भानुप्रतापपुर विधानसभा उपचुनई बर आज वोट डारे गीस। मंझनिया तीन बजे तक के सुरूवाती आंकड़ा के मुताबिक ए उपचुनई बर पैंसठ फीसदी ले जादा मतदान होय हे। ए उपचुनई बर करीबन बैसठ फीसदी पुरूष मतदाता अउ छियासठ प्रतिसत ले जादा माईलोगिन मतदाता मन ह अपन मताधिकार के परयोग करे हे। बिहनिया सात बजे ले सुरू होय मतदान म केन्द्र के बाहिर लोगन मनके लंबा कतार देखे गीस। सांतिपूर्ण अउ निष्पक्ष मतदान बर चुनाव आयोग कोति ले सुरक्षा के कड़ा प्रबंध करे गे रिहीस। ए विधानसभा क्षेत्र म एक लाख पंचानवे हजार आठ सौ बाईस मतदाता हवय। इहां परमुख मुकाबला कांग्रेस उम्मीवार सावित्री मंडावी अउ भाजपा प्रत्याशी ब्रम्हानंद नेताम के बीच हवय।
कांग्रेस उम्मीदवार श्रीमती मंडावी ह चारामा ब्लॉक के तेलगरा गांव म अपन वोट डारीन। त उहें, भाजपा उम्मीदवार ह कासावाही म वोट डारीन। ए उपचुनई के परिणाम आठ दिसंबर के आही।
जानबा के मुताबिक भानुप्रतापपुर विधानसभा सीट विधायक मनोज मंडावी के निधन के बाद खाली होगे रिहीस।
हाईकोर्ट-ब्रम्हानंद नेताम
भानुप्रतापपुर विधानसभा उपचुनई म भाजपा प्रत्यासी ब्रम्हानंद नेताम ल झारखंड हाईकोर्ट ले राहत मिल गेहे। हाईकोर्ट ह अवइया सुनवाई तक उंखर मनके खिलाफ कार्रवाई उपर रोक लगा देहे। झारखंड हाईकोर्ट के न्यायाधीश जस्टिस संजय द्विवेदी के अदालत म आज ए मामला के सुनवाई होईस। ब्रम्हानंद नेताम कोति ले वकील मन ह अदालत म अपन बात राखत किहीन कि ए मामला म उंखर पक्षकार के कोनों परकार के जुड़ाव नइ हे अउ एफ.आई.आर. घलो नइ हे। फेर पुलिस ह ओमन ल परेसान करत हे। अदालत ह आज होय सुनवाई के बाद आदेस देहे कि अवइया सुनवाई तक ब्रम्हानंद नेताम के खिलाफ पीड़क कार्रवाई झन करे जाय।
इही बीच, ए मामला म कांकेर आय झारखंड पुलिस ह मामला के विवेचना बर किलेपाल गांव पहुंचीन अउ भाजपा प्रत्याशी ब्रम्हानंद नेताम ल अपन संग कांकेर थाना चले बर किहीन। ए खबर मिलतेच बड़ संख्या म भाजपा कार्यकर्ता मन ह चारामा विकासखंड के हाराडुला चउक पहुंच गे। झारखंड पुलिस ल ए दउरान भाजपा कार्यकर्ता मनके भारी विरोध के सामना करे बर पड़ीस। पुलिस के कहना हे कि ओमन सिरिफ ब्रम्हानंद नेताम के बयान ले बर आय रिहीन। विरोध के चलत झारखंड पुलिस ह मउका ले लहुट गे। उहें, भाजपा विधायक अउ भानुप्रतापपुर उपचुनाव प्रभारी बृजमोहन अग्रवाल हाराडुला पहुंचीन अउ भाजपा प्रत्यासी ब्रम्हानंद नेताम ल अपन संग लेके चारामा स्थित पार्टी कार्यालय पहुंच गेहे। कांकेर जिला के पुलिस अधीक्षक शलभ कुमार सिन्हा ह आकाशवाणी समाचार ले गोठबात करत बतईन कि झारखंड पुलिस ह नेताम ल गिरफ्तार करे बर नइ गे रिहीन। ओमन सिरिफ ए मामला के विवेचना करे बर गे रिहीन।
