आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री रोजगार मेला

प्रधानमंत्री रोजगार मेला के दूसरा चरण म प्रधानमंत्री नरेन्द्र मोदी काली वर्चुअल माध्यम ले लगभग इकहत्तर हजार लोगन मन ल नियुक्ति पत्र दीहीं। नियुक्ति पत्र देसभर के पैंतालीस जगह मन म सौंपे जाही। प्रधानमंत्री ह योजना के पहिली चरण म अक्टूबर म नव-नियुक्त पचहत्तर हजार लोगन ल नियुक्ति पत्र सौंपे रिहीन।
प्रधानमंत्री काली कर्मयोगी प्रारंभ मॉडयूल के घलो सुरूवात करही। ए ह आने-आने सरकारी विभाग मन म सबो नवनियुक्त कर्मी मन बर ऑनलाइन आरंभिक पाठ्यक्रम हरय। एमा सरकारी सेवक मन बर आचार संहिता, कार्यस्थल म नैतिकता, सत्यनिष्ठा अउ मानव संसाधन नीति सामिल हे। ए कर्मी मन ल अपन ज्ञान, कौशल अउ दक्षता ल बढ़ाय बर आने पाठ्यक्रम करे के घलो अवसर मिलही।

भानुप्रतापपुर उपचुनाव

भानुप्रतापपुर विधानसभा उपचुनाव बर आज नाम वापसी के आखिरी दिन चौदह प्रत्यासी मन ह अपन नामांकन वापिस लीन। अब ए सीट म कांग्रेस अउ भाजपा प्रत्यासी संग सात उम्मीदवार बाच गेहे। आज प्रत्यासी मन ल चुनाव चिन्ह घलो दे दे गेहे। ए उपचुनाव के तहत पांच दिसंबर के वोट डाले जाही। उहें, मतगणना अउ चुनाव परिणाम के घोसना आठ दिसंबर के होही।
इही बीच, भारत निर्वाचन आयोग ह उपचुनाव ल देखत एक्जिट पोल करे अउ एखर परिणाम के प्रकासन संग प्रसारण पांच दिसंबर के संझा साढ़े छह बजे तक बर प्रतिबंधित कर देहे। ए संबंध म अधिसूचना जारी कर दे गेहे।

ओम माथुर-छत्तीसगढ़

भारतीय जनता पार्टी के प्रदेस प्रभारी ओम माथुर ह आज चार दिन के दउरा म छत्तीसगढ़ पहुंचीन। माना एयरपोर्ट म भाजता नेता मन ह उंखर स्वागत करीन। ए दउरान पत्रकार मन ले चरचा करत ओमन ह प्रदेस कांग्रेस डहार ले भानुप्रतापपुर विधानसभा उपचुनाव म भाजपा प्रत्यासी उपर लगाय गे आरोप उपर कहिन कि ए ह आदिवासी समाज के अपमान हरय। ओमन ह उम्मीद जताय हे कि अवइया विधानसभा चुनाव म छत्तीसगढ़ म भाजपा ह जीत के सत्ता म वापसी करही।

