महतारी हुंकार रैली
भारतीय जनता पार्टी महिला मोर्चा डहार ले आज बिलासपुर म महतारी हुंकार रैली के आयोजन करे गीस। ए रैली म प्रदेसभर ले आय महिला मोर्चा के सदस्य मन सामिल होईन। ए रैली म सामिल होय बर केन्द्रीय मंत्री स्मृति ईरानी आज बिलासपुर पहुंचीन। स्मृति ईरानी के अगुवई म गांधी चौक ले निकाले गे ए रैली नेहरू चौक म संपन्न होईस, जिहां एक जनसभा के आयोजन करे गीस।
जनसभा ल संबोधित करत केन्द्रीय मंत्री ह राज्य सरकार उपर जमके निसाना सधीन। रैली ल केन्द्रीय मंत्री रेणुका सिंह, सांसद सरोज पांडेय, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह अउ प्रदेस अध्यक्ष अरूण साव ह घलो संबोधित करीन।
आधार नियम-संशोधन
केन्द्र सरकार ह आधार नियम म संशोधन करे हे। नवा नियम म आधार बनाय जाय के दस साल पूरा होय म कम से कम एक घांव सहायक दस्तावेज मन ल अद्यतन कराना जरूरी कर दे गेहे। केन्द्रीय इलेक्ट्रॉनिक्स अउ सूचना प्रौद्योगिकी मंत्रालय के गजट अधिसूचना के अनुसार सहायक दस्तावेज मन ल अद्यतन कराय ले सेंट्रल आइडेंटिटीज डेटा रेपोजिटरी म आधार ले जुड़े सूचना सही बने रेहे ल सुनिश्चित करे जा सकही।
मुख्यमंत्री-पैरादान अपील
मुख्यमंत्री भूपेश बघेल ह किसान मन ले गौठान म पैरादान करे के अपील करीन हे। ओमन पैरादान के फायदा बतावत किहीन कि एखर ले प्रदूषण ले मुक्ति मिलही। उहें, मवेशी मन बर चारा के व्यवस्था होही। ओमन किसान मन ले आग्रह करीन कि फसल कटाई के बाद पैरा झन जलावय। एखर ले प्रदूषण बाढ़थे, जउन ह स्वास्थ्य बर अच्छा नइ हे।
ए बात मुख्यमंत्री ह जांजगीर-चांपा जिला के ग्राम सेमरा म भेंट-मुलाकात कारीकरम के दउरान किहीन। कारीकरम म श्री बघेल ह नवागढ़ म स्वामी आत्मानंद इंग्लिश मीडियम स्कूल खोले, नवागढ़ के शासकीय नवीन महाविद्यालय के नाम लिंगेश्वर महादेव के नाम उपर करे अउ शासकीय हाईस्कूल बुढ़ेना ल आयुर्वेद रत्न डॉक्टर गुलाब सिंह के नाम उपर करे के घोसना करीन। एखर अलावा मुख्यमंत्री ह नवागढ़ म खेल मैदान समेत आने-आने विकास काम के घलो घोसना करीन।
मुख्यमंत्री ह विद्यार्थी मनके सिकायत उपर सेमरा हाईस्कूल के प्राचार्य ल निलंबित करे अउ क्लर्क ल स्थानांतरित करे के निरदेस अधिकारी मन ल दीन।
गृहमंत्री-सड़क मरम्मत
लोक निर्माण मंत्री ताम्रध्वज साहू ह प्रदेस के खराब अउ जर्जर सड़क मनके मरम्मत अउ नवा बनाय के काम अवइया दिसंबर महीना तक जरूरी रूप ले पूरा करे के निरदेस संबंधित विभाग ल दीन हे। ओमन अधिकारी मन ले किहीन कि हरेक सड़क वर्क प्लान तैयार करके सुधारे के काम निर्धारित समय-सीमा म करे जाय। श्री साहू ह विभागीय कामकाज के समीक्षा करत सड़क मनके निर्माण के संघरा मरम्मत अउ नवीनीकरण काम म तेजी लाय बर मुख्य अभियंता, अधीक्षण अभियंता अउ कार्यपालन अभियंता ल हफ्ता म चार ले पांच दिन कार्यस्थल के निरीक्षण करे के निरदेस दीन।
