प्रधानमंत्री चिंतन-शिविर
प्रधानमंत्री नरेन्द्र मोदी सुकवार के वीडियो कान्फ्रेंसिंग ले राज्य के गृह मंत्री मनके चिंतन सिविर ल संबोधित करही। केन्द्रीय गृह अउ सहकारिता मंत्री अमित शाह काली ले हरियाणा के सूरजकुंड म सुरू होवइया दू दिन के चिंतन सिविर के अगुवई करही। चिंतन सिविर म केन्द्रसासित प्रदेस के उप राज्यपाल अउ प्रशासक भाग लीहीं। एखर संगेसंग राज्य के गृह सचिव अउ पुलिस महानिदेशक, केन्द्रीय सशस्त्र बल अउ केन्द्रीय पुलिस संगठन के महानिदेशक घलो ए सिविर म भाग लीहीं। एमा छह सत्र होही, जेमा आने-आने बिसय म गोठबात करे जाही। प्रधानमंत्री ह एसो स्वतंत्रता दिवस के संबोधन म पंच-प्रण के घोषणा करे रिहीन। ओखरे मुताबिक सिविर म विजन-दू हजार सैंतालीस अउ पंच-प्रण बर कार्ययोजना तियार करना हे। ए सिविर के उद्देश्य केन्द्र अउ राज्य स्तर म आने-आने पक्ष के बीच योजना ल बने असन चलाय अउ उंखर बीच तालमेल बने बनाना हे।
गौठान दिवस
प्रदेस म आज गोवर्धन पूजा के तिहार गौठान दिवस के रूप म मनाय जात हे। मुख्यमंत्री भूपेश बघेल ह अपन रईपुर निवास म आज बिहनिया अपन परिवार वाले मन संग गाय अउ बइला ल खिचड़ी खंवा के गोवर्धन पूजा करीन। संगेसंग गौरी-गौरा के पूजापाठ करके प्रदेसवासी मनके खुसहाली अउ समृद्धि के कामना करीन। ए बेरा म पारंपरिक लोक धुन के संग सुआ नचइया अउ राउत नाचा के दल मन अपन सुघ्घर प्रस्तुति दीन। मुख्यमंत्री ह पारंपरिक वेशभूषा म राउत नाचा दल के बीच म पहुंच के उंखर उछाह बड़ईन।
ए मउका म मुख्यमंत्री ह किहीन कि छत्तीसगढ़ म एक-दूसर के घर म दीया अमराय के परंपरा हवय, जउन लक्ष्मी पूजा ले सुरू होथे अउ गौरा-गौरी पूजा, गोवर्धन पूजा तक ए परंपरा के पालन करे जाथे। ओमन किहीन कि गोवंश के हित बर राज्य सरकार सरलग काम करत हे, जेखर फायदा पशुपालक मन ल मिलत हे।
उहें, महासमुंद जिला के आने-आने गौठान मन म आज गउ-माता के पूजापाठ करके खिचड़ी खंवाय गीस। ए मउका म महिला स्व-सहायता समूह, गौठान समिति के सदस्य, जनप्रतिनिध अउ गांव के लोगन मौजूद रिहीन।
दीपावली/गोवर्धन पूजा
राजधानी रईपुर समेत प्रदेसभर म आज गोवर्धन पूजा अउ अन्नकूट के तिहार उछाह के संग मनाय जात हे। आज के दिन गउ-माता के पूजापाठ करके खिचड़ी खंवाय जाथे अउ गोबर ले गोवर्धन पर्वत बनाके ओखर पूजा करके गउ-माता ल उपर ले रेंगाय जाथे।
राजधानी रईपुर के दूधाधारी मठ म घलो अन्नकूट अउ गोवर्धन पूजा के कारीकरम राखे गीस। प्रदेस के आने जिला मन म घलो गोवर्धन पूजा करे के समाचार मिले हे।
राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल गौरी-गौरा, गोवर्धन पूजा के बधाई अउ सुभकामना दीन हे।