उपचुनाव-आरोप/प्रत्यारोप

इही बीच, कांग्रेस ह ए सीट ले भाजपा के उम्मीदवार ब्रम्हानंद नेताम के नामांकन ल निर्वाचन आयोग म चुनौती देहे। प्रदेस कांग्रेस अध्यक्ष मोहन मरकाम ह आज कांकेर म निर्वाचन अधिकारी ल लिखित सिकायत करीन, जेमा ओमन ह आरोप लगाय हे कि ब्रम्हानंद नेताम के खिलाफ झारखंड म सामूहिक दुष्कर्म, पॉक्सो अउ अनैतिक देह व्यापार निषेध कानून के तहत मामला दर्ज हे। नामांकन के बेरा दे गे शपथ पत्र म नेताम ह ए मामला के जानकारी नइ देहे। ए ह लोक प्रतिनिधित्व कानून के उल्लंघन हरय। श्री मरकाम ह मांग करे हे कि सूचना छूपाय के सेती ब्रम्हानंद नेताम के नामांकन खारिज करे जाय। श्री मरकाम ह कांकेर के पुलिस अधीक्षक ले घलो मुलाकत करे ए मामला म कार्रवाई बर ज्ञापन सौंपीन।
उहें, प्रदेश कांग्रेस संचार विभाग के अध्यक्ष सुशील आनंद शुक्ला, रायपुर विकास प्राधिकरण के उपाध्यक्ष शिव सिंह ठाकुर संग कतकोन पदाधिकारी रईपुर म मुख्य निर्वाचन पदाधिकारी कार्यालय पहुंचीन। ओमन ह झूठा सपथ देके के     आधार म भाजपा प्रत्याशी के नामांकन रद्द करे के मांग करीन।
ओति, विधानसभा म नेता प्रतिपक्ष नारायण चंदेल ह आरोप लगाय हे कि लोगन के चरित्र हनन करना कांग्रेस के चरित्र म हे। चुनाव म हार के आसंका ल देखत कांग्रेस ह आदिवासी प्रत्यासी ब्रम्हानंद नेताम के उपर निम्न स्तर के आरोप लगाय हे। रईपुर म एक ठिन पत्रकारवार्ता म श्री चंदेल के संग अनुसूचित जनजाति मोर्चा के प्रदेस अध्यक्ष विकास मरकाम अउ प्रदेस महामंत्री केदार कश्यप घलो मौजूद रिहीन। भाजता नेता मन ह कहिन कि जेन प्रतिवेदन ल कांग्रेस के नेता दिखावत हे, ओ प्रतिवेदन म कोन्हों जघा भाजपा प्रत्यासी ब्रम्हानंद नेताम के अपराध का हरय, ए ह स्पष्ट नइ हे।

राज्यपाल-भोपाल प्रवास

राज्यपाल अनुसुईया उइके ह आज भोपाल के नेहरू युवा केन्द्र के स्वर्ण जयंती समारोह अउ युवा सम्मेलन म सामिल होईन। ए मउका म ओमन कहिन कि नेहरू युवा केन्द्र, युवा मन ल देस अउ मानवता के निःस्वार्थ सेवा करे के अवसर प्रदान करथे। ओमन ह युवा मन ले कहिन कि डिग्री लेना हमर एकमात्र उद्देश्य नइ होना चाही, व्यवहारिक ज्ञान अउ आचार, विचार, संस्कार के घलो व्यक्तित्व निर्माण म बड़का भूमिका हे।
उहें, राज्यपाल काली अपन भोपाल प्रवास के दउरान रवीन्द्रनाथ टैगोर यूनिवर्सिटी डहार ले आयोजित टैगोर अंतर्राष्ट्रीय साहित्य अउ कला महोत्सव ‘‘विश्वरंग‘‘ के समापन समारोह म सामिल होईन।

विश्व मत्स्य दिवस

आज विश्व मत्स्य दिवस हरय। दुनियाभर के सबो मछवारा मछली उत्पादक अउ संबंधित हितधारक के संग एकजुटता दिखाय करे खातिर हर बछर इक्कीस नवंबर के विश्व मत्स्य दिवस मनाय जाथे।
इही बीच, छत्तीसगढ़ ल मत्स्य पालन के क्षेत्र म उल्लेखनीय उपलब्धि बर दू राष्ट्रीय पुरस्कार मिले हे। दमन म आयोजित एक ठिन कारीकरम म छत्तीसगढ़ ल बेस्ट इनलैंड स्टेट के पुरस्कार मिले हे। मत्स्य विभाग के संचालक एन.एस. नाग ह ए पुरस्कार ल ग्रहण करीन। उहें, धमतरी जिला के बगौद गांव के मत्स्य पालन फर्म भारत बाला एक्वाकल्चर ल ‘बेस्ट प्रो-प्राइटरी फर्म‘‘ के रूप म सम्मानित करे गीस।
उहें, राज्य सरकार ह मछली पालन नीति म संशोधन करत तरिया अउ जलासय ल मछली पालन बर नीलामी करे के बजाय दस बछर बर लीज म देके फइसला लेहे। ए योजना म परंपरागत मछुआ समुदाय के लोगन ल प्राथमिकता दे जाही। आज रईपुर म मुख्यमंत्री भूपेश बघेल के मौजूदगी म आयोजित मछुवारा सम्मेलन म कृषि मंत्री रविन्द्र चौबे ह ए घोसना करीन।

