ट्रेन परिचालन
दक्षिण पूर्व मध्य रेलवे नागपुर रेलमंडल के राजनांदगांव-कलमना रेलखंड के बीच सालवा रेलवे स्टेशन ल तीसरा रेलवे लाइन ले जोड़े के काम छह ले नौ नवंबर तक करे जाही। एखर सेती पन्द्रह गाड़ी मनके परिचालन रद्द करे गेहे। उहें, छह गाड़ी मन ल गंतव्य ले पहिली समाप्त करे के संघरा नौ ठिन ट्रेन मन ल परिवर्तित मार्ग ले चलाय जाही।
जेन गाड़ी मनके परिचालन रद्द करे गेहे, ओमा कोरबा-इतवारी-कोरबा एक्सप्रेस, बिलासपुर-इतवारी-बिलासपुर इंटरसिटी एक्सप्रेस, रीवा-इतवारी-रीवा एक्सप्रेस, दुर्ग-गोंदिया-दुर्ग मेमू स्पेशल, गोंदिया-इतवारी-गोंदिया मेमू, रायपुर-इतवारी-रायपुर स्पेशल पैसेंजर सामिल हे। अइसने, तिरोड़ी-इतवारी-तिरोड़ी पैसेंजर अउ बिलासपुर-कोरबा पैसेंजर ट्रेन ल घलो रद्द करे गेहे।
स्कूली बच्चे-प्रतियोगिता
पढ़ई तुहंर दुआर थ्री प्वॉइंट जीरो ‘‘पोस्ट कोविड बच्चांे के व्यक्तित्व विकास‘‘ बर स्कूल स्तर ले राज्य स्तर तक आने-आने प्रतियोगिता आज ले सुरू होगे हे। कक्षा छठवीं ले बारहवीं तक के लइका मन बर आयोजित ए प्रतियोगिता मन तीस नवंबर तक चलही।
ए संबंध म स्कूल शिक्षा विभाग ह जम्मों जिला शिक्षा अधिकारी अउ जिला मिशन समन्वयक मन ल निरदेस जारी कर देहे। एखर अनुसार स्कूल के हरेक लइका ल कोनों न कोनों प्रतियोगिता म सामिल होना अनिवार्य हरय। एखर तहत निबंध, तात्कालिक भासन, चित्रकला, खेल, विज्ञान प्रोजेक्ट प्रदर्शन, गणित अउ विज्ञान, ओलम्पियाड अउ सामान्य ज्ञान म राखे गे क्विज प्रतियोगिता होही। स्कूल स्तर म ए प्रतियोगिता आज अउ काली, विकासखंड स्तर म छह अउ सात, जिला स्तर म आठ, संभाग स्तर म नौ अउ दस अउ राज्य स्तर म बारह ले चौदह नवंबर तक होही। एखर अलावा राज्य स्तर म कला उत्सव के आयोजन बाईस ले तीस नवंबर तक करे जाही।
एसडीआरएफ-मॉकड्रिल
कोनों भी प्राकृतिक अउ अप्राकृतिक आपदा के बेरा तुरते राहत अउ बचाव काम ल तुरंत अउ प्रभावी रूप ले संपादित करइया एसडीआरएफ के टीम ह आज राजधानी रायपुर समेत प्रदेस के आने-आने जिला मन म मॉकड्रिल करीन। एखर तहत आज टीम ह दुरूग जिला म पुलगांव चउक करा शिवनाथ नदी म मॉकड्रिक करके रेस्क्यू करे के सफल प्रदर्सन करीन। मॉकड्रिल के दउरान एसडीआरएफ के टीम ह नदी म डूबत एक मनखे ल बचाय के प्रक्रिया के प्रदर्सन करके लोगन मन ल एखर बारे म प्रसिक्षित करीन।
धान खरीदी
समर्थन मूल्य म धान खरीदी सुरू होय के बाद मोहला-मानपुर अंबागढ़ चौकी म जिला प्रशासन ह सीमावर्ती क्षेत्र म चौकसी बढ़ा देहे। जिला कलेक्टर एस. जयवर्धन ह पड़ोसी राज्य ले अवइया धान के अवैध परिवहन ल रोके बर सख्ती बरते के निरदेस दीन हे। साप्ताहिक समय-सीमा के बइठका म कलेक्टर ह किहीन कि धान खरीदी महत्वपूर्ण काम हे, एला प्राथमिकता ले करे जाय। ओमन धान उपार्जन केन्द्र मन म किसान मनके सुविधा बर समुचित बेवस्था करे के घलो निरदेस दीन।
