प्रधानमंत्री नरेन्द्र मोदी ह किहीन हे कि जी-ट्वेंटी समूह के पगरइति भारत बर विश्व कल्याण के एक ठिन बड़का मउका हरय। आकाशवाणी ले ‘‘मन की बात‘‘ कारीकरम म ओमन किहीन कि ए मउका ल विश्व के भलाई बर बउरना चाही अउ भारत ह इही संकल्प लेके चलथे। प्रधानमंत्री ह बतईन कि जी-ट्वेंटी के विश्व जनसंख्या म दू-तिहाई, विश्व व्यापार म तीन-चौथाई अउ विश्व सकल घरेलू उत्पाद म पच्यासी प्रतिसत के भागीदारी हे। श्री मोदी ह स्कूल, कालेज अउ यूनिवर्सिटी ले अपील करे हे कि ओमन जी-ट्वेंटी के चरचा अउ एखर ले जुड़े प्रतियोगिता कारीकरम करावय।
प्रधानमंत्री ह अट्ठारह नवंबर ल एक ठिन ऐतिहासिक दिन बतईन, जब प्राईवेट सेक्टर के पहलइया राकेट विक्रम-एस ल अंतरिक्ष म पठोय म सफलता मिलीस। ओमन बतईन कि भारत ह अंतरिक्ष के क्षेत्र म अपन सफलता ल पड़ोसी देस मन संग घलो साझा करत हे। भारत ह कालीच एक ठिन उपग्रह के प्रक्षेपण करे हे, जेला भूटान के संग मिलके बनाय हे। प्रधानमंत्री ह टेक्नोलॉजी ले जुड़े नवाचार के बारे म किहीन कि भारत ह ड्रोन के क्षेत्र म जोरदरहा आगू बाढ़त हे। अभी थोरिक दिन पहिली हिमाचल प्रदेस के किन्नौर जिला म ड्रोन के सहायता ले सेब फल के पहला खेप लाय गीस।
मलेरिया मुक्त अभियान
प्रदेस म मलेरिया मुक्त छत्तीसगढ़ अभियान के सातवां चरण अवइया एक दिसंबर ले सुरू होही। राज्य के चार ठिन मलेरिया संवेदी जिला – बीजापुर, दंतेवाड़ा, नारायणपुर अउ सुकमा म एक महीना तक ए अभियान चलाय जाही। मलेरिया के मामला ल कमतिया के पूर्ण मलेरिया मुक्त राज्य के लक्ष्य ल पाय बर प्रदेस म सरलग अभियान चलाय जात हे। पाछु छहो ठिन चरण म ए अभियान के सुघ्घर नतीजा आय हे। सुरू होवत सातवां चरण म घलो स्वास्थ्य विभाग के टीम ह बस्तर संभाग के ए चारों ठिन जिला के बियाबान जंगल अउ पहाड़ ले घिरे दुर्गम अउ दूरिहा इलाका म दुवारी-दुवारी जाके सबो मनखे के मलेरिया के जांच करही। संगे पॉजिटिव मिलइया लोगन मन ल तुरते दवई खवाय जाही। मलेरिया के जांच अउ इलाज के संगे एखर ले बांचे बर जन-जागरूकता वाले कारीकरम घलो चलाय जाही। ए दउरान लोगन मन ल मच्छरदानी लगाय बर प्रोत्साहन देके संगे घर के तीर-तखार म सकलाय पानी अउ नाली मन म डी.डी.टी. या फेर जले वाले तेल के छिड़ाकाव करे जाही। लोगन मन ल घर के तीर-तखार म साफ-सफई अउ मच्छर झन बाढ़य तेला रोके के उपाय घलो बताय जाही।
उप स्वास्थ्य केन्द्र-सर्टिफिकेशन
उप स्वास्थ्य केन्द्र ए स्तर बर राष्ट्रीय गुणवत्ता आश्वासन मानक-एन.क्यू.ए.एस. प्रमाण पत्र हासिल करइया छत्तीसगढ़ ह देस के चौथा राज्य बन गेहे। केन्द्रीय स्वास्थ्य अउ परिवार कल्याण मंत्रालय ह दुरूग जिला के अमलेश्वर अउ रईपुर जिला के निसदा हेल्थ एंड वेलनेस सेंटर उप स्वास्थ्य केन्द्र के निरीक्षण अउ मूल्यांकन के बाद राष्ट्रीय गुणवत्ता आश्वासन मानक प्रमाण पत्र जारी करे हे। राज्य के संतावन ठिन सरकारी अस्पताल मन ल अब तक राष्ट्रीय गुणवत्ता आश्वासन मानक प्रमाण पत्र दे गे हवय। केन्द्रीय मंत्रालय डहार ले सेवा के मूल्यांकन म अमलेश्वर हेल्थ एंड वेलनेस सेंटर उप स्वास्थ्य केन्द्र ल चौरानवे प्रतिसत अउ निसदा ल तिरानवे प्रतिसत अंक मिले हे। दूनों स्वास्थ्य केन्द्र के ए बछर जुलाई म केन्द्रीय टीम डहार ले मूल्यांकन करे गे रिहीस।
बजट-सुझाव
केन्द्र सरकार ह बजट दू हजार तेईस-चौबीस बर लोगन मन ले सुझाव अउ विचार मंगाय हे। जनभागीदारी के भावना के अनुरूप बजट प्रक्रिया ल समोवशी अउ सहभागितापूर्ण बनाय बर वित्त मंत्रालय ह हर बछर देस के नागरिक मन ल बजट उपर सुझाव मंगाथे। ए सुझाव भेजे के लास्ट डेट दस दिसंबर हरय।
दुर्घटना
