राज्य अलंकरण
छत्तीसगढ़ राज्य स्थापना म हर बछर होवइया राज्योत्सव काली ले शुरू होगे। राजधानी रायपुर के साइंस कालेज मैदान म चलत तीन दिवसीय राज्योत्सव म काली संझा राज्य अलंकरण समारोह राखे गीस । एमा राज्यपाल ह तैंतीस ठिन आने आने विधा म बने काम करइया इकतालिस विभूति मन ल राज्य अलंकरण ले सम्मानित करे गीस। वोमन राज्य अलंकरण पुरस्कार मिलइया विभूति मन ल बधाई देवत कीहिन कि ये इनाम ले मेहनत करया मनके मान बाढ़थे। संगेसंग समाज के नवा पीढ़ि ल बने काम करे के प्रेरणा मिलथे। समारोह म बोलत राज्यपाल ह कीहिन कि ये छत्तीसगढ़िया होय के गौरव उत्सव हे। वोमन राज्य निर्माण के सपना देखइया अउ ओखर बर मेहनत करइया पुरखा अउ जम्मों महापुरूष मन ल सुरता करीन। राज्योत्सव के संगेसंग राखे गे राष्ट्रीय आदिवासी नृत्य महोत्सव ल प्रदेश बर गौरव के पल बतात राज्यपाल ह कीहिन कि ये प्रदेश के जनजाति संस्कृति ल एक नवा पहिचान देके प्रयास हे। वोमन प्रदेश के जम्मों झन ले अपील करीन कि राज्य के विकास बर जादा ले जादा योगदान करय।
ये बेरा म मुख्यमंत्री भूपेश बघेल ह कीहिन कि राष्ट्रीय आदिवासी नृत्य महोत्सव ले वसुधैव कुटुंबकम के सपना पूरा होवत हे। राज्य अलंकरण पुरस्कार पवइया विभूति मन ल बधाई देत कीहिन कि उंखर योगदान ले प्रदेश के गौरव बाढ़े हे। श्री बघेल ह जम्मों जिला मुख्यालय मन म छत्तीसगढ़ महतारी के प्रतिमा स्थापित करे के घोषणा करीन। उंहे राज्य सरकार के आने आने कल्याणकारी योजना के संबंध म गोठबात करत कीहिन कि कृषि, शिक्षा, स्वास्थ्य अउ रोजगार समेत कतकोन क्षेत्र म प्रदेश के हर वर्ग ल फायदा पहुंचाय बर सरलग प्रयास करे जात हे। ओमन धान खरीदी अउ लघुवनोपज बिसाय के संग गौठान ले गांव के अर्थव्यवस्था ल मजबूत बनाय के बात कीहिन । समारोह म राज्य मंत्रिमंडल के सबो सदस्य, नेता प्रतिपक्ष, सांसद अउ विधायक मौजूद रीहिन।
भाजपा गौरव दिवस
राज्य के मुख्य विपक्षी दल भाजपा कोति ले राज्य स्थापना दिवस ल गौरव दिवस के रूप म मनाये जात हे। एमा प्रदेश के आने आने जिला म भाजपा कार्यकर्ता अउ पदाधिकारी मन ह कतकोन कार्यक्रम करीन। एमा काली मुंगेली के जिला भाजपा कार्यालय म राखे गे कार्यक्रम म पार्टी कार्यकर्ता अउ पदाधिकारी मन ह पूर्व प्रधानमंत्री अटल बिहारी बाजपेयी ल सुरता करत चित्र म फूलमाला चढ़ाईन ।
