प्रधानमंत्री नरेन्द्र मोदी ह किहीन हे कि नवा भारत के परिकल्पना केवल देस के खातिर नइ हवय बल्कि ए ह बलिदान, प्रेम, संवेदना, प्रतिभा, साहस, पराक्रम अउ सांति के मिला जुला रूप हवय। करगिल म सशस्त्र बल मन संग होइस गोठबात म श्री मोदी ह किहीन कि जम्मों विश्व म बहुत अकन सभ्यता मन विकसित होय हवय अउ खतम घलो होय हवय, फेर भारतीय सभ्यता सबो चुनौती मनके बाद घलो पुनर्जीवित होय हे। ओमन किहीन कि एक राष्ट्र तब अजर-अमर हो जथे जब ओखर देस के बीर सैनिक मन के खुद के उपर भरोसा होथे। देसभक्ति ल देवभक्ति के समान बतावत प्रधानमंत्री ह देस के सशस्त्र बल मनके बड़ सराहना करीन। ओमन किहीन के करगील के विजय भूमि ले विश्व अउ जम्मों देसवासी मन ल देवारी के अपन सुभकामना देवत हवय।
श्री मोदी ह किहीन कि देवारी के मतलब हवय आतंक के खातमा के तिहार अउ करगील ह एला संभव बनाय हवय। ओमन किहीन के सुरक्षा बल मन ह करगील म देवारी के मउका म आतंक के अस्तित्व ल नेस्तानाबूद कर दे रिहीस। प्रधानमंत्री ह सेना के अतुल्य वीरता के सराहना करिन अउ किहीन के राष्ट्र ल तब गर्व होथे जब उंखर सैनिक मन के मस्तक हिमालय के तरह उंचा होथे। ओमन किहीन के भारत ह हमेसा ले ही यु़द्ध ल अंतिम विकल्प माने हवय अऊ सांति के प्रचार करिन हवय। अगर कोनो भारत के तरफ बुरा नजर ले देखे के हिम्मत करही, त देस के तीन्नो सशस्त्र बल ह ओखर मन के करारा जवाब दीहीं।
दीपावली
कार्तिक अमावस्या के दिन मनाय जाने वाला दीया के तिहार देवारी आज छत्तीसगढ़ सहित पूरा देसभर म बड़ उछाह के साथ मनाय जावत हे। ए तिहार अंधकार अउ निरासा ल दूर भगा के लोगन मनके जिनगी म सुख, सांति अउ समृद्धि लाय के तिहार हे। देवारी के मउका म आज लोगन मन के घर-बार म दीया अउ बिजली के रंग-बिरंगा झालर मनके रोसनी ह जगमगावत हे। अइसन मान्यता हवय कि लंका म जीत हासिल करे के बाद भगराम राम के अयोध्या पहुंचे के खुसी म लोगन मन दीया बार के उंखर सुवागत करे रिहीन। तेखरे सेती ए खुसी म आज के दिन देवारी तिहार मनाय जाथे।
देवारी के मउका म ए बेरा लोगन मन पूजा बर देवी लक्ष्मी के आकर्षक मूर्ति अउ घर मन ल सजाय के जिनीस घलो खरीदत हवय। समृद्धि के प्रतीक माने जाने वाला धान के बाली ले बने झालर यानि फाता के मांग ए दरी बाजार म जादा रिहीस।
देवारी के मउका म राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह देसवासी मन ल अपन बधाई अउ सुभकामना दीन। उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो प्रदेसवासी मन ल देवारी तिहार के सुभकामना दीन हे।
दीपावली-माता कौशल्या मंदिर
रायपुर के चंदखुरी म माता कौशल्या मंदिर म काली 31 हजार दीया बारे गीस। दीया के सजावट ले जय सियाराम लिखे गीस अउ बाद म आतिसबाजी घलो करे गीस। ए मउका म विधायक देवेन्द्र यादव के अगुवानी म राजीव युवा मितान क्लब के तकरीबन 200 सदस्य मन दीपदान खातिर माता कौशल्या मंदिर पहुंचीन। दीपदान ले पहिली उहां पहुंचीन सदस्य मन मंदिर परिसर म सफाई अभियान चला के जम्मों परिसर ल रंगबिरंगा रंगोली अउ फूल मनले मंदिर ल सजाईन।
