सूर्यग्रहण
भारत समेत आने-आने देस म आज आंसिक सूर्यग्रहण देखे गीस। ग्रहण, मंझनिया बाद 4 बजके 29 मिनट म सुरू होईस अउ संझा 5 बजके 42 मिनट म सूर्यास्त के संग खतम होगीस। छत्तीसगढ़ म घलो कई ठिन सहर मन म सूर्यग्रहण के नजारा देखे गीस। ए खगोलीय गतिविधि मन ल देखे खातिर लइका मन म सबले ज्यादा उछाह देखे गीस।
अवइया सूर्यग्रहण, भारत म दू अगस्त, 2027 के नजर आही, जउन ह पूर्ण सूर्यग्रहण होही।
गोवर्धन पूजा
गोवर्धन पूजा अउ अन्नकूट के तिहार काली मनाय जाही। अभी तक लक्ष्मी पूजा के दूसर दिन गोवर्धन पूजा अउ अन्नकूट के तिहार मनाय के परंपरा रिहीस। फेर ए दारी आंशिक सूर्यग्रहण होय के सेती ए तिहार लक्ष्मी पूजा के एक दिन बाद मनाय जाही। गोवर्धन पूजा के दिन गउ-माता के पूजा अर्चना कर ओला भोग लगाय जाथे।
मुख्यमंत्री भूपेश बघेल ह परंपरा के चलत आज दुरूग जिला के गांव जंजगिरी अउ कुम्हारी म गौरा-गौरी के पूजा-अर्चना कर प्रदेस के रहइया मनके सुख-सांति के कामना करीन। ए मउका म मुख्यमंत्री ह सोटा खाय के परंपरा ल घलो निभईन अउ लोगन मन ल देवारी के अपन सुभकामना दीन।
एखर पहिली, मुख्यमंत्री ह काली अपन गृह गांव कुरूद-डीह पहुंच के परिवार वाला मन संग विधि-विधान ले मां लक्ष्मी के पूजा-अर्चना करीन। ए दउरान मुख्यमंत्री ह गांव के महिला मन डहार ले पेस करे गे सुआ नृत्य ल घलो देखीन।
इही बीच, रईपुर कलेक्टर डॉक्टर सर्वेश्वर नरेन्द्र भूरे ह आज खम्हारडीह के बालिका गृह पहुंच के उहां रहइया लइकी मन ल मिठाई बांटीन अउ उंखर मन संग देवारी तिहार मनईन। ए मउका म कलेक्टर ह लइकी मन ले बालिका गृह म रेहे-खाय के संगेसंग पढ़ई आदि के बेवस्था के जानकारी लेके अधीक्षक ल लइकी मन खातिर अच्छा सुविधा उपलब्ध कराय बर किहीन।
गौठान दिवस
प्रदेस म काली गोवर्धन पूजा के संगेसंग गौठान दिवस घलो मनाय जाही। मुख्यमंत्री भूपेश बघेल ह ए मउका म प्रदेसवासी मन ल अपन बधाई अउ सुभकामना दीन हे। मुख्यमंत्री ह किहीन हे कि सुराजी गांव योजना के तहत प्रदेस म गौठान बनाय जावत हे। ए गौठान मन ल मल्टी एक्टिविटी सेंटर अउ रूरल इंडस्ट्रियल पार्क के रूप म विकसित करे जावत हे। गौठान मनके माध्यम ले पसुपालन ल अर्थव्यवस्था ले जोड़े, लोगन मन ल रोजगार देवाय अउ जैविक खेती ल बढ़ावा दे सेती प्रयास करे जावत हे।
दीपावली
दीया के तिहार देवारी काली प्रदेस म बड़ उछाह के संग मनाय गीस। ए तिहार अंधकार अउ निरासा ल दूरिहा भगा के लोगन मनके जिनगी म सुख, सांति अउ समृद्धि लाय के तिहार हवय। देवारी के मउका म लोगन मन ह अपन-अपन घर म बिजली के रंग-बिरंगा झालर लगाय हवय।
बस्तर जिला म घलो देवाही के तिहार बड़ उछाह के संग मनाय गीस। जिला के गांव-गंवई म काली लोगन मन ह अपन घर के द्वार म छिंद के पत्ता ले प्रवेस द्वार बनाके सुघ्घर ढंग ले सजाय रिहीन।
उहें, दुरूग जिला म घलो देवारी तिहार बड़ धूमधाम अउ उछाह के संग मनाय गीस। पाछु दू बछर के कोरोना काल के बाद ए दारी देवारी तिहार म आने-आने उमर के लइका, सियान, माईलोगिन मन म बड़ उछाह देखे गीस।
छत्तीसगढ़िया ओलंपिक
छत्तीसगढ़िया ओलंपिक के तीसरइया चरण परन दिन 27 अक्टूबर ले सुरू होही। विकासखंड स्तर म आयोजित तीसरइया चरण के ए प्रतियोगिता 10 नवंबर तक चलही। एखर बाद जिला स्तर म 17 ले 26 नवंबर तक, संभाग स्तर म 5 ले 14 दिसंबर तक अउ राज्य स्तर म 28 दिसंबर ले 6 जनवरी तक ए प्रतियोगिता आयोजित करे जाही। एखर पहिली, राजीव युवा मितान क्लब स्तर अउ जोन स्तर म प्रतियोगिता होगे हंवय।
