देश के छठवां सेमी हाइस्पीड ट्रेन वंदे भारत एक्सप्रेस काली ले बिलासपुर ले नागपुर के बीच चलाये जाही। प्रधानमंत्री नरेंद्र मोदी काली ग्यारह दिसंबर के नागपुर म ये ट्रेन ल हरियर झंडी दिखाके रवाना करही। ए ट्रेन ह काली संझा बिलासपुर स्टेशन पहुंचही। बिलासपुर स्टेशन म ट्रेन के पहिली यात्री मनके अउ क्रू स्टाफ मनके स्वागत रेलवे प्रसासन कोति ले करे जाही। वंदे भारत एक्सप्रेस के स्वागत मउका म संझा रेल परिवार के सदस्य मन डहार ले आने-आने रंगारंगा सांस्कृतिक कारीकरम प्रस्तुत करे जाही। ए दउरान यात्री मन ले यात्रा अनुभव के बारे म फीडबैक घलो ले जाही। ए मउका म सांसद अरूण साव समेत अन्य जनप्रतिनिधि, रेलवे अधिकारी अउ नागरिक मन मौजूद रिही।
रेलवे के मुताबिक ये ट्रेन के स्टापेज रायपुर, दुर्ग, राजनांदगांव अउ गोंदिया म दे गेहे। शनिचर ल छोड़के ये ट्रेन हप्ता म छै दिन चलही अउ यात्रा के एक चरण करीबन पांच घंटा म पूरा करही। ये ट्रेन बिलासपुर ले बीहनिया पौने सात बजे रवाना होही अउ मंझनियां करीबन सवा बारह बजे रायपुर पहुंचही। लहुटत बेरा म ये ट्रेन मंझनियां दू बजे नागपुर ले रवाना होके संझा सात बजके पैंतीस मिनट म बिलासपुर पहुंचही। ये सेमी हाइस्पीड ट्रेन म स्वचालित दरवाजा अउ जीपीएस आधारित ऑडियो विजुअल सूचना प्रणाली के संगेसंग जम्मों आधुनिक सुविधा होही।
खबर के मुताबिक वंदे भारत एक्सप्रेस ट्रेन के नियमित परिचालन बारह दिसंबर ले करे जाही, जेखर बर आरक्षण आजे ले सुरू होगे हे।
ईडी-संपत्ति अटैच
प्रवर्तन निदेशालय-ईडी ह मनी लॉंड्रिंग अउ कोयला घोटाला मामला म निलंबित आईएएस अधिकारी समीर बिश्नोई, मुख्यमंत्री सचिवालय के उपसचिव सौम्या चौरसिया, कारोबारी सूर्यकांत तिवारी, लक्ष्मीकांत तिवारी अउ सुनील अग्रवाल ल आज अतिरिक्त जिला अउ सत्र न्यायाधीश अजय सिंह राजपूत के विशेष अदालत म पेस करीस। सुनवाई के बाद अदालत ह समीर बिश्नोई, सूर्यकांत तिवारी, लक्ष्मीकांत तिवारी अउ सुनील अग्रवाल ल तेरह दिसंबर तक जेल भेज देहे। उहें, सौम्या चौरसिया के ईडी रिमांड अवधि ल चार दिन अउ बढ़ा दे गेहे। कोर्ट ह यहू कहिस कि अवइया बार सबो आरोपी मन ल वीडियो कान्फ्रेंसिग के जरिए पेस करे जाय। बहुते जरूरी होय म ही एमन ल कोर्ट लाय के निरदेस दीन हे।
ए कार्रवाई पच्चीस रूपिया प्रति टन कोयला उपर उगाही मामला से संबंधित हवय। इही बीच, ईडी ह ए मामला म सबो आरोपी मनके एक सौ बावन करोड़ रूपिया ले जादा के चल-अचल संपत्ति अटैच करे हे। एमा सूर्यकांत तिवारी के पैंसठ संपत्ति, सौम्या चौरसिया के इक्कीस, समीर बिश्नोई के पांच अउ बांचे संपत्ति ह सुनील अग्रवाल अउ लक्ष्मीकांत तिवारी ले जुड़े हुए हे। कुर्की करे गे चल-अचल संपत्ति म नगदी, आभूषण, फ्लैट, कोयला वाशरी अउ छत्तीसगढ़ म स्थित भूखंड घलो सामिल हवय।