रईपुर जिला म आज होय दू ठिन आने-आने रोड एक्सीडेंट म तीन झिन मनखे के मउत होगे। उहें, एक झिन मनखे गंभीर रूप ले घायल होगे हे।
मिले जानकारी मुताबिक धमतरी जिला के कोरेगांव थाना म के एक झिन आरक्षक अपन परिवार संग कार म बिलासपुर ले धमतरी जावत रिहीस। तभे राखी थाना क्षेत्र के गांव निमोरा तीर एक ठिन आने चारपहिया गाड़ी ह ओखर कार ल टक्कर मार दीस। ए एक्सीटेंड म आरक्षक के पत्नी के मउकाच म मउत होगे अउ गंभीर रूप ले घायल आरक्षक के इलाज बेरा मउत होगे।
उहें, राजधानी रईपुर म रिग रोड क्रमांक-एक म भाटागांव ओवरब्रिज तीर ट्रक के टक्कर ले फटफटी सवार एक झिन जवान मनखे के मउत होगे। उहें, एक झिन आने जवान लइका गंभीर घायल होगे हे।
अग्निवीर प्री-भर्ती रैली
जांजगीर-चांपा जिला प्रसासन अउ भूतपूर्व सैनिक संघ डहार ले जवान लइका मन ल भारतीय सेना म भर्ती योग्य बनाय बर जांजगीर के पुलिस मैदान म अग्निवीर प्री-भर्ती रैली राखे गीस, जेमा चार सौ ले जादा जवान लइका मन ह भाग लीन। ट्रेनिंग के दउरान युवा मन ल दउड़ अउ लंबा कूद समेत आने तैयारी कराय गीस। अब दू दिसंबर के दुरूग म अग्निवीर भर्ती होही। इहां ए बतादन कि केन्द्रीय रक्षा मंत्रालय अउ प्रधानमंत्री नरेन्द्र मोदी के महत्वाकांक्षी योजना अग्निवीर भर्ती रैली ले पहिली जवान लइका मन ल ट्रेनिंग दे जावत हे।
रेलवे-माल ढुलाई
दक्षिण पूर्व मध्य रेलवे बिलासपुर रेलमंडल ह चालू वित्तीय बछर दउरान सिरिफ दू सौ उनचालीस दिन म सौ मिलियन टन माल ढुलाई के उपलब्धि पाय हे। फेर, पाछु वित्तीय बछर म सौ मिलियन टन माल ढुलाई ल दू सौ चवालीस दिन म पूरा हो रिहीस।
ए मउका म कंट्रोल रूम म राखे गे कारीकरम म मंडल रेल प्रबंधक प्रवीण पांडेय ह अधिकारी-कर्मचारी मन ल ए उपलब्धि उपर सुभकामना दीन हे।
चिटफंड कंपनी-रकम वापसी
राजनांदगांव जिला प्रसासन ह चिटफंड कंपनी म पइसा लगइया मन ल उंखर जमा पइसा ल लहुटाय के काम ल तेज कर देहे। सहारा इंडिया के निवेसक मन ल भुगतार बर एक करोड़ रूपिया के चेक जारी करे गेहे। ए बेरा करीबन एक हजार निवेसक मनके आवेदन के सत्यापन के काम पूरा होगे हे। ओमन ल उंखर लगाय पइसा के पच्चीस प्रतिसत लहुटाय जात हे।
मौसम के हाल…
उत्तर दिसा सोज ले सुष्क अउ ठंडा हवा आय के सेती प्रदेस म जाड़ बाढ़ गेहे। बीते चौबीस घंटा के दउरान राजधानी रईपुर के अधिकतम तापमान उनतीस डिग्री सेल्सियस अउ अउ न्यूनतम तापमान तेरह दमशलव पांच डिग्री सेल्सियस दर्ज करे गेहे। प्रदेस के कवर्धा म सबले कमती न्यूनतम तापमान छह दशमलव छह डिग्री सेल्सियस दर्ज करे गेहे।
मौसम विभाग के मुताबिक अवइया चौबीस घंटा के दउरान प्रदेस म मौसम सुष्क रहि सकत हे।
अउ अब थोरकुन समाचार सार म –
– राजनांदगांव के सासकीय ठाकुर प्यारेलाल सिंह उच्चतर माध्यमिक स्कूल म काली अउ परन दिन जिला स्तरीय छत्तीसगढ़िया ओलंपिक राखे गेहे।
– बालोद जेल ले दू झिन विचारधीन कैदी जेल के परदा ल नाहक के फरार होगे हे। सूचना बाद पुलिस के टीम ह कैदी मन ल खोजे म लग गेहे।
– कोरिया जिला म प्रशासनिक टीम ह बैकुंठपुर तहसील के कई ठिन जघा ले दू झिन कोचिया मन उपर कार्रवाई करत एक ठिन गाड़ी ले करीबन सत्तर बोरा गैर कानूनी ढंग ले रखे धान ल जब्त करे हे।
– बिसेस रोजगार कार्यालय रईपुर डहार ले आठवीं ले बारहवीं पास मूकबधिर अउ अस्थि बाधित दिव्यांग उम्मीदवार मन ल उनतीस नवंबर के जुन्ना पुलिस मुख्यालय म प्लेसमेंट कैम्प राखे गेहे।
– उहें, जिला रोजगार अउ स्वरोजगार मार्गदर्शन केन्द्र रईपुर डहार ले घलो उनतीस नवंबर के जुन्ना पुलिस मुख्यालय म प्लेसमेंट कैम्प राखे गेहे।
अउ
– सूरजपुर जिला के घुई रेंज के पकनी बस्ती तीर एक ठिन दंतैल हाथी के लास बरामद करे गेहे। वन विभाग के टीम ह मउका म जाके जांच म लग गेहे।