वित्तमंत्री मुख्यमंत्री बैठक
मुख्यमंत्री भूपेश बघेल ह आज नई दिल्ली म केंद्रीय वित्तमंत्री निर्मला सीतारमण के पगरैती म होय बइठका म सामिल होइन। बजट पूर्व आयोजित ए बइठका म आने आने राज्य मनके वित्तमंत्री घलो मौजूद रीहिन। ये मउका म श्री बघेल ह आम बजट दू हजार तेईस-चोबीस ल लेके कतकोन प्रस्ताव अउ सुझाव दीन। मुख्यमंत्री ह कीहिन कि बछर दू हजार बाईस-तेईस म केंद्रीय पूल म संतावन लाख मीट्रिक टन अरवा अउ चार लाख मीट्रिक टन उसना चाउंर के लक्ष्य दे गेहे। ओमन केंद्र सरकार ले चौदा लाख मीट्रिक टन उसना चाउंर के लक्ष्य निर्धारित करे के अनुरोध करीन। एखरे संग नवा जूट बारदाना देबर अउ कोदो-कुटकी के न्यूनतम समर्थन मूल्य घोषित करे के मांग करीन।
बइठका म मुख्यमंत्री ह एक घांव फर एनपीएस के राशि के वापसी, जीएसटी क्षतिपूर्ति के भरपाई, कोल रॉयल्टी के राशि के मांग समेत आने आने मुद्दा ल लेके केंद्रीय वित्त मंत्री ले गोठबात करीन। श्री बघेल ह कीहिन कि राज्य शासन के कर्मचारी मन बर जुन्ना पेंशन योजना लागू करे हे। एनएसडीएल के तीर इकतीस मार्च तक जमा सतरा हजार दू सौ चालीस करोड़ रूपिया के राशि छत्तीसगढ़ ल लहुटाय जाये, ताकि कर्मचारी मनके सामान्य भविष्य निधि म डारे जा सकय। श्री बघेल ह बताइन कि राज्य शासन के अंश पृथक पेंशन निधि म जमा राखे जाही, जेखर उपयोग भविष्य म पेंशनरी दायित्व ल पूरा करे बर करे जाही।
ओमन कीहिन कि एखर निवेश भारत सरकार अउ राज्य सरकार के प्रतिभूति म करे जाही। एखरे संग बइठका म मुख्यमंत्री ह जीएसटी क्षतिपूर्ति के एक हजार आठ सौ पचहत्तर करोड़ अउ कोल रॉयल्टी के चार हजार एक सौ चालीस करोड़ रूपिया राज्य ल जल्दीच ट्रांसफर करे के आग्रह करीन। संगेसंग मुख्यमंत्री ह रायपुर म इंटरनेशनल कार्गो टर्मिनल शुरू करे अउ केंद्रीय योजना मन म केंद्र सरकार के अंश बढ़ाय के बारे म घलो सुझाव दीन।
भानुप्रतापपुर उपचुनाव प्रचार
भानुप्रतापपुर विधानसभा उपचुनाव बर प्रचार-प्रसार तेज होगे हे। आज प्रदेश कांग्रेस अध्यक्ष मोहन मरकाम ह पार्टी प्रत्याशी सावित्री मंडावी के संग नगर पंचायत चारामा म आने आने वार्ड म घर-घर जाके लोगन मनले भेंट करके वोट मांगीन। एखरे संगे भानुप्रतापपुर के गांव उडकूड़ा अउ चनदेली म गांव वाले मन संग सभा लीन।
ओति भारतीय जनता पार्टी समेत आने आने उम्मीदवार मन घलो प्रचार शुरू कर देहे।
खबर के मुताबिक ए सीट म कांग्रेस अउ भाजपा प्रत्याशी समेत सात उम्मीदवार मैदान म हवय। ए उपचुनाव के तहत पांच दिसंबर के वोट डारे जाही। उंहें मतगणना अउ चुनाव परिणाम के घोषणा आठ दिसंबर के होही।
