प्रधानमंत्री चिंतन शिविर
राज्य मनके गृहमंत्री के दू दिन के चिंतन शिविर आज ले हरियाणा के सूरजकुंड म शुरू होवत हे। केंद्रीय गृहमंत्री अमित शाह एखर अध्यक्षता करत हे। प्रधानमंत्री नरेंद्र मोदी काली ये शिविर ल संबोधित करही। राज्य मनके गृहमंत्री अउ केंद्र शासित प्रदेश मनके उप राज्यपाल, अउ प्रशासक सम्मेलन म शामिल हे। राज्य मनके गृह सचिव, पुलिस संगठन अउ केंद्रीय सशस्त्र पुलिस बलके महानिदेशक मन घलो चिंतन शिविर म हिस्सा लेवत हे।
सम्मेलन के छै सत्र म पुलिस बलके आधुनिकीकरण, सायबर अपराध प्रबंधन, अपराधिक न्याय प्रणाली म सूचना प्रौद्योगिकी के बढ़त उपयोग, भूमि सीमा प्रबंधन, तटीय सुरक्षा, महिला सूचना अउ मादक पदार्थ मनके तस्करी जइसे मुद्दा मन उपर विचार विमर्श करे जाही।
जिला मुख्यालय मन म एक नवंबर ले एक दिवसीय कार्यक्रम के आयोजन के संबंध म सामान्य प्रशासन विभाग ह सबो जिला कलेक्टर मन ल निर्देश जारी कर देहे। निर्देश के अनुसार कार्यक्रम स्थल म अलग अलग विकास विभाग के विभागीय प्रदर्शनी के आयोजन करे के संगेसंग अलग अलग विभाग मनके विशेष उपलब्धि मनके प्रदर्शन करे जाही। संगेसंग कार्यक्रम स्थल म राज्य सरकार के विभिन्न विभाग मनके महत्वपूर्ण योजना अउ परियोजना मनके प्रदर्शन घलो करे जाही।
जिला स्तर म स्थानीय कलाकार मन डहार ले एक नवंबर के एक दिवसीय सांस्कृतिक कार्यक्रम के आयोजन करे जाही। जिला मुख्यालय के सबो शासकीय विभाग मन म एक नवंबर के रात के रोशनी घलो करे जाही।
उंहे छत्तीसगढ़ राज्य स्थापना दिवस के मउका म एक ले तीन नवंबर तक आदिवासी नृत्य महोत्सव के आयोजन घलो करे जात हे। रायपुर के साइंस कॉलेज मैदान म आयोजित होने वाला ये महोत्सव म भारत के चौदह सौ जनजाती कलाकार मनके अलावा नौ ठन देश मनके सौ झन जनजाति कलाकार मन घलो हिस्सा लीही। महोत्सव के दउरान दू वर्ग म प्रतियोगिता आयोजित करे जाही। विजेता मन ल कुल बीस लाख रूपिया के पुरस्कार दे जाही।
इही बीच राज्य सरकार ह राज्य स्थापना दिवस के अवसर म एक नवंबर के प्रदेश के सबो शासकीय कार्यालय अउ संस्थान मन म एक दिवसीय स्थानीय अवकाश घोषित करे हे।
प्रदेश म एक नवंबर ले समर्थन मूल्य उपर धान खरीदी शुरू होगे हे। एखर बर प्रदेश भर के धान खरीदी केंद्र मन म तैयारी लगभग पूरा कर ले गेहे। राज्य सरकार ह धान खरीदी बर आज ले दू दिवसीय पूर्वाभ्यास शुरू करे हे। एखर सफल होय के बाद धान खरीदी के प्रक्रिया निर्धारित तिथि ले करे जाही। पूर्वाभ्यास के तहत टोकन ले से लेके धान खरीदी समिति के व्यवस्था तक के आकलन करे जाही। राज्य म करीबन पच्चीस लाख किसान मन ह धान बेचे बर अपन पंजीयन कराय हे।
गौरतलब हे कि राज्य सरकार ह ए साल समर्थन मूल्य म एक सौ दस लाख टन धान खरीदी करे के लक्ष्य राखे हे। किसान मन धान बेचे बर अपन पंजीयन इकतीस अक्टूबर तक करा सकथे।
प्रवर्तन निदेशालय-ईडी डहार ले मनी लाड्रिंग मामला म हिरासत म लेगे आईएएस समीर बिश्नोई र् अउ दू झन आने आरोपी मन ल विशेष न्यायालय ह न्यायिक अभिरक्षा म जेल भेज देहे। मिले जानकारी के अनुसार ईडी ह रिमांड अवधि पूरा होय के बाद आज आईएएस समीर बिश्नोई, लक्ष्मीकांत तिवारी अउ सुनील अग्रवाल ल रायपुर के विशेष सत्र न्यायालय म पेश करे गीस। जिहां ले न्यायालय ह ए तीनो आरोपी मन ल जेल भेज देहे।
