मंत्रिमंडल निर्णय-01
उंहे राज्य मंत्रिमंडल के आने फैसला के तहत जिला खनिज न्यास के राशि के बीस प्रतिशत भाग ल सामान्य क्षेत्र म अउ चालीस प्रतिशत भाग ल अधिसूचित क्षेत्र म खर्च करे के प्रावधान ल खतम कर देहे। ए फैसला लागू करे बर छत्तीसगढ़ जिला खनिज संस्थान नियम म संशोधन करे के फैसला घलो ले गेहे। आज के बइठका म राज्य मंत्रिमंडल ह छत्तीसगढ़ लोक सेवा, अनुसूचित जाति, जनजाति अउ आने पिछड़ा वर्ग बर आरक्षण संशोधन विधेयक के प्रस्ताव के अनुमोदन घलो कर देहे। उंहे चालू वित्त बछर के द्वितीय अनुपूरक अनुमान ले जुड़े छत्तीसगढ़ विनियोग विधेयक ल घलो बइठका म मंजूरी दे गीस। एला, विधानसभा के अवइया सत्र म पेस करे जाही।
राज्य मंत्रिपरिषद के एक ठन आने फैसला के मुताबिक नवा मछली पालन नीति म संशोधन के विभागीय आदेश ल मंजूरी दे दे गेहे। एखर मुताबिक अब मछली पालन बर तरिया के नीलामी नइ होही, फेर मछुवारा समूह मन ल दस बछर बर पट्टा म दे जाही। अइसने आदिवासी बहुल क्षेत्र म अनुसूचित जनजाति वर्ग के मछुआरा समूह अउ सहकारी समिति मन ल प्राथमिकता दे जाही।
मंत्रिमंडल निर्णय-02
अइसने केबिनेट के एक आने फैसला के मुताबिक राज्य वनोपज संघ अउ निजी निवेशक मनके बीच होय समझौता के आधार म स्थापित वनोपज संबंधी उद्योग के उत्पाद ल चालीस प्रतिशत के छूट के संग खरीदे जाही। आज के बइठका म रायपुर के सेरीखेड़ी म करीबन नौ हेक्टेयर सरकारी जमीन के आबंटन प्रस्ताव के संग मुख्यमंत्री के स्वेच्छानुदान राशि ल सत्तर करोड़ ले बढ़ाके एक सौ दस करोड़ रूपिया करे के प्रस्ताव के अनुमोदन घलो करे गीस।
अविश्वास प्रस्ताव
सक्ति जिला के जनपद अध्यक्ष के खिलाफ लाने गे अविश्वास प्रस्ताव ह निरस्त होगे हे । प्रस्ताव के निरस्त होय के सेती वर्तमान जनपद अध्यक्ष राजेश राठौर अपन पद म बने रीही। अविश्वास प्रस्ताव म आज होय मतदान म जनपद के बीस झिन सदस्य मन ह भाग लीन। एमा ले दस वोट अश्विास प्रस्ताव के खिलाफ अउ नौ वोट प्रस्ताव के पक्ष म पड़ीस। उंहे एक मत ल निरस्त कर दे गीस। अइसने एक वोट ले राजेश राठौर ह अपन पद बचा लीस।
भाजयुमो पुतला दहन
भारतीय जनता युवा मोर्चा के मुंगेली इकाई ह भानुप्रतापपुर उपचुनाव म भाजपा प्रत्याशी ब्रम्हानंद नेताम उपर कंाग्रेस डहार ले लगाए गे आरोप के विरोध म आज प्रदर्शन करे गीस। प्रदर्शनकारी मन ल संबोधित करत मोर्चा के मुंगेली जिला इकाई के अध्यक्ष तरूण खांडेकर ह आरोप लगाय हे कि राज्य सरकार के कथित नाकामी ले लोगन मनके धियान हटाये बर कंाग्रेस डहार ले तथ्यहीन प्रकरण ल उछाले जावत हे। ओमन भाजपा प्रत्याशी के खिलाफ कंाग्रेस के आरोप ल आदिवासी समाज के अस्मिता उपर प्रहार बताइन।
आबकारी अधिकारी हमला
बिलासपुर जिला के भिलमी गांव म काली रतिहा अवैध शराब बनाये के जांच बर पहुंचे आबकारी विभाग के दल उपर आरोपी मन डहार ले हमला करे के घटना आगू आय हे। ए मामला म पुलिस ह मुख्य आरोपी ल गिरप्तार कर लेहे। उंहे आने आरोपी मनके तलाश करे जात हे।
भाजपा पार्षद आरोप
रायपुर नगर निगम के नेता प्रतिपक्ष मीनल चौबे अउ भाजपा पार्षद मन ह आरोप लगाइन कि नगर निगम डहार ले वीआइपी रोड के सौंदर्यीकरण ले जुड़े एकेच निविदा ल ऑनलाइन प्रक्रिया ले अलग राखे बर छोटे-छोटे टुकड़ा म जारी करे गीस।
