सुप्रीम कोर्ट-आरक्षण
देस म आर्थिक आधार म आरक्षण आगू घलो जारी रिही। उच्चतम न्यायालय के पांच न्यायाधीश मनके संविधान पीठ ह आर्थिक रूप ले कमजोर वर्ग बर आने-आने व्यावसायिक शिक्षण संस्थान म प्रवेस के संग सरकारी नौकरी मन म दस प्रतिशत आरक्षण के प्रावधान ल सही बताय हे। ए मामला म सुनवाई करत पांच न्यायाधीश मनके पीठ म ले तीन न्यायधीश मन ह आरक्षण के पक्ष म अपन फइसला देहे। अइसने बहुमत के आधार म सुनाय गे ए फइसला के तहत आर्थिक आधार म आरक्षण जारी रिही।
खबर के मुताबिक ए संबंध म एक सौ तीनवां संविधान संशोधन म प्रावधान करे गेहे। ए प्रावधान ल जनवरी दू हजार उन्नीस म संसद म मंजूरी दे गे रिहीस। एखर तुरते बाद कुछेक संस्थान मन ह ए संशोधन ल चुनौती दे बर उच्चतम न्यायालय म याचिका दायर कर दे रिहीस।
इही बीच, भारतीय जनता पार्टी ह आर्थिक रूप ले कमजोर वर्ग मनके आरक्षण ल जारी राखे के संबंध म उच्चतम न्यायालय के फइसला के स्वागत करे हे। पार्टी महासचिव बी.एल. संतोष ह अपन ट्वीट संदेस म कहिन कि सामाजिक न्याय के दिसा म ए ह एक ठिन बड़का फइसला हरय।
भानुप्रतापपुर-उपचुनाव
भानुप्रतापपुर विधानसभा उपचुनाव बर राजनीतिक माहौल तेज होगे गेहे। इही कड़ी म काली रईपुर म प्रदेस कांग्रेस के चुनाव समिति के बइठका म प्रत्यासी के चयन उपर चरचा करे जाही। ए बइठका म भाग ले बर प्रदेस कांग्रेस प्रभारी पी.एल. पुनिया आज रतिहा रईपुर आवत हे। ए बइठका म मुख्यमंत्री भूपेश बघेल संग कांग्रेस के वरिष्ठ नेता अउ पदाधिकारी घलो सामिल होही।
एखर पहिली, प्रदेस अध्यक्ष मोहन मरकाम तेलंगाना म कांग्रेस के पूर्व अध्यक्ष राहुल गांधी के भारत जोड़ो यात्रा म सामिल होय के बाद आज भानुप्रतापपुर पहुंच चुके हे। ओमन ह इहां पार्टी के स्थानीय नेता अउ पदाधिकारी मनके संग बइठका लेके प्रत्यासी चयन के संभावना उपर चरचा करीन। श्री मरकाम ए चरचा के रिपोर्ट के संग काली रईपुर म होवइया प्रदेस चुनाव समिति के बइठका म सामिल होही।
ओति, मुख्य विपक्षी दल भाजपा ह घलो ए उपचुनाव बर अपन तैयारी तेज कर लेहे। पार्टी ह प्रत्यासी के चयन बर पर्यवेक्षक नियुक्त करे हे। एमा पूर्व राज्यसभा सांसद रामविचार नेताम, सांसद संतोष पांडेय, विधायक शिवरतन शर्मा अउ रंजना साहू ल सामिल करे गेहे।
इही बीच, कांकेर के कलेक्टर अउ जिला निर्वाचन अधिकारी डॉक्टर प्रियंका शुक्ला ह भानुप्रतापपुर उपचुनाव ल देखत सबो सासकीय अधिकारी अउ करमचारी मनके बिना अनुमति छुट्टी ल म रोक लगा देहे। ए उपचुनाव बर जिला निर्वाचन अधिकारी बाईस नोडल अधिकारी नियुक्त करे हे। ए नोडल अधिकारी मन ल आज बिहनिया जिला पंचायत सभा कक्ष म चुनाव संबंधी प्रसिक्षण दे गीस।
मेडिकल/डेंटल कॉलेज-प्रावीण्य सूची
प्रदेस म मेडिकल अउ डेंटल कॉलेज मन म प्रवेस बर तकनीकी सिक्षा संचालनालय ह प्रावीण्य सूची जारी कर देहे। एमा लगभग साढ़े तीन हजार विद्यार्थी मनके नाम सामिल हे। ए विद्यार्थी मन प्रदेस के नौ सरकारी अउ तीन निजी मेडिकल कालेज के पन्द्रह सौ सत्तर सीट अउ डेंटल कालेज मनके छह सौ सीट मन बर होवइया कउंसलिंग म सामिल हो सकत हे।
श्रमेवजयते मोबाइल ऐप
राजधानी रईपुर के साईंस कालेज मैदान म काली खतम होय राज्योत्सव मेला म श्रम विभाग ह श्रमिक मनके तत्काल पंजीयन बर बिसेस सुविधा केन्द्र बनाय रिहीन। इहां श्रमेवजयते नाम के मोबाइल ऐप के माध्यम ले तत्काल पंजीयन के सुविधा कराय गे रिहीस। राज्योत्सव के दउरान ए सुविधा केन्द्र म आके साढ़े पांच सौ ले जादा श्रमिक मन ह पंजीयन बर आवेदन करीन।
खबर के मुताबिक अब तक ए मोबाइल ऐप्लीकेशन के माध्यम ले प्रदेसभर के दस हजार ले जादा श्रमिक मन पंजीयन बर आवेदन जमा कर चुके हे।
दीक्षांत परेड समारोह
