राज्य म त्रि-स्तरीय पंचायत मनके खाली पद अउ नगर पालिक निगम, नगर पालिका परषिद के संगेसंग नगर पंचायत मन म पार्षद मनके खाली होय पद म नौ जनवरी के उपचुनई कराय जाही। ए संबंध म राज्य निर्वाचन आयोग डहार ले अधिसूचना जारी कर दे गेहे।
राज्य चुनाव आयोग ले मिले खबर के मुताबिक राज्य म एक ठन जिला पंचायत सदस्य, दस ठन जनपद पंचायत सदस्य, एक सौ सत्ताईस ठन सरपंच अउ पांच सौ संतानवे ठन पंच समेत कुल सात सौ पैंतीस ठन खाली होय पद बर उपचुनई कराय जाही। उहें, प्रदेस के बारह ठन जिला के चौदह ठन नगरीय निकाय मन म पन्द्रह ठन वार्ड पार्षद मनके पद बर घलो उपचुनई कराय के फइसला ले गेहे।
खबर के मुताबिक ए चुनाव खातिर सोलह दिसंबर ले तेईस दिसंबर तक नामांकन पत्र भरे जा सकही। नामांकन पत्र मनके जांच ल चौबीस दिसंबर के करे जाही। उम्मीदवार मन ह छब्बीस दिसंबर तक अपन नाव वापस ले सकत हे अउ उही दिन चुनाव चिन्हा घलो बांटे जाही। त्रि-स्तरीय पंचायत चुनाव अउ निकाय चुनाव म नौ जनवरी के वोट डारे जाही। ए चुनाव ल मतपत्र के माध्यम ले कराय जाही। चुनाव आयोग डहार ले करे गे घोसना के संगेसंग ए क्षेत्र मन म आदर्श आचार संहिता लागू कर दे गेहे।
भेंट-मुलाकात कार्यक्रम
मुख्यमंत्री भूपेश बघेल ह आज महासमुंद जिला के बसना म भेंट मुलाकात कारीकरम म सामिल होईन। ए दउरान ओमन बसना ल अनुविभागीय कार्यालय के दर्जा देवाय के घोसना करीन। श्री बघेल ह गोपालपुर म सरकारी उच्च माध्यमिक विद्यालय के उन्नयन, मेमरा गांव के हाईस्कूल ल हायर सेकेंडरी बनाय, पिथौरा नगर पंचायत म गौरव पथ के निर्माण, बाघ नंदियां म एनीकट बनाय के संगेसंग कई ठन विकास काम के घोसना करीन। ए दउरान श्री बघेल ह भोकलूडीह ग्राम पंचायत के सरपंच ल वन अधिकार पत्र बर जल्दी ले जल्दी काम करे के निरदेस घलो दीन।
उहें, श्री बघेल ह भेंट-मुलाकात कारीकरम के दउरान पिरदा म उप तहसील कार्यालय खोले अउ महाविद्यालय बनाय के घलो घोसना करीन। संगेसंग ग्राम पंचायत सांकरा अउ पिरदा ल नगर पंचायत बनाय के घोसना करीन। ओमन किहीन कि ग्राम सांकरा म स्वामी आत्मानंद के स्कूल खोले जाही। ग्राम पिरदा म तरिया के गलत बंटवारा करे के सिकईत म मुख्यमंत्री ह उहां के तहसीलदार ल निलंबित कर दीन।
अनुराग ठाकुर-आकाशवाणी प्रसारण
केन्द्र सरकार के एक राष्ट्र, एक प्रसारण सेवा‘‘ के कोनों नीति नइ हे। केन्द्रीय सूचना अउ प्रसारण मंत्री अनुराग सिंह ठाकुर ह लोकसभा म एक ठिन लिखित उत्तर म ए जानकारी दीन। ओमन यहू किहीन कि आकाशाणी ह अपन स्थानीय रिले केन्द्र ल बंद करे अउ विविध भारती के माध्यम ले कारीकरम ल प्रसारित करे के कोनों फइसला नइ लेहे। ओमन बतईन कि अपन नेटवर्क के जरूरत के हिसाब से आकाशवाणी ह दुनियाभर के सुनइया मन बर अपन सेवा के प्रसार खातिर प्रसारण करथे। ओमन बतईन कि आकाशवाणी के माध्यम ले देस के पांच सौ एक केन्द्र ले तेईस ठन भासा अउ एक सौ इक्यासी ठन बोली मनके प्रसारण करथे।
कुम्हारी फ्लाईओवर-कार्रवाई
दुरूग जिला के कुम्हारी ओवर ब्रिज म होय दुर्घटना के मामला म पुलिस ह आज ठेका कंपनी के मैनेजर ल गिरफ्तार करके न्यायालय म पेस करीन। उहें, पुलिस ह ए मामला म डायरेक्टर के संगेसंग चार झन लोगन मनके तलास करत हे।
खबर के मुताबिक पाछु कुछ दिन पहिली कुम्हारी म नवा बनत ओवरब्रिज म फटफटी के गिरे ले एक झन पति-पत्नी के मउत होगे रिहीस।
छत्तीसगढ़ गौरव दिवस