भाजपा बयान
भारतीय जनता पार्टी के प्रदेस महामंत्री केदार कश्यप ह प्रदेस के कांग्रेस सरकार उपर आदिवासी मन ल गुमराह करे के आरोप लगाइन हे। ओमन कीहिन कि केबिनेट म विसय लाना आने गोठ हे अउ ओला कानून म बदलना अलग हे। श्री कश्यप ह कीहिन कि कांग्रेस सरकार के सेती आज एससी अउ आने पिछड़ा वर्ग के आरक्षण प्रभावित होय हे। भानुप्रतापपुर विधानसभा के कोरर क्षेत्र म चुनाव प्रचार के बेरा श्री कश्यप ह कई ठिन सवाल उठावत कीहिन कि कांग्रेस सरकार सिरिफ राजनीतिक छल कपट करना जानथे।
उंहे भाजपा विधि प्रकोष्ठ के प्रदेश संयोजक जयप्रकाश चंद्रवंशी ह आरोप लगाइन कि राज्य सरकार अंठावन फीसदी आरक्षण बचा नइ पाय हे अउ अब प्रदेशवासी मन ल छिहत्तर प्रतिशत आरक्षण के सपना देखावत हे। ओमन कीहिन हे कि मंत्रिमंडल के बइठका म आरक्षण ल लेके जउन प्रस्ताव पारित करे गेहे वो ह जनता के आंखी म धूल झोंके कोसिस आय।
श्री चंद्रवंशी ह आरोप लगाइन हे कि प्रदेश के कांग्रेस सरकार भाजपा सरकार डहार ले देगे अउ अपन कार्यकाल तक सुरक्षित रखे बत्तीस प्रतिशत आरक्षण के बचाव नइ कर सकीस। बल्कि सुनियोजित तरीका ले आदिवासी आरक्षण म कटौती करवा दीस। उंहें अब लोगन मनके विरोध ल देखत हुए कुल छिहत्तर प्रतिशत आरक्षण के प्रस्ताव पारित करे गीस, जउन संभव नइ हे।
मलेरिया मुक्त अभियान
छत्तीसगढ़ म मलेरिया मुक्त अभियान के सातवां चरण एक दिसंबर ले शुरू होही। एखर तहत ये अभियान मलेरिया ल देखत संवेदनशील चार जिला मन म बीजापुर, दंतेवाड़ा, नारायणपुर अउ सुकमा म चलाये जाही । एखर तहत र्स्वास्थ्य विभाग के टीम ए चार जिला मन म घना जंगल अउ पहाड़ म स्थित दूर दराज के इलाका मन म घर घर जाके जम्मो लोगन के मलेरिया के जांच करही अउ ए दउरान मलेरिया पॉजीटिव पाये गे लोगन मन ल तुरते दवा खवाये जाही।
धान खरीदी
प्रदेश म समर्थन मूल्य म धान खरीदी करे जावत हे। उंहें प्रदेश म धान खरीदी बर दू लाख सत्ताईस हजार नग गठान बारदाना उपलब्ध हे। खाद्य सचिव टी.के. वर्मा ह बातइन कि जिला के भण्डारण केंद्र, सोसायटी समेत उपार्जन केंद्र म आज के बेरा म धान खरीदी बर अतका बारदाना हे कि अवइया एक सवा माह तक बारदाना के कोनो कमी नइ होही।
स्वास्थ्य मंत्री बैठक
स्वास्थ्य मंत्री टी एस सिंहदेव ह प्रदेश म विशेषज्ञ डॅाक्टर मनके संख्या बढ़ाय के संग मेडिकल कालेज म पीजी के जादा ले जादा सीट मंजूर करे बर केहे हे। ये बात ओमन राजनांदगांव स्थित अटल बिहारी बाजपेयी स्मृति चिकित्सा महाविद्यालय के स्वशासी समिति के साधारण सभा के बइठका के पगरैती करत कीहिन। बइठका के दउरान नेशनल मेडिकल कमीशन के मापदंड के अनुरूप महाविद्यालय अउ छात्रावास परिसर म सुरक्षा बर सीसीटीवी खरीदे अउ स्थापित करे के मंजूरी दे गीस।
