प्रधानमंत्री चिंतन-शिविर
प्रधानमंत्री नरेन्द्र मोदी ह किहीन हे कि पंच प्रण मन ल सुशासन के रद्दा देखवइया होना चाही। हरियाण के सूरजकुंड म राज्य के गृह मंत्री मनके दू दिन दिन के चिंतन सिविर ल संबोधित करत ओमन किहीन कि अमृत काल म भारत के विकास के सपना ल पूरा करे म पंच प्रण के भूमिका ह जरूरी होही।
प्रधानमंत्री ह किहीन कि देस ल मजबूत करे ले देस के जम्मों नागरिक ह मजबूत होही। ए बेरा अंतर्राज्यीय अउ अंतर्राष्ट्रीय अपराध के घटना घलो बाढ़त हे, जेखर बर केन्द्र अउ राज्य के एजेंसी मनके भूमिका ह जरूरी हो जथे। प्रधानमंत्री ह किहीन कि चाहे साइबर अपराध होय या फेर मादक पदार्थ के तस्करी बर ड्रोन तकनीक के प्रयोग, सरकार ह एखर ले निपटे बर नवा तकनीक लाय के दिसा म काम करत हे।
फर्जी समाचार मनके जिकर करत प्रधानमंत्री ह किहीन कि एखर प्रमाणिकता के जांच करना जरूरी हे। प्रधानमंत्री ह जम्मों राज्य के पुलिस मन बर एक जइसन वर्दी लाय उपर विचार करे के सुझाव दीन। ओमन किहीन कि एखर ले कानून प्रवर्तन एजेंसी मन ल एक जइसन पहिचान मिलही।
प्रधानमंत्री ह किहीन कि नक्सलवाद के हर रूप चाहे ओ बंदूक वाला होय या फेर कलम वाला, देस के युवा मन ल घुमराह करे ले रोके बर एला जड़ ले खतम करना होही। प्रधानमंत्री ह किहीन कि पाछु आठ बछर म देस म नक्सल प्रभावित जिला मनके संख्या म कमी आय हे अउ जम्मू कश्मीर के संगेसंग पूर्वोत्तर राज्य मन म घलो सांति फइलत हे।
राज्योत्सव/आदिवासी नृत्य महोत्सव
छत्तीसगढ़ के तेईसवां स्थापना दिवस एक नवंबर के मनाय जाही, जेखर तियारी जोरदरहा चलत हे। ए मउका म रईपुर के साईंस कॉलेज मैदान म एक ले तीन नवंबर तक राज्योत्सव अउ राष्ट्रीय आदिवासी नृत्य महोत्सव के कारीकरम चलही। ए नवंबर के बिहनिया आदिवासी नृत्य महोत्सव के सुभारंभ होही अउ इही दिन संझाकुन राज्य अलंकरण दे जाही। मुख्यमंत्री ह काली साईंस कॉलेज मैदान म जाके तियारी के जायजा लीन अउ अधिकारी मन ल जरूरी दिसा-निरदेस दीन।
जानबा के मुताबिक राष्ट्रीय आदिवासी नृत्य महोत्सव म भारत के चौदह सौ कलाकार के संगेसंग मोजांबिक, मंगोलिया, टोंगो, रशिया, इंडोनेशिया, मालदीव, सर्बिया, न्यूजीलैंड अउ इजिप्ट के सौ जनजातीय कलाकार मन भाग लीहीं। ए दउरान दू श्रेणी म प्रतियोगिता होही। विजेता मन ल बीस लाख रूपिया के पुरस्कार दे जाही। महोत्सव के माध्यम ले राष्ट्रीय-अंतर्राष्ट्रीय स्तर म जनजातीय कलाकार मनके कला के घलो परख होही। महोत्सव म संगोष्ठी के घलो आयोजन राखे गेहे।
धान खरीदी
