छत्तीसगढ़ म भानुप्रतापपुर विधानसभा सीट कांग्रेस ह फेर जीत लेहे। इंहा होय उपचुनाव के नतीजा म आज कांग्रेस प्रत्याशी सावित्री मंडावी ह भाजपा प्रत्याशी ब्रम्हानंद नेताम ल इक्कीस हजार एक सौ इकहत्तर वोट ले हराइन। सावित्री मंडावी ल पैंसठ हजार चार सौ उन्यासी वोट मिले हे। ब्रम्हानंद नेताम ल चौवांलिस हजार तीन सौ आठ वोट मिले हे।
तीसर स्थान म सर्व आदिवासी समाज के उम्मीदवार अकबर राम कोर्राम ह तेईस हजार चार सौ सतरा वोट पाय हे।
भानुप्रतापपुर उपचुनाव म जीत के खबर मिलतेच प्रदेश कांग्रेस के रायपुर कार्यालय म कार्यकर्ता मन म उछाह छागे अउ ओमन फटाका फोड़के मिठाई बांटीन। ये उपचुनाव म होय जीत ल मुख्यमंत्री भूपेश बघेल ह कांग्रेस कोति आदिवासी मनके भरोसा के नतीजा बतावत हे। कांग्रेस उम्मीदवार सावित्री मंडावी ल बधाई देत ओमन कीहिन कि उपचुनाव म मिले जीत ले आदिवासी समुदाय के कांग्रेस बर विस्वास अउ मजबूत होय हे।
दूसर कोति गुजरात विधानसभा चुनाव म पार्टी के जीत ल लेके भाजपा कार्यालय एकात्म परिसर म कार्यकता मन ह उछाह के संग मिठाई बांटीन। खबर के मुताबिक कांग्रेस के बड़का नेता अउ छत्तीसगढ़ विधानसभा के उपाध्यक्ष मनोज मंडावी के निधन के सेती भानुप्रतापपुर सीट म उपचुनाव कराय गीस।
गुजरात-हिमाचल मतगणना
गुजरात विधानसभा चुनाव म भारतीय जनता पार्टी ह अउ हिमाचल प्रदेश विधानसभा चुनाव म कांग्रेस ह सरकार बनाय बर जरूरी निर्णायक बढ़त हासिल कर लेहे। अभी दूनो राज्य म मतगणना जारी हे । आखरी समाचार मिले तक गुजरात के एक सौ बंयासी म एक सौ संतावन सीट म भाजपा आगू चलत हे। गुजरात म सौ सीट के नतीजा आगे हे। एमा ले छियांसी सीट भाजपा जीते हे। उंहे कांग्रेस ह सात, आम आदमी पार्टी ह तीन अउ समाजवादी पार्टी ह एक सीट म जीत हासिल करे हे।
अइसने हिमाचल प्रदेश के अड़सठ म उनतालिस सीट म कांग्रेस ह बढ़त हासिल करे हे। अंतिम समाचार मिले तक इंहा सैंतालिस सीट के नतीजा आगे हे। भाजपा ह सोला अउ कांग्रेस ह अठाईस सीट जीते हे। उंहे तीन सीट निर्दलीय के पक्ष म गेहे।
जनता कांग्रेस जनअधिकार पदयात्रा
जनता कांग्रेस छत्तीसगढ़ के अध्यक्ष अमित जोगी ह आज जांजगीर चांपा जिला के बलौदा ले जनअधिकार पदयात्रा सुरू करीन। एमा उंखर पत्नि ऋचा जोगी समेत पार्टी के आने पदाधिकारी अउ कार्यकर्ता सामिल हे। यात्रा के सुरूआत के बेरा म बोलत अमित जोगी ह कीहिन कि बछर दू हजार तेइस के अवइया विधानसभा चुनाव म ओखर पार्टी कोनो आने दल संग गठबंधन नइ करही। ओमन राज्य सरकार उपर आरोप लगाइन कि अभी प्रदेस म विकास रूक गेहे। अमित जोगी ह कीहिन कि ओखर पार्टी के कांग्रेस म विलय के कोनो संभावना नइ हे।