छत्तीसगढ़ सशस्त्र बल के अड़तीसवां सत्र के दीक्षांत परेड समारोह आज जगदलपुर के लालबाग स्थित पुलिस प्रशिक्षण साला म संपन्न होईस। एमा चालीस नव आरक्षक सामिल होईन। ए सबो जवान मन ल पाछु दस महीना के दउरान कानून व्यवस्था अउ पुलिस प्रक्रिया के संगेसंग आने-आने अस्श-शस्त्र के कुशल संचालन के प्रसिक्षण दे गेहे। ए मउका म बस्तर रेंज के पुलिस महानिरीक्षक सुंदरराज पी. ह नव आरक्षक मन ल देस अउ समाज के प्रति समर्पित होके निष्ठापूर्वक सेवा देके सपथ दिलईन। ओमन ह प्रसिक्षण के दउरान अच्छा प्रदर्सन करइया नव आरक्षक मन ल पुरस्कार घलो दीन।
खेलो भिलाई मैराथन
दुरूग जिला ओलंपिक संघ के खेल महोत्सव आज ले इस्पात नगरी भिलाई म सुरू होगे हे। ए आयोजन के पहिली आज, ‘‘खेलो भिलाई मैराथन‘‘ के आयोजन करे गीस। भिलाई के सेक्टर-एक के क्रिकेट मैदान ले सुरू होय ए मैराथन दउड़ म खिलाड़ी अउ जनप्रतिनिधि मनके संगेसंग आने-आने संस्था मनके पदाधिकारी मन ह घलो बड़-चढ़के हिस्सा लीन। प्रमुख रद्दा ले होवत ए दउड़ शहीद पार्क परिसर म खतम होईस।
ए दउड़ म बालक वर्ग म ओंकार वर्मा ल पहला, मुकेश कुमार ल दूसरा अउ उमा सिंह ल तीसरा स्थान मिलीस। बालिका वर्ग म प्रियंका साहू विजेता अउ दिलेश्वरी ठाकुर उप विजेता रिहीन। उहें, शीतल कुशवाहा ल तीसरा स्थान प्राप्त होईस। ए आयोजन के संबंध म भिलाई के महापौर नीरज पाल ह बतईन कि चौदह नवंबर तक चलइया ओलंपिक खेल महोत्सव के अंतर्गत चालीस खेल स्पर्धा मन म दुरूग जिला के साढ़े पांच हजार ले जादा खिलाड़ी अपन प्रतिभा के प्रदर्सन करही। एमा एथलेटिक्स, तैराकी, कुश्ती, तीरंदाजी, टेनिस, वॉलबॉल, फुटबॉल अउ बास्केटबॉल संग आने-आने खेल मनके मुकाबला होही।
रोलर स्केटिंग प्रतियोगिता
रईपुर म आयोजित पन्द्रहवां राज्य स्तरीय रोलर स्केटिंग प्रतियोगिता काली खतम होईस। स्कूल शिक्षा मंत्री डॉक्टर प्रेमसाय सिंह टेकाम ह ए प्रतियोगिता विजेता खिलाड़ी मन ल पुरस्कार बांटीन। ए मउका म श्री टेकाम ह कहिन कि प्रदेस म रोलर स्केटिंग ल अउ बढ़ावा दे बर रईपुर के संग दुरूग, भिलाई अउ बिलासपुर म नवा स्केटिंग मैदान के निर्माण जल्दी कराय जाही। ए राज्य स्तरीय प्रतियोगिता म अच्छा प्रदर्सन करइया खिलाड़ी मन ल अवइया ग्यारह ले बाईस दिसंबर तक बेंग्लुरू म होवइया राष्ट्रीय प्रतियोगिता म छत्तीसगढ़ के टीम म सामिल करे जाही।
दुर्घटना
बीते चौबीस घंटा के दउरान प्रदेस के अलग-अलग जगह मन म होय सड़क हादसा म ग्यारह लोगन के मउत होगे। उहें, चार लोगन घायल होगे हे।
गौरेला-पेण्ड्रा-मरवाही जिला के पेण्ड्रा इलाका म बीते रतिहा एक ठिन दुर्घटना म तीन झन युवक मनके मउका म ही मउत होगे। उंखर मोटर साइकिल रद्दा के खड़े कंटेनर ले टकरा गे।
उहें, रायगढ़ जिला के नवापाली इलाका म दू मोटर साइकिल के टक्कर म दू झिन युवक के मउत होगे।
ओति, कोंडागांव जिला के कोरेगांव इलाका म मोटर साइकिल के ट्रक ले टक्कर होगे। ए हादसा म मोटरसाइकिल सवार एक झिन युवक के घटनास्थल म ही मउत होगे। उहें, एक झिन आने युवक के इलाज के दउरान अस्पताल म मउत होगे। इही जिला के केशकाल इलाका म एक ठिन ट्रक ह साइकिल सवार माईलोगिन ल टक्कर मार दीस, जेखर ले माईलोगिन के मउका म ही मउत होगे।
अइसने, रईपुर-बिलासपुर राष्ट्रीय राजमार्ग म मुंगेली जिला के जुनवानी इलाका म कार के टक्कर ले मोटर साइकिल सवार एक झिन युवक के मउत होगे।
उहें, जांजगीर-चांपा जिला के डड़ई गांव म एक ठिन अज्ञात वाहन ह मोटर साइकिल सवार ल टक्कर मार दीस। एखर ले मोटर साइकिल सवार युवक के घटनास्थल म ही मउत होगे।
ओति, भानुप्रतापपुर-मनेन्द्रगढ़ जिला के ईमली गोलाई गांव म ट्रक अउ मोटर साइकिल के टक्कर ले दुपहिया सवार एक झिन मनखे के मउका म ही मउत होगे।