आज दिनभर के खबर ल अपन गुरतुर छत्तीसगढ़ी भाखा म पढ़व

भानुप्रतापपुर उपचुनाव मतगणना

भानुप्रतापपुर विधानसभा उपचुनाव बर काली बीहनिया आठ बजे ले वोट के गिनती शुरू होही अउ कले नतीजा के घोषणा करे जाही। कंाकेर के सासकीय भानुप्रतापदेव स्नातकोत्तर महाविद्यालय म वोट के गिनती करेे जाही।
सबले पहिली डाकमत पत्र के गणना होही। फेर ईवीएम मशीन म दरज मत के गिनती होही। जिला निर्वाचन  अधिकारी डॅाक्टर प्रियंका शुक्ला ह आज पत्रकार मन ल बताइन कि ए चुनई बर उन्नीस राउंड म मतगणना होही। एक कमरा म चौदा ठिन टेबल लगाय गेहे। काली बीहनिया सात बजे प्रेक्षक अउ रिटर्निंग अधिकारी मनके मौजूदगी म स्ट्रंाग रूम ल खोले जाही। उंहे मतगणना के कामकाज के वीडियो रिकार्डिंग घलो कराये जाही।

ओमन बताइन कि मतगणना के जगा म सुरक्षा के चाक-चौबंद बेवस्था करे गेहे। निर्वाचन आयोग कोति ले जारी निर्देश म केहे गेहे कि कोनो भी अधिकारी अउ कर्मचारी मतगणना केंद्र म मोबाइल पेन लेके नइ जा सकय। मतगणना कर्मचारी मन ल पहिचान पत्र रखना जरूरी हे।

संसद-शीतकालीन सत्र

संसद के शीतकालीन सत्र आज ले सुरू होगे। सत्र के पहिली दिन परिसर म आज पत्रकार मन ले गोठबात करत प्रधानमंत्री नरेन्द्र मोदी ह जम्मों राजनीतिक दल ले आग्रह करीन कि ओमन संसद के सीतकालीन सत्र ल जादा ले जादा उपयोगी बनाय बर परयास करय। प्रधानमंत्री ह सबो राजनीतिक दल ले अपील करीन कि ओमन बहस म युवा सदस्य मन ल भाग लेके मउका देवय। सत्र ल महत्ता के बतात श्री मोदी ह किहीन कि ए सत्र अइसन बेरा म होवत हे, जब भारत ह जी-ट्वेंटी के अध्यक्षता लेहे अउ देस अमृतकाल म प्रवेश करे हे।
ओमन कीहिन कि जी-ट्वेंटी विश्व के आगू भारत के क्षमता दिखाय के मउका हे । प्रधानमंत्री ह विश्वास जताइन कि राज्यसभा के नवा सभापति जगदीप धनखड़ के अगवई म सदन नवा कीर्तिमान स्थापित करही। राज्यसभा म शीतकालिन सत्र के पहिली दिन ओखर सुआगत करत श्री मोदी ह श्री धनखड़  ल शुभकामना दीन। शीतकालिन सत्र ये महीना के उनतीस तारीख तक चलही। ये दउरान लोकसभा अउ राज्यसभा के दूनों के सतरा बइठका ठिन होही।