ये बेरा म बड़का भाजपा नेता पुन्नूलाल मोहिले ह कीहिन कि पूर्व प्रधानमंत्री अटल बिहारी बाजपेयी ह छत्तीसगढ़ समेत तीन ठन राज्य निर्माण म महत्ता के भूमिका निभाय रीहिन। उंहं राजनांदगांव म घलो जिला भाजपा कोति ले पार्टी कार्यकर्ता मन ह छत्तीसगढ़ राज्य निर्माण बर पूर्व प्रधानमंत्री अटल बिहारी बाजपेयी बर आभार जतात फूलमाला चढ़ाइन। ये बेरा म पूर्व सांसद मधुसूदन यादव समेत आने कतकोन नेता अउ कार्यकर्ता मन ह उंखर योगदान ल सुरता करीन।
आदिवासी नृत्य
राज्य स्थापना दिवस म राज्योत्सव के संगेसंग राजधानी म राष्ट्रीय आदिवासी नृत्य महोत्सव होवत हे। एमा देश के आने आने राज्य के आदिवासी कलाकार मन संग विदेश ले आदिवासी कलाकार अपन सुघ्घर नृत्य देखावत हे। इंहा देश अउ प्रदेश के संस्कृति के झलक हवय। एमा आज दूसर दिन सिक्किम के आदिवासी कलाकार मन ह तमांग शेलो नृत्य देखाइन। ये सिक्किम म नवा बछर के बेरा विशेष रूप ले करे जाथे। एमा बौद्ध धरम के अध्यात्मिक परंपरा के झलक घलो दिखाइ देथे।
आज के आने प्रस्तुति म तेलंगाना के कलाकार मन ह लंबाडी नृत्य प्रस्तुत करीन। ये नृत्य बने फसल के मनौती के संग भगवान के आगू करे जाथे । उंहे झारखंड के आदिवासी कलाकार मन ह संथाली नृत्य जउन देवी आराधना के संगेसंग प्रकृति ल बने फसल बर आभार जताय खातिर ये नृत्य करे जाथे । एखर पहिली काली न्यूजीलैण्ड अउ मिश्र के कलाकार मन ह अपन पारंपरिक वेशभूषा ले देखइया मनके मन मोह लीन। ये महोत्सव के आखरी दिन काली देश के आने राज्य के संगेसंग आये विदेशी कलाकार मन ह पारंपरिक आदिवासी नृत्य प्रस्तुत करहीं।
आयुष्मान योजना पैकेज
केंद्र सरकार के आयुष्मान भारत प्रधानमंत्री जन आरोग्य योजना अउ राज्य सरकार के डॅाक्टर खूबचंद बघेल स्वास्थ्य सहायता योजना म अब किडनी ट्रंासप्लांट अउ ब्रेन एंजियोग्राफी घलो हो सकही।
एखर संगेसंग योजना म हृदय रोग अउ रीढ़ के ऑपरेशन के संग ये बीमारी म काम अवइया दवई ल सामिल करे गेहे। योजना म पंजीयन वाले अस्पताल म इलाज बर सामान्य बिस्तर अउ आईसीयू बिस्तर बर भुगतान के दर म बढ़वार करे गेहे। एखर ले मरीज मन ल आने आने बीमारी के इलाज बर अपन पइसा खरच नइ करे बर पड़य।
ये बीमारी के मरीज मन रायपुर के डीकेएस सुपर स्पेशलिटि अस्पताल या फेर एम्स म इलाज के सुविधा देवाय गेहे। स्वास्थ्य विभाग अउ राष्ट्रीय स्वास्थ्य मिशन मिलके लोगन ल ये सुविधा देवाहीं।
खबर के मुताबिक प्रदेश के स्वास्थ्य विभाग ह गंभीर बीमारी के इलाज के दर म फेरबदल करे अउ नवा पैकेज ल सामिल करे बर राष्ट्रीय स्वास्थ्य एजेंसी ल प्रस्ताव भेजे रीहिस, जेमा करीबन आठ सौ पैकेज के दर म फेरबदल करे गेहे। जेखर ले मरीज मन ल अस्पताल म इलाज के बेरा खुद के पइसा खरच के जरूरत नइ पड़ही।
गन्ना बोनस
