रईपुर विमानतल म फ्लाइट के संख्या बढ़ाय अउ दूसर रनवे के बनाय खातिर राज्य सरकार ह भूईंया ल आरक्षित करही। एखर बर केन्द्र सरकार ले अनुमति ले जाही। मुख्यमंत्री भूपेश बघेल ह आज रईपुर म राखे गे नगरीय प्रशासन अउ विकास विभाग, नगर अउ ग्राम निवेश विभाग, आवास अउ पर्यावरण अउ एनआरडी के कामकाज के समीक्षा करीन। ए मउका म ओमन अधिकारी मन ले किहीन कि रईपुर एयरपोर्ट तीर एरो सिटी विकास बर प्रक्रिया सुरू करे जाय। संगे किहीन कि गैर कानूनी ढंग ले होय निर्माण के नियमितीकरण काम म तेजी लाय अउ जनता भीतरी एखर जोरदरहा प्रचार-प्रसार करय। श्री बघेल ह किहीन कि जनता ल सोझे लाभ पहुंचाय बर कानून लाय गेहे, जेखर लाभ जादा ले जादा मनखे मन ल मिलय, ए तय करे जाय।
मुख्यमंत्री ह अधिकारी मन ल कालोनी के ले-आउट अउ मार्ग संरचना के अनुमोदन वाले काम ल समय-सीमा भीतरी पूरा करे के निरदेस दीन। संगे अवैध कॉलोनाइजर मन उपर कड़ा कार्रवाई करे बर किहीन। ओमन नवा रईपुर म सेवा ग्राम निर्माण के काम ल घलो समय-सीमा भीतरी पूरा करे के निरदेस दीन। उहें, श्री बघेल ह ए मउका म नगरीय निकाय मनके सड़क मरम्मत बर एक सौ सैंतालीस करोड़ रूपिया जारी करीन, जेखर बर कलेक्टर मन ल एजेंसी ल चुने के अधिकार दे गेहे।
भानुप्रतापपुर उपचुनाव
भानुप्रतापपुर विधानसभा उपचुनाव बर नाव वापसी लेके काली आखिरी दिन हे। ए उपचुनाव म इक्कीस झिन उम्मीदवार मैदान म हे। अब तक ले कोनों उम्मीदवार अपन नाव वापिस नइ लेहे। नामांमन के पत्र के जांच म कांग्रेस के उम्मीदवार सावित्री मंडावी, भाजपा प्रत्याशी ब्रम्हानंद नेताम, गोंडवाना गणतंत्र पार्टी के घनश्याम जुर्री के संगेसंग पांच झिन आने-आने पार्टी अउ सोलह झिन निर्दलीय ल मिला के इक्कीस झिन उम्मीदवान मनके नामनिरदेसन पत्र नियम मुताबिक पाय गीस।
ए उपचुनाव बर पांच दिसंबर के वोट डाले जाही। उहें, वोट के गनती अउ चुनाव परिणाम के घोषणा आठ दिसंबर के होही।
मॉडल राशन दुकान
प्रदेस के सबो जिला मन म मॉडल सासकीय उचित मूल्य यानि रासन दुकान मन ल चरणबद्ध ढंग ले सुरू करे जाही। ए दुकान मन म रासन समान के संगे आने बउरे के जिनीस ल बेचे के संगे बैंकिंग कॉरस्पोंडेंट के सहुलियत घलो दे जाही।
खाद्य सचिव टोपेश्वर वर्मा ह काली रईपुर म होय विभागीय समीक्षा बइठका म खाद्य अधिकारी मन ल मॉडल रासन दुकान सुरू करे बर जरूरी तैयारी करे के निरदेस दीन। ओमन सार्वजनिक वितरण प्रणाली, समर्थन मूल्य म धान बिसई अउ कस्टम मिलिंग के घलो समीक्षा करीन। खाद्य सचिव ह किहीन कि धान बिसई केन्द्र मन म जरूरी व्यवस्था राखे के संगे सबो जिला मन म राईस मिल मनके पंजीयन के काम पूरा करके धान के उठाव तेजी ले करे जाय।