भेंट-मुलाकात कार्यक्रम

मुख्यमंत्री भूपेश बघेल आज भेंट मुलाकात कार्यक्रम म महासमुंद जिला के सरायपाली विधानसभा क्षेत्र के गांव बलौदा पहुंचीन। ए बेरा म ओमन शिशुपाल पर्वत ल पर्यटन स्थल घोसित करे अउ सरायपाली म अंतर्राज्यीय बस स्टैंड बनाय समेत कतकोन घोसना करीन। ए बेरा म मुख्यमंत्री ह हाट बाजार क्लीनिक योजना म जिला के सबो विकासखंड बर मोबाइल मेडिकल यूनिट दीन। श्री बघेल ह भंवरपुर ल नगर पंचायत अउ उप तहसील बनाय के घोषणा के संग भंवरपुर म राष्ट्रीयकृत बैंक के शाखा खोले के बात कीहिन। वोमन भंवरपुर पुलिस चौकी के थाना म बढ़वार करे, कॉलेज बनाय अउ स्वामी आत्मानंद इंग्लिश माध्यम स्कूल खोले के घोषणा करीन।
कारीकरम के बेरा मुख्यमंत्री ह गरियाबंद जिला बर दू सौ उन्नीस करोड़ रूपिया ले जादा के करीबन साढ़े चार सौ विकास काम के भूमिपूजन अउ सिलान्यास करीन। पाछु सर्किट हाउस म अधिकारी मनके बइठका लेके महरा जाति प्रमाण पत्र बनाय आत दिक्कत ल दुरिहा करे के निरदेस दीन। मुख्यमंत्री ह पिछड़ी जनजाति के भर्ती बर मेरिट के आधार म पद म भर्ती करे के मंजूरी दीन। ओमन हाट बाजार क्लीनिक ल छोटे-छोटे बाजार म नइ करके बड़े बाजार म करे अउ ओपीडी बढ़ाय के निरदेस दीन।

भाजपा-राष्ट्रीय पदाधिकारी बैठक

भाजपा के राष्ट्रीय पदाधिकारी मनके दू दिवसीय बइठका दिल्ली म होईस। एमा छत्तीसगढ़ ले पार्टी के प्रदेस अध्यक्ष अरूण साव, राष्ट्रीय उपाध्यक्ष डॉक्टर रमन सिंह अउ संगठन महामंत्री पवन साय सामिल होईन। ए बइठका म प्रदेस अध्यक्ष श्री साव ह राज्य म कांग्रेस सरकार के खिलाफ होय आंदोलन के जानकारी दीन। ओमन छत्तीसगढ़ म संगठन म चलत काम के जानकारी घलो दीन। बइठका म लोकसभा प्रवास अउ मन की बात जइसन बिसय म गोठबात होईस। बइठका के उद्घाटन प्रधानमंत्री नरेन्द्र मोदी अउ राष्ट्रीय अध्यक्ष जे.पी. नड्डा ह करे रिहीन।

सशस्त्र सेना झंडा दिवस

देसभर म आज सशस्त्र सेना झंडा दिवस मनाय जात हे। हर बछर आजे के दिन सहीद अउ मातृभूमि के रक्षा करइया सशस्त्र बल के जवान मन ल सम्मानित करे बर मनाय जाथे। ए दिन सशस्त्र बल के करमचारी मनके कल्याण बर लोगन ले धन एकट्ठा करे जाथे। रक्षा मंत्री राजनाथ सिंह ह वीडियो संदेस ले सशस्त्र सेना झंडा दिवस कोष म योगदान देके अपील करीन।
छत्तीसगढ़ के राज्यपाल अनुसुईया उइके ह सशस्त्र सेना झंडा दिवस के मउका म अपन संदेस म कश्मीर ले लेके कन्याकुमारी तक देस के सीमा के रक्षा करइया तीनों सेना के बहादुर जवान मन ल सुभकामना दीन।
उहें, मुख्यमंत्री भूपेश बघेल ह ए मउका म सैनिक मनके कल्याण बर अंशदान करीन। मुख्यमंत्री ले छत्तीसगढ़ सैनिक कल्याण बोर्ड के संचालक बिग्रेडियर विवेक शर्मा ह गरियाबंद जिला म भेंट करीन। श्री बघेल ल बिग्रेडियर ह प्रतीकात्मक झंडा लगाके सहयोग रासि लीन। अपन संदेस म मुख्यमंत्री ह किहीन कि ए दिन, देस के जवान सैनिक अउ उंखर परिवार वाले मन बर अपन जिम्मेवारी ल समझे अउ ओमा योगदान देके प्रतीक हवय।