गोधन न्याय योजना
मुख्यमंत्री भूपेश बघेल ह आज अपन निवास कार्यालय म गोधन न्याय योजना के हितग्राही मनके खाता म ये योजना म करीबन आठ करोड़ रूपिया ऑनलाइन जमा कराय हे। ये योजना म गोबर बेचइया पशुपालक अउ गांव के लोगन मन ल अभी तक करीबन एक सौ नवांसी करोड़ रूपिया के भुगतान करे गेहे। ये बेरा म मुख्यमंत्री ह कीहिन कि गौठान ले खुद के जमा पूंजी ले गोबर बिसाना गोधन न्याय योजना के बड़े सफलता हे। ओमन यहू कीहिन कि प्रदेस के आधा ले जादा गौठान अपने संसाधन ले गोबर बिसावत हे।
मुख्यमंत्री ह बताइन कि अवइया बेरा म ग्रामीण औद्योगिक परिक्षेत्र ल विकसित करे बर ये योजना ग्रामीण अर्थव्यवस्था के मजबूत आधार बनही। उंहे मुख्यमंत्री ह प्रदेस के जादा ले जादा गौठान मन म पैरा बंडल बनाय बर बेलर मसीन देवाय के निर्देश दीन। कार्यक्रम म बोलत कृषि मंत्री रविंद्र चौबे ह कीहिन कि प्रदेस के साढ़े नौ हजार ले जादा गौठान मन म चार हजार दू सौ सत्तर गौठान स्वावलंबी होगे हे। एमा गोबर बिसाय के संगेसंग वर्मी कम्पोस्ट के उत्पादन अउ वितरण के काम होवत हे। गौठान के बढ़वार होय ले एमा युवा मन बर रोजगार के मउका घलो बढ़ाय जाही।
खेल अकादमी
प्रदेस म खेल सुविधा के बढ़वार बर आने आने औद्योगिक इकाई कोति ले खेल अकादमी चलाय के काम सुरू होगे हे। एमा आज मुख्यमंत्री भूपेश बघेल के अगवई म खेल अउ युवा कल्याण विभाग अउ औद्योगिक इकाई के बइठका होइस। एमा भिलाई इस्पात संयंत्र अउ राष्ट्रीय खनिज विकास निगम, भारत एल्युमिनियम कंपनी बाल्को समेत नौ ठिन औद्योगिक इकाई के प्रतिनिधि संघरीन। आज के बइठका म बीएसपी ह नारायणपुर म मल्लखंभ अकादमी बनाय के मंजूरी दीन। उंहे बालको कोति ले कोरबा के प्रियदर्शिनी स्टेडियम म फुटबॉल, वॉलीबॉल, बास्केटबॉल, अउ तैराकी अकादमी बनाय जाही। एस.ई.सी.एल. ह बिलासपुर म राज्य खेल प्रशिक्षण केंद्र बर जरूरी सुविधा देवाय के मंजूरी दीन। अल्ट्राटेक सीमेंट कोति ले रायपुर म आवासीय हॉकी अकादमी अउ श्री बजरंग पॉवर एंड इस्पात लिमिटेड कोति ले आवासीय एथलेटिक अकादमी चलाय जाही अइसने गोपाल स्पंज एंड पावर लिमिटेड अउ फिल इस्पात लिमिटेड कोति ले बिलासपुर के बहतराई म बालिका कबड्डी अकादमी बर आर्थिक मदद दे जाही। जिंदल स्टील एंड पावर लिमिटेड कोति ले नवा रायपुर म निशानेबाजी अकादमिक चलाय जाही।
खबर के मुताबिक मुख्यमंत्री के अगवई म पाछू पंद्रह जून के छत्तीसगढ़ खेल विकास प्राधिकरण के बइठका म ये फैसला लेगे रीहिस।
अग्निवीर भर्ती रैली