इही बीच, अंबिकापुर म भारतीय जनता किसान मोर्चा के प्रदेस अध्यक्ष पवन साहू ह धान खरीदे के दउरान किसनहा मन ल होवइया परेसानी ल लेके राज्य सरकार ल चेताय हे। ओमन किहीन कि सरगुजा जिला के सात सौ चौबीस किसान मनके पंजीयन सून्य होगे हे। ओमन प्रसासन ले मांग करीन कि ए मामला के निरीक्षण करके रकबा ठीक करे जाय।
भाजपा-आरोप
भारतीय जनता पार्टी महिला मोर्चा ह प्रदेस म कानून बेवस्था बिगड़े के आरोप लगावत नागरिक, बिसेस कर महिला मन ल होवत परेसानी ल लेके मुंगेली कलेक्टर ल राज्यपाल के नाम ज्ञापन सौंपे हे।
मुंगेली जिला भाजपा महिला मोर्चा के अध्यक्ष वर्षा सिंह ह बतईन कि प्रदेस म जब ले कांग्रेस के सरकार बने हे, तब ले कानून बेवस्था सरलग बिगड़त जात हे। एखर सेती महिला मनके घर ले बाहिर निकलना मुश्किल होगे हे। ओमन राज्य सरकार उपर चुनाव ले पहिली घोषणा पत्र म करे गे वादा ल पूरा नइ करे के घलो आरोप लगईन।
बातों-बातों-में
प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ ए बखत किशोर साहू सम्मान ले विभूषित पहिली छत्तीसगढ़ी फिलिम के निर्माता-निर्देशक मनु नायक ले होय भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली पांच नवंबर के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र रिले करही।
केशकाल घाट-वाहन प्रतिबंध
कोंडागंाव जिला म केशकाल घाटी के राष्ट्रीय राजमार्ग तीस म रद्दा मन ल ठीकठाक करे के काम चलत हे। जेखर सेती आज ले ग्यारह नवंबर तक ए रद्दा म बड़का गाड़ी मनके अवई जवई उपर रोक लगाय गेहे। उंहे छोटे गाड़ी अउ यात्री बस मनके अवई जवई होवत रीही। लोगन मन ल होवइया परेसानी ल देखत जिला प्रशासन ह बड़का गाड़ी मनके अवई जवई ल केशकाल विश्रामपुरी चौक ले विश्रामपुरी-बोरई-नगरी होके धमतरी रद्दा कोति गाड़ी चलाये के बात केहे हे। एक दूसर वैकल्पिक रद्दा माकड़ी ढाबा ले भानुप्रतापपुर-अंतागढ़-नारायणपुर होवत कोंडागांव पहुंचे जा सकथे।
हाथी हमला-मौत
सक्ती जिला के धौरा गांव म हाथी के हमला म दू लइका मनके मउत होगे हे। उहें ओमन के दाई-ददा घायल होगे हे।
मिले जानकारी अनुसार झाड़सुगुड़ा क्षेत्र के ग्राम धौरा म एक परिवार ईंटा भट्टी म काम करे बर गे रिहीस। पाछु रतिहा ए हाथी उहां पहुंचीस अउ झोपड़ी तोड़े के संग ओमन उपर हमला कर दीस। बताय जात हे कि झाड़सुगुड़ा क्षेत्र के बागीडीह म लगभग छह हाथी मनके दल घुमत हे।
पूर्व विस प्रत्याशी-गिरफ्तार