प्रदेस म पंजीकृत किसान मन ले समर्थन मूल्य म धान बिसाय के काम एक नवंबर ले करे जाही। मुख्य सचिव अमिताभ जैन ह काली वीडियो कान्फ्रेसिंग के माध्यम ले धान खरीदी के संगेसंग राज्य सासन के जरूरी योजना मनके समीक्षा करीन। एमा संभागा आयुक्त, कलेक्टर अउ आने-आने विभाग के अधिकारी मन सामिल होईन। बइठका म मुख्य सचिव ह धान खरीदी अउ कस्टममिलिंग, समिति मन ले धान उठाय के व्यवस्था के संगेसंग एसो के खरीफ सीजन म धान खरीदी के बारे म अवइया सिकायत मनके निपटारा के बारे म समीक्षा करीन।
बइठका म मुख्य सचिव ह नगरीय निकाय मन म लीगेसी वेस्ट के निराकरण के कार्ययोजना म तेजी लाय के समीक्षा करीन। मुख्य सचिव ह ऑनलाइन नामांतरण योजना के समीक्षा करत राजस्व विभाग के अधिकारी मन ले किहीन कि जमीन के रजिस्ट्री होतेच नामांतरण के ऑनलाइन व्यवस्था सुरू करे जाय, जेखर बर ओमन अधिकारी-कर्मचारी मन ल प्रसिक्षण देवाय के बात किहीन।
सेल डायरेक्टर-बीएसपी
स्टील अथॉरिटी ऑफ इंडिया लिमिटेड-सेल के डायरेक्टर ए.क.े सिंह ह काली भिलाई इस्पात संयंत्र पहुंचीन। ए दउरान ओमन संयंत्र के प्रभारी निदेशक अनिर्बान दासगुप्ता अउ सेल के अधिकारी मनके बइठका लेके संगेसंग संयंत्र म आने-आने परियोजना मनके निरीक्षण करीन, जेखर बाद ओमन भिलाई के मोडेक्स इकाई म बनत इस्पात के काम ल घलो देखीन। श्री सिंह ह कोक ओवन, ओर हैडलिंग प्लांट, सिंटरिंग प्लांट्स अउ ब्लास्ट फर्नेस के घलो निरीक्षण करीन।
प्रदेश कार्यकारिणी-बैठक
कांग्रेस के प्रदेस कार्यकारिणी के बइठका इकतीस अक्टूबर के राजीव भवन म राखे गेहे। बइठका म अखिल भारतीय कांग्रेस कमेटी के प्रदेस प्रभारी पी.एल. पुनिया, मुख्यमंत्री भूपेश बघेल, प्रदेश कांग्रेस अध्यक्ष मोहन मरकाम, प्रभारी सचिव डॉक्टर चंदन यादव के संगेसंग जिला, शहर कांग्रेस कमेटी के अध्यक्ष अउ प्रदेस कांग्रेस मोर्चा संगठन के संगेसंग आने-आने प्रकोष्ठ के प्रदेस अध्यक्ष म सामिल होही।
सड़क पर जन्मदिन-कार्रवाई
रद्दा म केक काटके जन्मदिन मनइया मन उपर पुलिस ह अब कठोर कार्रवाई करही। उहें, तलवार अउ चाकू ले केक काटके वीडियो वायरल करइया मनके खिलाफ घलो आर्म्स एक्ट के तहत कार्रवाई करे जाही। बिलासपुर के पुलिस महानिरीक्षक रतनलाल डांगी ह अइसन सरारती लोगन मनके खिलाफ कठोर कार्रवाई करे के निरदेस दे हवय। ओमन रेंज के जम्मों पुलिस अधीक्षक मन ल सोशल मीडिया म बंदूक, पिस्टल, तलवार अउ चाकू के संग केक काटत वीडियो वायरल करइया मनके खिलाफ आर्म्स एक्ट के संगेसंग आने धारा के तहत केस दरज करके जेल भेजे के आदेस दे गेहे।
हाथी-रेस्क्यू
धमतरी जिला के दुगली वन परिक्षेत्र के गांव चारगांव म खेत म बनाय गे कुंआ म तीन ठिन हाथी मन गिर गे, जेमन ल सुरक्षित बाहिर निकाल ले गेहे।