जानबा के मुताबिक बछर दू हजार उन्नीस म जमशेदपुर म एक झिन नोनी ले दुष्कर्म के मामला म भाजपा प्रत्याशी ब्रम्हानंद नेताम ल घलो झारखंड पुलिस डहार ले आरोपी बनाय गेहे।
मेडिकल कॉलेज-नवजात मौत
अंबिकापुर के सरगुजा मेडिकल कालेज म पाछु रतिहा चार झिन नवजात शिशु के मउत के मामला म स्वास्थ्य मंत्री टी.एस. सिंहदेव ह जांच के आदेस देहे।
जानबा के मुताबिक पाछु रतिहा करीबन चार घंटा तक अस्पताल म लाइन बंद रिहीस, जेखर सेती अस्पताल म वेंटीलेटर अउ आने मसीन बंद होगे। ए दउरान शिशु मेडिकल अस्पताल के स्पेशल न्यू बोर्न केयर यूनिट म भर्ती चार झिन लइका के संदिग्ध परिस्थित म मउत होगे। लइका के परिवार वाले मन अस्पताल प्रबंधन उपर लापरवाही बरते के आरोप लगावत अस्पताल परिसर म जमके हंगामा करीन।
ए मामला ल स्वास्थ्य मंत्री ह गंभीरता ले लेवत जांच के आदेस देहे। ओमन बतईन कि ए मामला म दोसी मनके खिलाफ कड़ा कार्रवाई करे जाही।
उहें, राज्यपाल अनुसुईया उइके ह नवजात लइका मनके मउत उपर सोक व्यक्त करे हे। एक ठिन ट्वीट म राज्यपाल ह लइका मनके मउत के मामला के उचित जांच अउ कार्रवाई करे के संगेसंग परिवार मन ल राहत देवाय अउ अवइया बेरा म अइसन घटना झन होवय एला रोके के बारे म सरकार अउ प्रसासन ल निरदेस दे हवय।
ऐति, नेता प्रतिपक्ष नारायण चंदेल, पूर्व मंत्री अउ भाजपा के प्रदेस प्रवक्ता राजेश मूणत के संगेसंग अनुराग सिंहदेव ह ए मामला म राज्य सरकार उपर लापरवाही बरते के आरोप लगाय हे।
संसद-सर्वदलीय बैठक
केन्द्र सरकार ह संसद के सीतकालीन सत्र के पहिली काली सर्वदलीय बइठका बुलाय हे। बइठका म जम्मों राजनीतिक दल मन ले संसद के दूनों सदन के कार्यवाही ल बने ढंग ले चलाय उपर मदद मांग जाही। संसद के सीतकालीन सत्र सात दिसंबर ले उनतीस दिसंबर तक चलही। ए दउरान सत्रह बइठका होही।
भेंट-मुलाकात-कार्यक्रम
मुख्यमंत्री भूपेश बघेल ह कहिन हे कि अब राज्य के जम्मों स्वामी आत्मानंद अंग्रेजी माध्यम स्कूल मन म हफ्ता म एक दिन संस्कृत अउ राजभासा छत्तीसगढ़ी के पढ़ई होही। ए बात मुख्यमंत्री ह आज राजिम विधानसभा क्षेत्र के छुरा म राखे गे भेंट-मुलाकात कारीकरम म किहीन। ए मउका म मुख्यमंत्री ह छुरा म रजिस्टार कार्यालय, अनुविभाग बनाय, स्वामी आत्मानंद हिन्दी माध्यम स्कूल खोले अउ आई.टी.आई. भवन ल बनाय के मंजूरी देके संगेसंग पांडुका गांव ल उप तहसील के दर्जा दे हवय। ए मउका मुख्यमंत्री ह आने-आने योजना बर हितग्राही मन ल सहायता रासि के चेक दीन।