जानबा के मुताबिक रईपुर के पासगांव चंदखुरी ल माता कौशल्या के जन्मभूमि माने जाथे, जउन ह भगवान श्री राम के ननिहाल के नांव ले प्रसिद्ध हवय। मानता हवय के भगवान राम ह जब लईका रिहीस त ओ बेरा बहुतअकन समय अपन ननिहाल म बिताय रिहीस। उंहे, भगवान राम वनवास के 14 बछर म करीबन 10 बछर छत्तीसगढ़ के आने-आने जघा मन म बिताय रिहीन। एला देखत राज्य सरकार ह भगवान राम के सुरता ल यादगार बनाय खातिर अउ ए जघा मनके धार्मिक महत्व ल समझत ओ जघा मन ल धर्म स्थल के संगे-संग पर्यटन स्थल के रूप म विकसित करे जावत हे।
ऐती, नवा बने सक्ती जिला के घिवरा गांव म देवारी तिहार धूमधाम ले मनाए जावत हे। ए मउका म इहां माता लक्ष्मी, सरस्वती, भगवान गणेस अउ कुबेर के मूर्ति स्थापित कर पूजा-अर्चना करे जावत हे। ए दउरान रतिहा के बेरा जसगीत प्रतियोगिता के आयोजन घलो करे जावत हे।
ओती, देवारी तिहार के दउरान भीड़ ल देखत दुरूग जिला के बी.आई.टी. कॉलेज ले एन.एस.एस. के, सासकीय पॉलीटेक्निक कालेज अउ साईंस कालेज के एनसीसी के कैडेट मन ह दुरूग-भिलाई सहर के आने-आने चउक-चौराहा मन म यातायात बेवस्था म अपन सहयोग देवत हावय।
पटाखा-सतर्कता
रोसनी के तिहार देवारी देसभर म बड़ उछाह के संग मनाय जावत हे। ए तिहार म जरा सा लापरवाही स्वास्थ्य पर विपरीत असर डाल सकथे। पटाखा जलावत समय लइका मनके खास ख्याल रखना जरूरी हावय। लापरवाही अउ दुर्घटना ले अगर कोनों के हाथ-पांव अउ सरीर के कोनों हिस्सा जल जथे, त तुरते ओमन ल प्राथमिक उपचार दे के बाद डाक्टर ल दिखाना चाही।
देवारी म पटाखा जलाय के बेरा म कुछु बात के धियान रखना जरूरी हवय। पटाखा खुल्ला मैदान अउ खुल्ला स्थान म ही जलाना चाही। पटाखा जलाए ले पहली आसपास देख लेना चाही के आगी फैलइया या तुरते आग पकड़इया कोनों चीज नजदीक म त नई हवय।
एनजीटी-पटाखा निर्देश
राष्ट्रीय हरित प्राधिकरण-एनजीटी ह दीवाली, छठ पूजा, गुरूपर्व, नववर्ष अउ क्रिसमस ल देखत फटाखा फोड़े के संबंध म निरदेस जारी करे हे। एनजीटी के दिसा-निरदेस के अनुसार राज्य सासन डहार ले दीवाली के दउरान फटाख फोड़े बर रात आठ बजे ले दस बजे के बीच दू घंटा के बेरा तय करे गेहे। उहें, छठ पूजा म बिहनिया छह ले आठ बजे तक, गुरूपरब म रात आठ ले दस बजे तक, नववर्ष अउ क्रिसमस के मउका म रतिहा ग्यारह बजके पचपन मिनट ले साढ़े बारह बजे तक फटाखा फोड़े के अनुमति दे गे हवय।
धान खरीदी
राज्य म समर्थन मूल्य म पंजीकृत किसान मन ले अवईय्या 1 नवम्बर ले धान खरीदी करे जाही जउन ह अवईय्या बछर ले 31 जनवरी तक चलही । किसान कृषि विभाग के एकीकृत किसान पोर्टल के जरिया 31 अक्टूबर तक अपन पंजीयन करा सकत हे। जउन किसान मन ह पाछु बछर धान खरीदी खातिर पंजीयन कराए रिहीन, ओमन ल फेर पंजीयन कराए के जरूरत नई हवय। उहें, नवा किसान मन के पंजीयन कर धान के खरीदी करे जाही। अब तक 24 लाख 5 हजार ले जादा किसान जुन्ना किसान मनके के पंजीयन ल आगू बढ़ा दे गे हवय। उहें, 95 हजार नवा किसान मन के पंजीयन करे गे हवय। ए बछर 110 लाख मीटरिक टन धान खरीदी के लक्ष्य राखे गे हवय। एखर सेती केन्द्र सरकार के नवा बारदाना नीति के अनुसार नवा और पुराना बारदाना म धान के खरीदी करे जाही।
धान खरीदी ल लेके राज्य के सहकारी समिति अउ खरीदी केन्द्र मन म तियारी अंतिम चरण म हवय। समिति मन म फड़, कांटाबाट, कम्प्यूटर, आद्रतामापी यंत्र, ड्रेनेज सहित आने-आने बेवस्था करे जावत हे। उहें, धान के अवैध परिवहन ल रोके खातिर जिला स्तर म राजस्व, खाद, सहकारिता, मंडी, विपणन वन विभाग के अधिकारी मन के टीम गठित करे गे हावय।