भानुप्रतापपुर उपचुनाव
भानुप्रतापपुर विधानसभा उपचुनाव बर प्रत्यासी चयन खातिर काली बीजेपी चुनाव समिति के बइठक होईस। बइठक के बाद बीजेपी प्रदेस अध्यक्ष अरूण साव ह बतईन कि पार्टी के 17 कार्यकर्ता के नांव आगू आय रिहीस हे, जेमा 5 नांव उपर विचार करके केन्द्रीय चुनाव समिति ल भेजे गीस।
इही बीच, भानुप्रतापपुर विधानसभा उपचुनाव बर नामांकन पत्र भरे के काम सुरू होगे हे। उम्मीदवार मन 17 नवंबर तक नामांकन भरहीं अउ 21 नवंबर तक नाम वापस ले सकहीं। बतादन कि भानुप्रतापपुर विधानसभा उपचुनाव बर 5 दिसंबर के वोट डाले जाही अउ 8 दिसंबर के परिणाम घोसित होही।
मुख्यमंत्री-भेंट मुलाकात
मुख्यमंत्री भूपेश बघेल ह राजनांदगांव जिला म भेंट-मुलाकात करीन। ए मउका म मुख्यमंत्री ह डोंगरगांव विधानसभा क्षेत्र म 80 करोड़ 27 लाख रूपिया के कतकोन विकास कारज के लोकार्पण अउ भूमिपूजन करीन।
कार्यक्रम के दौरान मुख्यमंत्री ह डोंगरगांव म अधिकारी मनके संग समीक्षा बइठक लीन। बइठक म मुख्यमंत्री ह अधिकारी मन ले नल-जल योजना के स्थिति के जानकारी लीन अउ जिला म सट्टा-जुआ, अवैध शराब बिक्री के सिकायत उपर कार्रवाई करे के निर्देश दीन। मुख्यमंत्री ह भेंट-मुलाकात कार्यक्रम के दउरान शासकीय महाविद्यालय डोंगरगांव म बाबा साहेब अंबेडकर के मूर्ति के अनावरण घलो करीन।
बाल दिवस
काली बाल दिवस हे। लइका मनके अधिकार, उंखर देखभाल अउ सिक्षा के प्रति जागरूकता बढ़ाय बर हर बछर 14 नवंबर के देस के पहिली प्रधानमंत्री पंडित जवाहर लाल नेहरू के जयंती म ए दिवस मनाय जाथे।
ए मउका म काली राजधानी रईपुर के साईंस कालेज परिसर स्थित पंडित दीनदयाल उपाध्याय ऑडिटोरियम म बाल दिवस समारोह के आयोजन करे जाही। समारोह के सुभारंभ मुख्यमंत्री भूपेश बघेल करही। कार्यक्रम म बस्तर अउ सरगुजा क्षेत्र के लइका मन अपन कलाकारी देखाही। ए मउका म स्कूल शिक्षा विभाग डहार ले घलो प्रदर्सनी लगाय जाही। प्रदर्सनी म बालवाड़ी के लइका मनके खेलकूद अउ आने सिक्षा के स्टॉल लगाय जाही।
एम्स-सुविधा
अखिल भारतीय आयुर्विज्ञान संस्थान-एम्स म लिक्विड आधारित साइटोलॉजी सुविधा सुरू होगे हे। ए सुविधा के सुरू होय ले माईलोगिन मन म होवइया गर्भाशय अउ सर्वाइकल कैंसर के जांच तेजी ले होही अउ स्क्रीनिंग घलो सरल हो जही। ये नवा सुविधा ले अब कोनों घलो उमर के महिला म गर्भाशय कैंसर के जांच हो सकही। एखर अलावा सर्जिकल पैथोलॉजी संग्रहालय के घलो उद्घाटन करे गीस, जेमा कतकोन प्रकार के कैंसर अउ पथरी जइसन नमूना राखे गेहे। जेखर ले चिकित्सा छात्र मन ल एखर जादा जानकारी अउ पढ़ई म सरल होही।
दलपत सागर-दीपोत्सव
जगदलपुर के जुन्ना तरिया ‘‘दलपत सागर‘‘ म बीते संझा करीबन सवा दू लाख दीया बारे गीस। जगदलपुर सहर ल साफ-सुथरा राखे खातिर अउ दलपत सागर के संरक्षण बर आयोजित ए कार्यक्रम म लोगन मन दीया, तेल अउ बाती दान करीन। दीपोत्सव कार्यक्रम म सबो वरग के लइका-सियान जुरियाय रिहीन, जिहां दलपत सागर के रानीघाट म दीया बार के पूजा-पाठ करे गीस।
