भानुप्रतापपुर विधानसभा
भानुप्रतापपुर विधानसभा उपचुनई बर भाजपा उम्मीदवार ब्रह्मानंद नेताम, गोंडवाना गणतंत्र पार्टी के घनश्याम जुर्री अउ दू झिन निर्दलीय प्रत्यासी मन ह नामांकन दाखिल करीन। उंहे कांग्रेस कोती ले सावित्री मंडावी ह अपन नामांकन दाखिल करीन हे। बतादन कि काली नामांकन दाखिल करे के आखिरी दिन हे।
इही बीच, जनता कांग्रेस छत्तीसगढ़ ह सावित्री मंडावी ल अपन समर्थन देके घोसना करीन हे। उंहे, आम आदमी पार्टी के प्रदेस प्रभारी संजीव झा ह किहीन कि उंखर पार्टी ह भनुप्रतापपुर उपचुनई ल नई लड़ही।
भाजपा प्रवेश
जांजगीर-चांपा जिला के पामगढ़ म जिला स्तरीय अनुसुचित जाति सम्मेलन के आयोजन होइस। एमा, नेता प्रतिपक्ष नारायण चंदेल, पूर्व विधायक पुन्नूलाल मोहल, सांसद गुहाराम अजगले अउ भाजपा के प्रदेस अध्यक्ष अरूण साव समेत कतकोन वरिष्ठ नेता मन सामिल होइन। ए सम्मेलन म आने-आने पार्टी के साढ़े तीन सौ लोगन मन भाजपा प्रवेस करीन। ए अवसर म श्री साव ह किहीन कि भाजपा ह गरीब मनके विकास बर कतकोन काम करे हे।
भेंट-मुलाकात कार्यक्रम
मुख्यमंत्री भूपेश बघेल ह भेंट-मुलाकात कारीकरम के चलत आज राजनांदगांव जिला के डोंगरगढ़ विधानसभा क्षेत्र म विकास बर छियांलिस करोड़ छप्पन लाख रूपिया ले जादा के आने-आने काम के भूमि पूजन अउ लोकार्पण करीन। एमा, पैंतीस करोड़ उनहत्तर लाख रूपिया ले जादा के चवालीस काम के भूमिपूजन अउ दस करोड़ सत्यासी लाख रूपिया के आठ विकास कार्य के लोकार्पण घलो सामिल हे। संगेसंग मुख्यमंत्री ह डोंगरगढ़ म सी मार्ट के सुभारंभ घलो करीन।
मुख्यमंत्री ह आज डोंगरगढ़ म अधिकारी के समीक्षा बइठका ल लेके शिक्षा के गुणवत्ता ऊपर बिसेस धियान देके निरदेस दीन हे। ओमन किहीन कि अधिकारी स्कूल मनके औचक निरीक्षण करत रहाय। ओमन वृद्धा पेंशन अउ आने पेंशन के निराकरण तुरते करे बर किहीन हे।
समीक्षा बैठइका के बाद डोंगरगढ़ म पत्रकार मन लेे गोठबात करत मुख्यमंत्री ह किहीन कि धान खरीदी के बेरा आने-आने राज्य ले अवईया धान उपर रोक लगाय के परयास करे जात हे। ओमन ह किसान मनले पैरादान करे के घलो अपील करीन। भेंट-मुलाकात के बेरा मुख्यमंत्री ह छुरिया गांव म चलत कारीकरम म उमरदा ल तहसील बनाय के घोसना करीन।
जनजाति गौरव दिवस-राज्यपाल
राज्यपाल अनुसुइया उइके ह किहीन कि आदिवासी समाज, अपन आर्थिक अउ सामाजिक विकास बर दृढ़ संकल्पित होेके आगू बाढ़य। राज्यपाल काली स्वतंत्रता संग्राम सेनानी बिरसा मुंडा के जयंती म छिंदवाड़ा के होवत जनजाति गौरव दिवस कारीकरम म सामिल होईन। ए मउका म ओमन किहीन कि बिरसा मुंडा एक महान आदिवासी नेता रिहीन। ओमन ह शोसण अउ गुलामी के खिलाफ आदिवासी समाज ल संगठित करके देस अउ समाज ल एक ठिन नवा दिसा दीन हे। संगे-संग जनजाति समाज ल सामाजिक कुरिती अउ आडम्बर के खिलाफ घलो जागृत करीन।
ओमन किहीन के आदिवासी मनके मान्यता के सम्मान करत हुवे ओखर प्राचीन गोंडि धरम ल घलो मान्यता मिलना चाही। उंहे प्रदेस म चलत एक लव्य आदर्स आवासीय विद्यालय म घलो काली जनजाति गौरव दिवस मनाय गीस। ए बेरा म लईका मन ह जनजाति अउ देसभक्ति लोकगीत उपर चलत कारीकरम के प्रस्तुति दीन। जानबा के अनुसार आदिम जाति अउ अनुसुचित जाति विकास विभाग डहार ले संचालित एकलव्य आदस आवासीय विद्यालय म पंद्रा ले बाइस नवंबर तक जनजाति गौरव दिवस ल तिहार जइसे मनाय के निरदेस जारी करे गीस।
