राज्य के आने-आने जिला के नगर निगम, नगर पालिका परिषद, नगर पंचायत अउ त्रिस्तरीय पंचायत संस्था मन म खाली पद के पूर्ति बर होवइया उपचुनाव के तहत आज ले नामांकन पत्र दाखिल करे के काम सुरू होगे हे। नामांकन जमा करे के आखिरी तारीख तेईस दिसंबर हे। उहें, नामांकन पत्र के जांच चौबीस दिसंबर ले करे जाही। उम्मीदवार छब्बीस दिसंबर तक अपन नाम वापस ले सकही अउ इही दिन चुनाव चिन्ह के आबंटन करे जाही। त्रिस्तरीय पंचायत चुनाव अउ निकाय चुनाव के तहत मतदान नौ जनवरी के होही। मतदान मतपत्र ले राज्य निर्वाचन आयोग के मतपेटी ले कराय जाही।
जानबा के मुताबिक राज्य म एक जिला पंचायत सदस्य, दस जनपद पंचायत सदस्य, एक सौ सत्ताईस सरपंच अउ पांच सौ संतानवे पंच के संग कुल सात सौ पैंतीस खाली पद बर उपचुनाव कराय जाही। उहें, प्रदेस के बारह जिला के चौदह नगरीय निकाय म पन्द्रह वार्ड पार्षद के पद बर घलो उपचुनाव होही।
मतदाता सूची-आधार
केन्द्र सरकार ह स्पष्ट कर देहे कि जउन लोगन के मतदाता पहिचान पत्र आधार ले जुड़े नइ हे, उंखर नाम मतदाता सूची ले नइ हटाय जाही। केन्द्रीय विधि मंत्री किरेन रिजिजू ह लोकसभा म किहीन कि मतदाता पहिचान पत्र ल आधार ले जोड़ना स्वैच्छिक हे। निर्वाचन आयोग ह अगस्त ले स्वैच्छिक आधार म मौजूदा अउ नया मतदाता मनके आधार संख्या इकट्ठा करे के काम सुरू करे हे। डेटा बेस के दुरूपयोग ल रोके बर विधि मंत्री ह किहीन कि आयोग ह ए संबंध म भारतीय विशिष्ट पहचान प्राधिकरण के दिशा-निर्देश के सख्ती ले पालन करत हे।
छत्तीसगढ़ गौरव दिवस
मुख्यमंत्री भूपेश बघेल के नेतृत्व म राज्य सरकार के काम के चार बछर पूरा होय के उपलक्ष्य म काली सत्रह दिसंबर ल गौरव दिवस के रूप म मनाय जाही। ए अवसर म मुख्यमंत्री ह जनता ल संदेस घलो दीहीं। काली बिहनिया ग्यारह बजे ले राज्य के जम्मों गौठान, तेंदूपत्ता संग्रहण केन्द्र, नगरीय क्षेत्र के सबो वार्ड अउ प्राथमिक सहकारी सोसायटी परिसर के संगेसंग धान खरीदी केन्द्र म कार्यक्रम के आयोजन करे जाही।
ए मउका म जनसंपर्क विभाग डहार ले स्लोगन, फोटोग्राफी अउ रील प्रतियोगिता के आयोजन घलो करे जाही। प्रतियोगिता म भाग ले बर इच्छुक मनखे पांच जनवरी तक ‘‘डब्ल्यू डब्ल्यू डब्ल्यू डॉट सीजी मॉडल डॉट इन‘‘ म अपन प्रविष्टि भेज सकत हे। प्रतियोगिता बर पर्यटन, प्रकृति, आर्किटेक्चर, जनसुविधा, स्वच्छता, शिक्षा, तिहार-परंपरा, विकास के काम अउ सासकीय योजना उपर आधारित बिसय ल सामिल करे गेहे।
मुख्यमंत्री-प्रेसवार्ता
मुख्यमंत्री भूपेश बघेल ह किहीन कि प्रदेस म साइबर थाना खोले जाही। ए बात ओमन आज महासमुंद म आयोजित पत्रकारवार्ता म किहीन। श्री बघेल ह बतईन कि अभी तीन जघा म साइबर थाना सुरू होगे हे। ओमन ह करनी म पावर प्लांट ल लेके मनखे मन डहार ले करे जात विरोध ल देखत हुए एखर निराकरण के निरदेस कलेक्टर ल दीन हे। पत्रकार मन ले बातचीत के दउरान मुख्यमंत्री ह किहीन कि ओ दिन भी आही, जब स्वामी आत्मानंद अंग्रेजी माध्यम स्कूल म छत्तीसगढ़ी बोली म सिलेबस तैयार करे जाही।
एखर पहिली, भेंट-मुलाकात कारीकरम के तहत मुख्यमंत्री भूपेश बघेल ह काली महासमुंद जिला के पटेवा म स्वामी आत्मानंद अंग्रेजी माध्यम स्कूल खोले के घोसना करीन। संगेसंग ओमन आने-आने विकास काम के मंजूरी घलो दीन।
दसवीं/बारहवीं-परीक्षा
छत्तीसगढ़ माध्यमिक शिक्षा मंडल ह दसवीं अउ बाहरवीं बोर्ड के मुख्य परीक्षा बर समय-सारिणी जारी कर देहे।
मंडल ले मिले जानबा के अनुसार दसवीं के परीक्षा अवइया दू मार्च ले सुरू होही, जउन चौबीस मार्च तक चलही। उहें, बारहवीं के परीक्षा एक मार्च ले सुरू होके इकतीस मार्च तक चलही। एखरे संग शारीरिक प्रशिक्षण डिप्लोमा परीक्षा एक मार्च ले तेरह मार्च तक ले जाही। जम्मों परीक्षा के समय बिहनिया नौ बजे ले मंझनिया सवा बारह बजे तक निर्धारित करे गेहे।
