प्रधानमंत्री केंद्रीय सतर्कता आयोग
प्रधानमंत्री नरेंद्र मोदी ह कीहिन हे कि भ्रष्टाचार के खिलाफ अब आखरी लड़ई के बेरा आगे हे। ओमन कीहिन कि भ्रष्टाचार ह एक ठिन बड़का बुराई हरय अउ देश ल एखर ले दूरिहा रेहे बर पड़ही। प्रधानमंत्री ह नई दिल्ली म केंद्रीय सतर्कता आयोग के जागरूकता सप्ताह कार्यक्रम ल संबोधित करत कीहिन कि भ्रष्टाचार के खिलाफ एनडीए सरकार जइसन जम्मों सरकारी विभाग मन ल इच्छा शक्ति दिखाय बर पड़ही।
श्री मोदी ह कीहिन कि एखर बर तीन तरीका अपनाय गेहे। जेमा उन्नत प्रौद्योगिकी, बुनियादी सेवा ल बने ढंग ले रखना अउ आत्मनिर्भरता कोति आगू बढ़ना शामिल हे। ए मउका म प्रधानमंत्री ह केंद्रीय सतर्कता आयोग के नवा शिकायत निवारण पोर्टल के शुभारंभ घलो करीन।
आदिवासी नृत्य महोत्सव राज्योत्सव
राजधानी रायपुर के साइंस कॉलेज मैदान म चलत तीन दिन के राष्ट्रीय आदिवासी नृत्य महोत्सव अउ राज्योत्सव आज सिरा जाही । समापन समारोह म झारखण्ड के मुख्यमंत्री हेमंत सोरेन मुख्य अतिथि के रूप म सामिल होही । त उंहे मुख्यमंत्री भूपेश बघेल ह कार्यक्रम के अध्यक्षता करही ।
आदिवासी नृत्य महोत्सव के तीसर दिन आज भिलाई ले आये लोक रागिनी के टीम ह छत्तीसगढ़ म जाने जाए सुवा नृत्य, रिलो नृत्य, राउत नाचा के प्रस्तुती लोकगीत के माध्यम ले दीन। ओमन मोर मयारू माटी, छत्तीसगढ़ के तोर पैय्या लागंू गीत उपर सुघ्घर प्रस्तुती दीन।
त उंहे बस्तर ले आये लोक कलाकार मन मारिया अउ गौर नृत्य के प्रस्तुती दीन। शिकार के वर्णन करत माड़िया नृत्य ह बस्तर अंचल के बड़का पहिचान हरय। एमा अविवाहित माड़िया युवक युवती मन ह ए नृत्य म भाग लेथे। आदिवासी नृत्य महोत्सव अउ राज्योत्सव के आखरी दिन हरियाणा के लोक कलाकार मन डहार ले प्रस्तुत घूमर नृत्य ल घलो देखइया मन कोति ले वाहवाही मिलिस। त उंहे मध्यप्रदेश के कलाकार मन ह कर्मा अउ सैताम नृत्य के सुघ्घर प्रस्तुती दीन।
मुख्यमंत्री प्रकोष्ठ गठन
मुख्यमंत्री ह प्रदेश के सरकारी विभाग मन म रोस्टर के पालन के बारे म जांच बर प्रकोष्ठ गठित बनाय के निर्देश दे हवय।
जानबा के मुताबिक राष्ट्रीय गोंडवाना महासभा डहार ले अनुसूचित जनजाति के हित म मुख्यमंत्री ल ए प्रस्ताव देगे रीहिस। ए प्रस्ताव म सहकारिता विभााग ह अनुसूचित जनजाति समुदाय के लोगन मन ल अधिनियम के मुताबिक प्रतिनिधित्व दे अउ संविधान के अनुच्छेद के तहत आने आने सेवा, पदोन्नति शिक्षण संस्थान मन म प्रवेश के मउका देवाय के मांग करे रीहिन। मुख्यमंत्री ह इंखर मनके मांग उपर तुरते प्रकोष्ठ गठन के अनुमति दे देहे।