मुख्य सचिव समीक्षा

प्रदेस के मुख्य सचिव अमिताभ जैन ह कलेक्टर मन ल निर्देश दीन हे कि ओमन अपन जिला के मिलर्स मनके बइठका लेके उपार्जन केंद्र ले धान के उठाव अउ भारतीय खाद्य निगम अउ नागरिक आपूर्ति निगम म चांउर जमा करे के सरलग मॉनिटरिंग करय। मुख्य सचिव ह वीडियो कॉन्फ्रेसिंग ले कमिश्नर अउ कलेक्टर मनके बइठका लेके समर्थन कीमत म धान बिसाय के समीक्षा करीन। संगेसंग किसान पंजीयन, गिरदावरी के शुद्धता, सिकइत के निपटारा, बारदाना के बेवस्था अउ धान बिसाय के बाद तय बेरा म रकम भुगतान के घलो जानकारी लीन।

भाजपा-जांच दल

भारतीय जनता पार्टी के प्रदेस इकाई ह बस्तर के मालगांव म मुरूम खदान म होय छै झिन के मउत अउ अंबिकापुर मेडिकल कॉलेज म चार झिन नवजात शिशु के मउत के मामला के जांच बर जांच दल बनाय गेहे। पार्टी के प्रदेस महामंत्री केदार कश्यप ह बतईन कि ए समिति संबंधित जगह के दउरा करके ए मामला ले जुड़े तथ्य के जांच करके अपन रिपोर्ट हफ्ता भर म सौंपही। समिति म पूर्व सांसद रामविचार नेताम, पूर्व मंत्री रामसेवक पैकरा अउ भाजपा प्रदेस प्रवक्ता अनुराग सिंहदेव के संग आने जनप्रतिनिधि सामिल हे।

रोजगार मेला

रायपुर म होवइया मेगा रोजगार मेला म संघरे बर ऑनलाइन अर्जी देके तारीख बढ़ा दे गेहे। अब एखर बर दस दिसंबर तक ऑनलाइन अर्जी दे जा सकत हे। मेला के आयोजन के तिथि अलग ले घोषित करे जाही। ये रोजगार मेला ले निजी क्षेत्र के आने आने सेक्टर म छियांलिस हजार ले जादा पद बर दसवीं अउ बारहवीं पास आवेदक के संगेसंग स्नातक, स्नातकोत्तर, जीडीए, होटल मैनेजमेंट, आईटीआई, पॉलिटेक्निक डिप्लोमा, बी.ई. अउ बी.टेक. पास योग्य आवेदक मनके भर्ती करे जाही।
उंहे दुर्ग म चलत अग्निवीर भर्ती रैली म आज तीन हजार ले जादा युवक मन सामिल होइन।  ये भर्ती रैली तेरा दिसंबर तक चलही।

अउ अब थोरकुन समाचार सार म –

– संघ लोक सेवा आयोग-यूपीएससी ह एसो सितंबर म होय प्रशासनिक सेवा के मुख्य परीक्षा के नतीजा घोषित कर देहे। परीक्षा म पास होय उम्मीदवार के साक्षात्कार ई-समन पत्र आयोग के वेबसाइट ले डाउनालोड करे जा सकथे।
– गरियाबंद नगर पालिका उपाध्यक्ष पद बर लाए गे अविश्वास प्रस्ताव के जांच बर भाजपा नेता संजय श्रीवास्तव ल पर्यवेक्षक बनाय गेहे।
– दंतेवाड़ा जिला के अरनपुर थाना क्षेत्र ले सुरक्षा बल ह दू झिन माओवादी ल गिरप्तार करे हे। एमा एक माओवादी उपर एक लाख अउ दूसर माओवादी उपर दस हजार रूपिया के इनाम घोषित रीहिस।
– शहीद वीर नारायण सिंह स्मृति राज्य स्तरीय चित्रकला प्रतियोगिता के आयोजन दस ले बारा दिसंबर तक करे जाही। एमा सामिल होय बर नौ दिसंबर तक अर्जी मंगाय गेहे।
अउ
– जशपुर जिला के घाघरा गांव म कार्यक्रम के बेरा म करीबन बारा ठिन फटफटी के अज्ञात कारण ले जले के मामला के जांच पुलिस ह शुरू कर देहे।