भाजपा बयान
लोकसभा सांसद अउ बीजेपी के बस्तर संभाग प्रभारी संतोष पांडेय ह कांग्रेस सांसद रंजीत रंजन उपर आरोप लगावत किहीन कि ओमन छत्तीसगढ़वासी के भावना ले खिलवाड़ करे हे। ओमन किहीन कि कांग्रेस के विचारधारा माओवादी मनके समर्थन अउ आम जनता के विरोध के हे। संतोष पांडेय ह किहीस कि कांग्रेस सांसद रंजीत रंजन ल पार्टी ले बाहर करे जाना चाही।
मतदाता सूची-पुनरीक्षण
प्रदेस के जम्मों मतदान केन्द्र मन म एकीकृत मतदाता सूची के प्रकासन के संगेसंग विशेष संक्षिप्त पुनरीक्षण के काम सुरू होगे हे। एमा मतदाता सूची म नाव जोड़े, हटाय या सुधारे बर आठ दिसंबर तक अरजी दे जा सकथे। ए अरजी मनके निराकरण पांच जनवरी तक करे के बाद अंतिम मतदाता सूची के प्रकासन करे जाही। मतदाता सूची म नाम जोड़वाय बर एक जनवरी, एक अप्रैल, एक जुलाई अउ एक अक्टूबर के अट्ठारह साल के उमर पूरा करइया मतदाता मन अरजी कर सकथे। एखर बर प्रदेस के हायर सेकेंडरी स्कूल अउ कालेज मन म बिसेस सिविर लगाय जाही। आयोग ह नाम जोड़े के काम ल पेपरलेस करे बर वोटर हेल्पलाइन ऐप अउ एनवीएसपी पोर्टल के माध्यम ले लोगन मन ले अरजी जमा करे के बिनती करे हे।
कोयला चोरी-हमला
कोरिया जिला के चरचा इलाका म कोयला चोर मन अधिकारी अउ करमचारी मन उपर हमला कर दीन। हमला म कतकोन कर्मचारी अउ सुरक्षा कर्मी घायल होगीन। बतादन कि चरचा कालरी प्रबंधन ल कोयला चोरी के जानकारी मिले के बाद अधिकारी अपन सुरक्षा दस्ता के संग मउका म पहुंचे रिहीन, जिहां करीबन चालीस लोगन कोयला चोरी करत मिलीन, उही बेरा चोर मन ह अधिकारी मन उपर पथरा अउ हथियार ले हमला कर दीन। पुलिस ह घटना के 6 आरोपी ल गिरफ्तार करे हे अउ आने आरोपी मनके तलाशी जारी हे।
हाथी-आतंक
कोरबा जिला के कटघोरा वनमंडल के केंदई रेंज म ए बेरा हाथी मनके उत्पात ले लोगन परेसान हे। 44 हाथी के दल बीते 4 दिन ले गांव के तीर-तखार म किंदरत हे। ए हाथी के दल ह एक ग्रामीण के घर ल तोड़ दीस। उहें, 4 मवेसी ल कुचल के मार डरीस। घटना के बाद ले ग्रामीण मन म डर बइठे हे अउ रतजगा करत हें। उहें, ग्रामीण मन ह इलाका म एसडीओ स्तर के अधिकारी के मांग करीन हे।
साइकिल रैली
राष्ट्रीय विधिक सेवा प्राधिकरण अउ छत्तीसगढ़ राज्य सेवा प्राधिकरण के मार्गदर्शन म आज रईपुर म साइकिल रैली निकाले गीस। जिला अउ सत्र न्यायालय परिसर ले निकाले गे ए रैली म आने-आने सरकारी स्कूल के छात्र-छात्रा मन भाग लीन। रैली के माध्यम ले लोगन मन ल आने-आने कानूनी बिसय म जागरूकता संदेस दे गीस।
अउ अब थोरकुन समाचार सार म –
– कबीरधाम जिला म विचाराधीन कैदी के अस्पताल ले फरार होय के बेरा ड्यूटी म तैनात पांच पुलिसकर्मी ल एसपी ह निलंबित कर दीस।
अउ
– कबीरधाम जिला के ही तालपुर गांव म बिहनिया स्कूल बस दुर्घटनाग्रस्त होगीस। हादसा म गुरूजी समेत 10 लइका घायल होगे हे।