भानुप्रतापपुर-उपचुनाव
भानुप्रतापपुर विधानसभा उपचुनई ल लेके आज रईपुर म प्रदेस कांग्रेस चुनाव समिति के बइठका होईस। बइठका म प्रत्यासी के चयन ल लेके दू झिन के नाव ल हाईकमान ल भेजे गेहे, जेमा सावित्री मंडावी अउ बीरेश ठाकुर के नाव सामिल हे। बइठका के बाद मुख्यमंत्री ह बतईन कि एक-दू दिन म प्रत्यासी के नाव के घोसना कर दे जाही। कांग्रेस चुनाव समिति के थोरिक दिन पहिली होय बइठका म चौदह झिन दावेदार मनके नाव आगू आय रिहीस।
उहें, आज जनता कांग्रेस छत्तीसगढ़ के नेता रामबाबू पांडेय ह कांग्रेस म प्रवेस कर लीन।
मोहन भागवत-जशपुर
राष्ट्रीय स्वयंसेवक संघ के सर संघचालक डॉक्टर मोहन भागवत ह अपन छत्तीसगढ़ प्रवास के दउरान जनजातीय गौरव दिवस के मउका म आज जशपुर म राखे गे कारीकरम म सामिल होईन। ए मउका म ओमन जशपुर सहर के बिरसा मुंडा चौक म राखे गे भगवान बिरसामुंडा के मूर्ति म माला चढ़ाके पूजा-पाठ करीन। ए मउका म आदिवासी समाज के लोगन मन ह पारंपरिक रूप ले सोभयात्रा निकालीन। आमसभा ल संबोधित करे के बाद डॉक्टर भागवत ह पूर्व सांसद स्वर्गीय कुमार दिलीप सिंह जूदेव के मूर्ति के घलो अनावरण करीन। ए मउका म भाजपा प्रदेश अध्यक्ष अरूण साव, पूर्व मुख्यमंत्री डॉक्टर रमन सिंह के संगेसंग बड़का नेता मन घलो सामिल होईन।
डॉक्टर भागवत ह काली अंबिकापुर म राष्ट्रीय स्वयंसेवक संघ के दू विभाग सरगुजा अउ कोरिया के संयुक्त पथ संचलन म भाग लीहीं अउ सार्वजनिक कारीकरम ल संबोधित करही।
मोदी ऐप-प्रतिभागी चयन
प्रधानमंत्री नरेन्द्र मोदी ऐप के माध्यम ले सेवा-समर्पण के उपर के पचास प्रतिभागी मनके चयन करे गेहे, जेमा छत्तीसगढ़ के तीन प्रतिभागी के नाव घलो सामिल हे।
जानबा के मुताबिक प्रधानमंत्री डहार ले देस ल अपन सेवा, समर्पण अउ गरीब कल्याण के योजना के संग काम करत आठ बछर पूरा होय उपर नरेन्द्र मोदी ऐप के माध्यम ले ‘‘एट इयर्स ऑफ सेवा‘‘ के अभियान चलाय गे रिहीस। चुने गे जम्मों प्रतिभागी मन ल प्रसंसा पत्र अउ ‘‘मोदी एट ट्वेंटी ड्रीम मीट डिलीवरी‘‘ पुस्तक दे जाही।
बाल दिवस
आज बाल दिवस हरय। लइका मनके अधिकार, उंखर बने ढंग ले देखभाल अउ सिक्षा कोति जागरूकता बढ़ाय बर हरेक साल चौदह नवंबर के देस के पहिली प्रधानमंत्री जवाहर लाल नेहरू के जयंती के मउका म ए दिवस ल मनाय जाथे। राष्ट्रपति द्रौपदी मुर्मू अउ प्रधानमंत्री नरेन्द्र मोदी ह पंडित नेहरू के जयंती म ओमन ल श्रद्धांजलि दे हवय।
ऐति, प्रदेस म घलो बाल दिवस के मउका म कतकोन कारीकरम होवत हे। मुख्यमंत्री ह अपन निवास कार्यालय म पंडित जवाहर लाल नेहरू के फोटू म माला चढ़ाके ओमन ल श्रद्धांजलि दीन। ए मउका म ओमन किहीन कि राज्य सरकार ह पंडित नेहरू के बताय रद्दा म चलत कतकोन फइसला लेहे। ए मउका म मुख्यमंत्री ह पंडित नेहरू के विचार, व्यक्तित्व उपर ‘‘नेहरू का भारत डॉट कॉम‘‘ वेबसाइट के लोकार्पण करीन।
जानबा के मुताबिक ‘‘आईडिया ऑफ इंडिया‘‘ ले आम लोगन मन ल परिचित कराय अउ एला जन-जन तक पहुंचाय के उद्देश्य ले पॉलिसी एनालिसिस रिसर्च एंड नॉलेज फाउंडेशन डहार ले ए वेबसाइट तैयार करे गेहे।
प्रसार भारती-सीईओ
भारतीय प्रशासनिक सेवा के वरिष्ठ अधिकारी गौरव द्विवेदी ल प्रसार भारती के मुख्य कार्यकारी अधिकारी-सीईओ बनाय गेहे। बछर उन्नीस सौ पंचानवे बैच के अधिकारी श्री द्विवेदी के कार्यकाल पांच साल तक रइही। ओमन वर्तमान म छत्तीसगढ़ शासन म प्रमुख सचिव वाणिज्यिक कर के पद म पदस्थ हे।
मन की बात
