मुख्यमंत्री भूपेश बघेल के अगुवई म राज्य सरकार के चार बछर पूरा होय म प्रदेस म आज छत्तीसगढ़ गौरव दिवस मनाय जात हे। ए मउका म मुख्यमंत्री ह अपन निवास कार्यालय म राखे गे वर्चुअल कारीकरम म मुख्यमंत्री वृक्ष संपदा योजना के घोसना करीन। ए योजना म सौ करोड़ रूपिया खरचा करे जाही। उहें, मुख्यमंत्री ह जम्मों स्कूल, आश्रम, सरकारी भवन के रखरखाव अउ मरम्मत बर एक हजार करोड़ रूपिया देके घलो घोसना करीन। एखर संगेसंग तकनीकी शिक्षा के स्तर म सुधार बर औद्योगिक प्रशिक्षण संस्थान के उन्नयन बर स्वामी आत्मानंद उत्कृष्ट आई.टी.आई. योजना के तहत बारह सौ करोड़ रूपिया के रासि दे जाही।
ए मउका म मुख्यमंत्री ह सतनाम पंथ के प्रवर्तक बाबा गुरू घासीदास के जयंती के पूर्व संध्या म नवा रईपुर म करीबन चार करोड़ छियासी लाख रूपिया के लागत ले बनइया संत शिरोमणि गुरू घासीदास बाबा स्मारक अउ संग्रहालय के भूमिपूजन करीन।
एखर पहिली, मुख्यमंत्री ह कलेक्ट्रेट चउक स्थित छत्तीसगढ़ महतारी के मूर्ति म फूल चढ़ाके ओमन ल नमन करीन। उहें, राज्य सरकार के चार बछर पूरा होय म रईपुर के टाउन हाल म छत्तीसगढ़ गौरव दिवस के आयोजन करे गीस। कारीकरम म मुख्यमंत्री ह वीडियो कान्फ्रेंसिंग के माध्यम ले पाछु चार बछर म सरकार के उपलब्धि अउ आने-आने सफलता के बारे म जानकारी दीन।
छत्तीसगढ़ गौरव दिवस म आज राज्य के जम्मों गौठान, तेंदूपत्ता संग्रहण केन्द्र, नगरीय क्षेत्र के हरेक वार्ड के संगेसंग प्राथमिक सहकारी सोसायटी परिसर अउ धान खरीदी केन्द्र मन म घलो आने-आने कारीकरम के आयोजन करे गीस।
छत्तीसगढ़ गौरव दिवस-भाजपा
उहें, भारतीय जनता पार्टी के प्रदेस अध्यक्ष अरूण साव ह छत्तीसगढ़ के कांग्रेस सरकार के चार बछर पूरा होय ल कुशासन अउ हर वर्ग उपर अत्याचार के कार्यकाल बतईन हे। श्री साव ह किहीन कि कांग्रेस सरकार के अब उल्टा गिनती सुरू होगे हे अउ अवइया विधानसभा चुनाव म एखर जाना तय हे।
अइसने, भाजपा के प्रदेस प्रवक्ता अउ पूर्व मंत्री राजेश मूणत ह किहीन कि चार साल के कार्यकाल म सिरिफ भ्रष्टाचार, आतंक अउ तस्करी ह कांग्रेस सरकार के देन हवय अउ ए चार बछर म न कोनों पुल-पुलिया बने हे अउ न कोनों रद्दा बनाय गेहे।
संतोष पांडेय-लोकसभा
राजनांदगांव लोकसभा क्षेत्र के सांसद संतोष पांडेय ह छत्तीसगढ़ म बाढ़त अपराध अउ भ्रष्टाचार के मुद्दा ल लोकसभा म उठईन। श्री पांडेय ह किहीन कि छत्तीसगढ़ ल जउन हाथ म सौंपे गेहे, उही मन ह प्रदेस ल लूटत हे। ओमन किहीन कि छत्तीसगढ़ ह भ्रष्टाचार, नसा अउ सट्टा के गढ़ बन गेहे। हालेच म ईडी ह कोयला ले जुड़े वसूली रैकेट के पर्दाफाशन करे हे। ईडी ह जउन कार्रवाई करे हे, ओमा अधिकारी मनके साठगाठ उजागर होय हे। श्री पांडेय ह केन्द्र सरकार ले प्रदेस म भ्रष्टाचार अउ ऑनलाइन सट्टा महादेव ऐप मामला के घलो जांच कराय के मांग करे हे।
क्षेत्रीय सरस मेला
छत्तीसगढ़ राज्य ग्रामीण आजीविका मिशन-बिहान म गठित महिला स्व-सहायता समूह डहार ले बनाय गे सामान के प्रदर्सनी अउ बिक्री बर राजधानी रईपुर के शंकर नगर स्थित बीटीआई मैदान म ए दिन क्षेत्रीय सरस मेला के आयोजन करे जावत हे। पच्चीस दिसंबर तक चलइया ए मेला के सुभारंभ गृह निर्माण मंडल के अध्यक्ष कुलदीप जुनेजा ह करीन। ए मेला म छत्तीसगढ़ के संगेसंग असम, गुजरात अउ मध्यप्रदेश समेत आने-आने राज्य के ग्रामीण समुदाय डहार ले बनाय सामान के प्रदर्सनी अउ बिक्री बर स्टॉल लगाय गेहे। मेला म छत्तीसगढ़ी खान-पान के स्टॉल घलो लगाय गेहे। संगेसंग मेला म संझा के सांस्कृतिक कारीकरम के प्रस्तुति घलो दे जावत हे।