धान खरीदी
प्रदेस म एक नवंबर ले धान बिसाय के काम सुरू होगे हे। अब तक किसान मन ले समर्थन मूल्य म चौदह हजार एक सौ अंठावन मीटरिक टन धान बिसाय जा चुके हे। खाद्य विभाग के अधिकारी मन बतईन कि किसान मन ल धान बेचे म कोनों परकार के दिक्कत झन आवय, एखर बर खरीदी केन्द्र म जरूरी तैयारी करे गेहे। एसो करीबन एक सौ दस लाख मीटरिक टन धान बिसाय के लक्ष्य राखे गेहे। धान बेचे बर एसो राज्य म पच्चीस लाख तिरानवे हजार किसान मनके एकीकृत किसान पोर्टल म पंजीयन करे गेहे।
एमा ले करीबन दू लाख तीन हजार नवा किसान सामिल हे। धान खरीदी बर प्रदेस म दू हजार चार सौ संतानवे खरीदी केन्द्र बनाय गेहे। राज्य म अवैध धान के आवक ल रोके बर नोडल अधिकारी तैनात करे गेहे अउ जघा-जघा चेकपोस्ट घलो बनाय गेहे, जिहां अधिकारी मन ह जांच करत हवय।
एति दुर्ग जिला के पाटन विकासखंड के सेवा सहकारी समिति सोरम के धान खरीदी केंद्र के गोदाम म आज बीहनिया आगी लाग गे। आगी लगे ले गोदाम म रखे बोरा मन जलगे। करीबन चार घंटा के बाद आगी ल बुझाय जा सकीस। आगी लगे के कारण शार्ट सर्किट बताए जात हे।
केशकाल घाट वाहन प्रतिबंध
कोंडागंाव जिला म केशकाल घाटी के राष्ट्रीय राजमार्ग तीस म रद्दा मन ल ठीकठाक करे के काम चलत हे। जेखर सेती काली ले दस नवंबर तक ए रद्दा म बड़का गाड़ी मनके अवई जवई उपर रोक लगाय गेहे। उंहे छोटे गाड़ी अउ यात्री बस मनके अवई जवई होवत रीही। लोगन मन ल होवइया परसानी ल देखत जिला प्रशासन ह बड़का गाड़ी मनके अवई जवई ल केशकाल विश्रामपुरी चौक ले विश्रामपुरी-बोरई-नगरी होके धमतरी रद्दा कोति गाड़ी चलाये के बात केहे हे।
जांजगीर पुलिस हमला
जांजगीर चंापा जिला म पामगढ़ थाना क्षेत्र के भैंसो सेमरिया गांव म वारंटी आरोपी अउ शराब तस्कर मन ल पकड़े बर गे पुलिस के टीम उपर आरोपी मन ह हमला कर दीन। हमला म टीआई ओपी कुर्रे अउ एएसआई शिवचंद्रा ल गंभीर चोट आय हे। दूनो पुलिस अधिकारी मन ल बिलासपुर अस्पताल म भर्ती कराय गेहे अउ आरोपी मन ल खोजे के काम करे जात हे।
पुलिस के मुताबिक एक झिन महिला आरोपी ल गिरप्तार करे के बाद लावत बेरा पुलिस के टीम उपर आरोपी मन ह हमला कर दीन। पुलिस ह सात झिन आरोपी मनके खिलाफ मामला दर्ज करे हे। जेमा ले दू झिन माइलोगिन घला सामिल हे। जिला के पुलिस अधीक्षक विजय अग्रवाल ह बताइन कि ए मामला म सामिल आरोपी मनके खिलाफ कड़ा कार्रवाई करे जाही।
एनटीपीसी हादसा