नौसेना-प्रश्नोत्तरी
भारतीय नौसेना प्रश्नोत्तरी थिंक प्रतियोगिता म छत्तीसगढ़ के स्वामी आत्मानंद उत्कृष्ट अंग्रेजी माध्यम स्कूल के दू झिन पढ़ईया लइका मन ह सेमीफाइनल म जगह बनाय हे। दूनो पढ़ईया लइका के टीम ल देस के सीर्ष सोलह टीम के रूप म चुने गेहे। प्रतियोगिता म देसभर के साढ़े सात हजार स्कूल मन ह भाग लेहे।
मिले जानकारी के मुताबिक दूनों छात्र – खुशी चौहान अउ आदित्य साहू कोरबा के स्वामी आत्मानंद उत्कृष्ट अंग्रेजी माध्यम स्कूल के छात्र हरय। दूनों छात्र मन ह एलीमिनेशन अउ क्वार्टर फाइनल राउंड म सुघ्घर प्रदर्सन करीन। अब इंखर सेमीफाइनल अवइया तेईस नवंबर के कारवार म विमान वाहक पोत आई.एन.एस. विक्रमादित्य म तय हे। ए दूनों पढ़ईया लइका आज राजधानी रईपुर ले गोवा बर रवाना होगे हे।
नसबंदी-पखवाड़ा
पुरूष नसबंदी ल बढ़ावा दे बर प्रदेस म काली ले 04 दिसंबर तक पुरूष नसबंदी पखवाड़ा राखे जाही। ए पखवाड़ा ‘‘अब पुरूष निभाएंगे जिम्मेदारी, परिवार नियोजन अपनाकर दिखाएंगे अपनी भागीदारी‘‘ के थीम म मनाय जाही। ए पखवाड़ा दू चरण म होही। पहिली चरण काली इक्कीस ले सत्ताईस नवंबर अउ दूसर चरण अट्ठाईस नवंबर ले चार दिसंबर तक मनाय जाही। पहिली चरण म पुरूष स्वास्थ्य कार्यकर्ता मन ‘‘मोर मितान-मोर संगवारी‘‘ के आयोजन करही। ए बेरा ओमन अपन क्षेत्र के जम्मों लक्षित दंपत्ति खास कर पुरूष मन ले व्यक्तिगत संपर्क करके नसबंदी के फायदा बताही।
साहित्य परब सम्मेलन
रईपुर म आज ले दू दिन वाले साहित्य परब सम्मेलन सुरू होईस, जेखर आयोजन रईपुर लिट फेस्ट सोसायटी डहार ले करे जावत हे।
साहित्य परब के उद्घाटन सत्र म बोलत नामी लेखक अउ विचारक राम माधव ह किहीन कि आज ए बात के जरूरत हे कि भारत के लोगन औपनिवेशिक मानसिकता ले बाहिर आके अपन सुघ्घर संस्कृति अउ इतिहास बारे म आत्मविश्वास के संग दुनिया ल बतावय अउ अइसन साहित्य लिखय जउन ह हमर बीते बेरा बर हमर भीतर गौरव पैदा करय।
कांग्रेस-पत्रकारवार्ता
प्रदेस कांग्रेस कमेटी के अध्यक्ष मोहन मरकाम ह भानुप्रतापपुर उपचुनाव म भाजपा प्रत्याशी ब्रम्हानंद नेताम उपर नाबालिग संग दैहिक शोषण करे के आरोप लगाय हे। आज कांकेर म पत्रकार मन ले चरचा करत श्री मरकाम ह किहीन कि भाजपा प्रत्याशी ब्रम्हानंद नेताम उपर सामूहिक बलात्कार अउ नाबालिग ल अनैतिक देहव्यापार म ढकेले के आरोप हे। ओमन बतईन कि ए मामला म झारखंड के जमशेदपुर जिला के टेल्को थाना म पन्द्रह मई दू हजार उन्नीस के श्री नेताम के खिलाफ एफआईआर दरज करे रिहीस। ओ बेरा झारखंड म भाजपा के सरकार रिहीस।
विस्फोटक-बरामद