उंहें श्री सिंहदेव ह शासकीय दंत चिकित्सा महाविद्यालय रायपुर के स्वशासी समिति के बइठका म सामिल होइन। ए दउरान महाविद्यालय के लाइब्रेरी स्टोर अउ सेंट्रल ओपीडी ल कम्पयूटराइज्ड करे जाय के मंजूरी दे गीस।
ट्रेन परिचालन
रेल प्रशासन डहार ले रद्द करे गे दू ठन गाड़ी के अवई जवई फेर ले शुरू करे जाही। मिले खबर के मुताबिक अइवया चार दिसंबर के मुंबई ले चलइया मुबई-गोंदिया विदर्भ एक्सप्रेस के परिचालन नियमित रीही। उंहें पांच दिसंबर के गोंदिया ले चलइया गोंदिया-मुंबई विदर्भ एक्सप्रेस के परिचालन घलो नियमित रूप ले करे जाही।
इही बीच उत्तर-पूर्व रेलवे डहार ले दुर्ग-सारनाथ के परिचालन अवइया एक दिसंबर ले अवइया बछर अठाईस फरवरी तक आने आने तारीख म छिहत्तर दिन तक रद्द करे जाही। रेलवे प्रशासन डहार ले जारी आदेश के अनुसार जाड़ा के सेती कोहरा ल देखत अप अउ डउन लाइन म ए ट्रेन के अवई जवई रद्द करे के फैसला ले गेहे।
विस्फोटक बरामद
राजनांदगांव पुलिस ह माओवादी मन डहार ले सुरक्षा बल मन ल नुकसान पहुंचाय बर राखे गे विस्फोटक बरामद करे हे। मिले खबर के मुताबिक सूचना मिलतेच थाना प्रभारी गातापार उप निरीक्षक जितेंद्र डहरिया के संग पुलिस अउ सीमा सुरखा बल के जवान मन सर्चिंग म निकलिन। इही दउरान टीम ह गांव खम्हारडीह अउ कौहाबहरा के बीच भुंइया के नीचे माओवादी मन डहार ले लुकाके राखे विस्फोटक बरामद करीन, जेला निष्क्रिय कर दे गीस।
जल जीवन मिशन
कोंडागांव जिला म जल जीवन मिशन के तहत आदेश जारी होय के बाद घलो काम शुरू नइ करइया ठेकेदार मनके निविदा निरस्त करे जाही। ये संबंध म कलेक्टर दीपक सोनी ह संबंधित अधिकारी मन ल निर्देश देहे। जल जीवन मिशन के समीक्षा बइठका म कलेक्टर ह काम म तेजी लाने बर कीहिन। ओमन कीहिन कि अइसन ठेकेदार जउन मन निविदा अउ काम के आदेश जारी होय के बाद घलो निर्धारित समय सीमा म काम शुरू नइ करे हे, ओखर विरोध म कार्रवाई करे जाए, फेर नवा निविदा मंगाके काम ल बेरा म पूरा कराये।
बइठका म कलेक्टर ह कीहिन हे कि ग्राम पंचायत के माध्यम ले स्थानीय गांव वाले मन ल पंप ऑपरेटर अउ तकनीकी सहयोगी नियुक्त करना चाही। ओति जांजगीर चांपा जिला के जांजगीर म जल जीवन मिशन के तहत हर घर नल से जल बर सरपंच मन ल प्रशिक्षण दे गीस। लोक स्वास्थ्य यांत्रिकी विभाग डहार ले पांच ठिन ब्लाक मनके सरपंच मन ल प्रशिक्षण देके योजना के रूपरेखा के संग काम अउ गुणवत्ता के संबंध म विस्तार ले जानकारी दे गीस ।