राज्य सरकार ह प्रदेश के गन्ना किसान मन ल बोनस देके संबंध म संशोधित आदेश जारी कर देहे । ये आदेश के मुताबिक पाछू बछर राज्य के सहकारी शक्कर कारखाना ल कुसियार बेचइया किसान मन ल चौरासी रूपिया पच्चीस पइसा कुंटल के दर ले प्रोत्साहन रकम दे जाही । पाछू सतरा अक्टूबर के मुख्यमंत्री भूपेश बघेल के अगवई म होय मंत्रिपरिषद के बइठका म ये संबंध म फैसला लेगे रीहिस। एमा प्रदेशभर के कुसियार लगइया किसान मन ल करीबन बारा करोड़ रूपिया के भुगतान करे जाही।
समीर बिश्नोई निलंबित
राज्य सरकार ह पाछू दिन मनी लाण्ड्रिंग के मामला म गिरप्तार करे गे आईएएस अधिकारी समीर बिश्नोई ल निलंबित कर देहे। सामान्य प्रशासन विभाग कोति ले जारी प्रशासनिक अधिकारी मनके सूची म ये फैसला ल सामिल करत बताय गेहे। समीर बिश्नोई ल पाछू सत्ताईस अक्टूबर के निलंबित कर देगे रीहिस।
खबर के मुताबिक आईएएस अधिकारी समीर बिश्नोई के घर अउ आने ठिकाना म प्रर्वतन निदेशालय कोति ले करे गे छापा के कार्रवाई म करीबन सैंतालिस लाख रूपिया नकदी अउ कीमती जीनिस बरामद करे गे रीहिस। प्रर्वतन निदेशालय कोति ले दू घांव रिमंाड म ले जाय के बाद वोमन ल सत्ताईस अक्टूबर के जेल भेजे गे रीहिस।
रमेश नैय्यर निधन
प्रदेश के जाने माने पत्रकार रमेश नैय्यर के आज संझा रायपुर म निधन होगे। श्री नैय्र प्रदेश के संग देश के जाने माने पत्रकार माने जाथे। अपन साठ बछर ले जादा के पत्रकारिता के सफर म चंडीगढ़ के ट्रिब्यून, दिल्ली के संडे आब्जर्वर समेत प्रदेश के कतकोन अखबार के संपादक रीहिन। पत्रकारिता म उंखर योगदान खातिर देश अउ प्रदेश म कतकोन सम्मान मिले हे। मुख्यमंत्री भूपेश बघेल ह वरिष्ठ पत्रकार रमेश नैय्र के निधन म शोक जताइन हे।
अग्निवीर भर्ती
प्रदेश म अवइया एक दिसंबर ले होवइया अग्निवीर भर्ती के तियारी शुरू कर दे गेहे। एमा दुर्ग के पंडित रविशंकर शुक्ल स्टेडियम म भर्ती रैली बर जिला प्रशासन कोति ले जरूरी बेवस्था कर जात हे। रैली म सामिल होवइया अभ्यर्थी मनके प्रवेश पत्र वेबसाइट म अपलोड करे गेहे।
खबर के मुताबिक दुर्ग म अग्निवीर भर्ती रैली एक ले तेरा दिसंबर तक होही। भर्ती रैली सिराय के चोबीस घंटा बादे नतीजा जारी कर दे जाही।
शालेय क्रीड़ा प्रतियोगिता
राज्य स्तरीय शालेय खेल प्रतियोगिता आजले रायगढ़ जिला के बोइरदादर म शुरू होगे हे। प्रतियोगिता म सॉफ्ट बॉल, टेनीक्वाईट अउ सायकिलिंग समेत आने खेल के मुकाबला होही। प्रदेश के खेलमंत्री उमेश पटेल ह ये प्रतियोगिता के शुभारंभ करीन। उंहे धरमजयगढ़ के विधायक लालजीत सिंह राठिया ह कार्यक्रम के अगवई करीन।