हमर संवाददाता ले मिले जानबा के मुताबिक काली रतिहा तीन ठिन हाथी मनके कुंआ म गिरे के सूचना मिले के बाद वनमंडला अधिकारी के संगेसंग करमचारी मन मउका म पहुंचीन, जेखर बाद पूरा व्यवस्था करके आज बिहनिया कुंआ म गिरे हाथी मन ल निकाल ले गीस। तीनों हाथी मन ल जंगल म छोड़े गेहे।
छठ पर्व
देस म चार दिन तक चलइया छठ पूजा आज ले सुरू होगे। ए तिहार म पूजापाठ करइया मन ह सूर्य भगवान के बिसेस पूजापाठ करथे। आज नहाय-खाय मनाय जात हे। काली खरना हे, जेमा पूरा दिनभर उपास राखे जाही अउ संझाकुन सूर्यास्त के बाद प्रसाद लेके अवइया छत्तीस घंटा तक निर्जला उपवास रइही। छठ पूजा के तीसर दिन नंदियां या तरिया म जाके डूबत सूरज ल अर्ध्य दीहीं अउ ओखर बाद सोमवार के उगत सूरज ल अर्ध्य देके संगेसंग छठ पूजा सिराही।
प्रदेस म घलो छठ परब ल लेके लोगन मन म उछाह बने हे। नंदिया अउ तरिया मन ल बिसेस ढंग ले साफ-सफाई करके सजाय गेहे।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय उपर आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ आदिवासी लोक कला अकादमी डहार ले करे जात कामकाज उपर केन्द्रित रइही। ए गोठबात म अकादमी के अध्यक्ष नवल शुक्ल ले होय भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली उनतीस अक्टूबर के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र रिले करही।
अउ अब थोरकुन समाचार सार म –
– मुख्यमंत्री भूपेश बघेल ह आज कांकेर जिला के नथिया नवागांव जाके छत्तीसगढ़ विधानसभा के उपाध्यक्ष स्वर्गीय मनोज सिंह मंडावी के सांतिभोज कारीकरम म सामिल होके ओमन ल श्रद्धांजलि दीन।
– कबीरधाम जिला म बैगा जनजाति के अस्सी झिन शिक्षित युवा मन ल शिक्षा, राजस्व, सहायक शिक्षक, पशुपालन विभाग म परिचारक अउ भृत्य के पद म नियुक्त दे गेहे। जिला कार्यालय म वन मंत्री मोहम्मद अकबर ह एमन ल नियुक्ति प्रमाण पत्र दीन।
– बिलासपुर रेलमंडल ह अपन क्षेत्र के गाड़ी मन म ई-केटरिंग सुविधा म वेंडर्स के संख्या ल बढ़ाय के फइसला लेहे। ए बेरा बिलासपुर मंडल म तीस ठिन ई-केटरिंग वेंडर्स मन ह आने-आने गाड़ी मन म खाय-पीये के सुविधा देवत हे।
– रईपुर के सड्डू स्थित शासकीय औद्योगिक प्रशिक्षण संस्था म आज ले दू दिन के अप्रेंटिसशिप मेला राखे गेहे। एमा फीटर, मोटर मेकनिक, डीजल मेकनिक, वेल्डर, इलेक्ट्रॉनिक्स के आई.टी.आई. पास प्रशिक्षाणार्थी मन भाग ले सकथे।
– जांजगीर-चांपा जिला के पंतोरा गांव म पेट्रोल टेंकर के चपेट म आय ले फटफटी म बइठे एक झिन मनखे के मउत होगे। घटना ले गुस्साय गांव के लोगन मन ह चक्काजाम कर दे रिहीन।
अउ
– बाईसवां राज्य स्तरीय शालेय क्रीडा प्रतियोगिता काली ले बिलासपुर के राजा रघुराज सिंह स्टेडियम म सुरू होईस। तीस अक्टूबर तक चलइया ए स्पर्धा म राज्य ले करीबन एक हजार छह सौ खिलाड़ी भाग लेवत हे।