धान खरीदी
प्रदेस म समर्थन मूल्य म अब तक अनुमानित लक्ष्य के करीबन पचास प्रतिशत धान के खरीद होगे हे। ए बछर राज्य सरकार ह किसान मन ले एक सौ दस लाख मीटरिक टन धान खरीदे के लक्ष्य राखे हे। डेढ़ महीना के भीतर करीबन पचपन लाख मीटरिक टन धान के खरीदी करे जा चुके हे। एखर एवज म राज्य के चौदह लाख किसान मन ल ग्यारह हजार एक सौ अंठावन करोड़ रूपिया के भुगतान बैंक लिंकिंग व्यवस्था के तहत करे गेहे। उहें, उपार्जन केन्द्र मन ले कस्टम मिलिंग बर धान के उठाव सरलग जारी हवय। चालीस लाख मीटरिक टन ले जादा धान के उठाव बर डीओ जारी करे गेहे। एखर एवज म मिलर्स डहार ले करीबन इकतीस लाख इकहत्तर हजार मीटरिक टन धान के उठाव करे गेहे।
माओवादी गिरफ्तार
बीजापुर जिला के बासागुड़ा थाना क्षेत्र म सुरक्षा बल ह दू झिन माओवादी ल गिरफ्तार करे हे। मिले खबर के मुताबिक सीआरपीएफ अउ कोबरा बटालियन के समलात टीम सर्चिंग बर निकले रिहीस। इही दउरान पकेला के जंगल ले ए दूनों माओवादी ल पकड़े गीस। ए माओवादी मनके खिलाफ बासागुड़ा थाना क्षेत्र म अपराध दरज हे। पकड़े गे माओवादी मन ह पूछताछ म माओवादी सामान पहुंचाय के बात ल स्वीकारे हे।
मन की बात
प्रधानमंत्री नरेंद्र मोदी ह अवइया पच्चीस दिसंबर के आकाशवाणी ले प्रसारित होवइया मन की बात कार्यक्रम बर लोगन मनले विचार अउ सुझाव देबर केहे हे।
सुनइया मन नमो ऐप या माईजीओवी ओपन फोरम म अपन विचार भेज सकथे या टोल फ्री नंबर 1 8 0 0-1 1-7 8 0 0 म घलो डायल कर अपन संदेस हिंदी या अंग्रेजी म रिकॉर्ड करा सकत हे । फोन लाइन तेईस दिसंबर तक खुला रइही। लोगन मन 1 9 2 2 म मिस्ड कॉल घलो दे सकत हे अउ एसएमएस लिंक मिले म सोझे प्रधानमंत्री ल अपन सुझाव दे सकत हे।
जिले की चिट्ठी
प्रादेशिक समाचार एकांश, आकाशवाणी समाचार डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मों केंद्र मन ह एके संगरा रिले करही। ए बखत के अंक म ‘‘रायपुर‘‘ जिला के गतिविधि मनके बारे म जानकारी दे जाही।
अउ अब पेस हे मौसम के हाल…
मौसम साफ होय अउ सर्द हवा के आय ले प्रदेस म एक घांव फेर जाड़ा बढ़ गेहे। मौसम विभाग के मुताबिक प्रदेस म उत्तर ले ठंडा अउ सुष्क हवा के आना सुरू होगे हे। एखर असर ले प्रदेस म अवइया चौबीस घंटा के दउरान मौसम सुष्क रइही अउ न्यूनतम तापमान म गिरावट होय के संभावना हे। संगेसंग अवइया दू दिन म प्रदेस के न्यूनतम तापमान म दू ले तीन डिग्री सेल्सियस तक के गिरावट दर्ज करे जा सकत हे।
अउ अब थोरकुन समाचार सार म –
– स्नातक स्तर बर विश्वविद्यालय प्रवेस परीक्षा-सी.यू.ई.टी. अवइया बछर इक्कीस ले इकतीस मई के बीच आयोजित करे जाही। आवेदन प्रक्रिया फरवरी माह म सुरू होही। विश्वविद्यालय अनुदान आयोग के मुताबिक बिसय के संख्या अउ प्रश्न पत्र के प्रारूप पहिली जइसे ही रइही।
– सतनाम पंथ के प्रवर्तक बाबा गुरू घासीदास के जयंती काली मनाय जाही। राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल सुभकामना दे हवय।
– गरियाबंद जिला म ग्राम जोबा के केरबहारा स्थित खेत म लगे बिजली तार के करंट के चपेट म आय ले एकेच परिवार के दू झिन लइका के मउत होगे।
– जांजगीर-चांपा जिला म सारागांव क्षेत्र के कमरीद गांव के तीर ट्रेन ले गिरके एक झिन मनखे के मउत होगे।
अउ
– कोरबा जिला के करतला वन क्षेत्र म ए दिन अड़तीस हाथी मनके दल घूमत हे। हाथी मनके दल ह पाछु रतिहा पसरखेत रेंज म किसान मनके फसल ल नुकसान पहुंचईन।