दंतेवाड़ा जिला के कोंडासवाली रद्दा म सुरक्षा बल मन दस किलो वजनी आईईडी बरामद करे हे। मिले जानकारी मुताबिक सीआरपीएफ के जवान तलाशी अभियान म निकले रिहीन, तभे कमल पोस्ट क्षेत्र ले छह सौ मीटर दूरिहा म विस्फोटक बरामद करे गीस, जेमा बम निरोधक दस्ता के टीम ह मउकाच म निष्क्रिय कर दीस।
सिविक एक्शन कार्यक्रम
केन्द्रीय रिजर्व पुलिस बल-सीआरपीएफ डहार ले दंतेवाड़ा जिला के अरनपुर म सिविक एक्शन कार्यक्रम राखे गे रिहीस। ए कारीकरम म तीर-तखार के छह ले जादा ग्राम पंचईत के ग्रामीण सामिल होईन। कारीकरम म स्वास्थ्य सिविर राखे गीस, जेमा गंवई के मनखे मनके स्वास्थ्य के जांच करे गीस। संगे ओमन ल साफ-सफई बर जागरूक घलो करे गीस। ए दउरान गंवई के मनखे मन ल स्टील प्लेट, कपड़ा अउ मच्छरदानी घलो बांटे गीस। कारीकरम म सीआरपीएफ के बड़का अधिकारी अउ अरनपुर थाना प्रभारी मौजूद रिहीन।
विश्वकप फुटबॉल टूर्नामेंट
विश्वकप फुटबॉल टूर्नामेंट अब ले थोरिक देर बाद कतर म सुरू होही। उद्घाटन मैच मेजबान कतर अउ इक्वाडोर के बीच होही। टूर्नामेंट म बत्तीस ठिन टीम मन ल आठ ठिन ग्रुप म बांटे गेहे। ए फुटबॉल टूर्नामेंट अवइया अट्ठारह दिसंबर तक चलही। उपराष्ट्रपति जगदीप धनखड़ ह फीफा विश्वकप के उद्घाटन समारोह म सामिल होही।
एचआईवी-कार्यक्रम
स्वास्थ्य विभाग डहार ले राजधानी रईपुर म काली जिपा कन्वेंशन कार्यक्रम राखे गे रिहीस। एखर उद्देश्य पी.एल.एच.ए. यानि एचआईवी संग जीवइया मनखे मन ल समाज म समानता के अधिकार के संगे जीवन जीयई अउ उंखर संग समाज म होवइया भेदभाव ल सिरोना हे, जेखर ले एचआईवी पीड़ित घलो, एक झिन नागरिक के रूप म मौलिक अधिकार, स्वास्थ्य, शिक्षा, खाद्य सुरक्षा अउ अवई-जवई असन जरूरी आवश्यकता ल बउरे म काबिल हो सकय। ए मउका म स्वास्थ्य संचालक भीम सिंह ह एचआईवी पीड़ित मन ले मिलके ओमन ल सासन डहार ले मिलइया योजना मनके जानकारी दीन।
अउ अब थोरकुन समाचार सार म –
– विश्वविद्यालय अनुदान आयोग ह चार वर्षीय स्नातक कारीकरम के रूपरेखा ल अंतिम रूप दे हे। ए कारीकरम म बछर दू हजार तेईस-चौबीस ले अधिकांश राज्य अउ सबो पैंतालीस ठिन केन्द्रीय विश्वविद्यालय अउ निजी विश्वविद्यालय मन म लागू करे जाही। ए पाठ्यक्रम मनके नियम ल अवइया हफ्ता सबो विश्वविद्यालय मन संग सेयर करे जाही।
– जिला रोजगार अउ स्वरोजगार मार्गदर्शन केन्द्र रईपुर डहार ले काली ले तेईस नवंबर तक जुन्ना पुलिस मुख्यालय के रोजगार कार्यालय परिसर म प्लेसमेंट कैम्प राखे जाही
अउ
– बिलासपुर पुलिस ह चार दिन ले लापता भिलाई के रहवइया एक झिन जवान नोनी के हत्या के खुलासा करे हे। ए मामला म मेडिकल व्यवसायी एक झिन मनखे ल गिरफ्तार करे गेहे।