खबर के मुताबिक ईडी ह कोरबा अउ रायगढ़ के डीसी कार्यालय म खनन विभाग समेत पचहत्तर ले जादा जघा म तलाशी लीन अउ आपत्तिजनक सबूत इकट्ठा करे हे। ईडी के जांच म आगू आय हे कि पाछु दू बछर म कमती ले कमती पांच सौ चालीस करोड़ रूपिया के उगाही करे गेहे। दागी संपत्ति के अउ आगू हस्तांतरण ल रोके बर ही अनंतिम कुर्की आदेस जारी करे गेहे।
जी-टवेंटी-सम्मेलन
जी-ट्वेंटी के चौथइया वित्त कार्य समूह के बइठका अवइया बछर के सितंबर माह म छत्तीसगढ़ म होही। मुख्यमंत्री भूपेश बघेल ह ट्वीट करके ए जानकारी ल साझा करीन हे। प्रधानमंत्री नरेन्द्र मोदी ह भारत कोति ले जी-ट्वेंटी के अध्यक्षता के तैयारी ल लेके काली वीडियो कान्फ्रेंसिंग के माध्यम ले बड़का बइठका ले रिहीन, जेमा केन्द्रीय गृहमंत्री अमित शाह, विदेश मंत्री एस. जयशंकर अउ छत्तीसगढ़ के राज्यपाल अनुसुईया उइके समेत सबो राज्य के राज्यपाल, उप राज्यपाल अउ मुख्यमंत्री मन सामिल रिहीन। बइठका म छत्तीसगढ़ के मुख्यमंत्री ह प्रधानमंत्री ल अवइया पहुना मन बर विश्व स्तरीय व्यवस्था राखे के आश्वासन दीन हे।
प्रधानमंत्री ह किहीन कि जी-ट्वेंटी के अध्यक्षता करे के भारत ल बड़ उत्कृष्ट अवसर प्राप्त होय हे। एमा हमन ल ‘अतिथि देवो भव‘ के सांस्कृतिक परंपरा अउ विविधता म एकता के भावना ल जम्मों दुनिया ल देखाना हे। एमा सबो राज्य मन ल अपन-अपन कला, संस्कृति अउ विशिष्टता देखाय के मउका मिलही।
वीरनारायण सिंह-बलिदान दिवस
स्वतंत्रता संग्राम सेनानी अउ अमर शहीद वीरनारायण सिंह के बलिदान दिवस म आज प्रदेसभर म आने-आने कारीकरम आयोजित करके ओमन ल श्रद्धांजलि दे जावत हे। राज्यपाल अनुसुईया उइके ह शहीद वीरनारायण सिंह ल नमन करत हुए लोगन मन ले अइसना वीर नायक के योगदान ल सुरता करके देस के प्रति अपन जिम्मेदारी के निर्वहन करे के आह्वान करीन हे।
ऐति, आदिम जाति विकास मंत्री डॉक्टर प्रेमसाय सिंह टेकाम ह शहीद वीरनारायण सिंह बलिदान दिवस के मउका म आज रईपुर म आयोजित कारीकरम म स्वर्गीय राजीव गांधी स्मृति प्रयास आवासीय विद्यालय के प्रतिभासाली अंठावन विद्यार्थी मन ल सम्मानित करीन।
शहीद वीरनारायण सिंह के सुरता म आज ले पंडित दीनदयाल उपाध्याय ऑडिटोरियम म तीन दिन के राज्य स्तरीय चित्रकला प्रतियोगिता के सुरूवात होगे हे। प्रतियोगिता के पहिली दिन एक सौ पचास प्रतिभागी सामिल होईन।
उहें, भाजपा के नेता अउ कार्यकर्ता मन ह बालोद बस स्टैंड स्थित शहीद वीरनारायण सिंह के मूर्ति म फूलमाला चढ़ाके उंखर सहदात ल नमन करीन। कारीकरम म भाजपा के क्षेत्रीय संगठन महामंत्री अजय जामवाल, प्रदेस संगठन महामंत्री पवन साय समेत आने-आने पदाधिकारी मन मौजूद रिहीन।
भाजपा के प्रदेस अध्यक्ष अरूण साव ह शहीद वीरनारायण सिंह के पुण्यतिथि म उनला श्रद्धासुमन अर्पित करत हुए किहीन कि आज के युवा पीढ़ी ल शहीद वीरनारायण सिंह के त्याग, तपस्या अउ बलिदान ले प्रेरणा लेना चाही।
धान खरीदी
