भानुप्रतापपुर-उपचुनाव
भानुप्रतापपुर विधानसभा उपचुनाव बर दाखिल करे गे नामांकन पत्र के आज जांच करे गीस। जांच म इक्कीस झिन अभ्यर्थी के नाव निरदेसन पत्र विधिमान्य पाय गीस। उहें, अट्ठारह झिन के नामांकन निरस्त कर दे गीस। कांग्रेस के उम्मीदवार सावित्री मंडावी, भाजपा प्रत्यासी ब्रम्हानंद नेताम, गोंडवाना गणतंत्र पार्टी के धनश्याम जुर्री के संगेसंग आने-आने पार्टी अउ निर्दलीय समेत इक्कीस अथ्यर्थी मनके नाव निरदेसन पत्र विधिमान्य पाय गीस। काली नामांकन जमा करे के आखिरी दिन तक उनचालीस अभ्यर्थी मन ह नामांकन दाखिल करे रिहीन। ए उपचुनाव म अभ्यर्थी इक्कीस नवंबर तक नाव वापिस ले सकत हे। पांच दिसंबर के वोट डारे जाही। उहें, मत के गिनती अउ चुनाव नतीजा के घोसना आठ दिसंबर के होही। भानुप्रतापपुर उपचुनाव बर गठित मतदान दल के करीबन छह सौ पचास पीठासीन अधिकारी अउ मतदान अधिकारी मन ल आज प्रशिक्षण दे गीस।
इही बीच, भारतीय जनता पार्टी ह भानुप्रतापपुर उपचुनाव बर स्टार प्रचारक मनके सूची जारी कर देहे। एमा पार्टी के प्रदेस अध्यक्ष अरूण साव, राष्ट्रीय उपाध्यक्ष डॉक्टर रमन सिंह, नेता प्रतिपक्ष नारायण चंदेल, ओम प्रकाश माथूर, सह प्रभारी नितिन नबीन, शिव प्रकाश, अजय जामवाल समेत पार्टी के चालीस झिन बड़े नेता मन ल सामिल करे गेहे। एखर संगेसंग पार्टी ह ए उपचुनाव बर विधायक बृजमोहन अग्रवाल ल प्रभारी बनाय हे। रामविचार नेताम, शिवरतन शर्मा अउ मोतीलाल साहू ल सह प्रभारी बनाय गेहे। संगेसंग मंडल स्तर म घलो प्रभारी अउ सह-प्रभारी मनके नियुक्ति कर दे गेहे।
केन्द्र-उर्वरक
केन्द्र सरकार ह केहे हे कि मौजूदा रबी मौसम म किसान मनके जरूरत पूरा करे बर देश म जरूरत के मुताबिक खातू हवय। रसायन अउ उर्वरक मंत्रालय ह किहीन हे कि केन्द्र जम्मों राज्य के जरूरत के मुताबिक यूरिया डी.ए.पी. अउ पोटाश समेत सबो किसान के खातू देवावत हे। मंत्रालय ह केहे गे कि ए राज्य के जिम्मेवारी हवय कि उर्वरक के कतका जरूरत हे, ए जानकारी राखय।
धान खरीदी
प्रदेस म करीबन दू लाख छब्बीस हजार किसान ले समर्थन कीमत म सात लाख छत्तीस हजार मीटरिक टन ले जादा के धान बिसाय गेहे। एमा किसान मन ल बैंक लिंकिंग व्यवस्था म एक हजार पांच सौ छियासठ करोड़ इकसठ लाख रूपिया के भुगतान होगे हे। खाद्य विभाग के सचिव टोपेश्वर वर्मा ह बतईन कि एसो राज्य धान बिसाय बर दू हजार पांच सौ अड़तीस उपार्जन केन्द्र बनाय गेहे। एसो किसान मन ले सामान्य धान दू हजार चालीस रूपिया कुंटल अउ ग्रेड ए धान दू हजार साठ रूपिया कुुंटल के दर ले बिसाय जात हे।