गृह मंत्री बैठक
गृहमंत्री ताम्रध्वज साहू के अध्यक्षता म आज रइपुर म मंत्री परिषद के उपसमिति के बइठका होइस। एमा, राजनीतिक प्रकरण के वापसी ले संबंधित कतकोन बिसय उपर चर्चा करे गीस। बइठका म कलेक्टर, पुलिस अधीक्षक अउ विधि विभाग ले मिले अनुशंसा ले संबंधित कुल सैंतीस ठिन प्रकरण समिति के आगू लाय गीस। एमा, ले इक्कीस प्रकरण ल राजनीतिक मानत हुवे ओला वापस लेके अनुशंसा करे गीस।
उंहे, सोला ठिन प्रकरण ल अमान्य कर दे गीस। बइठक म नगरीय प्रशासन मंत्री शिवकुमार डहरिया अउ महिला तथा बाल विकास मंत्री अनिला भेंड़िया घलो मौजूद रिहीन।
उंहे, राज्य स्तरीय परियोजना समिति के बइठक म जर्जर शासकीय भवन अउ खाली पड़े जमीन के बेवस्थित विकास अउ ओखर बउरती के बारे म चर्चा करे गीस। बइठक म सामिल मंत्री मन ह किहीन कि चिन्हांकित भुईंया अउ जर्जर भवन के सुव्यवस्थित विकास के चलत पुराना पेड़, ऐतिहासिक धरोंहर अउ भवन ल सुरक्षित रखे जाय। बइठका म पूर्व अनुमोदित योजना के बारे म घलो चर्चा करे गीस।
आत्मानंद स्कूल-निर्माण
स्कूल शिक्षा विभाग के प्रमुख सचिव डॉक्टर आलोक शुक्ला ह सबो जिला कलेक्टर ल चिट्ठी लिखके स्वामी आत्मानंद स्कूल बनाय बर प्रशासकीय स्वीकृति जारी करे बर किहीन हे। डॉक्टर शुक्ला ह कलेक्टर मन ल तीन दिन के भीतरी जानकारी मांगे हे। ताकि स्वामी आत्मानंद स्कूल के निर्माण जल्दी हो सके । जानबा के अनुसार एसो प्रदेस म चार सौ पैंतीस आत्मानंद स्कूल खोले के लक्ष्य राखे गे रिहीस। जेमा, ले बाइस ठिन स्कूल म काम बूता सुरू हो गेहे।
मल्टीमीडिया चित्र प्रदर्शनी
“एक भारत श्रेष्ठ भारत” कारीकरम के चलत बिलासपुर के गुरू घासीदास केन्द्रीय विश्वविद्यालय परिसर म आज ले तीन दिन के मल्टीमीडिया चित्र प्रदर्शनी सुरू होय हे। आजादी के अमृत महोत्सव के चलत अट्ठारा नवंबर तक चले वाले ए प्रदर्शनी म कतकोन प्रतियोगिता अउ सांस्कृतिक कारीकरम करे जात हे। केन्द्रीय सूचना अउ प्रसारण मंत्रालय के चलत केन्द्रीय संचार ब्यूरो के रइपुर प्रादेशिक कार्यालय अउ बिलासपुर क्षेत्रीय कार्यालय डहार ले चलत ए प्रदर्शनी के सुभारंभ सीआरपीएफ के ग्रुप कमांडिंग अधिकारी लक्ष्मी नारायण मिश्रा ह करीन। कारीकरम के अध्यक्षता विश्वविद्यालय के कुलपति प्रोफेसर आलोक चक्रवाल ह करीन।
अउ अब थोरकुन समाचार सार म –
– रेल मंत्रालय ह आइ.आर.सी.टीसी ल रेल गाड़ी म दे जाय वाले खाना म स्थानीय अउ क्षेत्रीय व्यंजन ल सामिल करे के छुट दे देहे। एमा मधुमेह रोगी मन बर खाना, लईका मनके खाना अउ स्वास्थ्य वर्धक आहार जइसे कतकोन समूह के यात्री मनकेे प्राथमिकता के अनुसार खाद्य पदार्थ सामिल हे।
– कांग्रेस नेता राहुल गांधी के भारत जोड़ो यात्रा के जइसे राजनांदगांव शहर म घलो कांग्रेस डहार ले इक्कीस नवंबर के भारत जोड़ो यात्रा निकाले जाही।
– छत्तीसगढ़ योग आयोग डहार ले प्रदेस म ग्यारवां राष्ट्रीय हास्य योग सम्मेलन के आयोजन करे जाही।
– दुरूग के तहसीलदार ह प्रकरण के सुनवाई के बेरा निजी भुईंया मालिक के नाव म दरज जमीन ल छत्तीसगढ़ राज्य वक्फ बोर्ड के नाव म नामांतरण करे के आवेदन ल खारिज कर देहे।
अउ
– रइपुर म चलत सड़क सुरक्षा समिति के बइठका म सड़क दुर्घटना ल रोके अउ यातायात बेवस्था के पालन लोगन मन ल कराय ल लेके विचार विमर्स करे गीस।