जशपुर जेल-कैदी फरार
जशपुर जिला जेल के दीवार ल कूदके आज दू झिन विचाराधीन कैदी ह भाग गे। कैदी मनके पहिचान होगे हे। पुलिस ह ए कैदी मनके फोटू ल सोशल मीडिया म वायरल करके लोगन मन ले ए मन ल गिरफ्तार करे म मदद करे के अपील करे हे।
जानबा के मुताबिक ए दूनों कैदी मन ल जेल म बंद आने कैदी मन ल भोजन बांटे के जिम्मेवारी दे गे रिहीस। आज बिहनिया ए कैदी मन ह कोहरा के फायदा उठावत भाग गे। बिहनिया करीबन सात बजे जेल प्रबंधन ल ए बात के पता चलीस, जेखर बाद खोजे के काम सुरू कर दे गेहे। जानबा के मुताबिक पाछु दू हजार आठ म घलो जशपुर जिला जेल के दीवार ल कूदके सात झिन कैदी मन भाग गे रिहीन।
विमेन इन पावर फेयर
दिल्ली म सात दिसंबर ले होवइया ‘‘विमेन इन पावर फेयर‘‘ म छत्तीसगढ़ के माईलोगिन मन डहार ले तैयार करे गे उत्पाद घलो सामिल रइही। भारत सरकार के लघु अउ सूक्ष्म उद्योग विभाग के मदद ले लगइया ए प्रदर्सनी बर प्रदेस के आठ महिला स्व-सहायता समूह मन ल चुने गेहे।
दिल्ली के कनॉट प्लेस स्थित कन्वेंशन सेंटर म नौ दिसंबर तक चलइया ए प्रदर्सनी म छत्तीसगढ़ के संगेसंग सोलह राज्य के करीबन दू सौ स्व-सहायता समूह के माईलोगिन मन सामिल होही। दिल्ली जाय के पहिली दुरूग म सांसद विजय बघेल ह समूह के माईलोगिन मनके सम्मान करीन।
अउ अब थोरकुन समाचार सार म –
– आज विश्व मृदा दिवस मनाय जात हे। स्वस्थ माटी अउ मृदा संसाधन के प्रबंधन के महत्ता ल बल दे बर हर साल पांच दिसंबर के ए दिवस ल मनाय जाथे। एसो के बिसय हे – ‘‘मृदा भोजपा के स्त्रोत‘‘।
– जिला रोजगार अउ स्व-रोजगार मार्गदर्शन केन्द्र रईपुर डहार ले कौशल विकास प्राधिकरण के अगुवई म मेगा रोजगार मेला राखे गेहे। एखर बर काली छह दिसंबर तक ऑनलाइन अरजी मंगाय गेहे। ए रोजगार मेला म दिव्यांगजन मन घलो सामिल हो सकथे।
– दुरूग के हेमचंद विश्वविद्यालय म जम्मों कक्षा के वार्षिक परीक्षा बर छात्र मन ह चौबीस दिसंबर तक ऑनलाइन अरजी भर सकथे।
– रायगढ़ म आज एनएसएस अउ एनसीसी कैडेट्स डहार ले यातायात जागरूकता रैली निकाले गीस। ए दउरान लोगन मन ल स्लोगन अउ पोस्टर के संगेसंग पर्ची बांट के ओमन ल सड़क दुर्घटना ले बांचे बर नियम बताके जागरूक करीन।
– भिलाई म स्मृति नगर पुलिस चौकी के प्रभारी युवराज देशमुख के पाछु रतिहा एक ठिन सड़क दुर्घटना म मउत होगे।
– रायगढ़ के टेंडा-नवापारा म जंगली हाथी के हमला म एक झिन मनखे के मउत होगे।
अउ
– राष्ट्रीय ताप विद्युत निगम-एन.टी.पी.सी. के कोरबा संयंत्र म नौकरी लगाय के नाव म ठगी के मामला म सक्ती पुलिस ह लछनपुर गांव ले एक झिन माईलोगिन ल गिरफ्तार करे हे।