आज रायपुर म पत्रकार मनले गोठबात करत मीनल चौबे अउ भाजपा के पार्षद सूर्यकांत राठौर समेत आने आने सदस्य मन ह आरोप लगाइन कि करीबन दू करोड़ रूपिया के निर्माण काम ल ऑनलाइन प्रक्रिया ले बचाए खातिर बारा टुकड़ा म जारी करे गेहे। भाजपा नेता मन ह आशंका जताइन कि छोटे-छोटे निविदा जारी करे ले भ्रष्टाचार ल बढ़ावा मिल सकत हे। भाजपा नेता मन ह ए प्रक्रिया म टेंडर के निर्धारित नियम के अहेलना करे के आरोप घलो लगाइन। भाजपा पार्षद दल डहार ले ए मामला के सिकायत आर्थिक अपराध अन्वेषण शाखा म कराये जावत हे।
दुष्कर्म आजीवन कारावास
बेमेतरा जिला के अदालत ह दुष्कर्म के आरोपी ल आजीवन कारावास के सजा सुनाइस। पुलिस के मुताबिक जिला के कंडरका गांव के ए प्रकरण म आरोपी ह एक नाबालिग लड़की के संग दुराचार के घटना ल अंजाम देे रीहिस हे। ए मामला म तुरते सुनवाई करत विशेष न्यायालय के अतिरिक्त सत्र न्यायाधीश मधु तिवारी ह आरोपी ल आजीवन कारावास के संग दू हजार रूपिया जुर्माना देके सजा सुनाइस।
ट्रेन परिचालन
उत्तर पूर्व रेलवे डहार ले दुर्ग-छपरा सारनाथ एक्सप्रेस के अवई जवई अवइया एक दिसंबर ले अवइया बछर अठाईस फरवरी तक कुछएक तारीख म रद्द करे गेहे। रेलवे प्रशासन ह ए रद्दा म जाड़ के सेती कोहरा ल देखत ये फैसला लेहे।
उंहे, रायपुर रेलमंडल म काली लोकमान्य तिलक टर्मिनल एक्सप्रेस के भुवनेश्वर ले रायपुर पहुंचे के बाद पार्सलयान ल खोलतेच एक पार्सल पैकेट ले धुआं निकले के घटना होइस। एखर उपर तुरते कार्रवाई करत ओ पैकेट ल बाहिर निकाले गीस। रेलवे प्रबंधन डहार ले ए घटना के जांच करे जात हे।
कार्यशाला
स्वास्थ्य विभाग डहार ले राजधानी रायपुर म नोनी मनके महत्व अउ लिंग अनुपात उपर काली एक दिवसीय कार्यशाला राखे गीस। प्रसव के पहिली लिंग परीक्षण अउ पहिचान संबंधी कानून के प्रति लोगन ल जागरूक करे के सेती ये कार्यशाला आयोजित करे गीस।
एमा आने आने राज्य ले आए विशेषज्ञ मन ह बालक-बालिका के बीच लिंग अनुपात ल संतुलित राखे उपर जोर दीन। कार्यशाला ल संबोधित करत राष्ट्रीय स्वास्थ्य मिशन के संचालक भोसकर विलास संदीपन ह कीहिन कि लिंग अनुपात के कमती होना एक बड़े चुनौती हरय। एला संतुलित बनाए बर बेटा अउ बेटी के बीच भेद ल खतम करके लोगन मन ल ए संबंध म जागरूक करना होही।
अउ अब थोरकुन समाचार सार म –
– महासमुंद के जिला जेल ले आज बीहनिया एक कैदी ह फरार होगे। ए घटना के बाद जेल के मुख्य प्रहरी ल तुरते प्रभाव ले निलंबित कर दे गेहे।
– जांजगीर-चंापा जिला म कोरबी गांव के धान खरीदी केंद्र म गड़बड़ी पाए के बाद दू झिन कर्मचारी मन ल निलंबित करके ए प्रकरण म एफआईआर घलो दरज करे गीस।
– इही जिला के भैंसो गांव म फसल कोटे बर गे छै झिन किसान मधुमक्खी के हमला म घायल होगे। एमा ले दू झनके हालत गंभीर बताए गेहे। जम्मों घायल मन ल पामगढ़ अस्पताल म भर्ती कराये गेहे।
– कोरबा कलेक्टर संजीव झा ह गोठान निरीक्षण के दउरान वर्मी कंम्पोस्ट निर्माण म लापरवाही के सिकायत मिले म दू झिन अधिकारी मन ल कारण बताओ नोटिस जारी करे हे।
– बीजापुर जिला म बस्तर फाइटर बटालियन के एक जवान मुन्नालाल पोयम के काली अचानके मउत होगे। बटालियन के प्रभारी उप अधीक्षक पुष्पेद बघेल ह घटना के पुष्टि करत बताइन कि कोंडागांव निवासी ये जवान प्रशिक्षण के दौरान अचानके गिर पड़ीस, जेला इलाज बर बीजापुर अस्पाल लाये गीस, जिहंा उंखर मउत होगे।
– महासमुंद जिला के टेमरी नाका म पुलिस ह जांच के दौरान एक ठिन गाड़ी ल जब्त करके ओमा ले करीबन पैंसठ किलो गांजा बरामद करे हे। एखर कीमत करीबन तेरा लाख रूपिया बताए गीस। ए मामला म पुलिस ह एक आरोपी ल गिरप्तार घलो करे हे।