प्रधानमंत्री नरेन्द्र मोदी ह आकाशवाणी ले सत्ताईस नवंबर के प्रसारित होवइया ‘‘मन की बात‘‘ कारीकरम बर लोगन मन ले विचार अउ सुझाव मांगे हे। प्रधानमंत्री ह अइसन बिसय के बारे म सुझाव दे बर केहे हवय, जेला ‘‘मन की बात‘‘ म उठाय जाना चाही। माई जीओवी अउ नमो ऐप म अपन विचार अउ सुझाव भेज सकथे या फेर एक आठ शून्य शून्य – एक एक सात आठ शून्य शून्य म डायल करके हिन्दी या अंग्रेजी म अपन बात रिकार्ड करा सकथे।
उर्वरक-कीमत
प्रदेस म रबी सीजन दू हजार बाईस-तेईस बर रासायनिक खातू के भाव तय कर दे गेहे। अब एन.पी.के. खातू के भाव म पचास रूपिया के कमी आय हे। त उहें, बाकी खातू मनके भाव ह पहिली जइसन रिही।
कृषि उत्पादन आयुक्त डॉक्टर कमलप्रीत सिंह के अध्यक्षता म आज राज्य स्तरीय उर्वरक क्रय समिति अउ रासायनिक उर्वरक देवइया मनके बीच वर्चुअल बइठका होईस। बइठका म डीएपी अउ एन.पी.के. खातू बर तेरह सौ पचास रूपिया प्रति बोरी के भावन तय करे गेहे। त उहें, एसएसपी पावडर बर चार सौ चौरानवे रूपिया, एसएसपी दानेदार बर छह सौ पैंतीस रूपिया अउ जिंकटेड एसएसपी पावडर बर पांच सौ चौदह रूपिया प्रति बोरी के भाव तय करे गेहे।
अंतर्राष्ट्रीय व्यापार मेला
इकचालीसवां भारत अंतर्राष्ट्रीय व्यापार मेला आज ले नई दिल्ली के प्रगति मैदान म सुरू होगे। केन्द्रीय वाणिज्य अउ उद्योग मंत्री पीयूष गोयल ह मेला के उद्घाटन करीन। आजादी के पचहत्तरवां बछर म राखे गे ए मेला म अमृत महोत्सव के झलक देखे ल मिलही। ए बार मेला के थीम हे ‘‘वोकल फॉर लोकल, लोकल टू ग्लोबल‘‘। ए थीम के आधार म छत्तीसगढ़ पवेलियन ल घलो सजाय गेहे। छत्तीसगढ़ राज्य औद्योगिक विकास निगम के प्रबंध संचालक सारांश मित्तर ह ए पवेलियन के उद्घाटन करीन। छत्तीसगढ़ के ए पवेलियन म ग्रामोद्योग स्वयं सहायता समूह, हैंडलूम, हस्तशिल्प, हर्बल अउ कृषि विभाग के स्टॉल लगाय गेहे। उहें, इक्कीस नवंबर के राज्य के सांस्कृतिक दिवस मनाय जाही, जिहां प्रदेस के लोक कला अउ संस्कृति के लोक कलाकार मन डहार ले प्रदर्सन करे जाही।
चौदह ले सत्ताईस नवंबर तक चलइया ए अंतर्राष्ट्रीय व्यापार मेला म उनतीस राज्य के संगेसंग जम्मों केन्द्रसासित प्रदेस मन घलो सामिल होवत हे।
स्वच्छता अभियान-निरीक्षण
केन्द्र सरकार डहार ले चलाय जात ‘‘विशेष स्वच्छता अभियान टू प्वॉइंट जीरो‘‘ के तहत सूचना अउ प्रसारण मंत्रालय के वरिष्ठ आर्थिक सलाहकार आर.के. जेना ह आज रईपुर स्थित मंत्रालय के आने-आने इकाई मनके दउरा करीन। श्री जेना ह अपन रईपुर प्रवास के दउरान आकाशवाणी केन्द्र, पत्र सूचना कार्यालय, केन्द्रीय संचार ब्यूरो अउ दूरदर्शन केन्द्र के घलो निरीक्षण करके साफ-सफई के जानबा लीन। ओमन ए जम्मों कार्यालय म साफ-सफई के स्तर उपर संतोष जतावत जरूरी दिसा-निरदेस दीन।
माओवादी-गिरफ्तार
बीजापुर जिला म सुरक्षा बल मन ह तीन झिन माओवादी मन ल गिरफ्तार करे हे। जानबा के मुताबिक एसटीएफ अउ जिला पुलिस बल के संयुक्त टीम ह बासागुड़ा थाना क्षेत्र ले पुसबाका गांव बर निकले रिहीन। इही दउरान सुरक्षा बल मन ह विस्फोटक सामान के संग ए माओवादी मन ल गिरफ्तार करे हे।
विश्व मधुमेह दिवस
आज विश्व मधुमेह दिवस हरय। ए दिन ल विश्व के लोगन मन ल मधुमेह के स्थिति अउ एला रोके के बारे म आने-आने उपाय बता के जागरूक करे जाथे। एसो की थीम हे – ‘‘मधुमेह के बारे में जानकरी बढ़ाना‘‘।
प्रदेस सरकार के स्वास्थ्य अउ परिवार कल्याण विभाग के नोडल अधिकारी डॉक्टर नेतराम नवरत्न ह बतईन कि मनखे मनके सरीर म रक्त शर्करा या ग्लूकोज के मात्रा बाढ़े के सेती मधुमेह या डायबिटीज के सिकायत आगू आथे। जादा ले जादा लोगन मन म ए बीमारी बने ढंग ले जीवन शैली ल नइ अपनाय के सेती होथे। ओमन बतईन कि मधुमेह ले बचाव बर प्रदेस के जम्मों जिला चिकित्सालय के संगेसंग सामुदायिक अउ प्राथमिक स्वास्थ्य केन्द्र मन म तीस साल ले जादा उमर के लोगन मन के डायबिटीज के मुफत म जांच करे जात हे।