गौरव द्विवेदी-सीईओ

भारतीय प्रशासनिक सेवा के वरिष्ठ अधिकारी गौरव द्विवेदी ह प्रसार भारती के मुख्य कार्यकारी अधिकारी के पदभार संभाल लीन हे। श्री द्विवेदी उन्नीस सौ पंचानवे बैच के छत्तीसगढ़ कैडर के अधिकारी हरय। राष्ट्रपति द्रौपदी मुर्मू ह ओमन ल पांच बछर बर नियुक्त करे हे। पदभार ग्रहण करे के बाद श्री द्विवेदी ह कहिन कि प्रसार भारती के दू इकाई, आकाशवाणी अउ दूरदर्शन ल अभू घलो सबले जादा विश्वसनीय माने जाथे। ओमन कहिन कि ए इकाई मन ल अउ मजबूत करे के प्रयास करे जाही।
ए मउका म आकाशवाणी के महानिदेशक डॉक्टर वसुधा गुप्ता अउ दूरदर्शन के महानिदेशक मयंक अग्रवाल संग आने वरिष्ठ अधिकारी उपस्थित रिहीन।

माओवादी-आगजनी

कांकेर जिला के पखांजूर इलाका म माओवादी मन ह बीते रतिहा एक ठिन निजी कंपनी के मोबाइल टावर म आग लगा दीन। पुलिस अधीक्षक शलभ सिन्हा ह घटना के पुष्टि करत बतईन कि करीबन पन्द्रह माओवादी मउका म पहुंचीन अउ घटना ल अंजाम दीन।
उहें, इही जिला के कोयलीबेड़ा म माओवादी मन ह एक ठिन यात्री बस म आगी लगा दीन।

प्रधानमंत्री अवार्ड-नामांकन

लोक प्रशासन के क्षेत्र म उत्कृष्ट सेवा बर दे जाने वाला प्रधानमंत्री अवॉर्ड बर अट्ठाईस नवंबर तक नामांकन भरे जा सकत हे। ए संबंध म समान्य प्रशासन विभाग ह सबो संभागायुक्त, जिला कलेक्टर विभागाध्यक्ष अउ राजस्व मंडल ल पाती पठो के नामांकन जमा करे बर केहे हे। प्रधानमंत्री अवार्ड के अंतर्गत सिविल सेवक मन डहार ले ‘‘हर घर जल योजना‘‘ के तहत स्वच्छ जल ल बढ़ावा दे बर, ‘हेल्थ एंड वेलनेस सेंटर‘ के माध्यम ले स्वस्थ भारत, ‘समग्र शिक्षा योजना के तहत शिक्षा म अवसर के समानता अउ आकांक्षी जिला के समग्र विकास अउ नवाचार के क्षेत्र म उत्कृष्ट योगदान के संबंध म नामांकन निर्धारित वेबपोर्टल के माध्यम ले भेजे जा सकत हे।

हाट बाजार क्लीनिक योजना

विश्व स्वास्थ्य संगठन ह छत्तीसगढ़ के हाट बाजार क्लीनिक योजना के सराहना करे हे। डब्ल्यू,एच.ओ. ह वनांचल अउ दूरस्थ अंचल के गांव मन म लोगन तक स्वास्थ्य सुविधा पहुंचाय खातिर सुरू करे गे छत्तीसगढ़ सरकार के ए योजना उपर डॉक्टयूमेंट्री फिल्म तैयार करे हे। मुख्यमंत्री भूपेश बघेल ह आज रईपुर म ए फिल्म ल रिलीज करीन। ए फिल्म विश्व स्वास्थ्य संगठन के जिनेवा स्थित मुख्यालय म दिखाय जाही। मुख्यमंत्री ह ए मउका म कहिन कि हाट बाजार क्लिनिक योजना के माध्यम ले अब तक बैसठ लाख ले जादा लोगन ल चिकित्सा सुविधा उपलब्ध कराय गेहे। करीबन साढ़े चार सौ मेडिकल मोबाइल वाहन के मदद ले ए योजना के संचालन करे जात हे।