राज्यपाल अनुसुइया उइके ह कीहिन हे कि अधिकारी मनके प्रति जागरूकता, संस्कृति के संरक्षण अउ संवर्धन के संगेसंग युवा मनके क्षमता के सदुपयोग से ही आदिवासी समाज के उत्थान हो सकथे। अपन छिंदवाड़ा प्रवास के दउरान युवा जनजाति प्रतिभा सम्मान अउ सामाजिक मिलन समारोह ल संबोधित करत राज्यपाल ह कीहिन कि संविधान म आदिवासी समुदाय मन ल अनेक अधिकार दे गेहे, लोगन मन ल ये प्रावधान मनके जानकारी होना चाही ताकि ओमन अपन हित के रक्षा स्वयं कर सकय ।
ओमन कीहिन कि आदिवासी समाज ल आगू बढ़ाय बर शिक्षा उपर विशेष ध्यान देके आवश्कता देहे। राज्यपाल ह कीहिन कि आदिवासी समाज के बेहतरी बर शासकीय प्रयास के संगेसंग समाज के लोगन मनके घलो प्रत्यक्ष-अप्रत्यक्ष रूप से सहयोग के आवश्कता होही।
अखिल भारतीय कांग्रेस कमेटी के छत्तीसगढ़ प्रभारी पी.एल.पुनिया अपन प्रवास म आज रायपुर पहुंचीन। श्री पुनिया काली अठाईस अक्टूबर के जगदलपुर जाहीं, जिहां कांग्रेस पदाधिकारी अउ वरिष्ठ कांग्रेसजन मनके संग बइठका म सामिल होही। श्री पुनिया उनतीस अक्टूबर के जगदलपुर ले दंतेवाड़ा जाही। जिहां माता दंतेश्वरी के दर्शन के बाद कांग्रेस कार्यकर्ता मनके बइठका लीहीं। श्री पुनिया इकतीस अक्टूबर के रायपुर के राजीव भवन म प्रदेश कार्यकारिणी के बइठका म भाग लीही।
छत्तीसगढ़िया ओलंपिक
छत्तीसगढ़िया ओलंपिक के तीसरइया चरण आज ले शुरू होगे हे। विकासखंड स्तर म आयोजित तीसरइया चरण के ये प्रतियोगिता दस नवंबर तक चलही। एखर पहिली राजीव युवा मितान क्लब स्तर अउ जोन स्तर म प्रतियोगिता हो चुके हे।
गौरतलब हे कि छत्तीसगढ़ के पारंपरिक खेल मन ल बढ़ावा देबर, खिलाड़ी मन ल मंच प्रदान करे अउ खेल मनके प्रति जन जागरूकता लाये के उद्देश्य ले छत्तीसगढ़िया ओलंपिक खेल मनके आयोजन छै चरण म करे जात हे। छत्तीसगढ़िया ओलंपिक म गिल्ली-डण्डा, पिटठूल, संखली, लंगड़ी दौड़, कबड्डी, खो-खो, रस्साकशी, बांटी, बिल्लस, फुगड़ी, गेड़ी दौड़, भौंरा, लंबी कूद अउ सौ मीटर दौड़ जइसे खेल मन ल शामिल करे गेहे।
पांच दिन देवारी तिहार के कड़ी म आज भाईदूज के तिहार परंपरागत अउ उल्लास के संग मनाये जात हे। राजधानी रायपुर सहित प्रदेश के अलग अलग जिला मन म भाईदूज के मउका म बहिनी ह भाई के माथा म टीका लगाके उंखर उज्जवल भविष्य के कामना करीन।
ए मउका म भाई ह घलो बहिनी मन ल उपहार दीन। कार्तिक मास के शुक्ल पक्ष के द्वितीया म मनाये जाने वाला ए पर्व ल यम द्वितीया घलो कहिथे। भाई के प्रति बहिनी के मया ल अभिव्यक्त करने वाला ए तिहार ल लेके एक ठिन किवदंती घलो हवय। जेमा यम देवता अपन बहिनी के लंबा इंतजार के बाद ये दिन दर्शन दे रीहिस। तबले ये प्रथा चले आवत हे।
एति प्रदेश के अलग अलग जिला म मातर के तिहार घलो हर्षोल्लास के संग मनाये जावत हे। ए अवसर म कुछ जगा म कुश्ती के आकर्षक करतब दिखाये जाथे। उंहे ग्रामीण मन देवी-देवता मनके पूजा-अर्चना करके सुख समृद्धि के कामना करीन।
बतादन कि आज राउत समाज के लोगन मन दइहान म गाय मनके झुण्ड के बीच हैरत अंगेज करतब देखाथे अउ संझा मंड़ई मेला के आयोजन के मजा लेथे।