राष्ट्रीय फाइलेरिया दिवस
फाइलेरिया जइसन गंभीर बीमारी बर समुदाय ल जागरूक करे अउ लोगन मन ल ए बीमारी ले सुरक्षित राखे बर छत्तीसगढ़ समेत देसभर म आज ‘‘राष्ट्रीय फाइलेरिया दिवस‘‘ मनाय जात हे। महामारी नियंत्रण के संचालक डॉक्टर सुभाष मिश्रा ह बतईन कि फाइलेरिया मच्छर के काटे ले होने वाला संक्रामक रोग हरय। एखर बचाव बर सरकार डहार ले लोगन मन ल मुफ्त म दवई दे जात हे। ओमन बतईन कि राष्ट्रीय फाइलेरिया उन्मूलन कारीकरम के अंतर्गत प्रदेस के तीन जिला- रईपुर, गरियाबंद अउ बलौदाबाजार-भाटापारा म अवइया बारह ले अट्ठारह दिसंबर तक सामूहिक दवा सेवन कारीकरम चलाय जाही। एखर तहत दू बछर ले कम उमर के लइका, गर्भवती महिला अउ अति गंभीर रूप ले बीमार मनखे मन ल छोड़के जम्मों लोगन मन ल डीईसी अउ अल्बेंडाजोल के निर्धारित खुराक प्रसिक्षित स्वास्थ्यकर्मी मन कोति ले घर-घर जाके खिलाय जाही।
राष्ट्रीय लोक अदालत
उपभोक्ता मन ले जुड़े विचाराधीन मामला ल निपटाय बर छत्तीसगढ़ समेत देसभर म काली बारह नवंबर के राष्ट्रीय लोक अदालत के आयोजन करे जाही। लोक अदालत म प्री-लिटिगेशन प्रकरण म बी.एस.एन.एल. विद्युत विभाग, नगर निगम, नामांतरण, बीमा कंपनी, बैंक अउ चेक बाउंस के अलावा दूसर राजीनामा योग्य प्रकरण मनके निराकरण करे जाथे।
प्रधानमंत्री टीबी मुक्त भारत अभियान
केन्द्रीय स्वास्थ्य सचिव राजेश भूषण ह काली जम्मों राज्यपाल अउ उप राज्यपाल के सचिव मन करा वर्चुअल बइठका करके प्रधानमंत्री टीबी मुक्त भारत अभियान के प्रगति के समीक्षा करीन। बइठका म अभियान के प्रगति अउ एखर क्रियान्वयन म आवत कठिनाई के संबंध म चरचा करे गीस।
बइठका म श्री भूषण ह सचिव मन करा किहीन कि जम्मों झन अपन राज्यपाल ले बिनती करय कि ओमन प्रदेस के राज्य क्षय अधिकारी मन संग मासिक समीक्षा बइठका करय। अपन कारीकरम म प्रधानमंत्री टीबी मुक्त भारत अभियान के बारे म जानकारी देवय अउ ए अभियान म सहयोग देवइया गैर सरकारी संस्था अउ उद्यमी मन ल सम्मानित करय।
स्कूल-स्पीड रीडिंग प्रतियोगिता
प्रदेस म संचालित प्राथमिक अउ माध्यमिक स्तर के स्कूली लइका मनके स्पीड रीडिंग अउ मौखिक गणित के राज्य स्तरीय प्रतियोगिता अवइया सोलह नवंबर के राजधानी रईपुर म होही। एमा प्रदेस के जम्मों पांच संभाग ले चुने गे चालीस विद्यार्थी मन अपन प्रतिभा के प्रदर्सन करही।