इही बीच, राज्य शासन ह समर्थन कीमत म धान बेचे बर पंजीयन ले छूटे किसान मन ल एक अउ मउका देवत एखर तारीख बढ़ा देहे। छूटे किसान मन इक्कीस नवंबर तक अपन क्षेत्र के तहसील कार्यालय या सहकारी साख समिति के दफ्तर म जाके पंजीयन करा सकत हे।
ऋचा जोगी-बयान
जनता कांग्रेस छत्तीसगढ़ के प्रदेस अध्यक्ष अमित जोगी के पत्नी ऋचा जोगी ह अपन खिलाफ दरज एफ.आई.आर. ल कोर्ट म चुनौती देके बात किहीन हे। ओमन अपन एक वीडियो संदेस म किहीन कि उंखर जाति के मामला न्यायालय म विचाराधीन हे, तभो ले उंखर खिलाफ एफ.आई.आर. दरज करे गेहे। श्रीमती जोगी ह किहीन कि सरकार के ए कदम ओमन ल ‘‘जोगी जन अधिकार पदयात्रा‘‘ म भाग ले बर रोके के प्रयास हरय। ओमन किहीन कि ओमन जोगी जन अधिकार पदयात्रा के अकलतरा विधानसभा के पर्यवेक्षक हरय। एखर सेती ए यात्रा म सामिल होय ले रोके बर परयास करे जात हे।
एनएसएस-शिविर
जांजगीर-चांपा जिला के कटनई गांव म आज ले राष्ट्रीय सेवा योजना एनएसएस के सात दिवसीय संयुक्त शिविर शुरू होईस। विधानसभा अध्यक्ष डॉक्टर चरणदास महंत ह ए सिविर के उद्घाटन करीन। ए दउरान एनएसएस के स्वयंसेवक राज्य सरकार कोति ले चलाय जात नरवा, गरूवा, घुरवा अउ बाड़ी योजना के संगेसंग व्यक्तित्व विकास बर काम करही। खबर के मुताबिक गांव कटनई म एक छोड़े पहाड़ी हे, जेमा एनएसएस कोति ले श्रम दान करके तीस बछर म विकसित करे गेहे। अब ए गांव राष्ट्रीय सेवा योजना के गोद गांव हे अउ शहीद नंदकुमार पटेल विश्वविद्यालय ह घलो एला अपन ड्रीम प्रोजेक्ट म सामिल करे हे।
सुघ्घर पढ़वईया योजना
प्रदेस के जम्मों सासकीय प्राथमिक अउ मिडिल स्कूल म पढ़ईया लइका मन म उंखर प्रतिभा के मुताबिक कौशल के विकास करे बर ‘‘सुघ्घर पढ़वईया योजना‘‘ सुरू करे गेहे। योजना म लइका मन म बने कौशल विकसित करे बर स्कूल ल इनाम दे जाही। प्लेटिनम पवइया स्कूल ल एक लाख रूपिया, गोल्ड पवइया स्कूल ल पचास हजार रूपिया अउ सिल्वर मिलइया स्कूल ल पच्चीस हजार रूपिया के इनाम दे जाही। ए योजना के उद्देश्य बने काम करइया सिक्षक मन ल प्रोत्साहित करना हे। योजना म सामिल होय बर स्कूल ल वेबपोर्टल म अरजी करे बर पड़ही। जउन स्कूल योजना म सामिल होही, ओला अपन लक्ष्य पाय बर अनुरोध करे म ऑन डिमांड प्रसिक्षण अउ आने जिनीस देवाय जाही।
सांस्कृतिक संध्या
छत्तीसगढ़ राज्य दिवस के मउका म इक्कीस नवंबर के नई दिल्ली म सांस्कृतिक संध्या राखे जाही। नई दिल्ली के एम.फी. थियेटर प्रगति मैदान म राखे गे कारीकरम के मुख्य अतिथि छत्तीसगढ़ के मुख्यमंत्री भूपेश बघेल होही। कारीकरम म मंत्री, सांसद, संसदीय सचिव अउ विधायक के संगेसंग नागरिक संघरही। संस्कृति विभाग के संचालक विवेक आचार्य ह बतईन कि सांस्कृतिक संध्या म गौर नृत्य, भोजली गेड़ी, सुआ, पंथी अउ कर्मा नृत्य जइसन छत्तीसगढ़ के पारंपरिक लोक नृत्य देखे बर मिलही।