जानबा के मुताबिक छत्तीसगढ़ के पारंपरिक खेल मन ल बढ़ावा दे बर, खिलाड़ी मन ल मंच प्रदान करे अउ खेल मनके प्रति जन-जागरूकता लाय के सेती छत्तीसगढ़िया ओलंपिक खेल के आयोजन 6 चरण म करे जावत हे। छत्तीसगढ़िया ओलंपिक म गिल्ली डंडा, पिट्ठुल, संखली, लंगड़ी दउड़, कबड्डी, खो-खो, रस्साकसी, बांटी, बिल्लस, फुगड़ी, गेड़ी दउड़, भौंरा, लंबी कूद अउ सौ मीटर दउड़ ल सामिल करे गे हवय।
चिकित्सा महाविद्यालय-त्रुटि सुधार
चिकित्सा महाविद्यालय मन म एम.डी., एम.एस., एम.बी.बी.एस., बी.डी.एस., नर्सिंग अउ बी.पी.टी. म प्रवेस खातिर विद्यार्थी मन ल उंखर आवेदन म करे गे गलती ल सुधार के ठीक करे खातिर एक अउ मउका दे जाही। एखर सेती सॉफ्टवेयर म अपडेशन करे जावत हे, जेखर सेती पंजीयन के आखिरी तारीख ल 28 अक्टूबर के संझा साढ़े 6 बजे तक बढ़ाय गे हवय।
पीडीएस/ई-पास मशीन
सार्वजनिक वितरण प्रणाली-पी.डी.एस. के तहत रासनकार्ड रखइया मनखे मन आधार प्रमाणीकरण करवाय के बाद प्रदेस म अपन पसंद के कोनों भी उचित मूल्य के दुकान ले पोर्टेबिलिटी के जरिया रासन ले सकत हे। एखर सेती प्रदेस के 13 हजार 401 रासन दुकान मन म ई-पास मसीन लगाय गे हवय। एमा ले करीबन साढ़े 12 हजार राशन दुकान मन म ऑनलाइन आधार प्रमाणीकरण के जरिया अउ बाचे दुकान मन म ई-पास मसीन के जरिया ऑफलाइन रासन सामग्री के वितरण करे जावत हे।
मन की बात
प्रधानमंत्री नरेन्द्र मोदी ह 30 अक्टूबर के आकाशवाणी म ‘‘मन की बात‘‘ कारीकरम बर लोगन मन ले विचार अउ सुझाव दे बर किहीन हे। ए मासिक रेडियो कारीकरम ‘‘मन की बात‘‘ के 94वां कड़ी होही। प्रधानमंत्री ह किहीन कि लोगन मन ओ बिसय म अपन विचार साझा करय, जेखर बारे म ओमन ल ‘‘मन की बात‘‘ कारीकरम के अवइया कड़ी म बात करना चाही। लोगन मन नमो ऐप या माई जी.ओ.वी. ओपन फोरम म अपन विचार बता सकत हे। ओमन टोल फ्री नंबर – 1 8 0 0 – 1 1 – 7 8 0 0 म घलो डायल करके प्रधानमंत्री बर अपन संदेस हिन्दी या अंग्रेजी म रिकार्ड करा सकत हवय। फोन लाइन 28 अक्टूबर तक खुले रइहीं।
आयोडीन अल्पता विकास
वैश्विक आयोडीन अल्पता विकास निवारण दिवस के उपलक्ष्य म प्रदेस म ए बेरा आयोडीन अल्पता विकार नियंत्रण के बारे म जागरूकता अभियान चलाय जावत हे। ए अभियान 27 अक्टूबर तक चलही। ए दउरान आयोडीन के कमी ले होवइया बीमारी ले बचाव के संबंध म जन-जागरूकता लाय खातिर आने-आने कारीकरम के आयोजन करे जावत हे। संगेसंग जिला मुख्यालय समेत स्वास्थ्य संस्था मन म लोगन मन ल आयोडीनयुक्त नमक खाय बर केहे जावत हे।
अउ अब थोरकुन समाचार सार म –
– कोंडागांव पुलिस ह इलेक्ट्रॉनिक बाईक शो-रूम खोले के नाम म 13 लाख रूपिया के ठगी करे के आरोप म दू झन लोगन मन ल गिरफ्तार करे हे, जेखर पास ले करीबन साढ़े 9 लाख रूपिया के जिनीस ल जब्त करे गे हवय।
– सूरजपुर जिला के प्रतापपुर विकासखंड के टुकूडांड़ म जिला स्तरीय जन समस्या निवारण सिविर 27 अक्टूबर के जघा अब 28 अक्टूबर के आयोजित होही।
अउ
– बिलासपुर म एक ठिन मॉल म हुरहा आगी लग गे, फेर ए घटना म कोनों जनहानि नइ होय हवय। बाद म फायर बिग्रेड के जरिया आगी म काबू पा ले गीस।