समग्र शिक्षा के प्रबंध संचालक ह जम्मों जिला सिक्षा अधिकारी अउ जिला मिशन समन्वय ल दिसा-निरदेस जारी कर देहे। ओमन किहीन कि सोलह नवंबर के स्पीड रीडिंग अउ मौखिक गणित म संभाग स्तर म विजयी प्रतिभागी मन ल राज्यस्तरीय प्रतियोगिता बर रईपुर लवई सुनिश्चित करय।
लखमा-कार्यशाला
उद्योग मंत्री कवासी लखमा ह किहीन हे कि राज्य सरकार उद्यमी मन ल हरसंभव मदद दीही। ओमन किहीन कि उद्यमी स्व-रोजगार अउ अपन उत्पाद बर उद्यम लेके आवय, सरकार ओमन ल रियायती दर उपर जमीन उपलब्ध कराही।
ए बात श्री लखमा ह जगदलपुर के कृषि महाविद्यालय म राखे गे संभाग स्तरीय कार्यशाला म किहीन। ए दउरान वाणिज्य अउ उद्योग विभाग डहार ले एक दिन के स्टार्टअप क्रेता-विक्रेता सम्मेलन के घलो आयोजन करे गीस, जेमा बस्तर संभाग के सब्बो जिला ले आय उद्यमी मन हिस्सा लीन।
धान खरीदी
प्रदेस म अब तक किसान मन ले समर्थन मूल्य म दू लाख छियालीस लाख मीटरिक टन ले जादा धान के खरीदी करे जा चुके हे। एखर एवज म किसान मन ल बैंक लिंकिंग व्यवस्था के तहत पांच सौ चौंतीस करोड़ उनचालीस लाख रूपिया के भुगतान करे गेहे। खाद्य विभाग के सचिव टोपेश्वर वर्मा ह बतईन कि अधिकारी धान के व्यवस्था उपर सरलग निगरानी रखे हवय। धान खरीदी ल लेके कोनों भी प्रकार के सिकायत नइ मिले हे। ओमन बतईन कि धान खरीदी के संघरा कस्टम मिलिंग बर धान के उठाव सुरू होगे हे। अब तक करीबन नौ हजार आठ सौ उपचान मीटरिक टन धान के उठाव हो चुके हरय।
इही बीच, बलरामपुर जिला के ग्राम पंचायत पंडरी के पहाड़डीह म दू मनखे मनके घर ले दू सौ बारह बोरी धान जब्त करे गीस। बतादन कि जिला प्रशासन डहार ले धान के अवैध परिवहन ल रोके बर कार्रवाई करे जात हे।
अउ अब थोरकुन समाचार सार म –
– राज्य सरकार ह अवइया बछर दू हजार तेईस बर शासकीय अवकाश के घोसना कर देहे। एमा सार्वजनिक अउ सामान्य अवकाश के अलावा ऐच्छिक अवकाश घलो सामिल हरय।
– छत्तीसगढ़ उच्च न्यायालय अउ राज्य विधिक सेवा प्राधिकरण बिलासपुर के तत्वावधान म जिला विधिक सेवा प्राधिकरण, महासमुंद डहार ले जिला पंचायत कार्यालय म अवइया तेरह नवंबर के मेगा कैम्प राखे जाही। ए दउरान आने-आने विभागीय योजना मनके जानकारी देहे के संघरा सामान घलो बांटे जाही।
अउ
– महासमुंद जिला के सिंघोड़ा पुलिस ह ग्राम रेहटीखोल म चांदी के तस्करी करे के आरोप म तीन मनखे मन ल गिरफ्तार करे हे। पुलिस के अनुसार ए आरोपी ओड़िसा ले बैसठ किलो दू सौ अस्सी ग्राम चांदी उत्तरप्रदेश ले जावत रिहीन। जब्त चांदी के कीमत इकतीस लाख चौदह हजार रूपिया बताय गेहे।