प्रधानमंत्री सांसद आह्वान
प्रधानमंत्री नरेंद्र मोदी ह जम्मों सांसद मन ल आह्वान करीन हे कि जी-20 ले जुड़े कार्यक्रम म भाग लेना चाही। काबर कि ये कार्यक्रम देश के हरय सरकार के नही। आज बीहनिया नई दिल्ली म भारतीय जनता पार्टी के संसदीय दल के बइठका म संबोधित करत श्री मोदी ह कीहिन कि जी-20 ले जुड़े गतिविधि म लोगन मन ल भागीदारी बढ़ाय के बारे म अपन विचार साझा करंय। प्रधानमंत्री ह कीहिन हे कि जिहां जी-20 के गतिविधि राखे जावत हे उंहा स्वच्छता अभियान जइसन पहल के जरिया ले जनता के भागीदारी सुनिश्चित करे जाना चाही।
मनी लॉन्ड्रिंग मामला
छत्तीसगढ़ के खनिज विभाग ले जुड़े मनी लॉडिं्रग मामला म रायपुर के विशेष अदालत ह मुख्यमंत्री कार्यालय के उपसचिव सौम्या चौरसिया ल न्यायिक रिमांड म जेल भेजे के आदेश देहे। ओला अब उन्नीस दिसंबर के अदालत म पेस करे जाही। एखर पहिली प्रवर्तन निदेशालय के रिमांड बेरा खतम होय के बाद ईडी के टीम ह सौम्या चौरसिया ल रायपुर के विशेष अदालत म पेस करे गीस।
खबर के मुताबिक ईडी ह पाछू ग्यारा अक्टूबर के प्रदेस के कई झिन अधिकारी अउ कारोबारी मनके ठिकाना म छापा मारे रीहिन। सुरूआती जांच अउ पूछताछ के बाद तेरा अक्टूबर के इस मामला म छत्तीसगढ़ इंफोटेक प्रमोशन सोसाइटी-चिप्स के तत्कालीन सीईओ समीर बिश्नोई, कोयला कारोबारी सुनील अग्रवाल अउ लक्ष्मीकांत तिवारी ल गिरप्तार करे रीहिस।
उंहे इही मामला म उनतीस अक्टूबर के एक झिन आने आरोपी सूर्यकांत तिवारी ह अदालत के आगू समर्पण कर दीस। ये जम्मों आरोपी मन अभी न्यायिक हिरासत म जेल म बंद हे। उंहे दू दिसंबर के राज्य प्रशासनिक सेवा के अधिकारी सौम्या चौरसिया ल गिरप्तार करे गे रीहिस।
छत्तीसगढ़ गौरव दिवस
छत्तीसगढ़ सरकार के चार बछर पूरा होय के मउका म अवइया सतरा ले बीस दिसंबर तक गौरव दिवस के रूप म मनाय जाही। ए दिन मुख्यमंत्री जनता के नाम संदेस घलो दीही। गौरव दिवस के तियारी के बारे म मुख्य सचिव अमिताभ जैन ह आज वीडियो कॉन्फ्रेसिंग के माध्यम ले जम्मों संभाग आयुक्त, कलेक्टर, जिला पंचायत के सीइओ, वनमंडल अधिकारी मनके बइठका लीन अउ गौरव दिवस के आयोजन के संबंध म जरूरी निरदेस दीन।
गौरव दिवस के दिन बिहनिया ग्यारा बजे ले राज्य के जम्मों गौठान, तेंदुपत्ता संग्रहण केन्द्र, नगरीय क्षेत्र के हरेक वार्ड मन के संग प्राथमिक सहकारी सोसायटी परिसर अउ धान खरीदी केन्द्र मन म कारीकरम के आयोजन करे जाही।
भेंट-मुलाकात
भेंट-मुलाकात कार्यक्रम के दउरान मुख्यमंत्री भूपेश बघल ह आज महासमुंद जिला के खल्लारी विधानसभा क्षेत्र के दउरा करीन। ए मउका म मुख्यमंत्री ह घुंचापाली के चण्डी अउ खल्लारी मंदिर ल पर्यटन जगा के रूप म विकसित करे के घोषणा करीन। ओमन मरार कसीबहरा गांव म हाईस्कूल खोले, मुनगासेर म जिला सहकारी केंद्रीय बैंक के शाखा, बागबाहरा के सामुदायिक स्वास्थ्य केंद्र म सौ बिस्तर ल बढ़ाय के संग कई ठिन आने आने घोषणा करीन।
एखरे संग मुख्यमंत्री ह गांव कोमाखान म शहीद वीरनारायण सिंह के मूर्ति ल स्थापित करे के घलो घोषणा करीन।
कोरोना प्रिकॉशन डोज