रेलवे-यूटीएस मोबाइल ऐप
दक्षिण पूर्व मध्य रेलवे डहार ले यात्री मन ल घर बइठे यात्रा टिकट बुकिंग के संग सीजन-टिकट-एमएसटी जारी अउ नवीनीकरण कराय बर ‘‘यूटीएस‘‘ मोबाइल ऐप के सुविधा दे जात हे। यात्री अपन मोबाइल म ए ऐप ल डाउनलोड करके आसानी ले तुरते अनारक्षित टिकट बुकिंग अउ सीजन टिकट जारी करे के संग नवीनीकरण घलो कर सकत हे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत ‘‘माउंट एवरेस्ट के संग विश्व के दू ऊंचा पर्वत चोटी उपर दस दिन के रिकॉर्ड समय म विजय हासिल करइया छत्तीसगढ़ के पर्वतारोही नैना सिंह धाकड़‘‘ ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली सत्रह दिसंबर के बिहनिया दस बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
मोर मयारू गुरूजी-स्कॉच अवॉर्ड
छत्तीसगढ़ राज्य बाल अधिकार संरक्षण आयोग डहार ले चलाय जात ‘‘मोर मयारू गुरूजी‘‘ कार्यक्रम के चयन स्कॉच अवॉर्ड-सिल्वर बर करे गेहे। ए पुरस्कार उन्नीस दिसंबर के नई दिल्ली म आयोजित कार्यक्रम म दे जाही। महिला अउ बाल विकास मंत्री अनिला भेंड़िया अउ राज्य बाल अधिकार संरक्षण आयोग के अध्यक्ष तेजकुंवर नेताम ए पुरस्कार लीहीं। स्कॉच संस्था डहार ले नामांकन ल लेके आखिरी चरण तक लगभग सात स्तर म चरणबद्ध तरीका ले मूल्यांकन करे के बाद ए सम्मान दे जात हे।
जानबा के मुताबिक ‘‘मोर मयारू गुरूजी‘‘ कार्यक्रम के माध्यम ले आयोग ह प्रदेस के लगभग दू हजार सिक्षक ल प्रशिक्षित करे हे। ए कार्यक्रम के माध्यम ले शिक्षक मन ल बाल अधिकार के रक्षा बर खेल अउ आने गतिविधि के माध्यम ले रोचक तरीका ले पढ़ई-लिखई के प्रसिक्षण दे जात हे।
रेलवे-समपार फाटक
भिलाई ले भिलाई पावर हाउस के बीच चौदह दिसंबर के वंदे भारत एक्सप्रेस म करे गे पत्थरबाजी के मामला म रेलवे पुलिस ह अज्ञात मनखे के खिलाफ मामला दर्ज करके जांच सुरू कर देहे। भविष्य म अइसन घटना ल रोके बर अधिकारी मन डहार ले रेललाइन के किनारे रहइया लोगन मन ल समझाईस देके जागरूक करे जात हे।
इही बीच, रायपुर रेलमंडल के निपनिया गेट तीर समपार फाटक म मरम्मत होय के कारण काली रात नौ बजे ले उन्नीस दिसंबर के रात नौ बजे तक ए फाटक ले गाड़ी मनके आना-जाना बंद रइही।
आईएएस अधिकारी-वीआरएस
प्रदेस के आईएएस अधिकारी धनंजय देवांगन ह स्वेच्छा ले सेवानिवृत्ति लेहे। राज्य सरकार ह उंखर आवेदन ल स्वीकार कर लेहे। बछर दू हजार चार बैच के आईएएस अधिकारी श्री देवांगन, गृह, आवास अउ पर्यावरण विभाग म सचिव के पद म रिहीस। ओमन ह अपन सेवानिवृत्ति ले ढाई महीना पहिली ही राज्य सरकार तीर स्वेच्छा ले सेवानिवृत्ति बर आवेदन करे रिहीन।
खेल
एकलव्य आदर्श आवासीय विद्यालय-पेंड्री के पांच लइका के चयन आंध्रप्रदेश के गुंटूर म अट्ठारह दिसंबर ले होवइया राष्ट्रीय खेलकूद प्रतियोगिता बर होय हे। चयनित प्रतिभागी खेल शिक्षक के संग आंध्रप्रदेश बर रवाना होगे हे।
उहें, चौथा जूनियर राष्ट्रीय बॉक्सिंग चैंपियनशिप बर छत्तीसगढ़ के टीम बिहार बर रवाना होगे हे। ए प्रतियोगिता काली ले बाईस दिसंबर तक पटना म आयोजित करे जाही।
क्षेत्रीस सरस मेला
राजधानी रईपुर के शंकर नगर स्थित बीटीआई मैदान म क्षेत्रीय सरस मेला के आयोजन करे जात हे। पच्चीस दिसंबर तक चलइया ए मेला म छत्तीसगढ़ के अलावा असम, गुजरात अउ मध्यप्रदेश के संग आने-आने राज्य के ग्रामीण समुदाय डहार ले बनाय गे सामान के प्रदर्शनी अउ बिक्री बर उपलब्ध कराय गेहे। मेला म छत्तीसगढ़ी खान-पान के स्टॉल घलो लगाय गेहे संगेसंग साम के सांस्कृतिक कारीकरम के प्रस्तुति घलो दे जावत हे।