छत्तीसगढ़िया ओलंपिक
छत्तीसगढ़िया ओलंपिक के तीसर चरण काली सत्ताईस अक्टूबर ले सुरू होही। विकासखंड स्तर म होवइया तीसर चरण के ए प्रतियोगिता दस नवंबर तक चलही। एखर पहिली, राजीव युवा मितान क्लब स्तर अउ जोन स्तर म प्रतियोगिता होगे हे।
खबर के मुताबिक छत्तीसगढ़ के पारंपरिक खेल मन ल बढ़ावा दे बर, खिलाड़ी मन ल मंच प्रदान करे अउ खेल कोति लोगन मन म जन-जागरूकता लाय बर छत्तीसगढ़िया ओलंपिक खेल के आयोजन छह चरण म करे जावत हे। छत्तीसगढ़िया ओलंपिक म गिल्ली डंडा, पिट्ठुल, संखली, लंगड़ी दउड़, कबड्डी, खो-खो, रस्साकसी, बांटी, बिल्लस, फुगड़ी, गेड़ी दउड़, भौंरा, लंबी कूद अउ सौ मीटर दउड़ सामिल करे गेहे।
राष्ट्रीय एकता दिवस
लौह पुरूष सरदार वल्लभ भाई पटेल के जयंती इकतीस अक्टूबर के राष्ट्रीय एकता दिवस के रूप म मनाय जाही। ए बेरा म प्रदेस म कतकोन कारीकरम होही, जेमा उनतीस ले इकतीस अक्टूबर तक दुरूग भिलई म अर्द्धसैनिक बल बी.एस.एफ. एस.एस.बी., सी.आई.एस.एफ., एन.सी.सी. अउ खेल मंत्रालय कोति ले कतकोन कारीकरम होही। संगेसंग साइकिल रैली, फटफटी रैली अउ पैदल मार्च के संग सांस्कृति कारीकरम घलो होही।
खबर के मुताबिक सरदार वल्लभ भाई पटेल ह पांच सौ पैंसठ विरासत के विलय करके भारत ल एक राष्ट्र बनाय रिहीन। एला देखत बछर दू हजार चौदह ले उंखर जनम दिन ल राष्ट्रीय एकता दिवस के रूप म मनाय जाथे।
भारतीय दूतावास-परामर्श
भारत ह अपन नागरिक मन ल तुरते यूक्रेन छोड़े बर केहे हे। यूक्रेन के कीव म भारतीय दूतावास ह परामर्श म केहे हे कि भारतीय नागरिक सीमा तक पहुंचे बर दूतावास ले सहायता ले सकत हे। भारतीय दूतावास ले फोन नंबर – तीन आठ शून्य नौ तीन तीन पांच पांच नौ नौ पांच आठ, – तीन आठ शून्य छह तीन पांच नौ एक सात आठ आठ एक अउ तीन आठ शून्य छह सात आठ सात चार पांच नौ चार पांच म संपर्क कर सकथे। भारतीय नागरिक जरूरी जानकारी ले बर भारतीय दूतावास के वेबसाइट देख सकत हे। ओमन रोमानिया, पोलैंड, हंगरी अउ स्लोवाकिया ले भारतीय दूतावास ले जुड़ सकत हे।
विस्ता डोम-कोच
बस्तर म पर्यटन के क्षेत्र म नवा संभावना जुड़े हे। ईस्ट कोस्ट रेलवे के वालटियर रेल मंडल ले किरंदुल-विशाखापट्टनम स्पेशल ट्रेन के संग विस्ता डोम कोच ल जोड़े जात हे। पहिली ए कोच ल आंध्रप्रदेश के अरकू स्टेशन तक चलाय जात रिहीस हे। एला बढ़ाके अब किरंदुल तक कर दे गेहे। ए कोच के लगे ले पर्यटक मन ल बस्तर तक आय म मुश्किल नइ होही अउ ए कोच ले टूरिज्म के बढ़वार बस्तर तक हो जही। विस्ता डोज कोच के डिब्बा के कतकोन हिस्सा आरपार दिखईया पारदर्सी कांच के बने हे। एक सौ अस्सी डिग्री म घूमइया कुर्सी हे अउ बड़े खिड़की-दरवाजा ले ए कोच म सफर लग्जरी ट्रेन असन लागथे।
