प्रधानमंत्री सुरक्षित मातृत्व के विस्तारित अभियान ल लागू करे म छत्तीसगढ़ देश म दूसरा स्थान म हे। ए उपलब्धि बर केंद्रीय स्वास्थ्य राज्य मंत्री डॅाक्टर भारती प्रवीण पवार ह काली नई दिल्ली म आयोजित राष्ट्रीय मातृत्व स्वास्थ्य कार्यशाला म छत्तीसगढ़ ल सम्मानित करीन। मातृत्व स्वास्थ्य कार्यक्रम के संयुक्त संचालक डॅाक्टर अल्का गुप्ता के संग स्वास्थ्य विभाग के आने प्रमुख अधिकारी मन ह ए पुरस्कार ग्रहण करीन।
ए राष्ट्रीय कार्यशाला म छत्तीसगढ़ डहार ले भाग लेवइया राज्य के कार्यक्रम अधिकारी डॅाक्टर शैलेन्द्र अग्रवाल ह बताइन कि कार्यशाला म छत्तीसगढ़ डहार ले जादा जोखिम वाले गर्भावस्था के देखभाल ले जुड़े जानकारी ल पोस्टर के माध्यम ले प्रस्तुत करे गीस।
उंहे रायपुर के मुख्य चिकित्सा अधिकारी डॅाक्टर मिथलेश चौधरी ह बताइन कि प्रदेश म सुरक्षित मातृत्व के विस्तारित अभियान के तहत ए बछर पाछू अप्रैल ले नवंबर महीना के बीच करीबन डेढ़ लाख गर्भवती महिला के जांच करे गीस। ये अभियान के तहत हर महीना के नौ अउ चौबीस तारीख के आंगनबाड़ी अउ सामुदायिक स्वास्थ्य केंद्र म गर्भवती महिला के जांच करे जावत हे।
भेंट-मुलाकात
भेंट-मुलाकात कार्यक्रम के दउरान मुख्यमंत्री भूपेश बघेल ह आज महासमुंद जिला के सिरपुर क्षेत्र के दउरा करीन। ए मउका म मुख्यमंत्री ह सिरपुर म जिला सहकारी केंद्रीय बैंक के स्थापना तुमगांव म उप तहसील अउ पासिद गांव म हाईस्कूल शुरू करे के घोषणा करीन। संगेसंग तुमगंाव म स्वामी आत्मानंद अंग्रेजी माध्यम स्कूल शुरू करे अउ महासमुंद शहर के बाहिर नवा बस स्टेण्ड बनाय के घोषणा घलो करीन। एखर अलावा मुख्यमंत्री ह तुमगांव ले महासमुंद सड़क चौड़ीकरण अउ बावनकेरा ले रामाडबरी तक सड़क निर्माण के स्वीकृति दीन।
अपन महासमुंद प्रवास के दउरान बागबाहरा विश्रामगृह म अधिकारी मनके समीक्षा बइठका के बाद पत्रकार मनले चर्चा करत मुख्यमंत्री ह कीहिन कि राजीव गांधी किसान न्याय योजना के चौथा किस्त के राशि इकतीस मार्च के पहिली दे जाही। श्री बघेल ह कीहिन कि कोमाखान म जल्दीच नवा कॉलेज सुरू करे जाही। ओमन ह महासमुंद म पत्रकार भवन बर बीस लाख रूपिया दे जाय के घोषणा घलो करीन।
रूरल इंडस्ट्रियल पार्क
प्रदेश म ग्रामीण युवा उद्यमी मन ल अउ मजबूत बनाय बर ग्रामीण औद्योगिक परिक्षेत्र बनाए जावत हे। ए संबंध म राज्य योजना आयोग डहार ले काली कार्यशाला के आयोजन करे गीस। कार्यशाला म बताए गीस कि पहिली चरण म तीन सौ ग्रामीण औद्योगिक परिक्षेत्र के सुरूआत होगे हे। एमा राज्य शासन डहार ले गठित मंडल के अध्यक्ष अउ प्रतिनिधि सामिल होइन। कार्यशाला म ग्रामीण उद्योग बर उपयुक्त नवाचार उपर विशेष रूप ले चर्चा करे गीस।
मुख्यमंत्री के सलाहकार प्रदीप शर्मा ह कीहिन कि गौठान म संचालित आर्थिक गतिविधि के अच्छा नतीजा आगू आवत हे। ओमन ह कीहिन कि गौठान के जइसने प्रदेश के आने आने ग्रामीण क्षेत्र म स्थापित करे जावत आजीविका गुड़ी म घलो परंपरागत व्यवसाय संचालित करे जाही।
नया रायपुर-आवासीय पट्टा
राज्य सरकार नवा रायपुर के प्रभावित किसान मन ल आवासीय पट्टा देबर विचार करत हे। कृषि मंत्री रविंद्र चौबे के अध्यक्षता म काली मंत्रालय म होय बइठका म ए विसय म विस्तार ले चर्चा करे गीस। बइठका म नगरीय प्रशासन मंत्री डॅाक्टर शिवकुमार डहरिया के संग आवास अउ पर्यावरण मंत्री मोहम्मद अकबर घलो सामिल होइन।