राज्य म कांग्रेस सरकार के चार बछर के कार्यकाल ह पूरा होय के मउका म सत्रह दिसंबर के दिन प्रदेस म छत्तीसगढ़ गौरव दिवस मनाय जाही। ए दिन राज्य के जम्मों गौठान, सहकारी सोसायटी, धान खरीदी केन्द्र, तेंदूपत्ता संग्रहण केन्द्र, वनोपज प्रबंधन समिति, हाट बाजार अउ नगरीय क्षेत्र के वार्ड मन म कारीकरम करे जाही। ए दउरान लोगन मन ल राज्य सरकार के जनकल्याणकारी योजना मनके बारे म जानकारी दे जाही। इही दिन मुख्यमंत्री भूपेश बघेल ह बिहनिया ग्यारा बजे जनता के नाव संदेस घलो दीहीं।
दुर्घटना
राज्य के मनेन्द्रगढ़-चिरमिरी-भरतपुर जिला म मनेन्द्रगढ़-अंबिकापुर रद्दा म पाछु रतिहा एक ठन सड़क हादसा म दू झिन मनखे के परान छूट गे। उहें, छै झिन मनखे मन ह घायल होगे। खबर के मुताबिक ए जम्मों झन मनखे मन ह सूरजपुर ले कोतमा जावत रिहीस हे, उही दउरान उंखर कार ह बेलबहरा के तीर एक ठिन पेड़ म टकरा गे। ए हादसा के बाद कार म आगी लगे ले ड्राईवर के संगेसंग एक झिन मनखे के मउत होगे। उहें, छै झिन मनखे मन ल कार ले बाहिर निकाल के अस्पताल म भर्ती कराय गेहे।
ओति, रायगढ़ जिला म जोरापाली के तीर यात्री बस के चपेट म आय ले फटफटी चलइया एक झिन जवान लइका के मउकाच म परान छूट गे। घटना के बाद गांव वाले मन ह मुआवजा के मांग ल लेके रद्दा म चक्काजाम कर दीन। बाद म पुलिस के समझाय के बाद ए चक्काजाम ल खतम करे गीस।
भाजपा घेराव
राज्य म बिजली बिल के दर म बढ़ोतरी करे के विरोध म आज पूर्व मंत्री राजेश मूणत के अगुवई म भारतीय जनता युवा मोर्चा के कार्यकर्ता मन ह रईपुर के गुढ़ियारी बिजली आफिस के घेराव करीन। ए दउरान पुलिस अउ कार्यकर्ता मनके बीच झूमाझटकी घलो होईस। श्री मूणत ह किहीन कि राज्य सरकार ह बिजली बिल आधा करे के नाव म लोगन मन ले वादाखिलाफी करे हे।
ओति, धमतरी जिला के कुरूद म भाजपा किसान मोर्चा डहार ले चारो ठन बांध मन ले पानी नइ देके विरोध म राष्ट्रीय राजमार्ग म चक्काजाम करीन।
ट्रेन परिचालन
उत्तर मध्य रेलवे के आगरा रेलमंडल म तीसरा रेललाइन ले जोड़े खातिर कीथम स्टेशन म पच्चीस दिसंबर तक नॉन इंटरलॉकिंग के काम करे जात हे। जेखर सेती दक्षिण पूर्व मध्य रेलवे ले चलइया गाड़ी मन ल आगरा रेलमंडल म कुछ समय बर रोके जाही।
एमा पुरी-योगनगरी ऋषिकेश उत्कल एक्सप्रेस, विशाखापटनम-अमृतसर हीराकुंड एक्सप्रेस, कोरबा-अमृतसर एक्सप्रेस, अउ निजामुद्दीन-दुर्ग एक्सप्रेस ल दस-दस मिनट बर रोके जाही। उंहे निजामुद्दीन- विशाखापटनम एक्सप्रेस, बिलासपुर-नई दिल्ली राजधानी एक्सप्रेस, पुरी-योगनगरी ऋषिकेश उत्कल एक्सप्रेस, अउ उधमपुर-दुर्ग एक्सप्रेस ल पच्चीस-पच्चीस मिनट बर रोके जाही।
अउ अब थोरकुन समाचार सार म –
– शहीद वीरनारायण सिंह के सुरता म राजधानी रईपुर म होय चित्रकला प्रतियोगिता म आदिम जाति अनुसंधान अउ प्रसिक्षण संस्थान के आयुक्त सह संचालक शम्मी आबिदी ह किहीन कि नवा रईपुर म बनइया आदिवासी संग्रहालय म छत्तीसगढ़ के स्वतंत्रता संग्राम सेनानी अउ जननायक मनके सुघ्घर पेंटिंग लगाय जाही। ए प्रतियोगिता म बनाय गे पेंटिंग ल घलो ए संग्रहालय म राखे जाही।
– राज्य शासन ह सरगुजा जिला के खाद्य अधिकारी रविंद्र सोनी ल राशन दुकान म गड़बड़ी करे के आरोप म निलंबित कर देहे।
– छत्तीसगढ़ राज्य ओपन स्कूल डहार ले मुख्य अउ अवसर परीक्षा बछर दू हजार तेईस म सामिल होय बर दाखिला लेके आखरी तारीख इकतीस दिसंबर राखे गेहे।
– कोंडागांव जिला रोजगार अउ स्व-रोजगार मार्गदर्शन केंद्र, लाईवलीहुड कॉलेज डोंगरीपारा म काली चौदा दिसंबर के सिक्योरिटी गार्ड के खाली सौ पद म भर्ती बर प्लेसमेंट कैम्प राखे गेहे।
– रायगढ़ फास्ट ट्रैक कोर्ट ह गांजा तस्करी मामला म दू झन मनखे मन ल चार-चार बछर के कारावास के संगेसंग पचास-पचास हजार रूपिया के सजा सुनाय हे।
अउ
– कोंडागांव के कलेक्टर दीपक सोनी ह काली मलेरिया जागरूकता रथ ल हरियर झंडा देखाके रवाना करीन।