राज्य स्तरीय प्रतियोगिता
स्कूल शिक्षा विभाग कोति ले ‘‘पढ़ई तुहंर द्वार- थ्री प्वाइंट-जीरो‘‘ म लइका मनके व्यक्तित्व विकास के राज्य स्तरीय प्रतियोगिता काली राजधानी म होईस। प्रतियोगिता म राज्य के सबो पांच संभाग के करीबन दू सौ विद्यार्थी संघरीन। एमा निबंध, भासन, चित्रकला, विज्ञान प्रोजेक्ट मॉडल, भासा अउ गणित, स्पीड गणित स्पीड रीडिंग अउ सामान्य ज्ञान के प्रतियोगिता होईस। समग्र शिक्षा के प्रबंध संचालक नरेन्द्र कुमार दुग्गा ह बतईन कि स्कूल ले लेके संभाग स्तर तक पांच चरण म राखे गे ए प्रतियोगिता त प्रदेस के सैंतालीस हजार ले जादा सरकारी स्कूल के तिरालीस लाख लइका मन ले चुने गे करीबन दू सौ लइका राज्य स्तरीय प्रतियोगिता म सामिल होईन।
ऑनलाइन-सट्टा ऐप
महादेव ऑनलाइन ऐप ले सट्टा चलावत दू पैनल के सोलह झिन ल दुरूग पुलिस ह दिल्ली के साकेत क्षेत्र ले गिरफ्तार करे हे। जिला के पुलिस अधीक्षक डॉक्टर अभिषेक पल्लव ह बतईन कि एमन दिल्ली म दू पैनल ले सट्टा चलात रिहीन हे। एखर टीम के सोलह झिन ल गिरफ्तार करके पैनल ल खतम कर दे गेहे। पुलिस की टीम आरोपी मन ल लेके भिलाई पहुंचत हे। ओमन बतईन कि आरोपी मन तीर ले छै ठिन लैपटॉप अउ इकतीस ठिन मोबाईल बरामद करे गेहे।
अउ अब थोरकुन समाचार सार म –
– प्रसार भारती के सीईओ बनाय गे आईएएस गौरव द्विवेदी ल छत्तीसगढ़ शासन ह आज कार्यमुक्त कर देहे। उंखर जगह म योजना, आर्थिक अउ सांख्यिकी विभाग के प्रभार हिमशिखर गुप्ता ल दे गेहे। श्री द्विवेदी इक्कीस नवंबर के प्रसार भारती के सीईओ के रूप म पदभार संभालही।
– राज्यपाल अनुसुईया उइके आज नवा रईपुर के कलिंगा विश्वविद्यालय के दीक्षांत समारोह म सामिल होईन ए मउका म एक सौ नवासी झिन विद्यार्थी मन ल स्वर्ण पदक अउ दू सौ अट्ठारह झन ल पीएचडी के उपाधि दे गीस।
– राजनांदगांव जिला के डोंगरगांव ब्लॉक के दर्रीमटिया म एनीकट टूटे के मामला म जल संसाधन विभाग ह उप यंत्री किरण रामटेके ल निलंबित कर देहे।
– जांजगीर-चांपा जिला म मुलमुला थाना क्षेत्र के गांव पकरियाझूलन म कार अउ गाड़ी के बीच होय टक्कर म कार ड्राईवर अउ एक मनखे के मउत होगे। उहें, कार म बइठे दू झिन लइका गंभीर रूप ले घायल होगे हे, जउन मन ल इलाज बर बिलासपुर भेजे गेहे।
अउ
– रायगढ़ जिला के चक्रधर थाना क्षेत्र तेजी ले आवत चौपहिया गाड़ी के चपेट म आय ले फटफटी सवार एक मनखे के मउकाच म मउत होगे। उहें, एक आने मनखे गंभीर रूप ले घायल होगे हे।