महाराष्ट्र पुलिस ह अहिवारा ले पूर्व विधानसभा प्रत्याशी अशोक कुमार डोंगरे ल धोखाधड़ी के एक पुराना मामला म गिरफ्तार करे हे।
मिले जानकारी अनुसार अशोक डोंगरे महाराष्ट्र म दर्ज लाखों रूपिया के धोखाधड़ी के एक मामला म मुख्य आरोपी हरय। लंबा समय तक महाराष्ट्र पुलिस के रिकॉर्ड म फरार बतइया अशोक ल खोजत महाराष्ट्र पुलिस भिलाई पहुंचीस। टीम ह जिला पुलिस के मदद ले आरोपी अशोक डोंगरे ल काली देर रात गिरफ्तार करके महाराष्ट्र ले गीस।
बतादन कि अशोक डोंगरे लंबा समय ले कांग्रेस के सक्रिय नेता हरय। ओमन बछर दू हजार तेरह म अहिवारा विधानसभा ले चुनाव लड़े रिहीन।
पुलिस हमला-आरोपी गिरफ्तार
जांजगीर-चांपा जिला के समेरिया गांव म पुलिस पार्टी म हमला करे के मामला म पुलिस ह छह झिन आरोपी मन ल गिरफ्तार करे हे। एमा चार महिला घलो सामिल हवय। ए मामला म पुलिस ह सात झिन आरोपी मनके खिलाफ नामजद मामला दरज करे रिहीस।
बतादन कि काली पामगढ़ थाना क्षेत्र के सेमरिया गांव म सराब तस्कर मन ल पकड़े बर गे पुलिस टीम उपर कुछ मनखे मन लाठी-डंडा ले हमला कर दे रिहीन, जेमा पामगढ़ थाना प्रभारी अउ ए.एस.आई. घायल होगे रिहीन।
देवउठनी एकादशी
जेठउनी एकादशी के परब आज राजधानी रईपुर समेत प्रदेसभर म श्रद्धा अउ उछाह के संग मनाय जावत हे। एला छोटे दीवाली के रूप म घलो जाने जाथे। ए मउका म घर मन म तुलसी अउ भगवान शालीग्राम के प्रतीकात्मक बिहाव रचाय जाथे। ए बिहाव बर घर-घर म गन्ना के मंडप बनाय गेहे। घर मन ल दीया, रंगोली अउ आकर्षक रोसनी ले सजाय गेहे। अइसे माने जाथे कि आजे के दिन भगवान विष्णु लंबा नींद ल जागथे अउ एखरे संग बिहाव जइसे मंगल आयोजन मन बर सुभ मूहूर्त सुरू हो जाथे।
अउ अब थोरकुन समाचार सार म –
– केन्द्रीय शिक्षा मंत्रालय ह राष्ट्रीय मेधावी छात्रवृत्ति योजना के आवेदन के आखिरी तारीख पन्द्रह नवंबर तक बढ़ा देहे। मंत्रालय ह किहीन कि जेन विद्यार्थी मनके माता-पिता के वार्षिक आय तीन लाख पचास हजार रूपिया ले कम हे, ओमन बारह हजार रूपिया वार्षिक छात्रवृत्ति पाय के पात्र हरय।
– राज्य सासन ह मंत्रालय संवर्ग के सहायक ग्रेड-एक, दू अउ तीन के नाम बदल के सहायक अनुभाग अधिकारी, वरिष्ठ सचिवालय सहायक अउ कनिष्ठ सचिवालय सहायक कर देहे। ए संबंध म सामान्य प्रशासन विभाग ह आदेस जारी कर देहे।
– एंटी करप्शन ब्यूरो के टीम ह गरियाबंद जनपद पंचायत के सीईओ ल बीस हजार रूपिया के रिश्वत लेवत रंगेहाथ पकड़े हे। सीईओ उपर बोर खनन के राशि के बदला बीस हजार रूपिया रिश्वत मांगे जाय के सिकायत मिले के बाद ए कार्रवाई करे गीस।
अउ
– रायगढ़ जिला म पाछु रतिहा एक निजी प्लांट म कन्वेयर बेल्ट म फंसे के सेती एक ऑपरेटर के मउत होगे।