दुर्ग के रविशंकर स्टेडियम म चलत अग्निवीर सेना भर्ती रैली ल लेके युवा मन म उछाह देखे जावत हे। तेरा दिसंबर तक चलइया ये भर्ती रैली म सामिल होय बर हरएक दिन युवा अभ्यर्थी मन बड़ संख्या म दुर्ग पहुंचत हे। ये रैली म सामिल होय बर आज करीबन सैंतालिस सौ युवक मन ह अपन पंजीयन कराय रीहिन। जेमा करीबन तीन हजार युवा मन भर्ती रैली म सामिल होइन। रैली के बेरा सामान्य सैनिक के संगेसंग नर्सिंग सहायक बर पंजीयन करे जात हे।
ये भर्ती के काम दस ले बारा दिसंबर तक चलही। खबर के मुताबिक ये भर्ती रैली म सामिल होय बर अवइया मन ल मुफत म रेहे अउ खाय पीये के बेवस्था जिला प्रसासन कोति ले कराय गेहे। भर्ती रैली के बेवस्था देखइया जनसक्ति नियोजन विभाग के उप संचालक राजकुमार कर्रे ह बताइन कि दुर्ग कलेक्टर पुष्पेंद्र कुमार मीणा रोजे स्टेडियम पहुंचके जम्मों सुविधा के जायजा लेवत हे। संगेसंग नोडल अधिकारी घलो सरलग गतिविधि म निगरानी राखे हे।
ऑनलाइन
सरगुजा पुलिस ह ऑनलाइन खरीदी के नाव म एक महिला ले करीबन साढ़े पांच लाख रूपिया के ठगी के मामला दर्ज करे हे। पुलिस अधीक्षक भावना गुप्ता ह बताइन कि कपाटबहरी गांव के रहइया पीड़ित महिला ल एक ऑनलाइन कंपनी कोति ले कोनो मनखे ह पच्चीस लाख रूपिया इनाम दे जाय के सूचना देगे रीहिस। एखर बादे लेनदेन ले ये महिला के खाता ले साढ़े पांच लाख रूपिया निकल गे। पुलिस अधीक्षक ह बताइन कि पीड़िता के सिकइत म विशेष टीम बनाके आरोपी मनके खोजबीन शुरू कर दे गेहे।
अउ अब थोरकुन समाचार सार म –
– मुख्यमंत्री भूपेश बघेल आज अपन निवास कार्या लय म राखे गे चर्मशिल्पकार विकास बोर्ड के शपथ ग्रहण समारोह म सामिल होइन। ये मौका म बोर्ड के अध्यक्ष तरुण बिजौर ह कार्यभार संभालिन।
– भाजपा के भिलाई इकाई कोति ले काली जुनवानी ले शंखनाद पदयात्रा निकाले जाही ।
– रायगढ़ जिला म पुलिस विभाग म होय बड़े फेरबदल म पंद्रा झिन पुलिस कर्मचारी मनके तबादला कर दे गेहे। ए संबंध म पुलिस अधीक्षक अभिषेक मीणा ह आदेश जारी कर दे हे।
– कोरबा पुलिस ह राज्य विद्युत मंडल के बिजली संयंत्र ले तांबा चोरी के मामला म सीएसईबी चौकी ले कुछएक दिन पहिली फरार होय आरोपी ल फेर गिरप्तार कर लेहे। ये मामला म तीन झिन आरोपी पहिलीच गिरप्तार होय हे। आज पकड़े गे आरोपी उपर डीजल अउ कोयला चोरी ल जुड़े गिरोह चलाय के मामला दरज हे।
अउ
– रायपुर के राजकुमार कालेज म काली वार्षिक उत्सव के तियारी म नृत्य अभ्यास के बेरा बारा बछर के नोनी के तबियत बिगड़ गे रीहिस, जउन ल अस्पताल म भर्ती कराय गे रीहिस हे। आज बीहनिया वो नोनी के मउत होगे।