प्रदेस म किसान मन से समर्थन मूल्य म अब तक लगभग इकचालीस लाख मीटरिक टन धान के खरीदी करे जा चुके हे। एखर बदला किसान मन ल आठ हजार चार सौ इक्यासी करोड़ रूपिया ले जादा के भुगतान बैंक लिकिंग व्यवस्था के माध्यम ले करे गेहे।
इही बीच, जांजगीर-चांपा जिला के अपन कलेक्टर एस.पी. वैद्य ह पामगढ़ तहसील के अंतर्गत पामगढ़, मेंहदी, मेऊ, लोहरसी अउ खरौद, उहें, जांजगीर तहसील के अंतर्गत खोखरा के धान खरीदी केन्द्र के निरीक्षण करीन, जहां अव्यवस्था अउ गड़बड़ी पाय जाय म खरौद धान खरीदी केन्द्र प्रभारी ल हटाय के अउ केन्द्र म अनुपस्थित पटवारी ल निलंबित करे के निरदेस दीन हे। उहें, तहसीलदार के टीम ह जर्वे गांव म एक झिन मनखे के मकान ले करीब चार सौ क्विंटल धान, सत्रह सौ बारदाना अउ सार्वजनिक वितरण प्रणाली के अस्सी क्विंटल चाउर घलो जब्त करे हे।
जिले की चिट्ठी
प्रादेशिक समाचार एकांश, आकाशवाणी समाचार डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ स्थित आकाशवाणी के जम्मों केंद्र मन ह एके संगरा रिले करही। ए बखत के अंक म ‘‘कांकेर‘‘ जिला के गतिविधि मनके बारे म जानकारी दे जाही।
दुर्घटना
दुरूग जिला के कुम्हारी म नवा बनत ओवरब्रिज ले मोटरसाइकिल के गिरे ले एक दम्पति के मउत होगे। ए दुर्घटना म बारह बछर के एक झिन नोनी ह घायल होगे हे।
ए घटना म मुख्यमंत्री भूपेश बघेल ह गहरा दुख प्रकट करे हे। मुख्यमंत्री ह जिला प्रसासन के अधिकारी मन ल नवा बनत ओवरब्रिज म बेरिकेडिंग समेत सुरक्षा के सबो उपाय करे के निरदेस दीन हे, जेखर ले भविष्य म अइसन घटना दुबारा झन होवय।
अउ अब थोरकुन समाचार सार म –
– प्रजापिता ब्रम्हकुमारी ईश्वरी विश्वविद्यालय के क्षेत्रीय प्रशासिका राजयोगिनी ब्रम्हकुमारी कमला दीदी के आज निधन होगे। उंखर निधन म राज्यपाल अनुसुईया उइके, मुख्यमंत्री भूपेश बघेल, भाजपा के प्रदेस अध्यक्ष अरूण साव अउ नेता प्रतिपक्ष नारायण चंदेल समेत आने-आने नेता मन ह श्रद्धांजलि अर्पित करे हे।
– भारतीय जनता पार्टी के प्रदेस उपाध्यक्ष अउ दुरूग संभाग प्रभारी भूपेन्द्र सवन्नी अउ प्रदेस संगठन महामंत्री पवन साय के उपस्थिति म बालोद विधानसभा क्षेत्र के सांगठनिक कामकाज ल लेके बइठका आयोजित करे गीस।
– बीजापुर जिला म प्रभारी मंत्री कवासी लखमा अउ बस्तर विकास प्राधिकरण के अध्यक्ष लखेश्वर बघेल के मौजूदगी म बस्तर विकास प्राधिकरण के बइठका राखे गीस।
– कोंडागांव जिला के सासकीय प्राथमिक साला मुरारीपारा-बड़ेबेंदरी म सड़क सुरक्षा सप्ताह के अंतर्गत जागरूकता अभियान चलाय गीस। एमा विद्यार्थी अउ शिक्षक-शिक्षिका मन ल सड़क सुरक्षा संबंधी नियम के पालन करे के सपथ देवाय गीस।
– जांजगीर-चांपा जिला के शिवरीनारायण क्षेत्र के ग्राम केसला के तीर ट्रैक्टर के टक्कर ले मोटरसाइकिल सवार एक झिन सीआरपीएफ जवान के मउत होगे।
अउ
– कोंडगांव जिला रोजगार अउ स्व-रोजगार मार्गदर्शन केन्द्र, लाईवलीहुड कालेज डोंगरीपारा म चौदह दिसंबर के सुरक्षा गार्ड के खाली सौ पद म भर्ती बर प्लेसमेंट कैम्प के आयोजन करे जाही।