छत्तीसगढ़ म कोरोना वैक्सीन के प्रिकॉशन डोज लेवइया मनके संख्या पचहत्तर लाख ले जादा होगे हे। प्रदेश म अब तक पचहत्तर लाख दू हजार एक सौ इंक्यानबे लोगन मन ल प्रिकॉशन डोज लगाये जा चुके हे।
राज्य म कोरोना ले बचाव बर अब तक कुल पांच करोड़ तीन लाख बाईस हजार ले जादा टीका लगाए गेहे। एमा ले दू करोड़ चौबीस लाख छैंसठ हजार ले जादा टीका पहिली खुराक अउ दू करोड़ तीन लाख तिरपन हजार टीका दूसर खुराक के रूप म लगाए गेहे। प्रदेश म अठारा बछर ले जादा आयुवर्ग के चौरानबे प्रतिशत लोगन मन ल कोरोनारोधी टीका के दूनो खुराक दे जा चुके हे।
अंबिकापुर मेडिकल कॉलेज कार्रवाई
अंबिकापुर के राजमाता देवेन्द्रकुमारी सिंहदेव चिकित्सा महाविद्यालय म पाछू दिन चार झिन नवजात लइका मनके मउत के मामला म शिशु रोग विभाग के सीनियर रेसीडेंट ल निलंबित कर दे गीस हे। निलंबन अवधि के बेरा ओमन ल जिला चिकित्सालय सूरजपुर म अटैच करे गीस हे। उंहें अस्पताल अधीक्षक ल घलो हटा दे गेहे। ओखर जगा म पैथालाजी विभाग के संचालक डॅाक्टर आर.सी. आर्या ल नवा अस्पताल अधीक्षक बनाय गेहे।
खबर के मुताबिक पाछू पांच दिसंबर के शिशु रोग विभाग म चार झिन नवजात लइका मनके मउत होगे रीहिस, जेमा स्वास्थ्य मंत्री टीएस सिंहदेव ह मामला के जांच के आदेश दे रीहिस। जांच म शिशु रोग विभाग के सीनियर रेसीडेंट डॅाक्टर कमलेश प्रसाद विश्वकर्मा के लापरवाही आगू आय हे। उंहे अस्पताल के अधीक्षक डॅाक्टर लखन सिंह ल घलो जिम्मेदारी तय करत ओमन ल अधीक्षक पद ले हटा दे गेहे।
बिलासपुर जिला के कोटा थाना क्षेत्र म रेलवे ट्रैक पार करत बाप-बेटा के ट्रेन के चपेट म आय ले मउत होगीस।
ओति कोंडागांव जिला के केशकाल थाना के सिंघनपुर गांव के तीर ट्रक अउ दूपहिया गाड़ी के बीच होय टक्कर म दूपहिया सवार बेटा के मउत होगे, फेर बाप ह गंभीर रूप ले घायल होगे। घटना म ट्रक चालक ल घलो चोट आय हे। घायल मन ल इलाज बर केशकाल अस्पताल म भर्ती कराय गेहे।
एति भिलाई स्टील प्लांट म कन्वेयर बेल्ट के रोलर के चपेट म आय ले एक झिन ठेका श्रमिक के मउत होगे।
अउ अब पेस हे मौसम के हाल –
मौसम विभाग ले मिले खबर के मुताबिक अवइया चार दिन म प्रदेश के न्यूनतम तापमान म चार ले पांच डिग्री सेल्सियस तक गिरावट आये के संभावना हे। उंहे बस्तर संभाग म सोला दिसंबर ले तापमान म गिरावट आये के आसार हे।
– दक्षिण पूर्व मध्य रेलवे के लोरहा स्टेशन ल तीसर लाइन ले जोड़े बर सतरा ले बीस दिसंबर तक नॉन इंटरलॉकिंग के काम करे जाही।
– भारतीय क्रिकेट टीम के भूतपूर्व कप्तान कपिल देव एक निजी स्कूल के कार्यक्रम म सामिल होय बर आज रायपुर पहुंचीन।
– सुकमा जिला म एक लाख रूपिया के इनामी माओवादी ह सुरक्षा बल के आगू आत्मसमर्पण करे हे। सुरक्षा बल मन डहार ले चलाए जात घर वापसी अभियान के तहत ए माओवादी ह आत्मसमर्पण करीस।
– सरगुजा जिला म राजीव गांधी शिक्षा मिशन के तहत प्राथमिक अउ माध्यमिक स्कूल म विद्युतीकरण के काम म होय करोड़ो रूपिया के गड़बड़ी के मामला म न्यायालय ह सहायक अभियंता समेत कई झिन मनखे मनके खिलाफ अपराध पंजीबद्ध करे के निर्देश देहे।
अउ–
दुर्ग जिला के कुम्हारी ओवरब्रिज हादसा म अपन माता-पिता ल गंवाये अन्नू देवागन के पढ़ई-लिखई अउ आने जरूरत बर ओवरब्रिज बनाये के ठेका कंपनी पंद्रह लाख रूपिया मुआवजा दीही।