बिलासपुर के सीपत स्थित एनटीपीसी के मल्चिंग मशीन स्टोरेज टैंक म विस्फोट होगे। ए घटना म एनटीपीसी के जूनियर टेक्निशियन के मउत होगे हे। घटना के बाद इंहा के कर्मचारी लोगन मन अउ भारतीय जनता युवा मोर्चा के कार्यकर्ता मन ह मुआवजा के मंाग करीन।
क्रीडा प्रतियोगिता
रायगढ़ जिला म काली ले बाइसवंा राज्य स्तरीय शालेय क्रीडा प्रतियोगिता शुरू होगे। ए खेल के शुभारंभ विधायक लालजीत सिंह राठिया ह करीन। तीन दिन तक चलइया ये प्रतियोगिता म सॉफ्ट बॉल, टेनीक्वाईड अउ सायकिलिंग समेत आने खेल के मुकाबला होही। ए प्रतियोगिता म पांच जोन मनके खिलाड़ी भाग लेवत हे। प्रतियोगिता रायगढ़ के बोइर दादर स्टेडियम म होवत हे।
लक्षमण मस्तूरिया पुण्यतिथि
छत्तीसगढ़ के जाने माने जनकवि अउ गीतकार स्वर्गीय लक्षमण मस्तूरिया के पुण्यतिथि म मुख्यमंत्री ह ओमन ल श्रद्धंाजलि दे हवय। ए मउका म मुख्यमंत्री ह राज्य अलंकरण श्रेणी म लोकगीत के क्षेत्र म लक्षमण मस्तूरिया पुरस्कार देके घोषणा करे हे। मुख्यमंत्री ह कीहिन कि श्री मस्तूरिया ह अपन गीत अउ सुघ्घर आवाज ले छत्तीसगढ़ के जम्मों वर्ग म अपन जगा बनाय हे। ओमन कतकोन छत्तीसगढ़ी फिल्म बर गीत के रचना करे के संगेसंग लोकसुर नाव के मासिक पत्रिका के घलो संपादन अउ प्रकाशन करीन।
अउ अब थोरकुन समाचार सार म –
– मुख्यमंत्री भूपेश बघेल ह जाने माने साहित्यकार, भाषाविद् अउ छत्तीसगढ़ राज्यगीत के रचयिता डॅाक्टर नरेंद्र देव वर्मा ल उंखर जयंती म नमन करे हे।
– प्रदेश के जाने माने पत्रकार रमेश नैयर के अंतिम संस्कार रायपुर के बुढ़ा तालाब मारवाड़ी शमशान घाट म काली बीहनिया दस बजे करे जाही। श्री नैयर के काली निधन होगे रीहिस।
– मुख्यमंत्री ह प्रदेश के लोगन मन ल काली मनाये जाय देवउठनी एकादशी माने जेठौनी तिहार के बधाई अउ शुभकामना दे हवय।
– दुर्ग कमिश्नर ह आज जिला अस्पताल के हुरहा निरीक्षण करके डॅाक्टर मनके उपस्थिति के बारे म जानबा लीन, ए दउरान अड़तीस झिन डॅाक्टर मनके संगेसंग कर्मचारी मन ह गैरहाजिर रीहिन, जेमन ल कारण बताओ नोटिस दे गेहे।
– सक्ति जिला के पिरदा गांव म रामनामी मेला के आयोजन करे गेहे।
– जांजगीर चंापा जिला के पतोरा गांव म पांच दिन पहिली होय सड़क दुर्घटना म एसईसीएल कर्मी के मौत के मामला म पुलिस ह आरोपी चालक ल गिरप्तार कर लेहे।
अउ
– दुर्ग पुलिस ह अपहरण अउ हत्या के मामला म छै झिन आरोपी मन ल गिरप्तार करे हे। पुलिस के मुताबिक ए आरोपी मन ह पाछू सात अक्टूबर के एक झिन युवक के अपहरण करके हत्या कर दे रीहिन।