मंत्री डॉक्टर शिवकुमार डहरिया, संसदीय सचिव चंद्रदेव राय, महापौर एजाज ढेबर अउ रईपुर नगर निगम के सभापति प्रमोद दुबे सामिल होईन।
उहें, मुख्यमंत्री ह मुंगेली के लालपुर गांव आयोजित घासीदास जयंती कारीकरम म घलो सामिल होईन। ए मउका म ओमन विकास के कई कारज बर एक करोड़ रूपिया देके घोसना करीन।
ऐति, कैबिनेट मंत्री मोहम्मद अकबर ह घलो कबीरधाम जिला के तारो अउ बंदौरा म बाबा घासीदास जयंती समारोह म सामिल होईन। एखर बाद ओमन पोस्ट मैट्रिक आदिवासी बालक छात्रावास म आयोजित शहीद वीरनारायण सिंह बलिदान दिवस कारीकरम घलो सामिल होईन।
मुख्यमंत्री-शासकीय भवन
मुख्यमंत्री भूपेश बघेल ह मुख्य सचिव ल शैक्षणिक संस्थान समेत आने सरकारी भवन मनके मरम्मत अउ रखरखाव के कार्ययोजना तैयार करके अवइया कैबिनेट के बइठका म प्रस्तुत करे बर किहीन हे। मुख्यमंत्री ह किहीन कि साला भवन, आश्रम अउ छात्रावास मनके मरम्मत बर पहिली ध्यान नइ दे के सेती पढ़ई-लिखई करे म लइका मन ल परेसानी होवत हे, एखर सेती अवइया शैक्षणिक सत्र ले पहिली ए भवन मनके मरम्मत अउ रखरखाव जरूरी हे।
उहें, प्रदेस म मुख्यमंत्री वृक्ष संपदा योजना सुरू करे गेहे। योजना के उद्देश्य निजी भूमि म वृक्षारोपण ल प्रोत्साहन देके लकड़ी आधारित उद्योग ल बढ़ावा देना हे। एखर ले लोगन ल रोजगार मिल सकही। मुख्यमंत्री भूपेश बघेल ह वृक्ष संपदा योजना के प्रस्ताव तैयार करके कैबिनेट के बइठका म प्रस्तुत करे बर किहीन हे।
भाजपा-पोस्टर प्रदर्शनी
भारतीय जनता पार्टी के रईपुर सहर इकाई ह कांग्रेस सरकार के 4 साल पूरा होय के मउका म घड़ी चउक तिर पोस्टर प्रदर्सनी लगाय हे, जेमा कांग्रेस सरकार डहार ले करे गे 36 ठिन वादा के कटआउट के पोस्टर लगाय हे। ए प्रदर्सनी म पूर्व नेता प्रतिपक्ष धरमलाल कौशिक ह सामिल होईन अउ ओमन राज्य सरकार उपर वादाखिलाफी के आरोप लगईन। कारीकरम म पूर्व मंत्री राजेश मूणत समेत भाजपा के कतकोन कार्यकर्ता सामिल होईन।
उहें, दुरूग जिला के रिसाली म घलो भाजपा कार्यकर्ता मन ह विधानसभा स्तरीय सम्मेलन के आयोजन करीन। एमा पूर्व मंत्री अजय चंद्राकर सामिल होईन। ए मउका म श्री चंद्राकर ह किहीन कि प्रदेस म युवा मन ल रोजगार नइ मिलीस अउ आपराधिक घटना सरलग बाढ़त हे। उहें, लोगन मन ल प्रधानमंत्री आवास योजना के लाभ घलो नइ मिलत हे।
एम्स-पुरस्कार
अखिल भारतीय आयुर्विज्ञान संस्थान-एम्स रईपुर के डॉक्टर मन शिलांग म आयोजित राष्ट्रीय स्तर के प्रश्नोत्तरी प्रतियोगिता म तीन ठन पुरस्कार जीते हे। विभागाध्यक्ष प्रोफेसर नंदकिशोर अग्रवाल के निरदेसन म जूनियर रेंजीडेंट्स के टीम ह भाग लीस। प्रतियोगिता म डॉक्टर अभिमन्यु प्रभु ल स्वर्ण, डॉक्टर धनज श्रीगणेश ल कांस्य अउ डॉक्टर नंदीश्वरा डीके ल पांचवां स्थान म सांत्वना पुरस्कार मिलीस।
एम्स रईपुर के निदेशक डॉक्टर नितिन एम. नागरकर ह प्रसंसा करत टीम ल बधाई दीन।
उपचुनाव-नामांकन
राज्य के आने-आने जिला के नगर निगम, नगर पालिका, नगर पंचायत अउ त्रिस्तरीय पंचायत संस्था मन म खाली पद के पूर्ति बर होवइया उपचुनाव के तहत ए बेरा नामांकन पत्र दाखिल करे के प्रक्रिया चलत हे। नामांकन जमा करे के आखिरी तारीख तेईस दिसंबर हे। उहें, नामांकन पत्र के जांच चौबीस दिसंबर ले करे जाही। उम्मीदवार छब्बीस दिसंबर तक अपन नाम वापस ले सकही अउ इही दिन चुनाव चिन्ह के आबंटन करे जाही। त्रिस्तरीय पंचायत चुनाव अउ निकाय चुनाव के तहत मतदान नौ जनवरी के होही। मतदान मतपत्र ले कराय जाही।
बतादन कि राज्य म 1 जिला पंचायत सदस्य, 10 जनपद पंचायत सदस्य, 127 सरपंच अउ 597 पंच के संग कुल 735 खाली पद बर उपचुनाव कराय जाही। उहें, प्रदेस के 12 जिला के 14 नगरीय निकाय म 15 पार्षद बर घलो उपचुनाव होही।
अउ अब थोरकुन समाचार सार म-
– जांजगीर-चांपा जिला के तिलई गांव म दू पक्ष के बीच जमके मारपीट होईस। घटना म ग्यारह झिन मनखे घायल होगीन। पुलिस ह मामला दर्ज करके जांच सुरू कर देहे।
– जांजगीर-चांपा जिला के ही देवरी मोड़ के तीर अज्ञात गाड़ी के चपेट म आय ले मोटरसाइकिल सवार एक झन युवक के मउत होगे।
– रईपुर के गुढ़ियारी इलाका म बीते 16 दिसंबर के सोभा यात्रा के बेरा चाकूबाजी के घटना म एक युवक के हत्या के मामला पुलिस ह दू नाबालिग समेत 6 झन ल गिरफ्तार कर लीस।
– जांजगीर-चांपा जिला के जावलपुर गांव म जर्जर स्कूल भवन ल तोड़े के बेरा मलबा म दू झन दब गीन। गंभीर हालत म घायल दूनों झन बिलासपुर के अस्पताल म भर्ती कराय गेहे।
अउ
– रईपुर रेलवे स्टेसन म लोकोपायलट के संग मारपीट अउ लूट करइया तीन झिन आरोपी मन ल पुलिस ह गिरफ्तार कर लीस। आरोपी मन ले मोबाइल अउ नगद रकम घलो जब्त करे गेहे।