जांजगीर-किसान स्कूल
जांजगीर-चांपा के बहेराडीह के किसान स्कूल म ए बखत गुरू घासीदास विश्वविद्यालय बिलासपुर के पन्द्रह झिन विद्यार्थी ग्रामीण प्रौद्योगिकी संग खेती-किसानी के अट्ठारह ठिन आने-आने बिसय म प्रसिक्षण लेवत हे। पांच दिन तक चलइया ए सिविर म पर्यावरण अउ मानव स्वास्थ्य म रासायनिक खातू के नकसान अउ जैविक कृषि के जरूरत ए संबंध म जानकारी दे जावत हे। उहें, पशुआहार, माटी परीक्षण, खाद्य प्रसंस्करण, साग-भाजी, नर्सरी प्रबंधन अउ किसानी ले जुड़े आने बिसय म घलो प्रसिक्षण दे जावत हे।
दीपक पटेल-निधन
मनेन्द्रगढ़ विधानसभा क्षेत्र के पूर्व विधायक दीपक पटेल के काली निधन होगे। ओमन कई दिन ले बीमार रिहीन, उंखर इलाज चिरमिरी के सामुदायिक स्वास्थ्य केन्द्र म चलत रिहीस हे। श्री पटेल भाजपा संगठन म आने-आने पद म रिहीन। छत्तीसगढ़ विधानसभा म सबले बने विधायक के रूप म श्री पटेल ल सनमानित करे गे रिहीस।
उंखर निधन म मुख्यमंत्री भूपेश बघेल, विधानसभा अध्यक्ष डॉक्टर चरणदास महंत, प्रदेस भाजपा अध्यक्ष अरूण साव समेत भाजपा के बड़का नेता अउ कार्यकर्ता मन ह अपन श्रद्धांजलि दीन।
डेंगू
रईपुर जिला म डेंगू के मामला सरलग बाढ़त जात हे। एला देखत स्वास्थ्य विभाग ह बचाव बर जरूरी कदम उठावत हे। जिला म काली उनचास झिन डेंगू मरीज के चिन्हारी करे गेहे। एमा सहर के तीस अउ तीर-तखार के गांव के उन्नीस झिन सामिल हे। मुख्य चिकित्सा अउ स्वास्थ्य अधिकारी डॉक्टर मिथिलेश चौधरी ह बतईन कि स्थिति ल नियंत्रण म करे बर स्वास्थ्य विभाग के कई ठन टीम बनाय गेहे, जउन आने-आने क्षेत्र म जाके लोगन ल इलाज बर जागरूक करत हे। ओमन अपील करीन कि तीर-तखार म पानी जमा झन होवन दे अउ बुखार आय म तुरते तीर के स्वास्थ्य केन्द्र म जाके डॉक्टर ले इलाज करावय।
अउ अब थोरकुन समाचार सार म –
– विश्व प्रसिद्ध गंगोत्री धाम के कपाट आज अनकूट परब म वैदिक मंत्रोच्चारण अउ अनुष्ठान के संग बंद कर दे गीस। केदारनाथ धाम और यमुनोत्री के कपाट काली ले बंद होही।
– छत्तीसगढ़ राज्य स्थापना दिवस म एक नवंबर के प्रदेश के सब्बों सरकारी भवन में रोसनी करे जाही।
– मोहला-मानपुर चौकी जिला के तुकाम गांव म पाछू संझा माओवादी मन ह एक मनखे के गोली मारके हत्या कर दीन।
अउ
– रईपुर के माना म एक रेस्टोरेंट में काम करइया दू झन युवक मन ह रेस्टोरेंट संचालक के हत्या कर दीन। पुलिस ह दूनों ल गिरफ्तार कर लेहे।