बइठका म बताये गीस कि नवा रायपुर के प्रभावित किसान मन ह पाछू कुछ दिन ले आवासीय पट्टा दे जाय के मंाग करे रीहिन। एखर उपर राज्य सरकार ह रायपुर के कलेक्टर अउ नवा रायपुर विकास प्राधिकरण एनआरडीए के अधिकारी मन ल जरूरी जानकारी अउ अभिलेख तियार करे के निर्देश दीन। ए संबंध म अवइया बइठक उन्नीस दिसंबर के होही।
हाथ जोड़ो यात्रा
प्रदेस कांग्रेस डहार ले अवइया गणतंत्र दिवस ले हाथ जोड़ो यात्रा शुरू करे जाही। ए यात्रा के फरवरी माह तक चले के संभावना हे। एखर पहिली भारत जोड़ो यात्रा के तहत पाछू कुछ दिन ले राजनंादगांव म बूथ स्तरीय यात्रा के बाद अभी विकासखंड स्तर म आने-आने वार्ड मन म पदयात्रा करे जात हे।
अग्निवीर प्रशिक्षण
भारतीय थल सेना डहार ले प्रदेश के युवा मन ल अग्निवीर सेना भर्ती म अवसर देके उद्देश्य ले पाछू एक ले तेरा दिसंबर तक दुर्ग के रविशंकर स्टेडियम म भर्ती रैली के आयोजन करे गीस।
एमा, जांजगीर-चंापा जिला के करीबन सात हजार युवा मन भाग लीन। शारीरिक परीक्षण म पास होवइया अभयर्थी मनके लिखित परीक्षा पंद्रह जनवरी ेके हो सकत हे। इंहा के जिला कलेक्टर तारण प्रकाश सिन्हा ह अपन जिला ले चुने गे युवा मनके लिखित परीक्षा ले पहिली प्रशिक्षण दिलाय बर अधिकारी मन ल निर्देश दीन। ए युवा मन ल अवइया सतरा दिसंबर ले चौदा जनवरी तक निशुल्क कोचिंग देवाय जाही। एखर बर जांजगीर के पॉलिटेक्निक कॉलेज अउ आजीविका महाविद्यालय के छात्रावास म रेहे के बेवस्था करे गेहे।
बागवानी फसल
केंद्र सरकार ह बागवानी परियोजना बर डिजीटल माध्यम ले मिलने वाला प्रस्ताव ल पैंतालिस दिन म मंजूरी देके निर्णय लीन । केंद्रीय कृषि मंत्री नरेंद्र सिंह तोमर के अध्यक्षता म राष्ट्रीय बागवानी बोर्ड के नई दिल्ली म होय बइठका म ये निर्णय ले गीस।
केंद्रीय मंत्री ह बताइन कि डिजिटल माध्यम ले बागवानी परियोजना ल मंजूरी देके प्रक्रिया एक जनवरी ले लागू हो जाही। कृषि मंत्री ह उम्मीद जताइन कि सरकार के ए फैसला ले देशभर म बागवानी परियोजना के तहत किसान मन बर काम करना सरल हो जाही।
मौसम के हाल –
प्रदेस म काली ले एक घांव फेर ठंड बाढ़े के संकेत मिलत हे।
मौसम विभाग ले मिले खबर के मुताबिक उत्तर ले ठंडी अउ शुष्क हवा के आय के सेती न्यूनतम तापमान म गिरावट आय के संभावना हे। अवइया तीन चार दिन म प्रदेश के न्यूनतम तापमान म चार ले पांच डिग्री सेल्सियस तक गिरावट आये के संभावना हे। उंहे बस्तर संभाग म काली ले तापमान म गिरावट आये के आसार हे।
अब थोरकुन समाचार सार म –
– राजधानी रायपुर के सड्डू ले पाछू लापता होय आठ बछर के नोनी के हत्या कर देगे रीहिस। अतिरिक्त पुलिस अधीक्षक अभिषेक महेश्वरी ह बताइन कि चौदा बछर के नाबालिग आरोपी ह ए नोनी के हत्या कर दे रीहिस, पुलिस ह मामला के जांच करत हे।
– जगदलपुर के शहीद गुण्डाधूर कृषि महाविद्यालय परिसर म काली ले संभाग स्तरीय युवा महोत्सव के आयोजन करे जाही। दू दिन चलइया महोत्सव म संभाग के सात जिला के करीबन डेढ़ हजार प्रतिभागी मन सामिल होही।
– उंहे दुर्ग के हेमचंद यादव विश्वविद्यालय के अंतर्गत अवइया जम्मों महाविद्यालय मन म पांच से सात जनवरी तक युवा उत्सव के आयोजन करे जाही।
– जांजगीर चंापा जिला के पामगढ़ म सरकारी नौकरी लगाये के नाव म पांच झिन लोगन मनले करीबन साढ़े नौ लाख रूपिया के ठगी के मामला म पुलिस ह दू आरोपी ल गिरप्तार करे हे। ए आरोपी मन ल अदालत म पेस करे के बाद जेल भेज दे गीस।